1921: cien xiujmejya
ITECH amaix Tanejmachtijkej 1 de enero de 1921 itech tajtol inglés, kinchiuilijkej nejin netajtanil Momachtianij ika Biblia: “¿Katiyejua tekit tikpiaj nejin xiuit?”. Tanankilil motemakak ika tein kijtoua Isaías 61:1, 2, tein kinelnamiktij ke monekia kiteixmatiltiskej iTajtol Dios: “Jiova nechixpejpenak maj nikinmatilti kuali tanauatilmej akin yolnejmachmej; [...] maj nikteixmatilti xiuit tein Jiova kiyolpaktia uan tonal keman toDios Momakepas”.
TOKNIUAN KINEXTIJKEJ YOLCHIKAUALIS
Momachtianij ika Biblia monekia yeskij yolchikaujkej. Kinmatiltiskiaj “kuali tanauatilmej akin yolnejmachmej”, uan no kinmatiltiskiaj akin amo yolkualmej ke ejkos ‘tonal keman Dios Momakepas’.
John Hoskin, se tokniuj takat akin nemia Canadá tanojnotsak ika yolchikaualis maski semi kiixnamikiaj. Ipeujyan xiuit 1921 tajtoj iuan se tamachtijkej metodista uan kiluij: “Kuali yeskia maj ika titajtokan Biblia, sayoj ke maj amo timotajtolteuikan. Hasta komo taman kemej tikajsikamatij se tamachtilis, maj amo tikualanikan uan maj kualtsin timonauatikan”. Sayoj ke nejon amo panok. Tokniuj Hoskin kijtoj: “Keman yekin titajtouayaj seki minutos, tamachtijkej chikauak kitopeuak puerta uan hasta niknemilij ke teskat tein kipiaya tapaniskia”.
Tamachtijkej kitsajtsilij: “¿Keyej amo tikinnojnotsati akin amo kineltokaj Cristo?”. Tokniuj Hoskin amo teyi kijtoj, sayoj ke keman yajtoyaya moiluij: “¡Niknemilij ke yejua nejon nikchiujtoya!”.
Mostika, keman tamachtijtoya tiopan, tamachtijkej peuak kijtouilia miak taman tokniuj Hoskin. Tokniuj kielnamiki: “Kiniluij akin kinmachtiaya ke nejua katka okachi ueyi takajkayaujkej akin ajsika nejon xolal, uan ke kinamikia maj nechtatoponilikan”. Sayoj ke tokniuj Hoskin amo mosenkauak, ta kisentokak tanojnotsak uan tajtoj iniuan miakej taltikpakneminij. Uan no kijtoj: “Semi nechyolpaktij nitanojnotsas kajkalpan itech nejon tonalmej. Sekin hasta nechiluijkej: ‘Tikmatij ke tejuatsin tikontekitilia Dios’, uan nechiluijkej ke ueliskia nechpaleuiskej ika seki taman komo monekia”.
MOMACHTIAYAJ ININSELTI UAN KEMEJ KALYETOUANIJ
Kemej Momachtianij ika Biblia kinekiaj kinpaleuiskej taltikpakneminij maj okachi kiajsikamatinij tein Biblia tamachtia, kikixtiayaj netajtanilmej uan tanankililmej itech amaix tein axkan moixmati kemej ¡Taijxitilis! Kipiaya netajtanilmej tein tetatmej ueliskia ika kinmachtiskej ininkoneuan. Tetatmej monekia kinchiuiliskej nejin netajtanilmej uan kinpaleuiskej maj kiajsinij tanankililmej itech Biblia. Seki netajtanilmej amo ouijkej katkaj, kemej neskayot “¿Kanachi amatajkuilolmej kipia Biblia?”. Okseki netajtanilmej kinpaleuiaya telpochmej uan ichpochmej maj amo mouinij keman tanojnotsaskiaj, kemej neskayot “¿Moneki kichiaskej nochin akin yekmelauj itatojtokakauan Cristo maj kinixnamikikan?”.
No kikixtiayaj netajtanilmej uan tanankililmej tein kinpaleuiaya tokniuan akin kuali kiixmatiajya tein Biblia tamachtia. Tanankililmej moajsiaj itech amatajkuilol Estudios de las Escrituras tein yekinika kisak. Miakej kinpaleuij nejin netajtanilmej. Sayoj ke itech amaix ¡Taijxitilis! 21 de diciembre de 1921 motematiltij ke amo kikixtiskiajok. ¿Keyej amo?
SE YANKUIK AMATAJKUILOL
Amatajkuilol El Arpa de Dios itech tajtol inglés.
Se amatsin tein kinextiaya katiyejua páginas monekia kiixtajtoltiskej.
Amatsitsin tein kipiayaj netajtanilmej .
Tokniuan akin kiixyekanayaj tanojnotsalis kiajsikamatkej ke monekia ixyetos keniuj momachtijtiaskej Biblia taltikpakneminij. Yejua ika, itech metsti noviembre xiuit 1921 kikixtijkej amatajkuilol El Arpa de Dios itech tajtol inglés (itech tajtol español kisak itech xiuit 1925). Taltikpakneminij akin kiseliayaj nejin amatajkuilol no ika peuaya momachtiayaj Biblia, uan uelia momachtiayaj ininselti. Nejin tamachtilis kinpaleuiaya maj kimatinij ke Dios kineki maj taltikpakneminij nemikan nochipaya. ¿Keniuj momachtiayaj?
Keman se taltikpaknenkej kiseliaya se amatajkuilol no kimakayaj se amatsin tein kijtouaya katiyejua páginas monekia kiixtajtoltis. Se semana satepan kimakayaj okse amatsin, tein kipiaya miak netajtanilmej tein monankiliayaj itech páginas tein kiixtajtoltijka. Itamian amatsin no kijtouaya katiyejua páginas monekia kiixtajtoltis okse semana.
Sejse semana, tokniuan kititaniliayaj ika correo se yankuik amatsin. Ijkon kichiuayaj 12 semanas. Miakpa, nejin amatsitsin kititaniaj tokniuan akin xiuejkejya katkaj oso akin amo uelia kisayaj porin xa mokokouayaj. Kemej neskayot, Anna Gardner, kayot Millvale (Pensilvania, Estados Unidos), kijtoj: “Amatajkuilol semi kipaleuij nokniuj siuat Thayle, akin amo ueli nejnemi, maj okachi tapaleuiskia itech tanojnotsalis, porin axkan ueliskia kititanis amatsitsin ika netajtanilmej”. Keman taltikpaknenkej motamimachtiaya, se tokniuj kikalpanouaya uan kipaleuiaya maj okachi kiixmati tein Biblia tamachtia.
Thayle Gardner itech isilla de ruedas.
ONKAYAOK MIAK TEKIT
Itamian xiuit, tokniuj Joseph Rutherford kintajkuilouilij tokniuan itech nochi nechikolmej. Yejua kijkuiloj: “Itech nejin xiuit okachi titanojnotskej uan tikinpaleuijkej okachi taltikpakneminij ke itech xiujmej tein panokej”. Tokniuj no kijtoj: “Onkakok miak tekit. Xikinyolchikauakan oksekin maj no tapaleuikan itech nejin kualtsin tekit”. Momachtianij ika Biblia kichiujkej tein tokniuj kiniluij, porin itech xiuit 1922 okachiok kiteixmatiltijkej ika yolchikaualis iTekiuajyo Dios.