Kampa Monankilia Netajtanilmej
◼ ¿Toni moneki momachtiskej konemej uan ijkon kipiaskej se kuali uikalis iuan Dios?
Tetatmej akin kichiuaj kemej Cristo mochikauaj kuali kinmachtiskej ininkoneuan kemej tanauatia Jiova (Efes. 6:4). Kemej neskayot, iniuan kiixtajtoltiaj kualkan texto tein moita mojmostaj, porin kiitanij ke kinpaleuia. Keman taueyichiuaj kemej kalyetouanij oso okse tonal, seki kalyetouanij kiitaj uan momachtiaj se video, ika tajtouaj tamachtilis tein kiualkui Los jóvenes preguntan tein okachi kinpaleuis, kiixneskayotiaj se tamachtilis tein kipia Biblia oso momamachtiaj keniuj tanankiliskej. Sayoj ke, konemej moneki kiajsikamatiskej tamachtilismej tein okachi ouijkej tein kipia Biblia uan ijkon uelis kichikauaskej ininkuali uikalis iuan Dios (Heb. 6:1).
Maj tiknemilikan toni ika titamachtiaj kampa titanojnotsaj. Keman yekinika titakalpanouaj oso satepan ijkuak timokepaj, timochikauaj tikpeualtiskej se nemachtil ika Biblia ika amaix ¿Toni yekmelauj tamachtia Biblia? Satepan keman timotamimachtiaj nejin, tipeuaj ika amaix “Xiksentokakan itech inetasojtalis Dios”. ¿Keyej? Amaix Tamachtia Biblia kinpaleuia momachtianij maj peuakan kiixmatikan tein tamachtia iTajtol Dios, sayoj ke amaix “Inetasojtalis Dios” kinpaleuia maj kiitakan keniuj uelis moyekanaskej itech ininnemilis ijkon kemej kijtoua Biblia. Momachtiskej nejin ome amaixmej kinpaleuis maj inintakuaujtamatilis “moueyiltijtiu” iuan Cristo uan ijkon “amo aken uelis [kin]yololinis” (Col. 2:6, 7). ¿Tikuij nejon amaixmej uan ika tikinmachtiaj tokoneuan? Yejuan no moneki kiajsikamatiskej toni kijtosneki taxtauil, Tekiuajyot uan keniuj moajsij mikemej. Uan no, moneki kimatiskej keyej Dios kikaua maj onka tajyouilis uan keyej tikmatij ke tinemij itech itamian tonalmej. Moneki kiyekajsikamatiskej ke itaixpantijkauan Jiova tikpiaj tamachtilis tein melauak, kiajsikamatiskej tein tayolmajxitia Biblia uan “kixejekojtiyaske” tein kuali uan tein amo kuali (Heb. 5:14). Tetatmej moneki kiitaskej xiuit tein kipiaj sejse ininkoneuan uan kemej uelis kiajsikamatiskej tamachtilis. Maski ijkon, miakej konemej kiajsikamatij miak tamachtilismej tein okachi ouijkej tein kipia Biblia keman nojnelmejok (Luc. 2:42, 46, 47).
Itech jw.org itech español kitaliskej nepaleuilmej tein mokixtiaj itech amaix Tamachtia Biblia, nejon kinpaleuis tetatmej. Kalyetouanij uelis kiitaskej kampa kijtoua ENSEÑANZAS BÍBLICAS > JÓVENES itech Internet. Satepan mochijchiuaskej okseki nepaleuilmej tein mokixtiskej itech amaix “Inetasojtalis Dios”. No uelis kikuiskej nejin ome amaixmej itech amat. Tetatmej kiixejekoskej ox kikuiskej nejon tamachtilis itech Youak keman Taueyichiuaj kemej Kalyetouanij, keman momachtiskej iniuan sejse ininkoneuan oso keman kinnextiliskej keniuj momachtiskej Biblia ininselti.