Uelis tiyolseujtoskej keman tikpanoskej ouijkayomej

1. ¿Toni kijtosneki keman Dios techyolseuia uan keniuj techpaleuia nejon? (Filipenses 4:6, 7).

MIAKEJ itech nejin taltikpak amo kimatij keniuj Dios teyolseuia. Nejin se taman tein kimachilia aksa keman kuali mouika iuan Dios. Keman Jehová techyolseuia amo timouij (xikonixtajtolti Filipenses 4:6, 7). Kuali timouikaj iniuan akin kitasojtaj Jehová uan no semi kuali timouikaj iuan “Dios akin teyolseuia” (1 Tes. 5:23). Dios techyolseuia keman tikixmatij, iuan titakuaujtamatij uan tiktakamatij. Nejon techpaleuia maj kuali timomachilikan maski tikpanouaj ouijkayomej.

2. ¿Keniuj tikmatij ke Dios uelis yekmelauj techyolseuis?

² ¿Yekmelauj Dios uelis techyolseuis keman tikpanoskej ouijkayomej? ¿Uelis tiyolseujtoskej keman onkas se ueyi kokolis, keman mochiuas se tetsauit, keman miakej takuejmolchiuaskej oso keman techixnamikiskej? Nejin uelis techmojmoujtis. Sayoj ke Jesús kiniluij itatojtokakauan nejin: “Amo ximoyoltekipachokan nion ximoyolmoujtikan” (Juan 14:27). Miakej tokniuan kichiuanij tein Jesús kijtoj. Jehová kinpaleuiani maj yolseujtokan maski kipanouanij uejueyi ouijkayomej.

UELIS TIYOLSEUJTOSKEJ KEMAN MOCHIUAS SE UEYI KOKOLIS

3. ¿Keniuj se ueyi kokolis ueliskia kichiuas maj amo tiyolseujtokanok?

³ Keman mochiua se ueyi kokolis uelis senkis kipatas tonemilis. Maj tiknemilikan keniuj COVID-19 kinijtakouani miakej. Keman sekin kintatajtanijkej, okachi miakej kijtojkej ke amo uelia yekkochiaj. Uan no, okachi miakej moteltekipachouayaj uan moteltayokoltiayaj, okachi miakej kikuiaj drogas uan mouintiayaj, kalyetouanij peuak okachi kipiaj kuejmolmej uan okachi miakej kitemouanij momiktiskej. Komo kampa tionnemi mochiujtok se ueyi kokolis, ¿toni mitsonpaleuis amo semi xionmotekipacho uan xionyolseujto?

4. ¿Keniuj techpaleuia maj tiyolseujtokan tein Jesús kijtoj ke panoskia itech itamian tonalmej?

⁴ Jesús kijtojka ke itech itamian tonalmej “miakkan” onkaskia tetsaujkakokolismej (Luc. 21:11). Tikmatiskej nejin techpaleuia maj tiyolseujtokan porin ipa tikmatiajya ke ijkon panoskia. Tikitaj ke tein Jesús kijtojka senkis mochiujtok, yejua ika tikchiuaj nejin tein kijtoj: “Amo ximomoujtikan” (Mat. 24:6).

5. 1) Kemej kijtoua Filipenses 4:8, 9, ¿toni moneki tiktajtaniskej Jehová keman peua se ueyi kokolis? 2) ¿Keniuj techpaleuia keman tikakij audio kampa moixtajtoltia Biblia?

⁵ Keman peua mochiua se ueyi kokolis ipa timotekipachouaj uan timomoujtiaj. Yejua nejon tein kipanok se tokniuj siuat akin monotsa Desi.b Keman itío, iprimo uan itapajtijkauj momikilijkej porin kinkuik COVID-19, yejua mouia maj no kikuini uan maj kimauani imomaj akin xiuejya katka. No mouia maj amo kipianiok tekit uan motajtaniaya kani kikuiskia tomin para kikouas tein kikuaskej uan para taxtauas renta. Nochipa ika tanemilijtoya nejon uan amo uelia kochia. Sayoj ke uelik oksepa yolseuik. ¿Toni kipaleuij? Senkis kiluiaya Jehová keniuj kinekia maj kipaleui para maj yolseujto uan para maj itech tanemiliani tein kipaleuiskia (xikonixtajtolti Filipenses 4:8, 9). Kikakia audio kampa moixtajtoltia Biblia uan ijkon kikakia Jehová. Yejua kijtoua: “Kemej tokniuan kualtsin taixtajtoltiaj, kichiuaya maj amo semi nimotekipachook uan maj nikelnamikini ke Jehová noka motekipachoua” (Sal. 94:19).

6. ¿Keniuj techpaleuia komo timomachtiaj Biblia toselti uan tiouij nechikolmej?

⁶ Keman mochiua se ueyi kokolis, mopata miak taman tein tikchiuayaj. Sayoj ke maski miak taman mopatas moneki tiksentokaskej timomachtiskej Biblia toselti uan tiaskej nechikolmej. Itech toamaixuan uan videos tikitaj keniuj seki tokniuan kisentokaj kitekitiliaj Jehová maski kipanouaj ouijkayomej kemej tejuan (1 Ped. 5:9). Nechikolmej techpaleuiaj maj itech titanemilikan tein kijtoua Biblia. Ompa no ueli tikinyolchikauaj oksekin uan no techyolchikauaj (Rom. 1:11, 12). Komo itech titanemiliaj keniuj Jehová kinpaleuiani itekitikauan keman mokokouaj, keman mouij oso keman momachiliaj ininselti, okachi iuan titakuaujtamatiskej uan senkis tikneltokaskej ke yejuatsin no techpaleuis.

7. ¿Keniuj uelis tikchiuaskej kemej tatitanil Juan?

⁷ Maj timochikauakan tiksentokaskej titajtoskej iniuan tokniuan. Se ueyi kokolis uelis kichiuas maj amo ueli tietokanok iniuan oksekin, hasta iniuan tokniuan. Komo ijkon panoua, xa uelis timomachiliskej kemej tatitanil Juan, akin semi kinekia kiitas itasojikniuj Gayo uan iuan tajtos (3 Juan 13, 14). Sayoj ke Juan kimatia ke amo ueliskia niman kiitas. Yejua ika, okachi kuali kijkuilouilij se amat uan kititanilij. Komo amo ueli tikinitaj tokniuan, xa ueliskia tikinnotsaskej oso tikchiuaskej se videollamada, oso uelis tikintajkuilouiliskej. Komo tiksentokaj titajtouaj iniuan tokniuan techpaleuia maj amo timomachilikan toselti uan maj okachi tiyolseujtokan. Uan komo semi timotekipachouaj, maj titajtokan iniuan tayekananij uan maj timokauakan maj techyolchikauakan (Is. 32:1, 2).

UELIS TIYOLSEUJTOSKEJ KEMAN PANOS SE TETSAUIT

8. ¿Keniuj se tetsauit uelis kichiuas amo xionyolseujtook?

⁸ Komo kampa tionnemi mochiuak se tetsauit, xa talolinik, semi kiouik oso taxotak uelis semi tionmotekipachos. Uan komo momikilij aksa akin tikontasojtaya oso tikonpoloj seki taman tein tikonpiaya, uelis tionmoyolkokos, tiontayokoyas uan hasta tionkualanis. Nejin amo kijtosneki ke okachi tikonpatiuita tein tikonpiaya oso ke amo semi tiontakuaujtamati iuan Jehová. Kemej tejuatsin tikonpanok se ueyi ouijkayot xa ipa amo kuali tionmomachilis, uan yejua ika sekin xa mitsonajsikamatiskej (Job 1:11). Sayoj ke maski tikpanoskej se ueyi ouijkayot, uelis tiyolseujtoskej. Maj tikitakan keniuj.

9. ¿Keniuj uelis techpaleuis tein Jesús kijtoj keman panos se tetsauit?

⁹ Sekin kinemiliaj ke amo keman panos se tetsauit kampa nemij. Sayoj ke tejuan tikelnamikij tein Jesús kijtoj. Tikmatij ke okachi mochiuaskej tetsaujmej uan xa uelis techijtakoskej. Jesús kiniluij imomachtijkauan ke achto ke tamiskia tein amo kuali semi taloliniskia uan mochiuaskiaj okseki tetsaujmej (Luc. 21:11). No kijtoj ke okachi mochiuaskia tein amo kuali, uan yejua nejon tein tikitaj axkan porin miakej tateuiaj uan kichiuaj teisa para kinmiktiskej tel miakej (Mat. 24:12). Jesús amo keman kijtoj ke nejin sayoj kinpanoskia akin amo kitekitiliaj Jehová, ta hasta seki itekitikauan tajyouianij porin panouani se tetsauit kampa nemij (Is. 57:1; 2 Cor. 11:25). Jehová xa amo kichiuas maj amo techpano tein amo kuali, sayoj ke techpaleuis maj tiyolseujtokan.

10. ¿Keyej tiknextiaj ke titakuaujtamatij iuan Jehová komo achto tikchiuaj tein techpaleuis keman mochiuas se tetsauit? (Proverbios 22:3).

¹⁰ Uelis tiyolseujtoskej keman panos se tetsauit komo tikmatijya toni tikchiuaskej. Komo achto tikchiuaj teisa tein techpaleuis amo kijtosneki ke amo titakuaujtamatij iuan Jehová, ta tiknextiaj ke titakuaujtamatij ke yejuatsin techyekpias. ¿Keyej ijkon tikijtouaj? Porin Biblia techiluia maj achto tikchiuakan tein techpaleuis keman panos tein amo kuali (xikonixtajtolti Proverbios 22:3). Inechikol Jehová miakpa techiluiani maj tikchiuakan tein techpaleuis keman panos se tetsauit. Techmatiltiani nejin itech amaixmej, nechikolmej uan keman techtitaniliaj amamej kampa techmatiltiaj teisa. Komo titakuaujtamatij iuan Jehová, tikchiuaskej axkan tein techiluiaj achto ke mochiuas se tetsauit.c

11. ¿Toni techmachtia tein kichiuak Margaret?

¹¹ Maj itech titanemilikan tein kipanok tokniuj Margaret. Tekiuanij kiluijkej maj kisani de ichan porin kampa ika nemia motatikuik. Kemej miakej sepasan kinekiaj choloskej, carros motelmiakilijkej uan amo ueliaok panouayaj. Onkaya miak pokti uan Margaret monekik mokauas itech icarro. Sayoj ke kemej kichiujkaya nochi tein monekia, uelik mopaleuij. Kiuikaya se mapa para kimatis kanikauin yas. Achto ipa yajkaya itech nejon ojti para kuali ixmatis. Kemej achto kichiuak nochi tein monekia, uelik momakixtij.

12. ¿Keyej tikchiuaj tein technauatiaj keman mochiua se tetsauit?

¹² Kemej tekiuanij kitemouaj techyekpiaskej oso maj mochiua teisa kemej moneki, xa uelis techiluiskej maj timokauakan tochan, maj tiakan okseko oso maj tikchiuakan okseki taman. Sekin amo kinekij kichiuaskej nejin porin amo kinekij kikauaskej tein kipiaj. Sayoj ke ¿toni tikchiuaj tiitekitikauan Dios? Biblia kijtoua: “Kemej nantakuaujtamatij iuan toTekotsin, xikintakamatikan taixyekananij akin kinixtaliaj nikan taltikpak, yeski se tekiuaj akin okachi ueyichiujkej oso taixyekananij, akin tekiuaj kintitani” (1 Ped. 2:13, 14). Inechikol Jehová no techiluia toni moneki tikchiuaskej para uelis timopaleuiskej. Miakpa techiluianij maj tikinmakakan tayekananij tein uelis ika technotsaskej uan techajsiskej komo mochiua se ijsiujkayot. ¿Tikchiuanijya nejin? Tokniuan xa uelis technauatiskej maj timokauakan tochan oso maj tikisakan. Xa no techiluiskej keniuj uelis tikseliskej tein moneki oso keniuj uan kemanian uelis tikinpaleuiskej oksekin. Komo amo titatakamatij, uelis techpanos tein amo kuali tejuan oso tayekananij akin semi techyekpiaj (Heb. 13:17). Margaret kijtoj: “Senkis nikmati ke kemej nikintakamatik tayekananij uan inechikol Jehová, uelik nimomakixtij”.

13. ¿Toni kinpaleuiani maj kisentokakan yolpakikan uan yolseujtokan tokniuan akin monekini kikauaskej ininchan?

¹³ Kemej mochiuaj tetsaujmej, neteuilismej oso oksekin takuejmolchiuaj, miakej tokniuan monekini kikauaskej ininchan. Yejuan mochikauaj niman momatiskej kampa ajsij uan kisentokaskej kiueyichiuaskej Jehová. Kisentokaj ‘kiteixmatiltijtinemij itajtol Dios’, ijkon kemej kichiujkej tokniuan itech yekinika siglo keman monekik nemitiuij okseko porin peuak kintajyouiltiaj (Hech. 8:4). Tokniuan akin monekini kikauaskej ininchan, semi kinpaleuia keman tanojnotsaj porin itech tanemiliaj tein kichiuas iTaixyekanalis Dios uan amo itech ininkuejmoluan. Nejon kinpaleuia maj kisentokakan yolpakikan uan maj yolseujtokan.

UELIS TIYOLSEUJTOSKEJ KEMAN TECHTAJYOUILTISKEJ

14. ¿Keyej keman techixnamikij uelis kichiuas maj amo tiyolseujtokanok?

¹⁴ Keman techixnamikij xa ouij techkisa tikchiuaskej seki taman tein techpaleuia maj tiyolseujtokan uan maj tiyolpakikan. Xa timouij maj tekiuanij techtsakuakan porin timonechikouaj, titanojnotsaj oso tikchiuaj okseki taman. Keman amo techkauaj maj tikchiuakan nejin, xa uelis timoteltekipachoskej uan tiknemiliskej toni panos satepan. Taixejekol maj ijkon timomachilikan. Sayoj ke maj amo tikauakan maj nejon kichiua maj amo titakuaujtamatikanok iuan Jehová, ijkon kemej Jesús kinnejmachtij itatojtokakauan (Juan 16:1, 2). Yejua ika, ¿toni uelis tikchiuaskej tein techpaleuis maj tiksentokakan tiyolseujtokan keman techixnamikiskej?

15. ¿Keyej amo moneki tikmouiliskej maj techtajyouiltikan? (Juan 15:20; 16:33).

¹⁵ Biblia kijtoua: “Nochin akin kinekiskej kiueyichiuaskej Dios kemej itatojtokakauan Cristo Jesús, no kintajyouiltiskej” (2 Tim. 3:12). Se tokniuj takat akin monotsa Andréi, ouij kikisak kineltokas nejin keman tekiuanij amo kinkaujkejok maj kiueyichiuakan Jehová itech altepet kampa nemi. Yejua kinemiliaya: “Nikan moajsij tel miakej tokniuan, amo uelis techtsakuaskej tinochin”. Maski kinemiliaya nejon amo yolseujtoya, ta nochipa motekipachojtoya. Sayoj ke okseki tokniuan takuaujtamatiaj iuan Jehová uan amo kinemiliayaj ke amo keman kintsakuaskiaj. Kimatiaj ke nejon ueliskia panos uan amo moteltekipachouayaj kemej Andréi. Yejua ika, yejua kiixtalij kichiuas kemej nejon tokniuan uan senkis takuaujtamatis iuan Jehová. Niman peuak yolseui uan axkan yolpaki maski onkakok miak kuejmolmej. Tejuan no uelis ijkon techpanos. Jesús ipa kijtoj ke techtajyouiltiskiaj, sayoj ke no kijtoj ke ueliskia titaxikoskej uan amo tikauaskej Jehová (xikonixtajtolti Juan 15:20; 16:33).

16. ¿Toni moneki tikchiuaskej keman techixnamikiskej?

¹⁶ Keman tekiuanij amo techkauaj maj tikueyichiuakan Jehová kemej ipa tikchiuaj, tokniuan itech kali Betel oso tayekananij uelis techiluiskej maj tikchiuakan seki taman para timoyekpiaskej, para tiksentokaskej tikseliskej tamachtilis uan tiksentokaskej titanojnotsaskej hasta kampa uelis. Komo ijkon panoua, maj tiktakamatikan tein techiluiskej, hasta keman amo tikajsikamatiskej keyej ijkon technauatiaj (Sant. 3:17). Uan maj amo keman tikinmatiltikan akin amo moneki kimatiskej teisa de tokniuan oso tein mochiua itech nechikol (Ecl. 3:7).

17. ¿Toni tikixtaliaj tikchiuaskej ijkon kemej tatitanilmej?

¹⁷ Satanás kinixnamiki itekitikauan Dios porin “kiteixmatiltiaj Jesús” (Apoc. 12:17). Maj amo tikauakan maj Satanás uan akin kinixyekana techmojmoujtikan. Keman tikteixmatiltiaj iTajtol Dios uan ika titamachtiaj maski techixnamikij, kichiua maj tiyolpakikan uan maj tiyolseujtokan. Itech yekinika siglo, keman taixyekananij judíos kinnauatijkej tatitanilmej maj amo tanojnotsanijok, yejuan kitakamatkej Dios. Kisentokakej tanojnotskej uan yolpakkej (Hech. 5:27-29, 41, 42). Moneki tikelnamikiskej ke keman tekiuanij amo techkauaj maj tikueyichiuakan Jehová, moneki kuali tikitaskej keniuj uelis titanojnotsaskej (Mat. 10:16). Komo timochikauaj tikchiuaskej nejin uelis tiyolseujtoskej porin tikmatij ke tikyolpaktiaj Jehová uan tikinpaleuiaj oksekin maj momakixtikan.

“DIOS AKIN TEYOLSEUIA NAMOUAN YETOS”

18. ¿Akoni ueli yekmelauj teyolseuia?

¹⁸ Maj senkis tikneltokakan ke hasta keman tikpanotoskej uejueyi ouijkayomej uelis tiyolseujtoskej. Ijkuak moneki tikelnamikiskej ke moneki maj Dios techyolseui porin sayoj yejua ueli yekmelauj teyolseuia. Maj titakuaujtamatikan iuan Jehová keman mochiuas se ueyi kokolis, se tetsauit oso keman techtajyouiltiskej. Maj tiktakamatikan tein technauatiskej itech inechikol uan maj itech titanemilikan tein tikseliskej satepan. Komo ijkon tikchiuaj, “Dios akin teyolseuia” touan yetos (Filip. 4:9). Itech okse tamachtilis tikitaskej keniuj uelis tikinpaleuiskej tokniuan maj kimachilikan ke Dios kinyolseuia keman kipanouaj ouijkayomej.