Tein tajtanij akin taixtajtoltiaj

Proverbios 24:16 kijtoua: “Maski akin yolmelauak uetsis chikojpa, moajokuis”. ¿Ika motajtojtok itech nejin tajkuilol se taltikpaknenkej akin miakpa tajtakolchiua, sayoj ke Dios kitapojpoluia?

Tein melauj, amo kijtosneki nejon. Nejin tajkuilol ika tajtoua se taltikpaknenkej akin uetsi porin miakpa kipanoua tataman ouijkayomej, sayoj ke moajokui, tein kijtosneki ke taxikoua.

Maj tikitakan versículo tein yetok achto uan tein yetok satepan: “Amo xikpijpia ichan akin yolmelauak porin tikneki tikchiuilis tein amo kuali, amo xikuejuelo kampa moseuia. Porin maski akin yolmelauak uetsis chikojpa, moajokuis, sayoj ke ouijkayot kiuetsiltis akin amo yolkuali. Keman uetsis akin mitstauelita, amo xipaki, uan keman mometstelos, amo xiyolpaki” (Prov. 24:15-17).

Sekin kinemiliaj ke versículo 16 ika tajtoua se taltikpaknenkej akin tajtakolchiua, sayoj ke moyolnonotsa oso moyolnemilia uan oksepa kuali mouika iuan Dios. Kemej neskayot, ome tiopixkamej kayomej Inglaterra kijkuilojkej ke seki tamachtianij ika Biblia ne uejkauj uan itech nejin tonalmej, ijkon kikuinij nejin tajkuilol. No kijtojkej ke nejon tanemilil kiteajsikamatiltia ke se takat akin yolkuali uelis kichiuas uejueyi tajtakolmej, sayoj ke kisentoka kitasojta Dios uan kemej moyolnonotsa kisentoka kipia itatiochiualis. Se taltikpaknenkej akin kichiua tein amo kuali xa kiuelkakis nejin tanemilil, porin uelis kinemilis ke maski miakpa tajtakolchiuas, Dios nochipa kitapojpoluis.

Sayoj ke versículo 16 amo yejua nejon kijtosneki.

Tajtol hebreo tein mokepa kemej “uetsi” itech versículos 16 uan 17 kijtosneki miak taman. Mokui keman se taltikpaknenkej oso se teisa uetsi, kemej neskayot, keman se kuakouej uetsi ojti, keman se taltikpaknenkej moajsi kalkuako uan panuetsi oso meualtia oso keman se tet uetsi talpan (Deut. 22:4, 8; Amós 9:9). Nejin tajtol no ika moixnextia teisa, kemej itech nejin taman: “Keman Jiova kiyolpaktia ojti tein kitojtokatok se takat, kiyekana keman ojtoka. Maski uetsis, amo mokauas talpan, porin Jiova kimakitskijtok” (Sal. 37:23, 24; Prov. 11:5; 17:20).

Sayoj ke, itech amatajkuilol Comentario bíblico Beacon moijtoua ke tajtol hebreo tein mokepa kemej uetsi “amo kiteajsikamatiltia se tajtakolchiuas”. Uan no, se takat akin kuali momachtiani nejin, kijtoua ika versículo 16: “Nenkaj yeskia kintajyouiltiskej itekitikauan Dios uan hasta akin tetajyouiltiaj uelis kinpanos tein amo kuali, porin itekitikauan Dios makisaj; sayoj ke akin amo yolkualmej amo”.

Nochi nejin kinextia ke Proverbios 24:16 amo ika tajtoua keman se tajtakolchiua, ta keman se kipanoua ouijkayomej, kemansa miakpa. Itech nejin tonalmej tein semi ouijkej, se taltikpaknenkej akin yolmelauak uelis kipanos tataman ouijkayomej. Kemej neskayot, xa kokolispeuas oso hasta tekiuanij kitajyouiltiskej porin kitekitilia Dios. Sayoj ke uelis takuaujtamatis ke Dios kipaleuis maj kixiko nejon ouijkayomej. ¿Melauj ke miakpa tikitanij ke itekitikauan Dios kuali kinkisa tein kichiuaj uan kuali kinyoui? ¿Keyej panoua nejon? Biblia kijtoua ke “Jiova kinajokui nochin akin uetsisnekij uan kinchikaua nochin akin amo kipiaj chikaualis” (Sal. 41:1-3; 145:14-19).

Yejua ika, “akin yolmelauak” amo yolpaki keman oksekin kipanouaj ouijkayomej, ta kiyolpaktia kimatis ke “akin kimoujkatokaj Dios akin melauak kuali kinyas, porin kimoujkatokaj” (Ecl. 8:11-13; Job 31:3-6; Sal. 27:5, 6).