Maj tikpeualtikan nemachtilmej ika Biblia iniuan akin tikinuikiliaj revistas mejmetstika
1. ¿Keyej techyoleuanij itech inechikol Jiova maj mejmetstika tikuikilikan revistas aksa?
1 Miak xiujmejya, itech inechikol Jiova techyoleuanij maj mejmetstika tikinuikilikan revistas akin kiuelitaj kiixtajtoltiskej sayoj ke amo kinekij kiseliskej se nemachtil ika Biblia. ¿Keyej? Porin keman kiixtajtoltiaj revistas kichiua maj kinekikan momachtiskej iTajtol Dios (1 Ped. 2:2). Uan uelis panos ke ijkuak kiixtajtoltiskej teisa ajsis itech ininyolo uan kinekiskej kiseliskej se nemachtil ika Biblia.
2. ¿Keniuj uelis tikinpaleuiskej maj kinekikan kimatiskej okachi akin tikuikiliaj revistas mejmetstika?
2 Maj tikmoyauakan tamachtilis tein melauak. Maj amo sayoj tikauakan revistas, ta maj titajtokan iniuan taltikpakneminij uan maj tiktemokan tikchiuaskej maj kuali momachilikan touan. Ijkon xa okachi tikmatiskej toni kipanouaj, toni kiuelitaj uan toni kineltokaj, nejon techpaleuis maj tikmatikan toni ika titajtoskej uan keniuj tikchiuaskej (Prov. 16:23). Sayoj ke moneki maj achto kuali timomachtikan. Maj tiktemokan se taman tein kiualkui revistas uan se texto tein iuan mouikas nejon uan maj ika titajtokan. Ijkon titapaleuiskej maj moskalti tamachtilis tein melauak itech iyolo taltikpaknenkej (1 Cor. 3:6). Maj amo tikelkauakan tikijkuiloskej tonal keman tikalpanojkej, amaixmej tein tikauilijkej, ijkon kemej nemachtil tein ika titajtojkej uan textos tein tikixtajtoltikej.
3. ¿Kemanian uelis oksepa tikalpanoskej akin tikauiliaj revistas?
3 Kemanian oksepa moneki timokepaskej. Akin tikuikiliaj revistas moneki tikalpanoskej mejmetstika. Sayoj ke uelis timokepaskej miakpa, komo tikitaj ke taltikpaknenkej kineki kimatis okachi, oso ijkon kemej uelis. Se oso ome semana satepan keman tikauilijkej revistas, uelis timokepaskej uan tikiluiskej: “Sayoj nikneki nimitsonnextilis teisa tein nikuelitak itech revistas tein nimitsonkauilij”. Nejon xa kipaleuis maj kineki kimatis okachi ika se tamachtilis tein kiualkui semej revistas. Komo aksa techiluia ke kiixtajtoltijya, uelis tiktajtaniskej keniuj kiita nejon tamachtilis uan ika titajtoskej tepitsin. Uan akin kiuelita kiixtajtoltis toamaixuan, uelis tikauiliskej tratado, folleto oso libro tein motemakatos nejon metsti.
4. ¿Toni uelis tikchiuaskej uan ijkon tikpeualtiskej se nemachtil ika Biblia iuan akin tikuikiliaj revistas mejmetstika?
4 Maj amo timochiakan maj taltikpaknenkej techtajtani se nemachtil ika Biblia, ta uelis tejuan tiktemoskej keniuj uelis tikpeualtiskej. Maski keman peuak tikalpanouaj amo kinekik kiselis, kemansa uelis tiknextiliskej tamachtilismej “Netajtanilmej tein kisaj itech Biblia” tein kiualkui amaix Tanejmachtijkej uan maj tikitakan ox uelis iuan timomachtiskej nejon. Xa ijkon uelis tikpeualtiskej se nemachtil ika Biblia itech ikaltenoj. Uan komo amo kineki, maj tiksentokakan tikuikilikan revistas uan ijkon tikpaleuiskej maj kineki kimatis okachi.