¿Nechnankilia Jehová keman niktataujtia?

1, 2. ¿Keyej uelis tiknemiliskej ke Jehová amo techkaki keman tiktataujtiaj?

“MAJ yejua Jehová okachi mitsyolpakti, uan yejua mitsmakas tein tikyolnejneki” (Sal. 37:4). ¡Tel kualtsin tein kijtoua nejin texto! Sayoj ke, ¿monekiskia maj tiknemilikan ke Jehová niman techmakas nochi tein tiktajtaniaj? ¿Keyej semi moneki maj timotajtanikan nejin? Itech xiontanemili seki taman tein panouani. Se tokniuj siuat akin amo kipia itakatsin kiluia Jehová ke kineki kiselis Tamachtilis para akin kiteixmatiltiaj iTaixyekanalis Dios, sayoj ke panoua miak xiujmej uan amo kiyoleuaj. Se tokniuj telpoch akin mokokoua, kitataujtia Jehová maj kipajti para okachi kitekitilis itech nechikol, sayoj ke amo pajti. Seki tetatmej kitataujtiaj Jehová para maj kipaleui ininkoneuj maj amo kikaua yejuatsin, maski ijkon kiixtalia amo kitekitilisok.

² Tejuatsin xa tikontajtaniani teisa Jehová uan amo mitsonnankiliani. Yejua ika xa tikonnemilia ke Jehová kinnankilia oksekin keman kitataujtiaj sayoj ke tejuatsin amo, oso ke amo mitsonmaka tein tikontajtania porin tikonchiuak tein amo kuali. Ijkon momachilij se tokniuj siuat akin monotsa Janice.b Yejua uan itakatsin kiluijkej Jehová ke kinekiaj tapaleuitiuij Betel. Janice kijtoua: “Niknemiliaya ke niman technotsaskiaj”. Sayoj ke panok miak metsti uan xiujmej uan amo kinnotskej. Janice kijtoua: “Semi nimotayokoltiaya uan amo nikajsikamatia keyej amo techyoleuayaj. Niknemiliaya ke xa tikchiujkaj teisa tein amo kiyolpaktia Jehová. Miakpa niktataujtijka ke tiknekiaj titapaleuiskej Betel uan amo nikajsikamatia keyej amo nechnankiliaya”.

3. ¿Toni tikitaskej itech nejin tamachtilis?

³ Xa kemansa timotajtaniaj ox Jehová kikaki keman tiktataujtiaj. Sekin itekitikauan Dios ne uejkauj no motajtanijkej nejon (Job 30:20; Sal. 22:2; Hab. 1:2). ¿Toni uelis mitsonpaleuis xikonneltoka ke Jehová mitsonnankilia keman tikontataujtia? (Sal. 65:2). Para tiknankiliskej nejin netajtanil, yekinika maj timomachtikan nejin eyi taman: 1) ¿Toni kichiuas Jehová? 2) ¿Toni kineki Jehová maj tikchiuakan tejuan? Uan 3) ¿keyej xa monekis maj tikpatakan tein titajtanij?

¿TONI KICHIUAS JEHOVÁ?

4. Kemej kijtoua Jeremías 29:​12, ¿toni motenkauani Jehová?

⁴ Jehová motenkaua ke techkakis keman tiktataujtiskej (xikonixtajtolti Jeremías 29:12). ToDios kintasojta itekitikauan uan nochipa kinkaki keman kitataujtiaj (Sal. 10:17; 37:28). Sayoj ke nejon amo kijtosneki ke nochipa techmakas tein tiktajtaniskej. Xa monekis timochiaskej hasta maj mochiua xochital para maj Jehová techmaka tein tiktajtaniaj.

5. ¿Toni kielnamiki Jehová keman kikaki tonetataujtiluan?

⁵ Keman Jehová technankilia kielnamiki tein kiixtalijtok kichiuas (Is. 55:​8, 9). Yejuatsin kineki maj nikan taltikpak momiakilikan akin kitakamatiskej uan mokauaskej maj kinixyekana. Sayoj ke Satanás kijtoj ke okachi tiyolpakiskiaj komo toselti timoixyekanaj (Gén. 3:​1-5). Jehová kikauak maj toselti timoixyekanakan para kinextis ke Satanás takajkayaua, uan yejua ika axkan tikpiaj miak ouijkayomej (Ecl. 8:9). Tikmatij ke Jehová ayamo niman kiixpolos nochi nejon ouijkayomej. Komo kichiuaskiaya nejon, akin amo kineltokaj yejuatsin kinemiliskiaj ke ueli ininselti moixyekanaj uan ke ueli kiixpolouaj nochi nejon ouijkayomej.

6. ¿Keyej moneki tikneltokaskej ke kemej Jehová technankilia kinextia ke tetasojta uan ke kichiua tein kuali yetok?

⁶ Maski itekitikauan Jehová kitajtaniskej sayoj se taman, yejuatsin tataman kemej kinnankilia. Keman tekiuaj Ezequías semi mokokouaya, kitataujtij Jehová maj kipajti uan yejuatsin kipajtij (2 Rey. 20:​1-6). Sayoj ke keman tatitanil Pablo kitataujtij Jehová maj kikixtiliani teisa tein katka ‘kemej se uitsti itech inakayo’, tein xa katka se kokolis, yejuatsin amo kikixtilij (2 Cor. 12:​7-9). Maj tikelnamikikan tein kinpanok tatitanilmej Santiago uan Pedro. Tekiuaj Herodes kinekia kinmiktis. Maski tokniuan itech nechikol ika motataujtijkej Pedro uan xa no Santiago, ipa kimiktijkej Santiago, uan Jehová kimakixtij Pedro ika se milagro (Hech. 12:​1-11). Xa timotajtaniskej keyej Jehová kimakixtij Pedro uan Santiago amo. Maski Biblia amo kijtoua keyej, tikmatij ke Jehová nochipa “kichiua tein kuali” uan ke yejuatsin kintasojtaya nochin omen (Deut. 32:4; Apoc. 21:14).c Xa kemansa Jehová amo technankilia kemej tiknekiskiaj. Sayoj ke kemej tikmatij ke yejuatsin nochipa tetasojta uan kichiua tein kuali yetok keman technankilia, amo tikijtouaj ke amo tikuelitakej kemej technankilij (Job 33:13).

7. ¿Toni moneki amo tikchiuaskej uan keyej?

⁷ Timochikauaj amo tikitaskej tein kinpanoua oksekin iuan tein tejuan techpanoua. Xa tiktajtanijkej Jehová se taman sayoj ke yejuatsin amo techmaka. Satepan tikmatij ke aksa no kitajtanij nejon uan nesi ke yejua kemaj kinankilij. Yejua nejon tein kipanok se tokniuj siuat akin monotsa Anna. Keman itakatsin Matthew kipiaya cáncer, ome tokniuan siuamej akin xiuejkejya no kipiayaj cáncer, isiuatsin kitataujtij Jehová para maj pajti. Anna no ininka motataujtiaya nejon ome tokniuan. Uan nejon omen tokniuan pajtikej, sayoj ke Matthew momikilij. Yekinika, motajtaniaya ox Jehová kinpaleuijka nejon tokniuan para maj pajtikan uan komo ijkon, keyej itakatsin amo no kipaleuij maj pajti. Amo senkis tikmatij keyej tokniuan pajtikej, sayoj ke kemaj tikmatij ke Jehová kiixpolos nochi tein techtajyouiltia uan kinejneki kichiuas maj oksepa nemikan itekitikauan akin semi kintasojta (Job 14:15).

8. 1) Kemej kijtoua Isaías 43:​2, ¿toni kichiua Jehová para techpaleuis? 2) ¿Keniuj netataujtil techpaleuia keman tikpiaj ouijkayomej? (Xikonita video Netataujtil techpaleuia maj titaxikokan).

⁸ Jehová nochipa techpaleuis. ToTajtsin Jehová, techtasojta uan amo kineki maj titajyouikan (Is. 63:9). Sayoj ke amo techajchiuilia nochi ouijkayomej tein tikpiaj tein Biblia kijtoua ke tamatij kemej uejueyi amej uan tit (xikonixtajtolti Isaías 43:2). Yejuatsin motenkaua ke techpaleuis maj ‘tikpanauikan’ tein yeski ouijkayot, uan maski semi titajyouijtoskej kijtoua ke techpaleuis maj nochipa kuali timouikakan iuan. Uan no, Jehová techmaka ichikaualis para techpaleuis maj titaxikokan (Luc. 11:13; Filip. 4:13). Yejua ika tikmatij ke nochipa tikpiaskej tein moneki para titaxikoskej uan tiksentokaskej tiktekitiliskej Jehová.d

¿TONI KINEKI JEHOVÁ MAJ TIKCHIUAKAN TEJUAN?

9. ¿Keniuj Santiago 1:​6, 7 kinextia ke moneki maj titakuaujtamatikan ke Jehová techpaleuis?

⁹ Jehová kineki maj iuan titakuaujtamatikan (Heb. 11:6). Xa semi ouij tein tikpanotoskej uan tiknemiliskej ke Jehová amo techpaleuis. Sayoj ke Biblia techiluia ke ichikaualis Dios techpaleuis maj kemej yeskia ‘ueli titejkokan itech se tepamit’ (Sal. 18:29). Yejua ika maj amo tiknemilikan ke Jehová amo techpaleuis. Ta maj tiktataujtikan uan maj titakuaujtamatikan ke yejuatsin technankilis (xikonixtajtolti Santiago 1:​6, 7).

10. Xikonijto toni moneki tikchiuaskej satepan ke tiktajtaniskej Jehová maj techpaleui.

¹⁰ Jehová kineki maj no tikchiuakan teisa satepan ke tiktataujtiaj. Maj tiknemilikan ke se tokniuj kineki yas se ueyi nechikol tein uejkaua eyi tonal, uan kitajtania Jehová maj kipaleui maj ueli kinojnotsa akin kitekitilia para maj kikaua maj youi. ¿Keniuj Jehová uelis kinankilis inetataujtil? Xa kiyolchikauas para maj iuan tajto akin kitekitilia. Sayoj ke yejua tokniuj akin moneki yas uan iuan tajtos uan xa miakpa monekis kinojnotsas. Xa hasta ueliskia kiluis ke uelis tekitis okse tonal uan ke amo moneki maj kitaxtauikan tonalmej keman amo tekitis.

11. ¿Keyej moneki maj miakpa tiktajtanikan Jehová tein tiknekij?

¹¹ Jehová kineki maj miakpa tikiluikan tein techtekipachoua (1 Tes. 5:17). Jesús kiteajsikamatiltij ke seki taman tein tiktajtaniskej Jehová amo niman techmakas (Luc. 11:9). Yejua ika maj amo timosenkauakan uan maj semi timotataujtikan (Luc. 18:​1-7). Keman tiksentokaj miakpa tiktajtaniaj Jehová teisa, tiknextiaj ke yekmelauj tiknekij maj mochiua uan ke tikneltokaj ke yejuatsin techpaleuis.

¿KEYEJ XA MONEKIS MAJ TIKPATAKAN TEIN TITAJTANIJ?

12. 1) ¿Toni ueliskia timotajtaniskej, uan keyej? 2) ¿Toni moneki tikelnamikiskej keman tiktataujtiskej Jehová para tiknextiskej ke tikpoujkaitaj? (Xikonita recuadro “¿Niknextia ke nikpoujkaita Jehová keman niktajtania teisa?”).

¹² Komo Jehová amo techmaka tein tiktajtanijkej, uelis timotajtaniskej eyi taman. Yekinika “¿Kuali yetok tein nitajtani?”. Kemansa tiknemiliaj ke tikmatij toni okachi techpaleuis. Sayoj ke tein titajtanij xa amo yejua tein techpaleuis satepan. Xa tiktataujtiaj Jehová keniuj tiknekij maj moyektali se kuejmol, sayoj ke xa onkas okse taman kemej uelis okachi kuali moyektalis. Uan xa kemansa tein titajtanij amo yejua tein Jehová kineki (1 Juan 5:14). Maj oksepa ininka titanemilikan tetatmej akin ininka titajtojkej itech párrafo 1. Yejuan kitajtanijkej Jehová maj kichiuani maj ininkoneuj kisentokani kitekitiliani. Xa ueliskia nesis ke kuali yetok tein kitajtanijkej. Sayoj ke Jehová amo akin kichikaujkauia maj kitekitili. Yejuatsin kineki maj tinochin, tejuan uan tokoneuan, tikueyichiuakan porin tisejsemej ijkon tikixpejpenaj (Deut. 10:​12, 13; 30:​19, 20). Komo ijkon, ¿toni ueliskia kitajtaniskej Jehová nejon tetatmej? Ueliskia kitajtaniskej maj kinpaleui maj kimatikan keniuj kipaleuiskej ininkoneuj para maj kitasojta yejuatsin uan maj kineki kuali iuan mouikas (Prov. 22:6; Efes. 6:4).

13. Kemej kijtoua Hebreos 4:​16, ¿kemanian techpaleuia Jehová?

¹³ Ojpatika netajtanil yejua nejin: “¿Kiita Jehová ke moneki nechnankilisya?”. Xa tiknemiliskej ke Jehová moneki maj niman technankili. Sayoj ke yejua Jehová akin kimati kemanian moneki maj techpaleui (xikonixtajtolti Hebreos 4:16). Komo Jehová amo niman techmaka tein tiktajtaniaj xa tiknemiliskej ke “Amo keman” techmakas. Sayoj ke xa yejuatsin kiita ke “Ayamo moneki”. Maj oksepa ika titajtokan telpoch akin kinekia pajtis uan kitataujtiaya Jehová. Komo Jehová kipajtiskia ika se milagro, Satanás ueliskia kiixiluis ke nejon telpoch kisentokaya kitekitiliaya sayoj porin kichiuak maj pajti (Job 1:​9-11; 2:4). Sayoj ke, Jehová kiixtalijya kemanian kiixpolos nochi kokolismej (Is. 33:24; Apoc. 21:​3, 4). Yejua ika axkan amo tikchiaj maj Jehová techpajti ika se milagro. Komo ijkon, ¿toni nejin telpoch ueliskia kitajtanis Jehová? Maj kipaleui maj taxiko uan maj yolseujto para uelis kisentokas kitekitilis maski mokokoua (Sal. 29:11).

14. ¿Toni mitsonmachtia tein kipanok Janice?

¹⁴ ¿Tikonelnamiki Janice? Yejua tokniuj siuat akin kitataujtiaya Jehová para tapaleuis Betel. Monekik panos makuil xiuit para kiajsikamatis ke Jehová kinankilijka sayoj ke amo kemej yejua kichiaya. Yejua kijtoua: “Itech nejon xiujmej, Jehová nechmachtij miak taman uan nechpaleuij maj nimochiua se kuali itekitikauj. Monekia okachi nitakuaujtamatis iuan, okachi kuali nimomachtis Biblia uan nikajsikamatis ke uelis niyolpakis kampa niktekitilijtos Jehová”. Satepan, Janice uan itakatsin kinyoleujkej maj kinkalpanokan nechikolmej itech circuito. Yejua kijtoua: “Jehová kemaj kinankilijka nonetataujtil sayoj ke amo kemej nejua niknekia. Amo niman nikitak ke kemej nechnankilijka semi kualtsin katka. Semi nimotasojkamati porin ueli nikmachilia ke Jehová nechtasojta uan nechtatiochiuia”.

15. ¿Keyej kemansa kuali yetok maj titajtanikan okseki taman keman timotataujtiaj? (No xikonita taixkopimej).

¹⁵ Expatika netajtanil yejua nejin: “¿Ueliskia niktajtanis Jehová okse taman?”. Maski kemansa kuali yetok maj tiktajtanikan tein tiknekij, komo tiktajtaniaj okseki taman okachi tikmatiskej toni kineki Dios maj tikchiuakan. Maj itech titanemilikan tokniuj siuat akin motataujtiaya porin kinekia kiselis Tamachtilis para akin kiteixmatiltiaj iTaixyekanalis Dios. Yejua kinekia kiselis nejin tamachtilis para tapaleuis kampa okachi monekij tanojnotsanij. Maski yejua uelis kisentokas ika motataujtis nejin, ¿toni okse taman ueliskia kitajtanis Jehová? Maj kipaleui maj kimati keniuj uelis okachi tanojnotsas (Hech. 16:​9, 10). Satepan ke motataujtis ueliskia kiluis tokniuj takalpanojkej ke kineki tapaleuis itech se nechikol tein amo uejka yetok kampa monekij precursores. No uelis tajkuilos sucursal para kimatis kani okachi monekij tanojnotsanij.e

16. ¿Toni uelis tikneltokaskej?

¹⁶ Kemej tikitakejya, uelis tikneltokaskej ke Jehová technankilia keman tiktataujtiaj, uan keman kichiua kinextia ke techtasojta uan kichiua tein kuali yetok (Sal. 4:3; Is. 30:18). Xa kemansa amo technankilia kemej tiknekiskiaj, sayoj ke nochipa kikaki keman tiktataujtiaj. Yejuatsin semi techtasojta uan amo keman techsenkauas (Sal. 9:10). Yejua ika, maj ‘nochipa titakuaujtamatikan’ iuan Jehová, uan keman timotataujtiskej maj tiktapouikan nochi tein tikmachiliaj (Sal. 62:8).