Tein tajtanij akin taixtajtoltiaj
Itech Salmo 61:8 David kijtoj ke kiueyichiuaskia itokay Dios “nochipaya”, ¿kijtosneki nejon ke kinemiliaya ke amo keman momikiliskia?
Amo, ta tein David kijtoj taixejekol katka.
Maj itech titanemilikan tein kijkuiloj itech Salmo 61:8 uan itech okseki versículos kampa no ika tajtoj nejon. Kijtoj: “Nochipaya nikueyichiuas motokay ika nekuikatilmej keman mojmostaj nikchiuas tein nimotenkauak”, “Nimitsueyichiua ika nochi noyolo, Jehová noDios, uan nikueyitalis motokay nochipaya”, uan “Nikueyichiuas motokay nochipaya” (Sal. 61:8; 86:12; 145:1, 2).
Keman David kijkuiloj nejin amo kinemiliaya ke amo keman momikiliskia, ta kimatia ke kemej titajtakolejkej tinochin timomikiliaj. Hasta yejua kijtoj ke no katka tajtakolej (Gén. 3:3, 17-19; Sal. 51:4, 5). Kimatia ke hasta itekitikauan Jehová akin amo kikaujkej kemej Abrahán, Isaac uan Jacob no momikilijkej. Uan kuali kimatia ke se tonal no momikiliskia (Sal. 37:25; 39:4). Sayoj ke tein David kijtoj itech Salmo 61:8 kinextia ke senkis kiixtalijtoya kitekitilis Jehová nochipaya, oso hasta ke momikiliskia (2 Sam. 7:12).
Kemansa David kijkuilouaya tein kipanouaya, kemej nesi ipeujyan Salmo 18, 51 uan 52. Itech Salmo 23, David kijtoj ke Jehová kemej yeskia se ichkatajpixkej akin kinyekana, kinyolseuia uan kinyekpia iichkauan. David no ijkon kinyekpiaya iichkauan uan yejua ika kinekia kitekitilis Jehová hasta ke momikiliskia (Sal. 23:6).
Maj tikelnamikikan ke Jehová kimatiltij David tein monekia kijkuilos. Seki taman tein kijkuiloj mochiuaskiaok satepan. Itech Salmo 110 David kijtoj ke ejkoskia tonal keman iTekotsin motaliskia iyekmakopa Dios ompa iluikak uan kimakaskiaj miak chikaualis. Ika nejon chikaualis kintaniskia akin kiixnamikij Dios uan ‘kintatsakuiltiskia nochin akin nemij itech altepemej’. David katka iuejkaujtat Mesías, akin taixyekanaskia ompa iluikak uan yeskia tiopixkat nochipaya (Sal. 110:1-6). Jesús kijtoj ke tein moijtojka itech Salmo 110 ika tajtojtoya yejua uan ke mochiuaskia hasta satepan (Mat. 22:41-45).
Kemej tikitakejya, Jehová kichiuak maj David kijkuilouani seki taman tein mochiuak keman yejua nemia uan seki taman tein mochiuas satepan keman oksepa nemis uan uelis kiueyichiuas Jehová nochipaya. Yejua ika, nejin techpaleuia maj tikajsikamatikan ke tein kijtoua Salmo 37:10, 11, 29, kinextiaj tein mochiuak ne uejkauj keman israelitas nemiaj uan tein mochiuas satepan keman Jehová kichiuas nochi tein motenkauak (xikonita itech nejin amaix tamachtilis “Nouan tietos itech Xochital”, párrafo 8).
Yejua ika, tein David kijtoj itech Salmo 61:8 uan okseki versículos kinextiaj ke yejua kinekia kiueyichiuas Jehová hasta ke momikiliskia. Uan no kinextiaj tein David kichiuas satepan, keman Jehová kichiuas maj oksepa nemi.