Maj nochipa xotato “tit tein iaxka Jah”

1. ¿Keniuj Biblia kijtoua ke tamati keman yekmelauj se tetasojta?

BIBLIA kijtoua ke netasojtalis “xota kemej tit tein semi techichinoj, tit tein iaxka Jah. Miak at amo ueli kichiua maj seui netasojtalis, nion uejueyi amej tein ijsiujka motalojtokej uelis kiuikas” (Cant. 8:6, 7).b ¡Tel kualtsin kemej kimelaua! Nejin tajtolmej technextiliaj ke se takat uan isiuatsin uelis nochipa motasojtaskej uan amo teyi uan nion akin uelis kintsakuilis.

2. ¿Toni moneki kichiuas se takat uan isiuatsin para maj nochipa motasojtakan?

² Takat uan isiuatsin moneki mosenpaleuiskej para motasojtaskej nochipaya. Maj itech titanemilikan tit, komo amo tiknekij maj seui moneki tiktatokiliskej. Komo amo teyi tiktaliliaj, tit seuis. No ijkon panoua keman se takat uan isiuatsin motasojtaj: moneki kichiuaskej tein kinpaleuis maj nochipa motasojtakan. Sayoj ke kemansa, keman amo teyi tomin, keman mokokouaj, uan ouijkayomej tein kipiaj keman kiniskaltiaj ininkoneuan uelis kichiuas maj yolik amo motasojtakanok. Komo tejuatsin tikonpia motakatsin oso mosiuatsin, ¿toni uelis tikonchiuas para maj nochipa xotato “tit tein iaxka Jah”? Itech nejin tamachtilis tikitaskej eyi taman tein mitsonpaleuis xionyolpaki uan nochipa kuali iuan xionmouika.c

XIKSENTOKAKAN OKACHI KUALI XIMOUIKAKAN IUAN JEHOVÁ

3. ¿Keyej takat uan isiuatsin moneki kuali mouikaskej iuan Jehová para maj nochipa motasojtakan? (Eclesiastés 4:12; no xikonita taixkopin).

³ Para maj kisentoka xotato “tit tein iaxka Jah”, takat uan isiuatsin moneki mosenpaleuiskej okachi kuali mouikaskej iuan Jehová. ¿Keyej? Komo nochin omen kinekij kuali mouikaskej iuan yejuatsin, ika nochi ininyolo kitakamatiskej tein tayolmajxitia. Nejin tapaleuis maj amo kipiakan kuejmolmej uan maj kixikokan tein yeski ouijkayot tein uelis kichiuas maj amo motasojtakanok (xikonixtajtolti Eclesiastés 4:12). Akin kuali mouikaj iuan Jehová mochikauaj kichiuaskej kemej yejuatsin keman yolkualmej, tetapojpoluiaj uan amo yolijsiuij (Efes. 4:32–5:1). Keman se takat uan isiuatsin kichiuaj nejin, okachi motasojtaj. Se tokniuj siuat akin monotsa Lena uan monamiktij panoua 25 xiujmejya, kijtoua: “¡Amo ouij tekisa se kitasojtas uan se kipoujkaitas aksa akin kuali mouika iuan Dios!”.

4. ¿Keyej Jehová kinixpejpenak José uan María para maj mochiuanij itatuan Mesías?

⁴ Maj ika titajtokan aksa akin nemik ne uejkauj. Maski David kinpiaya miakej ichankauan, Jehová kinixpejpenak José uan María para maj mochiuanij itatuan Mesías. ¿Keyej yejuan kinixpejpenak? Porin nochin omen kuali iuan mouikayaj uan kimatia ke nochipa kiyolpaktiskiaj. ¿Toni uelis kinmachtis akin monamiktijkejya tein kichiujkej José uan María?

5. ¿Keniuj tetakauan uelis kichiuaskej kemej José?

⁵ José mokauaya maj Jehová kiixyekana uan nejon kipaleuiaya maj mochiua okachi kuali tetakauj. Kemej expa Jehová kinauatij toni monekia kichiuas para kinyekpias ichankauan. Uan niman kichiuak maski ouij kikisak (Mat. 1:20, 24; 2:13-15, 19-21). Kemej kitakamatik Jehová, José uelik kiyekpiak María para maj amo teyi kipanouani. Xa nejon kichiuak maj María okachi kitasojtani uan maj kipoujkaitani. Namejuan tetakauan, no uelis nankichiuaskej kemej José uan nankitemoskej tayolmajxitilismej itech Biblia tein namechpaleuis xikinyekpiakan namochankauan.d Komo nankichiuaj nejin maski monekis nankipataskej seki taman, nankinextiskej ke nankitasojtaj namosiuatsin uan okachi kuali namouikaskej. Se tokniuj siuat akin kayot Vanuatu uan panoua 20 xiujmejya ke monamiktij, kijtoua: “Keman nikita ke notakatsin kitemoua maj kiixyekana Jehová uan kichiua tein yejuatsin tanauatia, okachi nikpoujkaita. Kuali nimomachilia uan nitakuaujtamati itech tein kiixtalia kichiuas”.

6. ¿Toni uelis kinmachtis siuatsitsin tein kichiuak María?

⁶ María kuali mouikaya iuan Jehová uan iuan takuaujtamatia. Amo kichiuaya nejin porin José no takuaujtamatia uan kuali taixyekanaya, ta porin yejua kuali kiixmatia iTajtol Dios (Lucas 1:46). No kixelouaya tiempo para tanemilis (Luc. 2:19, 51). María no katka kuali tesiuatsin porin kuali mouikaya iuan Jehová. Miakej tokniuan siuamej mochikauaj kichiuaskej kemej yejua. Maj tikitakan tein kipanok se tokniuj siuat akin monotsa Émiko. Yejua kijtoua: “Keman katka noselti nejua nikixtaliaya kemanian nimomachtis. Sayoj ke satepan ke nimonamiktij, notakatsin toka motataujtiaya uan kiitaya maj tinochin kuali timouikakan iuan Jehová. Nikitak ke nitakuaujtamatia porin notakauj kichiuaya nochi. Nikmatia ke nejua monekia nikchiuas maj kuali nimouika iuan Jehová. Yejua ika axkan nikxeloua tiempo para nimotataujtis noselti, nikixtajtoltis Biblia uan itech nitanemilis” (Gál. 6:5). Siuatsitsin, komo namochikauaj okachi kuali namouikaskej iuan Jehová, namotakauan okachi namechtasojtaskej uan namechiluiskej ke kuali tein nankichiujtokej (Prov. 31:30).

7. ¿Toni uelis kinmachtis akin monamiktijkejya tein kichiujkej José uan María?

⁷ José uan María no mosenpaleuijkej para nochipa kuali mouikaskej iuan Jehová. Yejuan kimatiaj ke semi monekia kisenueyichiuaskej iniuan ininkoneuan (Luc. 2:22-24, 41; 4:16). Xa kemansa ouij katka, okachiok keman peuak kinpiaj oksekin konemej, sayoj ke amo teyi kintsakuilij. ¡Nejin semi kinmachtia akin monamiktijkejya! Komo no nankinpiaj konemej, xa ouij namechkisa nanyaskej nechikolmej uan nankixeloskej tiempo para nankiueyichiuaskej Jehová iniuan namochankauan. Uan para namosenmachtiskej uan namosentataujtiskej sayoj nanomen xa okachi ouij yeski. Sayoj ke xikelnamikikan ke komo nankisenueyichiuaj Jehová, okachi kuali iuan namouikaskej uan namejuan nanomen no. Yejua ika nochipa xiktemokan nankiueyichiuaskej Jehová.

8. Komo akin monamiktijkejya kipiaj kuejmolmej, ¿toni uelis kinpaleuis keman taueyichiuaskej kemej kalyetonij?

⁸ ¿Toni uelis nankichiuaskej komo nankipiaj kuejmolmej? Xa amo nankinekiskej nantaueyichiuaskej kemej kalyetonij. Komo ijkon, peua ximomachtikan teisa tein amo ouij, tein nankiuelitaskej uan tein nanomen nankiixpejpenaskej. Nejin yejua yekinika taman tein namechpaleuis okachi ximotasojtakan uan xiknekikan nankisenueyichiuaskej Jehová.

XIKXELOKAN TIEMPO PARA NANSENYETOSKEJ

9. ¿Keyej takat uan isiuatsin moneki kixeloskej tiempo para senyetoskej?

⁹ Akin monamiktijkejya uelis nochipa motasojtaskej komo kixelouaj tiempo para senyetoskej, nejon kinpaleuis maj kimatikan tein kinemiliaj uan tein kimachiliaj (Gén. 2:24). Lilia uan Ruslán monamiktijkej panoua 15 xiujmejya, tepitsin satepan ke monamiktijkej yejuan kiitakej se taman tein ueliskia kinpanos. Lilia kijtoua: “Tikitakej ke xa amo ueliskia tikxeloskej tiempo para tisenyetoskej kemej tiknemiliayaj, porin nochipa tikchiujtoyaj teisa itech totekiuj oso tokalijtik, uan satepan tikinpiakej konemej. Tikajsikamatkej ke komo amo tikxelouayaj tiempo para tisenyetoskej, amo kuali timouikaskiajok”.

10. ¿Keniuj akin monamiktijkejya uelis kichiuaskej tein kijtoua Efesios 5:15, 16?

¹⁰ ¿Toni moneki kichiuaskej takat uan isiuatsin para senyetoskej? Xa moneki kiixtaliskej kemanian kichiuaskej uan amo sayoj komo kemantij (xikonixtajtolti Efesios 5:15, 16). Se tokniuj takat akin nemi Nigeria uan monotsa Uzondu kijtoua: “Keman nikixtalia toni nikchiuas no nikxeloua tiempo keman nietos iuan nosiuatsin. Nejua nikita ke nikxelos nejin tiempo semi moneki” (Filip. 1:10). Maj tikitakan tein kichiua Anastasia, isiuatsin se tokniuj takalpanojkej de Moldavia. Yejua kijtoua keniuj kuali kikui itiempo: “Nikchiua seki tekimej kalijtik keman notakatsin kichiua seki taman de nechikol. Ijkon, satepan ueli tisenyetokej”. Uan, ¿komo onkak miak taman tein moneki nankichiuaskej uan ouij namechkisa nankipiaskej tiempo para nansenyetoskej?

11. ¿Toni tekimej kisenchiuayaj Áquila uan Priscila?

¹¹ Akin monamiktijkejya uelis kinmachtis miak taman tein kichiuayaj Áquila uan Priscila, tokniuan itech yekinika siglo semi kintasojtayaj (Rom. 16:3, 4). Maski Biblia amo semi ika tajtoua keniuj mouikayaj, kemaj kijtoua ke sentekitiaj, sentanojnotsayaj uan kinsenpaleuiayaj oksekin (Hech. 18:2, 3, 24-26). Uan keman Biblia ininka tajtoua Áquila uan Priscila, yejuan nochipa senyetoyaj.

12. ¿Toni uelis kisenchiuaskej akin monamiktijkejya para okachi senyetoskej? (No xikonita taixkopin).

¹² ¿Keniuj akin monamiktijkejya uelis kichiuaskej kemej Áquila uan Priscila? Itech xiontanemili nochi tekimej tein nansejsemej moneki nankichiuaskej. Okachi kuali amo xikchiuakan namojsejselti, ta ximosenpaleuikan. Áquila uan Priscila sentanojnotsayaj. ¿Namomattokej no ijkon nankichiuaskej? Áquila uan Priscila no sentekitiaj. Xa maski amo sekosan nantekitij uelis nakisenchiuaskej seki tekimej kalijtik (Ecl. 4:9). Komo namosenpaleuiaj, nakimachiliskej ke amo namoselti uan okachi uelis namonojnotsaskej. Robert uan Linda monamiktijkej panoua 50 xiujmejya. Robert kijtoua: “Tein melauj, amo semi tikemantij para tisenyetoskej. Sayoj ke keman nitapajpaktok uan nosiuatsin tauajuatstiuj oso keman nitekititok kalan uan yejua nechajsiti uan nechpaleuia, semi niyolpaki. Keman tiksenchiuaj teisa, okachi kuali timouikaj uan okachi timotasojtaj”.

13. ¿Toni moneki kichiuaskej takat uan isiuatsin komo kinekij okachi kuali mouikaskej?

¹³ Nochipa xikelnamikikan ke maski nansenyetoskej amo kijtosneki ke kuali namouikaj. Se tokniuj de Brasil akin kipia itakatsin kijtoua: “Onkak miak taman tekimej tein moneki tikchiuaskej, yejua ika ueliskia tiknemiliskej ke kemej tisennemijya amo moneki tikxeloskejok tiempo para tisenyetoskej. Sayoj ke nikitani ke amo sayoj moneki tisennemiskej, ta no moneki nikitas toni kipoloua notakatsin”. Xikonita toni kichiuanij Bruno uan isiuatsin Tays para kimatiskej keniuj uelis mosenpaleuiskej. Bruno kijtoua: “Para tiyolpakiskej keman tisenyetokej, okseko tikintaliaj tocelulares”.

14. ¿Toni uelis kichiuaskej akin monamiktijkejya komo amo kiuelitaj senyetoskej?

¹⁴ Uan, ¿komo amo nankiuelitaj nansenyetoskej? Xa tataman tein nankiuelitaj nankichiuaskej oso amo namouelitiliaj tein nankichiuaj. ¿Toni uelis nankichiuaskej komo ijkon namechpanoua? Itech xiontanemili tit tein achto ika titajtojkej. Keman peua xota, yolik xotatiuj. Uan moneki se kitatokilijtias para okachi xotas. ¿Keyej amo no ijkon nankichiuaj? Mojmostaj xikixtalikan tepitsin nansenyetoskej. Xiktemokan nankisenchiuaskej teisa tein nochin nanomen nankiuelitaj uan tein amo namechkualantis (Sant. 3:18). Komo nankisenchiuaj teisa tejtepitsitsin, oksepa yolik peuas namotasojtaskej.

XIMOPOUJKAITAKAN

15. ¿Keyej akin monamiktijkejya semi moneki maj mopoujkaitakan?

¹⁵ Takat uan isiuatsin semi moneki mopoujkaitaskej, nejin tamati kemej ejekat tein kichiua maj tit xota. Komo amo onkak ejekat, tit uelis niman seuis. No ijkon, takat uan isiuatsin amo motasojtaskejok komo amo mopoujkaitaj. Sayoj ke komo kichiuaj, kisentokaskej motasojtaskej. Sayoj ke nejin amo kijtosneki ke tiontapoujkaita porin tejuatsin ijkon tikonnemilia, ta nejin kijtosneki ke komo motakatsin oso mosiuatsin kimachilia ke tikonpoujkaita. Penny uan Aret monamiktijkej panoua 25 xiujmejya. Penny kijtoua: “Kemej timopoujkaitaj, tokalijtik nochipa timotasojtaj, tikijtouaj tein tiknemiliaj uan tein tikmachiliaj porin nejua uan notakatsin tikitaj ke semi moneki”. ¿Uan toni uelis tikonchiuas para maj motakatsin oso mosiuatsin kimachili ke tikonpoujkaita? Maj tikitakan tein kichiujkej Abrahán uan Sara.

16. ¿Keniuj tetakauan uelis kichiuaskej kemej Abrahán? (1 Pedro 3:7; no xikonita taixkopin).

¹⁶ Abrahán kipoujkaitak Sara. Kikakia tein kinemiliaya uan kimatia tein kimachiliaya. Se tonal keman Sara semi motekipachojtoya, kitaueliluij Abrahán tein kikualantijka uan hasta kitajtakoltij. Sayoj ke Abrahán amo iuan kualanik nion kiluij teisa tein kiyolkokoskia, kuali kiixmatia uan kimatia ke Sara mokauaya maj kiixyekana uan kipaleuiaya ika tein kiixtaliaya. Kuali kikakik uan kitemoj kimelauas kuejmol (Gén. 16:5, 6). ¿Toni techmachtia? Ke tetakauan yejuan akin kiixtaliaj toni kichiuaskej kemej kalyetonij (1 Cor. 11:3). Sayoj ke kemej kitasojta isiuatsin, kikaki tein kinemilia uan okachiok komo tein kiixtalia, uelis kipaleuis oso kijtakos (1 Cor. 13:4, 5). Uan no, kemansa xa isiuatsin amo kuali momachilis uan kinekis kiluis keniuj momachilia. ¿Tikonpoujkaita uan tikonajsikamati tein kimachilia keman tikonkaki? (Xikonixtajtolti 1 Pedro 3:7). Angela uan Dimitri kiajxitijtokejya kemej 30 xiujmej ke monamiktijkej. Angela kijtoua toni kichiua itakatsin para kinextilis ke kipoujkaita: “Dimitri kuali nechkaki keman nimoyolkokojtok oso keman nikneki nitajtos. Amo yolijsiui nouan maski nikualantok oso nichokasneki”.

17. ¿Keniuj siuatsitsin akin kipiaj inintakatsin uelis kichiuaskej kemej Sara? (1 Pedro 3:5, 6).

¹⁷ Sara kinextij ke kipoujkaitaya Abrahán porin kipaleuiaya tein kiixtaliaya kichiuas (Gén. 12:5). Se tonal, Abrahán kuali kinselij akin kikalpanotoj maski amo kinchixtoya. Yejua ika kinauatij Sara maj kikauani tein kichiujtoya uan maj kinchijchiuani miak pantsitsin (Gén. 18:6). Sara niman kichiuak tein Abrahán kinauatijka. Siuatsitsin, namejuan uelis nankichiuaskej kemej Sara uan nankipaleuiskej tein kiixtalia namotakatsin, komo nankichiuaj, okachi kuali namouikaskej (xikonixtajtolti 1 Pedro 3:5, 6). Dimitri, akin achto ika titajtojkej, kijtoua toni kichiua isiuatsin para kinextilis ke kipoujkaita: “Nikmati ke keman nikixtalis nikchiuas teisa, nosiuatsin nochipa nechpaleuis maski amo kiuelitas. ¡Keman amo kuali kisa teisa, yejua amo nechtajtakoltia, semi niktasojkamati maj Angela ijkon kichiua!”. ¡Amo ouij se kitasojtas aksa akin tepoujkaita!

18. ¿Toni panoua komo akin monamiktijkejya kitemouaj nochipa motasojtaskej?

¹⁸ Satanás amo kineki maj tokniuan akin monamiktijkejya kisentokakan motasojtakan. Kimattok ke komo takat uan isiuatsin amo motasojtajok, no uelis kikauaskej Jehová. ¡Sayoj ke akin yekmelauj motasojtaj amo uelis kintsakuilis nion teyi! Yejua ika ximotasojtakan kemej kijtoua amatajkuilol El Cantar de los Cantares. Nanomen xikyolpaktikan Jehová uan xikixtalikan tiempo para nansenyetoskej. Xikpoujkaitakan tein kimachilia uan xikitakan tein kipoloua namotakatsin oso namosiuatsin. Komo ijkon nankichiuaj, nankiueyitaliskej Jehová akin kichiua maj yekmelauj se tetasojta uan namotasojtaskej kemej tit tein kitatokiliaj, tein amo keman seui.