Xikchiuakan ijkon kemej kichiujkej tanauatianij: Sofonías
1. ¿Keniuj moajsia xolal Judá keman Sofonías katka tanauatijkej, uan keyej techkauilij se kuali neskayot?
1 Achto ke ajsiskia xiuit 648 achto itech totonaluan, itech xolal Judá senkis kiueyichiuayaj tiotsin Baal. Tekiuaj Amón akin amo yolkuali katka yekin kimiktijkaj uan telpoch Josías peuak tekiuajti (2 Crón. 33:21–34:1). Itech nejon xiujmej Jiova kiixpejpenak Sofonías maj tanauatiani ke kiualkuiskia tatsakuiltilis. Maski Sofonías xa pouia iniuan kalyetouanij akin tekiuajtiaj ompa Judá, amo kitsakuilij maj kinmatiltiani akin tayekanayaj itech xolal ke Jiova kintatsakuiltiskia (Sof. 1:1; 3:1-4). Tejuan no ijkon timochikauaj tikchiuaskej kemej tanauatijkej Sofonías uan amo tikauaj maj netasojtalis tein tikinpialiaj tochankauan maj techtsakuili maj tikueyichiuakan Jiova (Mat. 10:34-37). ¿Toni tanauatil kitematiltij Sofonías, uan toni kiualkuik nejon?
2. ¿Toni moneki tikchiuaskej uan ijkon Jiova techmatampauis keman kiualkuis tatsakuiltilis?
2 “Xiktemokan Jiova.” Sayoj Jiova ueli kinmakixtia taltikpakneminij keman kiualkui tatsakuiltilis. Yejua ika, Sofonías kiniluij akin nemiaj itech xolal Judá maj kitemokan Jiova, uan maj kitemokan melaujkayot uan yolyemanilis keman ueliskiaok (Sof. 2:2, 3). Itech totonaluan no ijkon panoua. Ijkon kemej Sofonías, tikinyoleuaj taltikpakneminij maj kitemokan Dios, sayoj ke tejuan no moneki tiktemoskej, uan tikixtaliskej nochipa tiktekitiliskej (Sof. 1:6). Tiktemouaj Jiova keman timomachtiaj ika nejmachkayot iTajtol uan tiktajtaniaj maj techyekana. Tiktemouaj melaujkayot keman tichipaujkanemij. Tiktemouaj yolyemanilis keman titatakamatij uan tikchiuaj ika miak pakilis tein technauatia Jiova itech inechikol.
3. ¿Keyej moneki tiknextiskej se kuali tanemilil itech tanojnotsalis?
3 Kiualkui tein kuali. Tanauatil tein Sofonías kitematiltij kinpaleuij sekin akin nemiaj itech xolal Judá, sayoj ke okachi kipaleuij Josías, akin peuak kitemoua Jiova keman katka okichpilok. Satepan, Josías kipeualtij se ueyi tekit tein ika kiixpoloskia taueyichiualis tein amo melauak ompa Judá (2 Crón. 34:2-5). Itech totonaluan, maski seki xinach tein kiixnextia iTekiuajyo Dios uetsi itech ojti, kampa teyoj oso kampa uitstaj, okseki uetsi itech se kuali tal uan kitemaka takilot (Mat. 13:18-23). Tikyekmatij ke Jiova kisentokas kitiochiuas chikaujkayot tein tikchiuaj porin tiksentokaj tikmoyauaj xinach tein kiixnextia iTekiuajyo Dios (Sal. 126:6).
4. ¿Keyej moneki maj tiksentokakan tikchiakan iueyi tonal Jiova?
4 Sekin akin nemiaj itech xolal Judá kinemilijkej ke Jiova amo keman kintatsakuiltiskia. Sayoj ke Jiova senkis kinyekmatiltij ke iueyi tonal amo uejka yetoya (Sof. 1:12, 14). Momakixtiskiaj sayoj akin kitemoskiaj inepaleuil (Sof. 3:12, 17). Ijkon kemej tikchiaj iueyi tonal Jiova, maj tiksentokakan tikchiuakan itekiyo Dios ika miak yolpakilis iniuan nochin akin kiueyichiuaj toueyi Tajtsin (Sof. 3:8, 9).