Maj okachi tikixmatikan Jehová ika tein kichijchiuak

1. ¿Toni kipaleuij Job maj okachi kiixmati Jehová?

ITECH nochi inemilis Job, miakej iniuan tajtouaya, sayoj ke xa okachi kielnamikia keman tajtoj iuan Jehová. Yejuatsin kiluijka Job maj kiita seki taman tein kualtsin tein kichijchiuak. Nejon kipaleuiskia maj kimati ke Jehová semi tamatkej uan maj takuaujtamati ke yejuatsin ueli kinyekpia itekitikauan. Job kiitak ke ijkon kemej Dios kinmaka tapialmej tein moneki para nemiskej, no kimakaskia tein kipoloskia (Job 38:39-41; 39:1, 5, 13-16). Keman Job itech tanemilij seki taman kemej nejin, okachi kimatik keniuj tamatia Dios.

2. ¿Keyej kemansa ouij techkisa tikitaskej tein Dios kichijchiuak?

² Tejuan no uelis okachi tikixmatiskej Dios komo tikitaj tein kichijchiuak. Sayoj ke xa ouij techkisas uan okachiok komo tinemij itech se ueyi xolal. Uan komo tinemij kampa onkak nejin tein kualtsin tein Dios kichijchiuak, xa amo tikxelouaj tiempo para tikitaskej. Yejua ika timomachtiskej keyej semi kuali komo tikixtaliaj tikitaskej. No timomachtiskej keniuj Jehová uan Jesús kuali ika tamachtijkej tein onkak uan tein uelis tikchiuaskej para maj kisentoka techmachti.

¿KEYEJ MONEKI TIKITASKEJ TEIN DIOS KICHIJCHIUAK?

3. ¿Keniuj tikmatij ke Jehová kinekia maj Adán kiyolpaktiani tein kichijchiujka?

³ Jehová kinekia maj yekinika takat yolpakini ika tein yejuatsin kichijchiuak. Yejua ika kitalij Adán itech se kualtsin xochital para maj kiixmatini, tatokani uan maj kiueyiltiani (Gén. 2:8, 9, 15). Xikonnemili keniuj momachilij Adán keman kiitak ke ixuayaj uan moskaltiayaj xochimej. Kiyekpias xochital Edén katka se tatiochiualis. Jehová no kinauatij Adán maj kintokaytiani tapialmej (Gén. 2:19, 20). Jehová ueliskia iselti kichiuas nejon, sayoj ke kinauatij maj Adán kichiuani. Xa Adán achto ke kiixtaliskia keniuj kintokaytiskia tapialmej, kuali kinitak keniuj tamatiaj uan tein kichiuayaj. Tikmatij ke semi kualtsin katka nejon tekit uan kipaleuij maj kiitani ke iTajtsin semi tamatkej, kimati kichiuas miak taman uan nochi tein kichijchiua semi kualtsin.

4. 1) ¿Keyej moneki tikitaskej tein Jehová kichijchiuak? 2) ¿Toni tein yejuatsin kichijchiuak okachi tikonuelita?

⁴ Se taman keyej moneki tikitaskej tein Jehová kichijchiuak yejua porin yejuatsin ijkon kineki. Dios techiluia: “Ximoixajokuikan iluikak uan xikitakan”. Uan satepan tajtani: “¿Akoni kichijchiuak nejin?”. Amo ouij se kimatis tanankilil (Is. 40:26). Jehová kichijchiuak miak taman ompa iluikak, itech taltikpak uan ueyiat, uan uelis techmachtis miak taman (Sal. 104:24). No xikonnemili keniuj techchijchiuak Dios. Techchijchiuak kemej uelis tiyolpakiskej keman tikitaskej nochi tein kualtsin. Uan no kemej uelis tikitaskej, tikakiskej, tikyekoskej, tikijnekuiskej uan tikmatokaskej tein kichijchiuak.

5. Kemej kijtoua Romanos 1:20, ¿keyej semi moneki maj tikitakan tein Dios kichijchiuak?

⁵ Okse taman tein Biblia kinextia ke moneki tikitaskej tein Jehová kichijchiuak yejua porin techpaleuia maj okachi tikixmatikan yejuatsin (xikonixtajtolti Romanos 1:20). Xikonnemili nejin, kemej kualtsin chijchiujtok nochi tein onkak kinextia ke Dios semi tamatkej, uan miak taman takual tein ueli tikyekouaj kinextia ke techtasojta. Keman tikitaj keniuj tamati Dios ika tein kichijchiuak, techpaleuia maj okachi tikixmatikan uan maj iuan timotokikan. Axkan maj tikitakan keniuj kikui Jehová tein kichijchiuak para techmachtis miak taman tein moneki.

DIOS TECHMACHTIA KENIUJ TAMATI IKA TEIN KICHIJCHIUAK

6. ¿Toni uelis techmachtis keman totomej uejka patanij?

⁶ Jehová kiixtalia kemanian kichiuas teisa. Nochi xiujmej, kemej itamian febrero uan itajkotian mayo, israelitas kinitayaj cigüeñas ke pataniaj para yaskej norte. Jehová kiniluij israelitas: “Hasta cigüeña tein patantinemi ejekaixko kimati kemanian moneki uejka patanis” (Jer. 8:7). Ijkon kemej Jehová kiixtalij kemanian moneki uejka patanis cigüeña, no ijkon kiixtalij kemanian kintatsakuiltis akin kichiuaj tein amo kuali. Keman tikitaj ke totomej uejka patanij techelnamiktia ke Jehová kiixtalijya kemanian kiixpolos tein amo kuali tein mochiua uan uelis titakuaujtamatiskej ke kichiuas (Hab. 2:3).

7. ¿Toni techmachtia keman patanij águilas? (Isaías 40:31).

⁷ Jehová kinmaka chikaualis itekitikauan. Itechkopa tanauatijkej Isaías, Dios motenkauak iniuan itekitikauan ke keman kimachiliskiaj ke amo chikaujkej uan kinekiskiaj mosenkauaskej, yejuatsin kinmakaskia chikaualis uan ijkon kemej yeskia “ajkopataniskej kemej águilas” (xikonixtajtolti Isaías 40:31). Israelitas miakpa kiitayaj ke keman kuali taejekatoya, águilas amo monekia mochikauaskej pataniskej. Nejin techelnamiktia ke ijkon kemej Jehová kinpaleuia nejon totomej, no uelis kinpaleuis itekitikauan uan kinyolchikauas. Yejua ika keman tikonitas se tototsin uejkapan patantok uan amo semi kinolinia iajtapaluan, xikonelnamiki ke Jehová no mitsonchikauas para tikonxikos ouijkayomej.

8. 1) ¿Toni kimachtij Job tein Dios kichijchiuak? 2) ¿Toni techmachtia tejuan?

⁸ Uelis titakuaujtamatiskej iuan Jehová. Keman Dios kinojnotsak Job kipaleuij maj okachi iuan takuaujtamati (Job 32:2; 40:6-8). Yejuatsin ika kinojnotsak miak taman tein kichijchiuak, kemej sitalimej, mixti uan keman tatikuini. No ika tajtoj tapialmej, kemej koujtajkuakouej uan caballo (Job 38:32-35; 39:9, 19, 20). Nochi tein kiiluij, amo sayoj kipaleuij Job maj kiita ke Jehová kipia miak chikaualis, ta no maj kiita ke semi tetasojta uan tamatkej. Nejin kipaleuij maj okachi takuaujtamati iuan Jehová (Job 42:1-6). Keman tejuan no timomachtiaj tein Jehová kichijchiuak, tikelnamikij ke yejuatsin semi tamatkej uan okachi chikauak ke tejuan. Uan no, uelis kiixpolos nochi ouijkayomej tein tikpiaj uan ijkon kichiuas. Nejon techpaleuia maj okachi iuan titakuaujtamatikan.

JESÚS KIKUIK TEIN DIOS KICHIJCHIUAK PARA TAMACHTIS AKONI ITAJTSIN

9, 10. ¿Toni techmachtia de Jehová keman tona uan keman kioui?

⁹ Jesús kuali kiixmatia nochi tein onkak. Kemej se “tekitikej tein ixmach”, kipiak tatiochiualis kipaleuis iTajtsin maj kichijchiuani nochi (Prov. 8:30). Uan keman Jesús yetoya nikan taltikpak, ika tajtoj tein Jehová kichijchiujka uan ika kinmachtij imomachtijkauan keniuj katka iTajtsin. Maj tikitakan seki taman.

¹⁰ Jehová kintasojta nochin. Keman Jesús tamachtij itech se tepet, ika kinnojnotsak imomachtijkauan ome taman tein Jehová kichijchiuak tein miakej amo kiitaj ke semi tapaleuia: tonaltsin uan kiouit. Nejin ome taman semi moneki para tiyoltoskej. Jehová nochin kinmaka tonaltsin uan kiouit para maj kinpaleui porin semi tetasojta (Mat. 5:43-45). Jesús ika tajtoj nejin para kinnextilis imomachtijkauan ke Jehová kineki maj tikintasojtakan nochin. Keman tikitaskej keniuj semi kualtsin tiotaki oso keniuj mixkiouit kualtsin taseselia, maj itech titanemilikan ke Jehová techtasojta uan amo techichikouia. Tein kichiua techmachtia ke no moneki titetasojtaskej uan tiknextiaj keman nochin tikinnojnotsaj ika Biblia.

11. ¿Keniuj uelis techyolchikauas komo tikinitaj totomej?

¹¹ Jehová techmaka tein moneki para tinemiskej. Keman Jesús tamachtij itech nejon tepet, no kijtoj: “Kuali xikinitakan totomej. Amo tatokaj nion kitekij tatok nion kisentiliaj, sayoj ke namoTajtsin akin yetok ne iluikak kintamaka”. Xa akin kikaktoyaj Jesús kiitayaj totomej patantinemiaj keman kintajtanij: “¿Xe namejuan amo okachi nantayekantokej ke totomej?” (Mat. 6:26). Semi kualtsin kemej Jehová techelnamiktia ke nochipa techmakas tein techpolos para tinemiskej (Mat. 6:31, 32). Nejin tein tamachtij kisentoka kinyolchikaua itekitikauan Dios. Se tokniuj ichpoch de España akin precursora kinekia mosenkauas porin amo kiajsia kani nemis. Sayoj ke okachi kuali momachilij keman kinitak seki tototsitsin kikuajtoyaj xinach uan seki takilomej. Yejua kijtoj: “Nejon nechelnamiktij ke komo Jehová kinyekpia, no nechyekpias nejua”. Tepitsin satepan tokniuj kiajsik kani nemis.

12. Kemej kijtoua Mateo 10:29-31, ¿toni techmachtiaj tototsitsin kemej tamati Jehová?

¹² Jehová techpatiuita tisejsemej. Achto ke Jesús kintitaniskia imomachtijkauan maj tanojnotsatij, kinpaleuij maj amo mouikan keman kinixnamikiskiaj (xikonixtajtolti Mateo 10:29-31). Kinyolchikauak keman ika tajtoj se tototsin tein semi kiixmatiaj ompa Israel. Itech nejon tonalmej, nejin tototsitsin amo patiyojkej katkaj. Sayoj ke Jesús kiniluij imomachtijkauan: “NamoTajtsin kuali kimati keman semej tototsitsin panuetsi”. Uan no kiniluij: “Namejuan okachi nantayekantokej ke miakej tototsitsin”. Ijkon kinextij ke Jehová kinpatiuitaya sejsemej, uan nejon kinpaleuij maj amo mouinij keman kinixnamikiskiaj. Xa keman tanojnotstiayaj itech uejueyi xolalmej uan xolaltsitsin uan kinitayaj nejin tototsitsin, kielnamikiaj tein Jesús kiniluijka. Keman no tikonitas se tototsin, xikonelnamiki ke Jehová semi mitsonpatiuita porin tejuatsin no okachi tiontayekantok ke “miakej tototsitsin”. Dios mitsonpaleuis xionmoyolchikaua keman mitsonixnamikiskej (Sal. 118:6).

¿TONI MONEKI TIKCHIUASKEJ PARA MAJ KISENTOKA TECHMACHTI TEIN DIOS KICHIJCHIUAK?

13. ¿Keniuj uelis kisentokas techmachtis tein Dios kichijchiuak?

¹³ Uelis tiksentokaskej tikixmatiskej Jehová keman tikitaj tein kichijchiuak. Yejua ika moneki tikxeloskej tiempo para tikitaskej tein onkak uan itech titanemiliskej toni techmachtia de yejuatsin. Xa ouij yeski tikchiuaskej nejon. Se tokniuj siuat de Camerún akin monotsa Géraldine kijtoua: “Kemej nimoskaltij itech se ueyi xolal, ouij nechkisa nikitas tein Jehová kichijchiuak”. Se tokniuj tayekankej akin monotsa Alfonso kijtoua: “Nikitani ke semi nechpaleuiani nikxelos tiempo para nietos noselti uan nikitas tein Jehová kichijchiuak uan niknemilis tein nechmachtia de yejuatsin”.

14. ¿Toni kimachtij David keman itech tanemilij tein Dios kichijchiuak?

¹⁴ Tekiuaj David itech tanemilij tein Dios kichijchiuak. Kiluij Jehová: “Keman nikita iluikak, tein tikchijchiuak ika momajpiluan, metsti uan sitalimej tein tejua tikchijchiuak, ¿toni chiujkej takat akin miki yejua ika tikelnamiktok […]?” (Sal. 8:3, 4). David amo sayoj kiitak keniuj kualtsin moitayaj sitalimej, ta no tein kimachtiayaj de Dios. Kiajsikamatik ke Jehová semi ueyichiujkej. David no itech tanemilij keniuj mochijchiuak iijtik imomaj. Keman kinemilij keniuj mochijchiujtiajki, okachi kimoujkaitak porin kiitak ke Jehová semi tamatkej (Sal. 139:14-17).

15. ¿Toni kualtsitsin taman tikonitani ke kinextia Jehová itech tein kichijchiuak? (Salmo 148:7-10).

¹⁵ Ijkon kemej David, amo moneki uejka tiaskej para tikitaskej uan itech titanemiliskej tein Dios kichijchiuak. Komo tikonita tein onkak kampa tionyetok, uelis tikonajsis miak kualtsitsin taman tein kinextia Jehová. Keman tonaltsin mitsontotonis xa tikonitas ke Jehová semi chikauak (Jer. 31:35). Keman tikonitas se tototsin kichijchiujtok ichan, xikonnemili keniuj Dios semi tamatkej. Keman tikonitas se itskuintsin kiauiltijtok ikuitapil xikonnemili keniuj Jehová semi yolpaki. Uan keman tikonitas se temomaj mauiltijtok iuan ikonetsin xikontasojkamatili Jehová porin semi tetasojta. Uelis okachi tikixmatiskej toTajtsin keman tikitaskej tein kichijchiuak porin nochi tein onkak kiueyitaliaj, yeski ueyi oso tsikitsin, uejka oso amo (xikonixtajtolti Salmo 148:7-10).

16. ¿Toni moneki tikixtaliskej tikchiuaskej?

¹⁶ Amo akin okachi tamattok, tetasojta, kimati kichiuas miak taman uan chikauak ke toDios. Uelis tikitaskej ke ijkon tamati uan ke kinextia okseki taman komo tikitaj tein kichijchiuak, maj tikxelokan tiempo para tikitaskej uan tiknemiliskej toni techmachtia de Jehová. Komo ijkon tikchiuaj, okachi timotokiskej iuan toTachijchiujkauj (Sant. 4:8). Itech okse tamachtilis tikitaskej keniuj tetatmej uelis ika kinpaleuiskej ininkoneuan tein Jehová kichijchiuak para maj iuan motokikan.