Itech jw.org moajsi tein tapaleuia maj se kinmachti konemej
1. ¿Keniuj tapaleuia taxelol “Niños” itech jw.org?
1 Itech Internet kampa timoteixmatiltiaj, jw.org, moajsi miak taman tein kinpaleuia taltikpakneminij akin kipiaj tataman xiujmej. Kemej neskayot, itech español moajsi taxelol “Niños” (xikonpatskili kampa kijtoua Enseñanzas bíblicas, uan ompa kampa kijtoua Niños). Nejin tapaleuia maj konemej uan tetatmej moyekuikakan uan kichikauakan ininkuali uikalis iuan Jiova (Deut. 6:6, 7). ¿Keniuj uelis tikontekitiltis nejin taxelol uan ijkon tikonmachtis mokoneuan?
2. ¿Keniuj uelis tikonmatis tein uelis tionmomachtis iniuan sejse mokoneuan?
2 Xiontanemili itech sejse mokoneuan. Nochin konemej tatamamej (1 Cor. 13:11). Yejua ika, ¿keniuj uelis se kimatis tein uelis se momachtis iniuan sejsemej? Moneki se kiitas kanachi xiuit kipiaj uan toni okachi kinyolnotsa. Uan no, moneki se tanemilis itech tein uelis kiajsikamatiskej uan kanachi tiempo uelis kuali takaktoskej. Taxelol itech jw.org “Mis primeras lecciones de la Biblia” uelis kintelpaleuis konemej akin kipiaj eyi xiuit oso okachi nojnelmej. Okseki kalyetouanij momachtiaj ika miak pakilis tanojnotsmej tein mokixtiaj itech Biblia uan moajsi itech taxelol “De padres a hijos”. Maj tikitakan okseki taman tein uelis tapaleuis.
3. ¿Keniuj tetatmej uelis momachtiskej iniuan ininkoneuan ika taxelol “Ideas para la adoración en familia”?
3 Tein tapaleuis itech taueyichiualis kemej kalyetouanij. Taxelol “Ideas para la adoración en familia” kinpaleuia tetatmej maj kiajsikan miak taman kemej uelis momachtiskej iniuan ininkoneuan. Xikonpatskili kampa kijtoua “Descargar” uan ompa nesi “Guía para los padres”, kampa kimelaua tein uelis tikonchiuas itech sejse tanojnots. Iniuan akin okachi nojnelmej uelis tikonkuis kampa kijtoua “Actividad ilustrada”, kemej kampa moneki kitapaluiskej se taixkopin. Uan iniuan konemej akin okachi uejueykej uelis tikonkuis kampa kijtoua “Proyectos de investigación”. Nochi tein moajsi itech “Guía para los padres” ika tajtoua sayoj se taman. Ijkon nochin konemej kipiaj se taman tein uelis kichiuaskej keman taueyichiuaskej kemej kalyetouanij.
4. ¿Toni kipia taxelol “Hazte amigo de Jehová”?
4 Ximochiua itasojikniuj Jiova. Itech taxelol “Hazte amigo de Jehová” moajsij videos, nekuikatilmej uan okseki taman tein konemej uelis kichiuaskej. Nejin kinpaleuia tetatmej maj kinmachtikan ininkoneuan tein kijtoua iTajtol Dios (Deut. 31:12). Videos kampa nesij taixkopimej tein mooliniaj kinmachtiaj konemej miak taman tein kintelpaleuia, uan tein moneki kichiuaskej kampa kijtoua “Actividades” oksepa kinelnamiktia ke motelneki nejon. Nekuikatilmej tel tapaleuiaj maj konemej kielnamikikan tein momachtijkej, uan kemej miakej kiuelitaj mokuikatiskej, kemansa motaliaj itech nejin taxelol nekuikatilmej tein tiktekitiltiaj itech nechikolmej uan okseki nekuikatilmej tein kinchijchiuiliaj konemej.
5. ¿Keyej moneki maj tetatmej kitajtanikan Jiova maj kinixyekana?
5 Tetatmej, Jiova kineki maj kuali kisa tein nankichiujtokej uan maj tamachtilis tein melauak ajsi itech ininyolo nanmokoneuan. Yejua ika, nochipa xiktajtanikan maj namechixyekana (Juec. 13:8). Ijkon, uelis nankinpaleuiskej nanmokoneuan maj kiselikan tamatilis tein kinpaleuis maj ‘kiajsikan ne nemakixtilis, komo yejuan kipixtinemij se ajsikatakuaujtamatilis iuan Cristo Jesús’ (2 Tim. 3:15; Prov. 4:1-4).