¿Akoni kiixtalia tein mitsonpanos?

TEIN MIAKEJ KINELTOKAJ

SITALIXMATINIJ. Miakej kinemiliaj ke kemej tekpantoyaj sitalimej keman yolkej kiixtalia tein kinpanos. Yejua ika, kilerouaj horóscopo para kimatiskej tein kinpanos uan kichiuaj seki taman para maj amo kinpano tein amo kuali oso maj kuali nemikan.

FENG SHUI. Oksekin kinemiliaj ke kemej kichijchiuaskej ininchan kichiuas maj kuali nemikan uan maj yolpakikan. Lo Wing,a se takat akin nemi Hong Kong kijtoua: “Se takat akin tamachtia feng shui nechiluij ke komo niktalia se kualtsin teskat kampa nitanamaka, okachi niktaniskia tomin”.

KINUEYICHIUAJ ININUEJKAUJTATUAN. Oksekin kinemiliaj ke moneki kinueyichiuaskej ininuejkaujtatuan oso okseki tiotsitsin para maj kinyekpiakan uan maj kintatiochiuikan. Van, se siuat akin nemi Vietnam, kijtoua: “Niknemiliaya ke komo nikinueyichiuaya nouejkaujtatuan okachi kuali ninemiskia axkan, uan nokoneuan uan nejua tikchiaskiaj kuali tinemiskej satepan”.

YOLISKEJ ITECH OKSE TAMAN. Miakej kinemiliaj ke keman timomikiliaj oksepa tiyolij itech okse taman uan ke miakpa mochiua. Uan kijtouaj ke kinpanoua tein kuali oso tein amo kuali ika tein kichiujkej itech ininnemilis tein achto kipiakej.

Uan maski miakej kineltokaj, amo kiyekmatij ox yekmelauj mochiua. Maski ijkon kiitaj ininhoróscopo, kikuij tabla ouija^®, cartas, kinmaitaj uan kichiuaj okseki taman porin kinemiliaj ke xa ijkon kinpaleuis maj kimatikan tein kinpanos.

TEIN MOCHIUA

¿Yekmelauj kuali nemij uan kuali kinyoui akin kineltokaj nochi nejin?

Maj tikitakan tein kipanok Hào akin nemi Vietnam. Yejua kineltokaya feng shui, sitalixmatinij uan kinueyichiuaya iuejkaujtatuan, ¿kipaleuij nejon? Hào kijtoua: “Nikpoloj notanamakalis, nimotauikaltij, nikpiak kuejmolmej iniuan nochankauan uan semi nimotayokoltij”.

Qiuming akin nemi Taiwán, kineltokaya sitalixmatinij, se yolis itech okse taman, se chikaualis tein kiixtalia toni techpanos, feng shui uan kinueyichiuas iuejkaujtatuan. Sayoj ke, satepan ke kuali momachtij tein kineltokaya, kijtoj: “Nikitak ke tein nikneltokaya uan tein nimomattoya nikchiuas, moixnamiki uan tepojpoloua. Sitalixmatinij miakpa mopolouaj. Uan oksepa se yolis itech okse taman..., komo amo tikonnelnamiki tein tikonchiuak keman achto tionnemia, ¿keniuj uelis tionmopatas para kuali mitsonyas keman oksepa tionnemis?”.

Hào, Qiuming uan miakejok kiitanij ke kemej tinemiskej satepan amo ixyetokya, nion kiixtaliaj sitalimej, touejkaujtatuan oso ke oksepa tiyoliskej itech okse taman. ¿Kijtosneki nejin ke amo uelis tikchiuaskej teisa para kuali tinemiskej?

Miakej kinemiliaj ke para kuali nemiskej satepan moneki kipiaskej se kuali nemachtil oso miak tomin. Sayoj ke, ¿keniuj momachilianij akin ijkon kichiuanij?