¿Tiktasojkamatij inetetayokoliluan Dios?

1, 2. 1) Kemej kijtoua Salmo 40:5, ¿toni techtayokolij Jiova? 2) ¿Keyej ika titajtotij nejin eyi netetayokolilmej?

JIOVA se Dios akin kiuelita kitemakas miak taman. Maj titanemilikan itech seki taman tein techtayokolij: kualtsin Taltikpak kampa tinemij; tokuatixyo oso tokuatitix tein semi kuali chijchiujtok, uan Biblia, iTajtol tein semi kipia ipatiuj. Kemej Jiova techmakak nejin eyi netetayokolilmej, tikpiaj kani tinemiskej, ueli titanemiliaj uan titajtouaj iniuan oksekin, uan tikajsij itanankililuan netajtanilmej tein okachi monekij (xikonixtajtolti Salmo 40:5).

² Itech nejin tamachtilis ika titajtoskej nejin eyi inetetayokoliluan Jiova. Keman okachi itech titanemiliskej, okachi tikinpatiuitaskej uan okachi tiknekiskej tikyolpaktiskej toTachijchiujkauj, akin semi techtasojta (Apoc. 4:11). Uan no, okachi tikmatiskej keniuj tikinpaleuiskej akin kinkajkayauanij uan kineltokaj ke amo akin tachijchiuak nikan taltikpak.

KUALTSIN TALTIKPAK KAMPA TINEMIJ

3. ¿Keyej Taltikpak amo kemej okseki planetas?

³ Keman timomachtiaj keniuj chijchiujtok Taltikpak, ueli tikitaj ke Dios semi tamatkej (Rom. 1:20; Heb. 3:4). Maski onkak okseki planetas tein kiyoualojtokej Tonaltsin, sayoj Taltikpak kipia tein tapaleuia maj taltikpakneminij uan tapialmej ueli yoltokan.

4. ¿Keniuj kemej Dios kichijchiuak Taltikpak kinextia ke semi tamatkej? Xikonijto se neskayot.

⁴ Ueliskia tikijtoskej ke Taltikpak kemej yeskia se barco tein moajsi tatajko itech ueyiat uan kinuika miakej. Sayoj ke semi taman kemej chijchiujtok se barco uan Taltikpak. Kemej neskayot, komo akin youij itech barco monekiskia mochijchiuiliskej ejekat, takilomej uan at, uan komo amo ueliskia kikixtiskej tein amo kualtiaok, ¿melauj ke niman mikiskiaj? Sayoj ke, itech Taltikpak nemij millones taltikpakneminij uan tapialmej uan kipia tein kichiua maj onka ejekat, takilomej uan at. Uan nejin amo keman tami. Uan no, maski nochi tein amo kualtiaok mokaua itech Taltikpak, kisentoka kualtsin moita uan taltikpakneminij uan tapialmej kisentokaj yoltokej. ¿Keniuj ueli mochiua nejon? Porin Jiova kichijchiuak Taltikpak kemej uelis kichiuas maj tein amo kualtiaok oksepa tapaleui. Maj ika titajtokan ome taman: ejekat uan at.

5. 1) ¿Keyej amo keman tami ejekat tein chipauak? 2) ¿Toni kinextia tein panoua ika ejekat?

⁵ Ejekat kinpaleuia taltikpakneminij uan tapialmej maj yoltokan. Keman mijyotiaj oso moijyokuij, kijyotilanaj ejekat tein chipauak uan kikixtiaj ejekat tein amo chipauak. Maski ijkon, ejekat tein chipauak amo keman tami uan no amo keman momiakilia ejekat tein amo chipauak. ¿Keyej amo keman panoua nejon? Porin Jiova kichijchiuak tataman koujmej, uejueykej uan tsikitsitsin, tein kitilanaj ejekat tein amo chipauak uan kikixtiaj ejekat tein chipauak. Nejin tein panoua ika ejekat kinextia ke melauak tein kijtoua Hechos 17:24, 25: “Totajtsin Dios [...] techmakatok tonemilis nikan taltikpak, uan no Yejuatsin techmaka toijiyo. Uan nochi ten tikpiaj”.

6. 1) ¿Keyej amo keman tami at? 2) ¿Toni kinextia tein panoua ika at? (No xikonita recuadro “At se inetetayokolil Jiova”.)

⁶ Onkak at porin Taltikpak amo semi uejka yetok iuan Tonaltsin nion semi inakastan. Komo semi inakastan yetoskia, amo onkaskia at porin semi tonaskia uan nejon kichiuaskia maj tauakto. Sayoj ke komo uejka yetoskia, nochi at takuauayaskia, uan sayoj onkaskia sekti. Kemej Jiova kitalij Taltikpak kampa moneki, nochipa onkak at uan ijkon taltikpakneminij uan tapialmej ueli yoltokej. Tonaltsin kikauantia oso kitotonia uejueyi amej uan tein tsikitsitsin, uan at pankisa kemej yeskia pokti uan ika mochijchiua mixti. Nejon mixti mokaua itech iluikak kemej majtakti tonalmej. Satepan kioui oso uetsi sekti, uan nejon at mokaua itech uejueyi amej uan tein tsikitsitsin. Ompa oksepa pankisa. Jiova kichiuak maj pano nejin uan ijkon nochipa onkas at itech taltikpak. Nejin kinextia ke semi tamatkej uan nochi ueli kichiua (Job 36:27, 28; Ecl. 1:7).

7. ¿Keniuj tiknextiaj ke tiktasojkamatij netetayokolil tein ika motajtoua itech Salmo 115:16?

⁷ Okachi tikpatiuitaskej Taltikpak kampa tinemij uan nochi tein ompa onkak, komo titanemiliaj itech tein Jiova kichijchiuak (xikonixtajtolti Salmo 115:16). Nejin techolinis maj mojmostaj tiktasojkamatilikan nochi tein techmaka. Uan no tiknextiaj ke tiktasojkamatij maj Jiova techmakani Taltikpak komo timochikauaj titachipauaskej kampa tinemij.

TOKUATIXYO TEIN SEMI KUALI CHIJCHIUJTOK

8. ¿Keyej ueli tikijtouaj ke tokuatixyo semi kuali chijchiujtok?

⁸ Tokuatixyo oso tokuatitix semi kuali chijchiujtok. Keman tiyetoyaj itech iijtik tomomaj, tokuatixyo mochijchiujtiyajki kemej Jiova kiixtalijkaya. ¡Uan itech sejse minuto nesiaj miles células tein yankuikej! Akin momachtiaj nejin, kiixejekouaj ke ikuatixyo se takat oso se siuat kipia kemej 100,000 millones células tein motokaytiaj neuronas. Nochi nejin células moajsij itech tokuatixyo, tein etik sayoj se kilo uan tajko. Maj tikitakan seki taman tein ueli tikchiuaj porin tokuatixyo semi kuali chijchiujtok.

9. ¿Keyej tikonneltoka ke se inetetayokolil Dios maj ueli titajtokan?

⁹ Se inetetayokolil Dios maj ueli titajtokan. Maj tiknemilikan nochi tein panoua keman titajtouaj. Keman tikijtouaj se tajtol, tokuatixyo moneki kichiuas maj moolinikan kemej cien taluamej tein tikpiaj itech tonenepil, totoskak, totexipal, totenoj uan toyolpan oso toelpan. Nochi nejin taluamej moneki sepasaj mooliniskej uan ijkon moajsikamatis tein tikijtouaj. ¿Uan ueli titajtouaj okseki tajtolmej? Seki momachtianij kitematiltijkej itech xiuit 2019 ke konemej akin yekin yolij ueli kiajsikamatijya tein kiniluiaj. Nejin kinextia ke melauak tein kijtouanij miakej momachtianij: ke tichijchiujtokej kemej uelis tikixmatiskej tajtol tein yekinika tikakij uan tiueliskej okseki tajtolmej. Nejin kinextia ke se inetetayokolil Dios maj ueli titajtokan (Éx. 4:11).

10. ¿Keniuj tiknextiaj ke tiktasojkamatij maj ueli titajtokan?

¹⁰ Se taman kemej tiknextiaj ke tiktasojkamatij maj ueli titajtokan, yejua keman tikintapouiaj keyej tikneltokaj ke Dios kichijchiuak nochi akin kineltokaj ke amo akin tachijchiuak (Sal. 9:1; 1 Ped. 3:15). Akin tamachtiaj nejon kinekij maj tikneltokakan ke Taltikpak uan tonemilis iselti nesik. Ika Biblia uan seki tanemililmej tein kipia nejin tamachtilis, uelis tikinmelauiliskej akin kinekiskej techkakiskej keyej tikneltokaj ke Jiova kichijchiuak iluikak uan Taltikpak (Sal. 102:25; Is. 40:25, 26).

11. ¿Toni okse taman kinextia ke tokuatixyo semi kuali chijchiujtok?

¹¹ Totanemilil semi kuali chijchiujtok. Ne uejkauj, se tamatkej kijtoj ke tokuatixyo ueliskia kielnamikis tein kijtouaj 20 millones amatajkuilolmej. Sayoj ke axkan, tamatinij kinemiliaj ke tokuatixyo ueli kielnamiki okachiok. Uan no, techpaleuia maj tiuelikan tikchiuakan okse taman. Maj tikitakan toni.

12. ¿Toni ueli tikchiuaj porin ueli tikelnamikij tein achto tikpanokej?

¹² Sayoj tejuan ueli tikelnamikij tein achto tikpanokej uan itech titanemiliaj. Tapialmej amo ueli kichiuaj nejin. Keman itech titanemiliaj tein tikpanokej techpaleuia maj tikpatakan kemej titanemiliaj uan maj okachi kuali tikchiuakan teisa (1 Cor. 6:9-11; Col. 3:9, 10). Tein melauj, ueli tikmachtiaj totanemilil uan ijkon uelis kimatis toni kuali yetok uan toni amo kuali yetok (Heb. 5:14). Ueli timomachtiaj tiknextiskej netasojtalis uan teiknelilis. Uan no ueli timomachtiaj tikchiuaskej tein melauak kemej Jiova.

13. Kemej kijtoua Salmo 77:11, 12, ¿keniuj moneki tikuiskej totanemilil?

¹³ Se taman kemej tiknextiaj ke tiktasojkamatij maj Jiova techmakani totanemilil yejua keman timochikauaj tikelnamikiskej keniuj yejuatsin techpaleuiani uan techyolseuiani. Ijkon okachi titakuaujtamatiskej ke oksepa techpaleuis satepan (xikonixtajtolti Salmo 77:11, 12; 78:4, 7). Okse taman yejua keman tikelnamikij keniuj techpaleuianij oksekin uan keman tikintasojkamatiliaj. Momachtianij kiitanij ke akin motasojkamatij miakpa okachi yolpakij. No semi kuali komo tikchiuaj kemej Jiova uan tikelkauaj seki taman. Kemej neskayot, maski yejuatsin nochi ueli kielnamiki, techtapojpoluia uan kielkaua totajtakoluan komo timoyolnonotsaj oso timoyolnemiliaj (Sal. 25:7; 130:3, 4). Uan yejuatsin no kineki maj tikintapojpoluikan akin techyolkokouaj uan maj tikelkauakan tein techchiuilijkej (Mat. 6:14; Luc. 17:3, 4).

14. ¿Keniuj uelis tiknextiskej ke tiktasojkamatij tokuatixyo tein semi kuali chijchiujtok?

¹⁴ Uelis tiknextiskej ke tiktasojkamatij tokuatixyo keman ika tikueyitaliaj akin techtayokolij. Sekin amo kuali kikuij nejin netetayokolil uan ininselti kiixtaliaj toni kuali uan toni amo kuali. Sayoj ke kemej Jiova techchijchiuak, taixejekol maj itanauatiluan okachi techpaleuikan ke tein tejuan tiknemiliaj ke kuali yetok (Rom. 12:1, 2). Keman tiktakamatij itanauatiluan, ueli tiyolseujtokej (Is. 48:17, 18). Uan tikajsikamatij tein Jiova kineki maj tikchiuakan: maj tikueyitalikan uan maj tikyolpaktikan toTachijchiujkauj uan toTajtsin (Prov. 27:11).

BIBLIA SEMI KIPIA IPATIUJ

15. ¿Keniuj Biblia se netetayokolil tein kinextia ke Jiova techtasojta?

¹⁵ Biblia se netetayokolil tein kinextia ke toTajtsin Dios techtasojta. Yejua ika, ika iespíritu kichiuak maj takamej akin nenkej ne uejkauj kijkuilouanij. Itech iTajtol, Jiova kinankilia netajtanilmej tein okachi monekij, kemej keniuj peuak tinemij, keyej tinemij uan toni panos satepan. Kemej Jiova kineki maj tinochin tikmatikan itanankililuan nejin netajtanilmej, ijkon kemej panouanij xiujmej kichiuani maj Biblia motajtolkepa itech miak tataman tajtolmej. Itech nejin tonalmej, nochi Biblia oso sayoj seki amatajkuilolmej moajsi itech panoua tres mil tataman tajtolmej. Tein melauj, yejua amatajkuilol tein okachi motajtolkepani uan momoyauani. Maski taltikpakneminij uejka nemij oso tajtouaj tataman tajtolmej, miakej ueli kiixmatij tein Biblia ika tajtoua itech inintajtol (xikonita recuadro “Motajtolkepa Biblia itech tajtolmej tein motajtouaj África”).

16. Ika tein kijtoua Mateo 28:19, 20 uan párrafo, ¿keniuj ueli tiknextiaj ke tiktasojkamatij Biblia?

¹⁶ ¿Keniuj ueli tiknextiaj ke tikpatiuitaj Biblia? Keman mojmostaj tikixtajtoltiaj, itech titanemiliaj uan timochikauaj tikchiuaskej tein timomachtiaj. Uan no, tiktasojkamatiliaj Dios maj techmakani Biblia keman timochikauaj tikinmatiltiskej miakej taltikpakneminij tein ompa kijtoua (Sal. 1:1-3; Mat. 24:14; xikonixtajtolti Mateo 28:19, 20).

17. ¿Toni netetayokolilmej ika titajtojkej itech nejin tamachtilis, uan toni ika titajtoskej itech okse tamachtilis?

¹⁷ Itech nejin tamachtilis ika titajtojkej eyi inetetayokoliluan Dios: kualtsin Taltikpak kampa tinemij; tokuatixyo oso tokuatitix tein semi kuali chijchiujtok, uan iTajtol, Biblia. Sayoj ke Jiova no techmakani netetayokolilmej tein amo moitaj. Itech okse tamachtilis ika titajtoskej seki nejon netetayokolilmej.