Maj semi timotasojtakan

1. ¿Toni tanauatil kinmakak Jesús itatojtokakauan? (Xikonita taixkopin ipeujyan amaix.)

YOUAK achto ke momikiliskia, Jesús kiniluij itatojtokakauan: “Namechmaka se yankuik tanauatil [...,] ke ijkon keme Nejuatsin namechyoltasojtatiuits ya, no ijkon namejuan ximoyoltasojtatiyakan”. Uan no kijtoj: “Ijkuakon nochi in taltikpakuani kajsikamatiske ke melau nannomomachtijkauan” (Juan 13:34, 35).

2. ¿Keyej semi moneki maj timotasojtakan?

² Jesús kijtoj ke taltikpakneminij kinixmatiskiaj akin yekmelauj itatojtokakauan komo kintasojtaj oksekin ijkon kemej yejua kintasojtak. Itajtoluan mochiujkej itech yekinika siglo uan no mochiuaj itech nejin tonalmej. Yejua ika moneki maj tikintasojtakan tokniuan hasta keman ouij techkisas.

3. ¿Toni tikitaskej itech nejin tamachtilis?

³ Kemej titajtakolejkej, kemansa ouij techkisa semi tikintasojtaskej tokniuan. Maski ijkon, moneki timochikauaskej tikchiuaskej kemej Cristo. Itech nejin tamachtilis tikitaskej keniuj netasojtalis techpaleuia maj kuali timouikakan iniuan tokniuan, maj amo tikinchikoitakan uan maj kuali tikinselikan. Ijkon kemej tikitstiyaskej, maj timotajtanikan: “¿Keniuj uelis nikchiuas kemej tokniuan akin kisentokanij kinextianij netasojtalis hasta keman ouij kinkisa?”.

MAJ KUALI TIMOUIKAKAN INIUAN TOKNIUAN

4. Kemej kijtoua Mateo 5:23, 24, ¿keyej moneki maj titajtokan iuan se tokniuj akin kualantok touan?

⁴ Jesús techmachtij ke komo se tokniuj kualantok touan moneki iuan titajtoskej (xikonixtajtolti Mateo 5:23, 24). Kijtoj ke moneki kuali timouikaskej iniuan oksekin komo tiknekij tikyolpaktiskej Dios. Jiova semi kiyolpaktia keman kiita ke timochikauaj kuali timouikaskej iniuan tokniuan. Yejuatsin amo kiselis totaueyichiualis komo tiksentokaj tikualantokej iuan se tokniuj uan hasta amo tiknekij tiktapojpoluiskej (1 Juan 4:20).

5. ¿Keyej ouij kikisak Mark kiyektalis se kuejmol iuan se tokniuj?

⁵ Kemansa xa ouij techkisas tikyektaliskej se kuejmol iuan se tokniuj. ¿Keyej? Maj tikitakan tein kipanok tokniuj Mark.b Yejua moyolkokoj keman se tokniuj kijijtoj uan amo kuali ika tajtoj itech nechikol. ¿Toni kichiuak Mark? Yejua kijtoua: “Semi nikualanik uan nikajuak”. Satepan kinemilij maj amo ijkon kichiuani uan kiluij tokniuj maj kitapojpolui. Sayoj ke nejon tokniuj amo kinekik kitapojpoluis. Yekinika, Mark kinemilij: “¿Keyej moneki nejua niksentokas niktemos maj moyektali kuejmol, ta yejua amo kineki nechtapojpoluis?”. Tokniuj akin takalpanoua itech nechikol kiyolchikauak maj amo mosenkaua. ¿Toni kichiuak Mark?

6. 1) ¿Keniuj kitemoj Mark maj moyektali kuejmol? 2) ¿Keniuj kichiuak Mark tein kijtoua Efesios 4:2, 32?

⁶ Mark motajtanij keyej ijkon tanemiliaya uan kiitak ke kemansa moueyimatia. Kiajsikamatik ke monekia mopatas (Col. 3:8, 9, 12). Oksepa kiitato tokniuj uan ika yolyemanilis kiluij maj kitapojpolui. Uan no, kijkuilouilij seki amamej kampa kiluij ke semi kiyolkokouaya tein kichiujka uan ox ueliskia oksepa kuali mouikaskej. Hasta kimakak seki netetayokolilmej tein kinemilij ke kiuelitaskia. Sayoj ke nejon tokniuj kisentokaya kualantoya. Maski ijkon, Mark kisentokaya kitasojtaya tokniuj uan kitapojpoluiaya, kemej tanauatij Jesús (xikonixtajtolti Efesios 4:2, 32). Hasta keman tokniuan amo kinekiskej maj tikyektalikan kuejmol, komo tikintasojtaj kemej Jesús techtasojtak, tiksentokaskej tikintapojpoluiskej uan tiktataujtiskej Jiova maj techpaleui maj oksepa kuali timouikakan iniuan (Mat. 18:21, 22; Gál. 6:9).

7. 1) ¿Toni technauatij Jesús maj tikchiuakan? 2) ¿Toni ouijkayot kipanok se tokniuj siuat?

⁷ Jesús technauatij maj tiksentokakan tikinchiuilikan tein kuali oksekin, ijkon kemej tejuan tiknekij maj techchiuilikan. Uan no kijtoj ke amo sayoj moneki tikintasojtaskej akin techtasojtaj (Luc. 6:31-33). ¿Toni tikchiuaskiaj komo itech nechikol se tokniuj amo kineki techtajpalos? Maski nejin amo semi panoua, yejua nejon tein kipanok tokniuj siuat Lara. Kijtoua: “Se tokniuj siuat amo nechtajpalouaya, uan amo nikmatia keyej. Amo kuali nimomachiliaya uan amo niknekia niyas nechikolmej”. Yekinika, Lara kinemiliaya: “Amo notajtakol. Tein melauj, okseki tokniuan itech nechikol no kijtouaj ke nejon tokniuj ipa ijkon kichiua”.

8. 1) ¿Keniuj kitemoj Lara oksepa kuali mouikas iuan tokniuj? 2) ¿Toni techmachtia tein kipanok Lara?

⁸ Lara kichiuak miak taman tein kipaleuiskia maj oksepa kuali mouika iuan tokniuj. Kitataujtij Jiova uan kiixtalij tajtos iuan tokniuj. Ika tajtojkej kuejmol, monauajkej uan oksepa kuali mouikakej. Moitaya ke nochi kuali kisak. Sayoj ke Lara kijtoua: “Satepan, nejon tokniuj oksepa amo nechtajpalouaya. Semi amo kuali nimomachiliaya”. Yekinika, Lara kinemiliaya ke sayoj ueliskia yolpakis komo tokniuj amo kichiuayaok nejon. Sayoj ke satepan kiajsikamatik ke tein okachi ueliskia kichiuas yejua kisentokas kitasojtas uan kitapojpoluis ika nochi iyolo (Efes. 4:32-5:2). Uan no kielnamikik ke akin yekmelauj tetasojta amo “kielnamiktinemi tetajtakoluan”, no “kixikojtiu nochi [...], kineltokatinemi sayo ten kuali. Uan [...] nachipa kiyolikachixtinemi Dios itanejnekilis, uan nachipa kijyouijtinemi tataman ouijkayome” (1 Cor. 13:5, 7). Nejon kipaleuij maj kuali momachili. Satepan, tokniuj siuat okachi kuali kinojnotsaya Lara. Komo tiktemouaj kuali timouikaskej iniuan tokniuan uan tiksentokaj tikintasojtaj, uelis senkis tikmatiskej ke Dios akin “teyolseuia uan teyoltasojta” touan yetos (2 Cor. 13:11).

MAJ AMO TITECHIKOITAKAN

9. Kemej kijtoua Hechos 10:34, 35, ¿keyej moneki amo titechikoitaskej?

⁹ Jiova amo techikoita (xikonixtajtolti Hechos 10:34, 35). Keman tejuan amo tikinchikoitaj oksekin, tiknextiaj ke tiikoneuan. Uan no, tiktakamatij tanauatil tein kijtoua ke moneki tikintasojtaskej oksekin kemej tejuan timotasojtaj. No titapaleuiaj maj itech nechikol tinochin kuali timouikakan (Rom. 12:9, 10; Sant. 2:8, 9).

10, 11. ¿Toni kichiuak se tokniuj siuat tein kipaleuij maj amo techikoitaok?

¹⁰ Kemansa miakej kinouijmaka amo tachikoitaskej. Maj tikitakan tein kipanok se tokniuj akin motokaytia Ruth. Keman siuapilok katka, se siuat akin kayot itech okse altepet kinchiuilij tein amo kuali ichankauan. Nejon kichiuak maj satepan techikoitani. Yejua kijtoua: “Semi niktauelitaya nochi tein onkaya itech nejon altepet. Niknemiliaya ke nochin akin ompa nemiaj ijkon katkaj, hasta tokniuan”. ¿Toni kipaleuij maj amo kinchikoitaok?

¹¹ Ruth kiajsikamatik ke amo monekia ijkon tanemilis. Kiixtajtoltij itech amatajkuilol Anuario tein kipanouanij tokniuan itech nejon altepet uan keniuj kitekitiliaj Jiova. Kijtoua: “Nimochikauak kuali nikinitas akin nemij ompa. Nikitak ke tokniuan semi kinyolpaktiaya kitekitiliskej Jiova. Senkis nikajsikamatik ke no moajsij itech ixolal Jiova”. Satepan, Ruth kiajsikamatik ke monekia kinextis ke kintasojta tokniuan. Kijtoua: “Keman nikinixmatia tokniuan akin kayomej itech nejon altepet, nimochikauaya kuali nikintajpalos uan nikinnojnotsas. Ijkon okachi kuali nikinixmatik”. ¿Keniuj kipaleuij nejon? Ruth kijtoua: “Satepan, amo nitechikoitakok”.

12. ¿Toni kuejmol kipiaya tokniuj Sarah?

¹² Xa sekin kinemiliaj ke amo techikoitaj, maski tein melauj kemaj. Kemej neskayot, se tokniuj akin monotsa Sarah kinemiliaya ke amo techikoitaya porin amo kiitaya kani kayomej katkaj tokniuan, ox kipiayaj tomin oso tekimej itech nechikol. Sayoj ke kijtoua: “Peuak nikita ke kemaj nitechikoitaya”. Nochin ichankauan yanij universidad uan yejua no, yejua ika kiuelitaya sayoj mouikas iniuan akin no yajkaj universidad. Se tonal, hasta kiluij se akin kuali iuan mouika: “Sayoj nimouika iniuan tokniuan akin momachtianij universidad uan akin amo, amo iniuan nimouika”. Senkis moita ke Sarah monekia kipatas itanemilil. ¿Keniuj kichiuak?

13. ¿Toni techmachtia tein kichiuak Sarah uan ijkon kipatak itanemilil?

¹³ Se tokniuj takalpanojkej kipaleuij Sarah maj kipata itanemilil. Yejua kijtoua: “Nechiluij ke kuali niktekitilijtoya Jiova, kuali nitanankiliaya itech nechikolmej uan kuali nikixmatia Biblia. Satepan, nechiluij ke ijkon kemej okachi tikixmatij Biblia no moneki tiknextiskej kualneskayomej kemej yolyemanilis, teiknelilis uan moneki tikajsikamatiskej ke onkak seki taman tein amo ueli tikchiuaj”. Sarah kichiuak tein kiyolmajxitij tokniuj takalpanojkej. Kijtoua: “Nikajsikamatik ke okachi monekia niyeski nikualtakat uan nitetasojtas”. Yejua ika peuak kiita tein kuali tein kichiuaj tokniuan. Kijtoua: “Nimochikauaya nikitas toni kualneskayomej kipiaj tein kichiua maj Jiova kinpatiuita”. ¿Uan tejuan? Amo keman tiknekij tiknemiliskej ke tiueyichiuanimej porin tikselijkej se kuali nemachtil. Komo semi tikintasojtaj tokniuan amo tikinchikoitaskej (1 Ped. 2:17).

MAJ KUALI TITESELIKAN

14. Kemej kijtoua Hebreos 13:16, ¿keniuj momachilia Jiova keman kuali tikinseliaj oksekin?

¹⁴ Jiova semi kipatiuita maj kuali tikinselikan oksekin (xikonixtajtolti Hebreos 13:16). Tein melauj, kiita ke no ika tikueyichiuaj, okachiok keman tikinpaleuiaj akin kipanouaj tatasojtilis (Sant. 1:27; 2:14-17). Yejua ika, Biblia techyolmajxitia: “Xikinselijtiyakan [...] nekes ten namechkalpanokiue” (Rom. 12:13). Keman kuali tikinseliaj oksekin tikinnextiliaj ke tikintasojtaj uan ke tiknekij iniuan timouikaskej. Jiova kiyolpaktia maj tikinmakakan oksekin tein kikuaskej oso tein tayiskej, oso maj iniuan tiyetokan uan maj tikinkakikan (1 Ped. 4:8-10). Sayoj ke, onkak seki taman tein uelis kichiuas maj amo tikinselikan oksekin oso maj amo tikualtakamej.

15, 16. 1) ¿Keyej sekin kinemiliaj ke amo uelis kinseliskej tokniuan ininchan? 2) ¿Toni kipaleuij Edit maj kinseli tokniuan ichan?

¹⁵ Kemansa xa tiknemiliaj ke amo uelis tikinseliskej tokniuan tochan porin amo keman tikchiuanij oso amo tiuelij. Yejua nejon kipanok Edit, akin amo nemiok inamik. Achto ke mochiuaskia itaixpantijkauj Jiova, amo semi mouikaya iniuan oksekin. Kinemiliaya ke oksekin okachi kuali nemiaj uan ke sayoj yejuan ueliskiaj kuali teseliskej.

¹⁶ Satepan ke Edit mochiuak itaixpantijkauj Jiova, kipatak itanemilil uan mochikauak kinselis tokniuan ichan. Kijtoua: “Keman tikchijchiujtoyaj Kali kampa tiMosentiliaj, se tayekankej nechtajtanij ox ueliskia mokauaskej nochan ome semanas se tokniuj takat uan inamik, akin tapaleuiskiaj itech kalchiualis. Nitanemilij itech tein kichiujka siuat akin nemia Sarepta akin amo nemiaok inamik uan ke Jiova semi kitatiochiuij” (1 Rey. 17:12-16). Yejua ika, Edit kijtoj ke maj mokauakan ichan. ¿Toni tatiochiualismej kiselij? Kijtoua: “Semi niyolpakia, porin amo sayoj ome semana mokaujkej, ta ome metsti. Uan kuali timouikakej”. Edit no kuali mouika iniuan tokniuan itech nechikol. Axkan precursora uan kiuelita kinyoleuas ichan tokniuan akin iniuan tanojnotsa. Kijtoua: “Nikinmakas tokniuan tein nikpia semi nechyolpaktia. Uan tein melauj, nikseliani miak tatiochiualismej” (Heb. 13:1, 2).

17. ¿Toni kichiujtoyaj Luke uan inamik?

¹⁷ Maski xa tikinyoleuanijya tokniuan tochan, ¿toni okachi uelis tikchiuaskej? Kemej neskayot, Luke uan inamik kiuelitaj kinseliskej oksekin ininchan. Kinyoleuayaj inintatuan, ininchankauan, akin kuali iniuan mouikayaj, uan tokniuj akin takalpanoua itech nechikolmej iuan inamik. Sayoj ke, Luke kijtoua: “Tikitakej ke sayoj tikinyoleuayaj akin okachi kuali iniuan timouikayaj”. ¿Toni kichiujkej uan ijkon ueliskiaj no kinyoleuaskej oksekin?

18. ¿Toni kichiujkej Luke uan inamik uan ijkon ueliskia no kinyoleuaskej oksekin?

¹⁸ Luke uan inamik kiajsikamatkej toni yekmelauj kijtosneki maj kuali se kinseli oksekin keman tanemilijkej itech tein kijtoj Jesús: “Komo sayo nankintasojtaj ne naken namechtasojtaj, ¿ijkuakon toni tetayokolil nankiseliske?” (Mat. 5:45-47). Kiajsikamatkej ke monekia kichiuaskej kemej Jiova, akin kualtakat iniuan nochin. Yejua ika kiixtalijkej kinyoleuaskej tokniuan akin amo kinyoleujtoyaj ininchan. Luke kijtoua: “Tinochin semi tiyolpakij keman tisenyetokej, porin nejon techyolchikaua uan techpaleuia maj okachi kuali timouikakan iuan Jiova”.

19. ¿Keniuj tiknextiaj ke tiitatojtokakauan Jesús, uan toni tikixtaliaj tikchiuaskej?

¹⁹ Itech nejin tamachtilis tikitakej ke semi tikintasojtaskej tokniuan techpaleuia maj kuali timouikakan iniuan, maj amo tikinchikoitakan uan maj kuali tikinselikan. Maj amo tikauakan maj nion teyi techtsakuili maj tikinnextilikan tokniuan ke semi tikintasojtaj. Komo tikchiuaj, tiyolpakiskej uan tiknextiskej ke yekmelauj tiitatojtokakauan Jesús (Juan 13:17, 35).