Jiova techtatiochiuia keman tikchiuaj tein technauatia

NIYOLIK itech xiuit 1923 ompa Hemsworth, se xolalkonet tein poui Yorkshire (Inglaterra). Nokniuj takat akin tayekanaya monotsaya Bob. Keman nikpiaya kemej chiknaui xiuit, nopopaj, akin kikualantiaya maj taixyekananij itech taneltokalis takajkayauanij, kiajsik seki amatajkuilolmej tein kinextiaya ke taneltokalis tein amo melauak kinkajkayaua taltikpakneminij. Semi kimoujkaitak tein kiixtajtoltij. Xiujmej satepan, Bob Atkinson techkalpanoko uan kitalij itech se gramófono se tanojnots tein kitemakak tokniuj Rutherford. Tikitakej ke nejon tamachtilis no ualeuaya kampa kinchijchiujkej nejon amatajkuilolmej. Notatuan kiluijkej Bob maj mojmostaj youak touan takuani uan maj technankiliani tonetajtaniluan, tein semi miakej katkaj. Yejua techyoleuak maj tiyanij nechikolmej ichan se tokniuj tein moajsia tel miak kilómetros uejka. Niman peuak tiyouij, uan mochiuak se nechikol kampa amo miakej mosentiliayaj ompa Hemsworth. Tepitsin satepan, tochan peuak mokauaj siervos de zona (tokniuan takalpanouanij) uan tikinyoleuayaj precursores maj takuatij. Semi nechpaleuij iniuan niyetos.

Nochankauan yankuixtok kitalijkaj se tanamakaloyan, sayoj ke nopopaj kiluij nokniuj: “Komo tikneki tiyeski tiprecursor, tikauaj nejin tanamakaloyan”. Yejua ika Bob tapaleuito okseko kemej precursor keman kipiaya 21 xiujmej. Ome xiuit satepan, keman nikpiaya 16 xiujmej, no nimochiuak niprecursora. Miakpa nitanojnotsaya noselti itech semana; nikuikaya gramófono uan se amatsin tein ika titanojnotsayaj. Sayoj ke Jiova nechtatiochiuij porin nikmachtij se siuat akin niman peuak kitekitilia. Satepan, miakej ichankauan no kiselijkej tamachtilis tein melauak. Se xiuit satepan, nechixtalijkej kemej precursora especial, iuan Mary Henshall. Techtitankej kampa amo ixyetoya maj se nechikol tanojnotsa itech xolal Cheshire.

Ijkuak, mochiujtoya Ojpatika Ueyi Neteuilis, uan tisiuamej technauatijkaj maj tikinpaleuianij tateuianij. Akin tikchiujtoyaj tekit kemej precursor especial tikchiayaj maj tamelauanij kijtouanij ke amo tikinpaleuiskiaj tateuianij, porin titamachtiayaj ika Biblia, uan oksekin akin tamachtiayaj itech inintaneltokalis kinkaujkej maj amo kinpaleuianij tateuianij. Sayoj ke amo panok nejon, uan kiixtalijkej maj nitsakto 31 tonalmej. Se xiuit satepan, keman nikajxitij 19 xiujmej, monekik niyas ojpa kampa tamelauayaj porin notanemilil amo nechkauaya maj nitapaleui itech neteuilis, uan nochi ojpa amo nechtsakkej. Itech nochi nejon tonalmej nikmachilij ke Jiova nechpaleuijtoya ika iespíritu uan nechyolchikaujtoya (Is. 41:10, 13).

NIKIXMATI AKIN MOCHIUAK NONAMIK

Itech xiuit 1946 nikixmatik Arthur Matthews. Kitsakkaj eyi metsti porin amo yajki neteuilis uan yankuixtok kiska. Niman keman kisak kiajsito iikniuj, Dennis, akin katka precursor especial ompa Hemsworth. Ipopaj kinmachtijka tein melauak keman katkaj konemejok uan moauijkej keman katkaj okichpipilok. Tepitsin satepan ke ajsik Hemsworth, iikniuj, Dennis, kititankej maj tapaleuiti Irlanda. Uan notatuan kiyoleujkej Arthur maj nemiti iniuan, porin katka se precursor akin tel tekitia uan kuali monejnemiltiaya. Keman nikinkalpanouaya, Arthur uan nejua tiksenpajpakayaj platos. Satepan peuak timotajkuilouiliaj. Uan maski itech xiuit 1948 Arthur kitsakkej okseki eyi metsti, timonamiktijkej itech metsti enero xiuit 1949. Tiknekiaj tiksentokaskej tiktekitiliskej Jiova miak tonalmej. Amo tikauilouayaj tomin, uan tikixtaliayaj seki tonalmej titekitiskej kampa kitekiaj takilot. Ika inepaleuil Jiova, uelik tiksentokakej kemej precursores.

Se xiuit satepan, techyoleujkej maj titapaleuitij Irlanda del Norte. Tiyajkej xolal Armagh uan satepan Newry, kampa tel miakej katkaj católicos. Miakej amo kuali kinitayaj akin kipiayaj okse taneltokalis, yejua ika monekia kuali titaixejekoskej keman titanojnotsayaj. Tikchiuayaj nechikolmej ininchan seki tokniuan namikuanij akin nemiaj 16 kilómetros uejka. Timosentiliayaj kemej tichikueyin. Komo ompa timokauayaj, tikochiaj talpan, uan kualkan kuali tialmasalouayaj. Semi nechyolpaktia nikmatis ke axkan moajsij tel miakej tokniuan ompa.

“¡TEJUAN UELIS TIYASKEJ!”

Nokniuj takat uan inamik, Lottie, tekitiajya kemej precursores especiales ompa Irlanda del Norte. Tisenyajkej ueyi nechikol tein uejkauak eyi tonalmej ompa Belfast itech xiuit 1952. Ichan tokniuj kampa timokaujkej no mokauak Pryce Hughes, akin ijkuak taixyekanaya itech sucursal ompa Gran Bretaña. Se youak ika titajtojkej folleto El camino de Dios es el de amor, tein yankuixtok mochijchiujka kemej ueliskia kinpaleuis akin katkaj irlandeses. Tokniuj Hughes kijtoj ke ouij katka se kinnojnotsas católicos akin nemiaj República de Irlanda. Kinkixtiayaj tokniuan kampa mokauayaj uan tiopixkamej kichiuayaj maj taltikpakneminij kinteuianij. Satepan no kijtoj: “Moneki ininnepaleuil namikuanij akin kipiaj carro uan kinekij tapaleuiskej maj momoyaua nejin folleto itech nochi altepet”.a Uan ijkuak titanankilijkej: “¡Tejuan uelis tiyaskej!”.

Ompa Dublín, precursores nochipa uelia mokauayaj ichan Rutland, se tokniuj siuat akin miak xiujmej kitekitilijka Jiova uan kiitayaj kemej ininmomaj. Tinauin timokaujkej ichan miak tonalmej uan tiknamakakej seki taman tein tikpiayaj. Satepan, timotitichakijkej itech se tsikitsin motocicleta tein katka iaxka Bob uan tikouatoj se carro. Tikoujkej se tein amo yankuik tein kuali tekitia uan tikiluijkej tanamakakej maj techuikiliani kalijtik porin nion semej tiueliaj tiknejnemiltiayaj. Arthur nochi tiotak tokotsyetoya itech cama uan kichiuaya kemej yeskia kinejnemiltiaya carro. Mostika kualkan, keman Arthur kinekia kinejnemiltis uan kikixtis carro, ajsik Mildred Willet (se misionera akin satepan monamiktij iuan John Barr, akin pouik iniuan Oloch Taojtokaltianij). ¡Yejua kimatia kinejnemiltis carro! Tepitsin techmachtij, uan satepan uelik tiyajkejya.

Satepan monekia tikajsiskej kani tinemiskej. Techiluijkej ke okachi kuali yeskia maj amo tineminij itech se remolque (se ueyi carro tein chijchiujtoya kemej se kali), porin taixnamikinij ueliskia kitikuiltiskej. Tiktemojkej se kali, sayoj ke kemej amo tikajsikej, tikochkej itech tocarro. Mostika sayoj tikajsikej se tsikitsin remolque tein kipiaya ome cama. Ompa tinemiskiaj. Tikmoujkaitakej maj seki milajtekitinij akin katkaj kualtakamej techkauanij maj tiketsanij remolque inintalpan. Titanojnotsayaj kemej 20 kilómetros uejka. Satepan, tikuikayaj okseko uan titanojnotsayaj kampa achto tikaujkaj.

Tikinkalpanojkej nochin akin nemiaj itech seki xolalmej ompa Irlanda, uan amo semi techixnamikkej. Tikxejxelojkej panoua 20,000 folletos uan tikinpanoltilijkej tokniuan akin tekitiaj sucursal ompa Gran Bretaña inintokay akin kinekiaj kimatiskej okachi. Nechyolpaktia nikmatis ke axkan ompa moajsij tel miakej itaixpantijkauan Jiova.

TIMOKEPAJ INGLATERRA UAN SATEPAN ESCOCIA

Xiujmej satepan techtitankej maj titapaleuitij Londres, kampa ika sur. Uan seki semana satepan, tokniuan akin tekitiaj sucursal kinotskej Arthur uan kiluijkej ke kinekiaj maj mostika peuani takalpanouani itech nechikolmej. Satepan ke se semana kimachtijkej, tiyajkej Escocia kampa peuaskia titakalpanoskiaj. Arthur nion uelik momachtij tanojnotsmej tein kitemakaskia, sayoj ke nochipa kichiuaya tein kiluiayaj maski ouij yeskia. ¡Semi nechyolchikauaya ineskayo! Techyolpaktij tikchiuaskej nejon tekit. Kemej miak xiujmej titanojnotstinenkej kampa amo ixyetoya maj se nechikol tanojnotsa, tikitakej kemej se ueyi tatiochiualis timoajsiskej iniuan miakej tokniuan.

Arthur kiyoleujkej maj kiseliti tamachtilis tein motemaka Galaad itech xiuit 1962. Tamachtilis uejkauaya majtakti metsti uan nejua amo nechyoleujkaj, yejua ika monekik tikixpejpenaskej se taman tein ouij. Tikixejekojkej ke okachi kuali katka maj Arthur kiseliani tamachtilis, maski monekia nimokauas noselti miak metsti. Oksepa nechtitankej xolal Hemsworth kemej precursora especial. Keman Arthur mokepak, se xiuit satepan, kiixtalijkej kemej takalpanojkej itech distrito. Titakalpanouayaj Escocia, Inglaterra kampa ika norte uan Irlanda del Norte.

OKSEKI TEKIMEJ OMPA IRLANDA

Itech xiuit 1964, Arthur kiixtalijkej maj taixyekana itech sucursal ompa Irlanda. Semi techyolpajtika titakalpanoskej itech circuito uan distrito, yejua ika tepitsin nimouia. Sayoj ke axkan semi nimotasojkamati nikpias ueyi tatiochiualis nitekitis Betel. Nikitani ke keman tikchiuaj tekimej tein Jiova techmaka, maski amo semi techpaktiaj, nochipa techtatiochiuia. Ompa nitekitia itech oficinas, niknepanouaya amaixmej, nitakualchiuaya uan nitachipauaya. Kemansa no titakalpanouayaj itech distrito uan ijkon tikinixmatkej tokniuan itech nochi altepet. Uan no, tikitakej keniuj akin tikinmachtiayaj ika Biblia peuak kitekitiliaj Jiova. Nochi nejon kichiuak maj okachi iniuan timouikanij tokniuan ompa Irlanda akin tikinitayaj kemej tochankauan. ¡Tel kualtsin tatiochiualis!

SE TAMAN TEIN KINPALEUIJ TOKNIUAN OMPA IRLANDA

Yekinika ueyi nechikol ompa Irlanda kampa mosentilijkej akin ualeuayaj itech okseki uejueyi altepemej mochiuak itech xolal Dublín itech xiuit 1965.b Maski taixnamikinij amo kinekiaj maj mochiuani, mochiuak ueyi nechikol. Mosentilijkej 3,948 uan moauikej 65. Tokniuan akin ualeuayaj itech okseki uejueyi altepemej, akin katkaj 3,500, mokaujkej ininchan akin ompakauin nemiaj. Akin kinkalotijkej kiselijkej se amat kampa kintasojkamatiliayaj, uan miakej kijtojkej ke tokniuan tel kuali monejnemiltiayaj. Ueyi nechikol semi tapaleuij ompa Irlanda.

Itech xiuit 1966, itech sucursal tein moajsia ompa Dublín peuak kiixyekanaj tekit tein mochiuaya Irlanda uan Irlanda del Norte, se taman tein amo ijkon panouaya ompa porin itech tekiuajyomej uan itech taneltokalismej xexeliujtoyaj. Semi techyolpaktij tikitaskej ke miakej católicos kiselijkej tamachtilis tein melauak uan tekitikej iniuan tokniuan akin achto katkaj protestantes.

SENKIS MOPATA TONEMILIS

Itech xiuit 2011, senkis mopatak tonemilis. Sucursal tein moajsi ompa Gran Bretaña uan Irlanda mochiujkej sayoj se, uan techiluijkej maj tiyanij Betel tein moajsi Londres. Ijkuak, semi nimotekipachojtoya porin nonamik kokolispeujka. Tapajtianij kiitakej ke kipiaya kokolis tein kitokaytiaj Parkinson. Tonal 20 metsti mayo xiuit 2015, satepan ke tiksentekitilijkej Jiova 66 xiujmej, nonamik Arthur momikilij.

Nejin xiujmej tein panouanij semi nitayokoyani. Arthur nochipa nouan yetoya, uan semi niktemoua. Sayoj ke se kipanos ouijkayomej, tepaleuia maj okachi se motoki iuan Jiova. Uan no, nechyolseuiani nikitas ke tokniuan kiteltasojtayaj Arthur. Totasojikniuan kayomej Irlanda, Gran Bretaña uan hasta Estados Unidos nechtitanilianij miak amamej. Semi nechpaleuianij nejon amamej uan yolchikaualis tein nechmakanij Dennis, iikniuj Arthur, inamik, Mavis, uan ininichpochuan, Ruth uan Judy; amo nikmati keniuj nikijtos ke semi nimotasojkamati.

Moajsi se tajkuilol tein semi nechyolchikaua. Yejua Isaías 30:18, tein kijtoua: “Jiova kichixtok ika nejmachkayot keman namechpaleuis, uan yejuatsin moajokuis uan namechnextilis teiknelilis. Porin Jiova yejua se Dios akin tamelaua. Yolpakij nochin akin kisentokaj itech mochiaj”. Nechyolseuia nikmatis ke Jiova kichixtok ika nejmachkayot maj ejko tonal keman kiyektalis tokuejmoluan uan techmakas tekimej tein techyolpaktis itech yankuik taltikpak.

Keman nikelnamiki tein tikchiujkej, nikyekita ke Jiova kichiuani maj okachi momiakilikan itekitikauan ompa Irlanda uan kitiochiuani tekit. Semi nechyolpaktia maj nitapaleuiani. Semi melauak ke Jiova techtatiochiuia keman tikchiuaj tein technauatia.