Keniuj kuali timomachtiskej tein ika tipeuaskej titajtoskej
1. ¿Keyej motelneki maj kuali timomachtikan tein ika tipeuaskej titajtoskej?
1 Keman aksa techyoleua maj titakuatij ichan, kichijchiua se tapalol tein ajuiyak uan tein tikueliliskej. No ijkon, komo tiknekij maj taltikpakneminij kinekikan kikakiskej tein tamachtia iTajtol Dios, moneki achto timomachtiskej uan timochikauaskej kuali tiktemoskej tein ika tipeuaskej titajtoskej (Prov. 15:28). Tein tiuejkauaskej uan tein tikijtoskej amo sayoj yejua tein kichiuas maj aksa kineki techkakis. ¿Toni moneki tiknemiliskej keman timomachtiskej tein ika tipeuaskej titajtoskej?
2. ¿Toni ika uelis titanojnotsaskej tein kichiuas maj kinekikan techkakiskej?
2 Tein okachi kinekij kimatiskej taltikpakneminij. Komo tein ika tipeuaj titajtouaj kichiua maj amo kineki techkakis, taltikpaknenkej xa amo kinekisok tajtos touan. Yejua ika moneki tiknemiliskej toni taman okachi kinekij kimatiskej kampa titanojnotsaj. ¿Kinekij maj kuali taixyekanakan tekiuanij? ¿Kinekij yolpakiskej kemej kalyetouanij? ¿Kinekij maj amo onkaok neteuilis? Kemej miakej kiuelitaj kijtoskej tein kinemiliaj, uelis tikuiskej se netajtanil tein kichiuas maj kijtokan tein kinemiliaj. Xa uelis tikuiskej semej neskayomej tein nesij itech amaix ITekiyo Dios tein Tikchiuaj uan ika tipeuaskej titajtoskej. ¿Uelis timomachtiskej seki neskayomej itech Youak keman tiTaueyichiuaj kemej Kalyetouanij?
3. ¿Keniuj uelis tipeuaskej titajtoskej ijkon kemej nemij uan tein kineltokaj taltikpakneminij?
3 Tein kineltokaj uan kemej nemij taltikpakneminij. Itech seki xolalmej moneki maj niman tikijtokan keyej tikinkalpanouaj. Sayoj ke, itech okseki xolalmej moneki maj achto tiktajtanikan taltikpaknenkej keniuj yetok uan iuan titajtoskej tepitsin, achto ke tikijtoskej keyej tikalpanouaj. Itech altepemej kampa kipoujkaitaj Biblia, xa uelis ika tipeuaskej titajtoskej (Hech. 2:14-17). Sayoj ke kampa amo semi moajsij taneltokalismej kampa kijtouaj kichiuaj kemej Cristo oso moajsij akin amo pouij itech nion se taneltokalis, xa monekis ika titajtoskej Biblia, keman oksepa tikinkalpanoskej (Hech. 17:22-31).
4. ¿Toni moneki tikelnamikiskej keman timomachtiskej tein ika tipeuaskej titajtoskej?
4 Tein ika tipeuaskej. Moneki kuali tikixpejpenaskej katiyejua yekinika tajtolmej tikuiskej. Okachi kuali maj tikuikan tajtolmej tein niman moajsikamatiskej. Amo sayoj maj tikitakan tein tikijtouaj ta no keniuj tikijtouaj. Maj tiknextikan yolpakilis uan maj tikelnamikikan ke komo tiknextiaj itech toixko, nejon kichiua maj nesi ke yekmelauj ininka timotekipachouaj. Komo tiktojtokaj nejin tayolmajxitilismej techpaleuis maj kuali timomachtikan tein ika tipeuaskej titajtoskej, uan ijkon kichiuas maj taltikpakneminij kinekikan kiseliskej tamachtilis tein kitemaka Jiova (1 Cor. 10:21).