Maj tikpaleuikan akin touan tanojnotsa
1. ¿Keniuj uelis tikchiuaskej kemej tatitanil Pablo keman titanojnotsatij iniuan tokniuan?
1 Keman tatitanil Pablo moajsia iniuan okseki tanojnotsanij, kitemouaya ‘kinyolmajxitis ika ne inintakuaujtamatilisʼ (Rom. 1:12). Uan tejuan, ¿tiktemouaj timopaleuiskej uan timoyolchikauaskej se iuan okse keman tisentanojnotsaj? Amo sayoj maj tisenyakan, ta maj timotapouikan toni techpaleuiani maj okachi kuali titanojnotsakan.
2. ¿Keniuj uelis tikpaleuiskej akin touan tanojnotsa maj kuali momachili, uan keyej tikijtouaj ke nejin motelneki?
2 Maj tiknextikan ke tiknekij tikinpaleuiskej. Seki tanojnotsanij amo kimatij toni kijtoskej, nejon moita itech ininixko oso keniuj tajtouaj. Komo ika nochi toyolo tikiniluiaj ke kuali tekit tein kichiujtokej uelis kinpaleuis maj kuali momachilikan. ¿Toni okseki taman uelis kinpaleuis? Se tokniuj takalpanojkej kiiluia akin iuan tanojnotsa ke yejua no kiouijmaka peuas tajtos uan miakpa moneki kitajtanis Jiova maj kipaleui. Okse tokniuj kijtoua toni kipaleuia maj yolseujto: “Kuali maj se ixuetska. Sayoj ke kemansa semi nimoui uan komo amo nimotataujtia iuan Dios, amo ueli nion niixuetska”. ¿Onkak se taman tein techpaleuij uan ijkon okachi kuali timomachilijkej itech tanojnotsalis? ¿Uelis tikiluiskej akin touan tanojnotsa?
3. ¿Toni uelis tikiluiskej akin iuan titanojnotsaj tein kipaleuis itech tanojnotsalis?
3 Maj tikijtokan toni techpaleuiani. ¿Onkak seki tajtolmej oso se netajtanil tein techpaleuiani maj ika tipeuakan titajtokan, xa se taman tein miakej kintekipachoua? Itech seki toamaixuan nesini keniuj uelis tipeuaskej titajtoskej, ¿techpaleuiani tikijtoskej okseki taman tein kichiua maj okachi kinekikan techkakikan? Maj tikijtokan tein techpaleuiani (Prov. 27:17). Keman tiyajtoskej oksepa tikalpanotiuij aksa, uelis tikiluiskej akin touan youi keniuj tiknekij tikpaleuiskej akin tikitatij uan keniuj tikixtaliaj tikchiuaskej. Uan satepan keman tikchiuaskej se nemachtil ika Biblia, uelis tikmelauiliskej akin touan youi keyej okachi ika titajtojkej se tanemilil oso se texto oso keyej moneki maj ijkon tikmachtikan nejon taltikpaknenkej.
4. ¿Keyej moneki tiktemoskej tikinpaleuiskej akin touan tanojnotsaj?
4 Tokniuan akin nemiaj itech yekinika siglo amo sayoj motekipachouayaj kinpaleuiskej taltikpakneminij itech tanojnotsalis, ta no kitemouayaj moyolchikauaskej se iuan okse (Hech. 11:23; 15:32). Yejua ika, tatitanil Pablo kimachtij telpoch Timoteo uan kiyoleuak maj kiniluiani oksekin tein yejua kimatia (2 Tim. 2:2). Komo tejuan no tikiniluiaj tokniuan tein techpaleuiani, okachi kuali tanojnotsaskej uan kichiuaskej ika yolpakilis. Uan tein okachi moneki, tikyolpaktiskej toTajtsin Dios (Heb. 13:15, 16).