Nikitani ke amo teyi kintsakuilia akin takuaujtamatij

Nikueuetskilij porin amo niknemiliaya maj notasojikniuj pouini itech se taneltokalis. Uan niktajtanij: “¿Xe tikmati toni kijtoua Biblia?”. Amo nechnankilij, sayoj ke satepan nechiluij ke imomaj katka itaixpantijkauj Jehová uan kimachtijka seki taman. Nejua niknekia okachi nikmatis uan nikiluij maj ika nechnojnotsani.

Uejkauak timonojnotstoyaj. Notasojikniuj nechiluij ke Biblia tamachtia ke Satanás taixyekantok nikan taltikpak (Juan 14:30). Xa tejuatsin tikonmatiya nejin, sayoj ke nejua amo keman nikaktoya uan semi nikmojkaitak. Nochipa nikakia ke Dios akin yolkuali uan kichiua nochi tein kuali yetok, taixyekana nikan taltikpak. Sayoj ke amo nikmatia keyej mochiuaya tein amo kuali. Maski nikpiaya 26 xiujmej, miak taman nechtekipachouayaya.

Nopaj kinpatanaltiaya aviones tein ika tateuiayaj ompa Estados Unidos. Yejua ika, keman katka niokichpil nikmatia ke ejkoskia tonal keman moteuiskiaj itech nochi taltikpak. Tateuianij kipiayaj nochi para tateuiskej, sayoj kichiayaj maj kinnauatikan. Keman nietoya Universidad ompa California semi titajyouijkej porin moteuijtoyaj ompa Vietnam. Nimouikaya iniuan akin nouan momachtiayaj akin semi takuejmolchiuayaj. Policías techeualtiayaj ika kouit, uan ticholouayaj maski tiijyotamiaj uan amo tiyektachiayaj porin kixiniayaj gas lacrimógeno. Semi onkaya kuejmolmej. Kinmiktiayaj akin yetoyaj itech política, uan mosenkuiaj para taixnamikiskej. Kemej noyampa xexeliujtoyaj uan tataman tein kinemiliayaj, amo nikmatiaok toni nikneltokas.

Itech xiuit 1970 nitekitito norte de Alaska, uan ompa niktanik miak tomin. Satepan niajki Londres (Inglaterra) uan ompa nikouak se moto uan niajki sur maski amo nikixtalij kani niajsis. Seki metsti satepan niajsik África. Keman niojtokatoya nikinixmatik miakej akin no yasnekiaj okseko uan kinekiaj kikauaskej tein amo kuali tein mochiuaya kampa nemiaj.

Keman nikitak tein mochiujtoya nikneltokak ke melauj tein Biblia tamachtia, ke se espíritu akin amo yolkuali yejua akin taixyekana nikan taltikpak. Sayoj ke niknekia nikmatis keyej Dios amo teyi kichiuaya.

Seki metsti satepan nikmatik keyej. Ijkon kemej panokej xiujmej, nikinixmatik uan nikintasojtak miakej takamej uan siuamej akin amo kikauaj Jehová maski kipanouanij miak taman.

IRLANDA DEL NORTE, “TAL KAMPA ONKAK BOMBAS UAN BALAS”

Keman nimokepak Londres, niktemoj imomaj notasojikniuj uan yejua nechmakak se Biblia. Panok se tiempo uan niajki Ámsterdam (Países Bajos). Se tonal keman nikixtajtoltijtoya Biblia ojtenoj kampa yetoya se lámpara, panok se itaixpantijkauj Jehová akin nechpaleuij maj okachi nikajsikamati tein kijtoua Biblia. Satepan, keman nietoya Dublín (Irlanda), niajsito Betel. Nitanotsak uan nechtatapouilijkej. Ompa nikixmatik Arthur Matthews, se tokniuj akin miak xiujmejya kitekitiliani Jehová. Niktajtanij maj nechmachti ika Biblia uan yejua kinekik.

Semi nikuelitaya tein nimomachtijtoya uan nikixtajtoltiaya nochi amaixmej tein kikixtiayaj itaixpantijkauan Jehová. Uan no nikixtajtoltiaya Biblia. Nikmojkaitaya maj hasta konemej akin yayaj nechikolmej kimatinij tein uejueyi taixmatinij uejkaujya motajtanianij, kemej nejin: ¿keyej mochiua tein amo kuali? ¿akoni Dios? uan ¿toni techpanoua keman timomikiliaj? Kemej itech nejon altepet amo akin nikixmatia, nochin akin kuali iniuan nimouikaya katkaj itaixpantijkauan Jehová. Yejuan nechpaleuijkej maj niktasojta Jehová uan maj nikyolpakti.

Itech xiuit 1972 nimoauij. Keman panok se xiuit nimochiuak precursor uan nitapaleuito itech se nechikol tein amo ueyi, ompa Newry (Irlanda del Norte). Nikrentaroj se tepankaltsin tein moajsia koujtaj. Ompaka nemiaj kuakuejmej uan niaya ininixpan nimomamachtiti notanojnots. Moitaya ke nechkakiaj keman yejuan takuajkuajtoyaj. Maski nejon kuakuejmej amo kakistiaj, nechpaleuiayaj maj nimomati nikinitas takakinij keman nitemakaskia tanojnots. Itech xiuit 1974 nechixtalijkej kemej precursor especial. Nouan tanojnotsaya tokniuj Nigel Pitt uan axkan tiksentokaj kuali timouikaj.

Itech nejon xiujmej, ompa Irlanda del Norte semi motakuejmolchiujtoya. Miakej kijtouayaj ke ompa katka “tal kampa onkak bombas uan balas”. Ojtipan moteuiayaj, tatojtoponiayaj uan bombas mojmostaj mokakiaj. Nejin panouaya porin akin pouiaj itech taneltokalis uan políticos peuak moixnamikij. Sayoj ke protestantes uan católicos kimatiaj ke itaixpantijkauan Jehová amo mokalakiaj itech política, yejua ika uelia titanojnotsayaj. Miakpa akin tikinnojnotsayaj ika Biblia kimatiaj kani uan kemanian ueliskia peuas moteuiskej uan techiluiayaj maj amo ompaka tipanokan.

Sayoj ke kemansa ipa tikixnamikiaj teisa. Se tonal niajka nitanojnotsato itech okse xolal iuan tokniuj Dennis Carrigan, akin no katka precursor. Ompa amo akin katka itaixpantijkauj Jehová uan sayoj sepa tiajkaj titanojnotsatoj. Kemej amo titajtouayaj kemej akin ompa nemiaj, se siuat techteluilij ke katkaj tisoldados británicos. Semi timomoujtijkej. Tikmatiaj ke maski tiyeskiaj tikualtakamej iniuan soldados ueliskia techmiktiskej oso techtatoponiliskej. Dennis uan nejua tikchixtoyaj autobús uan semi taseseyaya. Ijkuak tikitakej ke ajsik se carro kampa cafenamakayaj uan ompa yetoya siuat akin techteluilijka. Yejua ualkisak uan peuak tajtoua iniuan ome takamej akin yetoyaj itech carro, semi kualantoya uan techmajpiluiaya. Satepan nejin takamej moualtokijkej kampa tietoyaj uan peujkej techtajtaniaj toni hora panouaya autobús. Keman ejkok autobús tajtojkej iuan chofer, sayoj ke amo tikakkej tein moiluiayaj. Sayoj tejuan tiayaj itech autobús, yejua ika tikmatiaj ke kinekiaj techkixtiskej den xolal para techchiuiliskej teisa. Sayoj ke amo teyi techpanok. Keman nitemok den autobús niktajtanij chofer: “¿Toni kinekiaj nejon takamej?”. Yejua nechiluij: “Amo ximotekipachokan. Nikiniluij nanakonimej. Amo teyi namechpanos”.

Itech xiuit 1976, ompa Dublín mochiuak se ueyi nechikol tein uejkaua eyi tonal. Ompa nikixmatik Pauline Lomax, se precursora especial akin ualaya de Inglaterra. Yejua semi kitasojtaya Jehová, yolyemanik uan tetasojtakej. Yejua uan iikniuj Ray peujkej momachtiaj Biblia keman katkaj konemej. Se xiuit satepan ke timoixmatkej timonamiktijkej uan tiksentokakej kemej precursores especiales ompa Ballymena (Irlanda del Norte).

No titakalpanojkej itech nechikolmej ompa Belfast, Lonlonderry uan okseki xolalmej kampa semi tamouililpan. Techyolchikauaya tikitaskej ke tokniuan semi takuaujtamatiaj, porin monekik kipataskej miak taman para kitekitiliskej Jehová, kemej amo tetauelitaskejok, amo techikoitaskejok uan kikauaskej tein kineltokayaj. Moitaya ke Jehová semi kintatiochiuiaya uan kinpaleuiaya.

Nitapaleuij Irlanda 10 xiujmej. Uan itech xiuit 1981 techyoleujkej maj tikselikan Tamachtilis tein motemaka Galaad tapoual 72. Keman tamik techtitankej Sierra Leona (África Occidental).

SIERRA LEONA: TOKNIUAN TAKUAUJTAMATIJ MASKI TATASOJTI

Itech kali kampa tinemiaj no moajsiaj 11 misioneros akin semi yolkualmej. Tikpiayaj se cocina, eyi baños, ojkan kampa timopakayaj, se teléfono, se lavadora uan se tepos kampa tikuatsayaj tasal. Semi kokotonia luz, kalpani onkayaj miak kimichimej uan tatampa den kali kalakiaj kouamej.

Maski kampa tinemiaj amo semi kualtsin katka, semi tiyolpakiaj keman titanojnotsayaj. Akin tikinnojnotsayaj kipatiuitayaj Biblia uan kualtsin techkakiaj. Miakej peujkej momachtiaj uan mochiujkej itaixpantijkauan Jehová. Akin ompa nemiaj nechixmatiaj kemej “takatsin Robert” uan Pauline kemej “siuatsin Robert”. Sayoj ke satepan amo semi nitanojnotsayaok porin peuak nitapaleuia sucursal. Ompa peujkej kiluiaj Pauline “siuatsin Pauline” uan nejua “takatsin Pauline”. Nosiuatsin semi kiuelitaya maj ijkon techiluianij.

Miakej tokniuan amo kipiayaj miak taman, sayoj ke Jehová nochipa kinmakaya tein kinpolouaya kemej amo kichiayaj (Mat. 6:33). Nikelnamiki ke se tokniuj siuat sayoj kipiaya tomin para kikouaskia tein kikuaskiaj yejua uan ikoneuan nejon tonal. Sayoj ke kitayokolij nejon tomin se tokniuj takat akin kipiaya malaria uan amo kipiaya tomin para mopajkouis. Nejon tonal se siuatsin kiitato tokniuj siuat uan kitaxtauij para maj kixilui. Miakpa tikitayaj seki taman kemej nejin.

NIGERIA: OKSE TAMAN TEIN MOMATTOYAJ KICHIUASKEJ

Tietoyaj Sierra Leona chiknaui xiujmej. Sayoj ke satepan techtitankej Betel de Nigeria, se sucursal tein semi ueyi. Nejua niksentokak nikchiua tekit tein nikchiuaya keman nietoya Sierra Leona, sayoj ke semi mopatak tein kichiuaya Pauline. Achto tanojnotsaya 130 horas itech se metsti uan akin kinmachtiaya mochikauayaj kichiuaskej tein momachtiayaj, sayoj ke ompa Betel, tajtsomaya nochi tonal itech se cuarto. Amo ijsiujka momatik, sayoj ke satepan kiajsikamatik ke tokniuan semi kitasojkamatiaj tein kichiuaya uan kiixtalij kinyolchikauas akin no tapaleuijtoyaj Betel.

Ompa Nigeria okse taman tein momattoyaj kichiuaskej uan monekia okachi tikinixmatiskej. Se tonal, ejkok Betel se tokniuj siuat, uan se tokniuj takat kiuikak kampa nitekiti para maj nechtajpalo. Nejua nikmatajpalouaya sayoj ke yejua motankuaketsak uan moixpiloj. Semi nikmojkaitak uan niman nikelnamik tein kijtoua Hechos 10:25, 26 uan Apocalipsis 19:10. Uan nimotajtanij: “¿Toni nikchiua? ¿Moneki nikiluis teisa?”. Sayoj ke satepan niknemilij: “Kimattokya tein kijtoua Biblia, yejua ika kiyoleujkej Betel”.

Maski nipinauak, niksentokak niknojnotsak uan satepan niktemoj toni kijtosneki nejon tein kichiujka. Nikmatik ke miakkan itech altepet ijkon momattoyaj motajpaloskej, hasta takamej no ijkon kichiuayaj. Amo ika taueyichiuayaj ta ika kinextiayaj ke tapoujkaitayaj. Biblia no ika tajtoua seki taman kemej nejin (1 Sam. 24:8). ¡Semi kuali ke amo teyi nikiluij tokniuj tein ika ueliskia nikyolkokos!

Ompa Nigeria tikinixmattkej miakej tokniuan akin kinextijkej itech nochi ininnemilis ke semi takuaujtamatiaj. Semej katka Isaiah Adagbona.a Keman katka telpoch peuak momachtia Biblia, uan satepan kikuik lepra. Kititankej kampa yetoyaj nochin akin kipiayaj lepra. Ompa sayoj yejua katka itaixpantijkauj Jehová. Maski semi kiixnamikkej, kinpaleuij panoua 30 akin no kipiayaj lepra maj mochiuanij itaixpantijkauan Jehová uan tapaleuij maj ompa mochiua se nechikol.

KENIA: TOKNIUAN KATKAJ YOLYEMANKEJ

Itech xiuit 1996 techtitankej maj titapaleuitij Betel ompa Kenia. Amo nimokeptoya Kenia desde nejon tonal tein amo keman nikelkaua, tein ika nitajtoj achto. Ompa Betel kemansa kalakiaj seki monos tein motokaytiaj cercopiteco verde. Keman tokniuan siuamej kikauayaj takilomej, nejin monos kiichtekiaj. Se tonal, se tokniuj siuat kitapojteuj ventana de icuarto. Keman mokepak kinajsito miak monos kikuajtoyaj takual tein onkaya. Tokniuj mojkatsajtsik uan kistikis de icuarto uan monos no momoujtijkej, tsajtsijkej uan kiskej itech ventana.

Pauline uan nejua peuak titapaleuiaj itech se nechikol itech tajtol suajili. Satepan nechiluijkej maj nikixyekana Nemachtil ika Amaix itech Nechikol (axkan motokaytia Nemachtil ika Biblia itech nechikol). Sayoj ke amo nitajtouaya suajili. Yejua ika, para kuali nikixtajtoltiskia netajtanilmej, achto kuali nimomachtiaya. Sayoj ke komo aksa tanankiliaya teisa tein amo ijkuiliujtok, amo nikajsikamatia. Amo kuali nimomachiliaya porin niknemiliaya ke amo nikinpaleuijtoya tokniuan, sayoj ke nikmojkaitaya porin yejuan katkaj yolyemankej uan amo yolijsiuiaj.

ESTADOS UNIDOS: KITEKITILIAJ JEHOVÁ MASKI UELISKIA MOTOMINTISKEJ

Ompa Kenia amo tiuejkaujkej nion se xiuit. Itech 1997 techyoleujkej maj titapaleuitij Betel ompa Brooklyn (Nueva York). Nikan semi tominpiaj uan kemansa nejon no se ouijkayot (Prov. 30:8, 9). Sayoj ke tokniuan akin nikan nemij no semi takuaujtamatij iuan Jehová. Amo kitemouaj motomintiskej, ta kikuij nochi tein kipiaj para kipaleuiskej inechikol Jehová.

Itech nochi nejin xiujmej tikitanij ke tokniuan semi takuaujtamatij maski kipanouanij miak taman, ompa Irlanda miakej takuejmolchiuaj, ompa África tatasojti uan tokniuan uejka nemij, uan Estados Unidos tominpiaj. Jehová semi yolpaki keman kiita ke tokniuan semi kitasojtaj maski kipanouaj tataman ouijkayomej.

Niman panouanij xiujmej, oso kemej kijtoua Job 7:6 “okachi ijsiujka panouaj ke kemej tekiti akin ijsiujka tajkiti”. Axkan titekitij itech sucursal tein moajsi Warwick (Nueva York) iniuan tokniuan akin no semi tetasojtaj. Tikuelitaj uan semi techyolpaktia tikpaleuiskej ueyi Tekiuaj Jesucristo akin amo uejkaua kintatiochiuis akin amo keman kikauaj (Mat. 25:34).