Maj kuali tikuikan amaix Tamachtia Biblia

Ijkon kemej akin iniuan timomachtiaj Biblia, kimatij tein kijtoua uan monejnemiltiaj kemej tamachtia, peuaj kinextiaj ke kinekij kipiaskej se kuali uikalis iuan Dios (Sal. 1:1-3). Komo kuali tiktekitiltiaj tein kipia amaix Tamachtia Biblia, uelis tikinpaleuiskej maj kuali mouikakan iuan.

Netajtanilmej tein moajsij ipeujyan sejse tamachtilis. Sejse tamachtilis peua ika seki netajtanilmej tein monankiliaj itech tamachtilis. Uelis tiktajtaniskej momachtijkej, sayoj ke amo tikchiaskej maj tanankili, ta ika tiktemoskej maj kineki kimati tein kijtoua tamachtilis. Okse taman uelis tikiluiskej maj kijto keniuj kiita sejse netajtanil. Xa kijtos teisa tein amo kuali yetok, sayoj ke amo moneki maj tikiluikan ke mopoloj, porin tein kijtos techpaleuis maj tikitakan toni tanemililmej monekis okachi kuali tikmelauiliskej keman iuan timomachtiskej (Prov. 16:23; 18:13).

Tamajsikayot. Komo momachtijkej kiajsikamatik tamachtilis tein tikitstokej, uelis tikiluiskej maj kiixtajtolti iselti tamajsikayot tein ika tajtoua nejon tamachtilis. Keman oksepa timomachtiskej, uelis tikchiuiliskej seki netajtanilmej uan ijkon tikitaskej ox kiajsikamatik. Sayoj ke komo tikitaj ke moneki, maj tikxelokan seki minutos keman timomachtiskej uan maj iuan tikitakan nochi tamajsikayot oso sayoj tepitsin. Uelis tikixtajtoltiskej párrafos uan tikchiuiliskej seki netajtanilmej tein achto tejuan timomachtijkej.

Recuadro tein ika tami. Sejse tamachtilis tami ika se recuadro kampa moajsij itanankililuan netajtanilmej tein kipia ipeujyan tamachtilis. Komo tikitaj iuan momachtijkej, tikitaskej ox kiajsikamatik tanemililmej tein tayekantokej uan ox ueli kimelaua. Satepan ke tikixtajtoltiskej tanankililmej uan textos tein ompa ixnesij, maj tikiluikan taltikpaknenkej maj kikui nejon textos uan maj ika kimelaua keyej tanemililmej tein moajsij itech recuadro melaujkej (Hech. 17:2, 3).