Maj tiktekitiltikan jw.org keman titanojnotsaj: “Kuali ximouika iuan Jiova”

Itech taxelol kampa kijtoua “Amaixmej” itech jw.org, moajsi se taxelol tein itokay “Kuali ximouika iuan Jiova”, tein kipia videos uan kinpaleuia konemej. (Itech tajtol español, itech nejin taxelol amo sayoj moajsij videos, ta no nekuikatilmej uan okseki taman.) ¿Tiktekitiltianijya nejin taxelol keman titanojnotsaj? Komo semej akin tikmachtiaj ika Biblia kipia konemej, ¿keyej amo tiknextiliaj? Xa nejon kiolinis maj kitemo okseki taxelolmej itech Internet kampa timoteixmatiltiaj.

Keman se tokniuj takat kimakak se tratado Tanauatilmej ika iTekiuajyo Dios tapoual 38 se siuat akin kipiaya ome ikoneuan tein nojnelmejok, siuat niman peuak kiixtajtoltia. Konemej no kinekiaj kimatiskej toni kijtouaya nejon amaix. Ompa, tokniuj kimelauilij tein kijtouaya uan kinnextilij Internet kampa timoteixmatiltiaj, tein ixnesi itamian página. Kemej kiitak ke nejon kiyolnotsak siuat, tokniuj nochin kinnextilij semej videos kampa ixnesi Caleb itech iteléfono.

Se tokniuj siuat ika tajto jw.org iuan se siuat akin iuan tekiti uan kipia konemej akin nojnelmejok. Kiluij ke itech Internet kampa timoteixmatiltiaj kiajsiskia tamachtilis tein kinpaleuia kalyetouanij. Nejin siuat iuan ikoneuan kitemojkej itech Internet. Satepan, kiluij tokniuj ke ikoneuan mokuikatijtoyaj kalijtik nekuikatil “Predica la palabra”, tein moajsi itech tajtol español, itech taxelol “Kuali ximouika iuan Jiova”.

¿Melauj ke semi tapaleuia maj nochipa se kiita tein mokixtia itech nejin taxelol tein moajsi itech jw.org uan maj se kitemolti seki videos, nekuikatilmej oso okseki taman? Komo ijkon tikchiuaj, kuali tikuiskej nejin taxelol tein semi tapaleuia keman titanojnotsaj uan ijkon tiksentokaskej tiktekitiliskej toTekotsin kemej takeualmej (Hech. 20:19).