Jehová kineki maj nochin moyolpatakan

1. ¿Toni kichiua akin moyolpata?

KEMAN tikchiuaj tein amo kuali, semi moneki maj timoyolpatakan. Biblia kijtoua ke aksa akin moyolpata peua kitauelita tein amo kuali tein kichiuak, amo tajtakolchiuaok uan kiixtalia amo oksepa kichiuas (Mt 3:8; Hch 3:19; 2 Pe 3:9).

2. ¿Keyej tinochin moneki tikmatiskej toni moneki tikchiuaskej para timoyolpataskej? (Nehemías 8:​9-11).

² Tinochin moneki tikmatiskej toni moneki tikchiuaskej para timoyolpataskej porin tinochin mojmostaj titajtakolchiuaj. Kemej tiikoneuan Adán uan Eva, tinochin titajtakolchiuaj uan timomikiliaj (Rom. 3:23; 5:12). Tinochin titajtakolejkej uan moneki maj timoyolpatakan. Hasta akin kuali kitekitilijkej Jehová kemej tatitanil Pablo, kinouijmakak kichiuaskej tein kuali (Rom. 7:​21-24). Maski ijkon amo moneki nochipa timotayokoltijtoskej porin titajtakolejkej. Jehová teiknelia uan kineki maj tiyolpakikan. Maj tikelnamikikan tein kinpanok judíos akin nenkej keman no nemik Nehemías (xikonixtajtolti Nehemías 8:​9-11). Jehová amo kinekia maj moteltayokoltianij porin tajtakolchiujkaj, ta maj yolpakinij keman kitekitiliskiaj. Yejuatsin kimati ke keman timoyolpataj ueli tiyolpakij, yejua ika techmachtia toni moneki tikchiuaskej para timoyolpataskej. Tikyekmati ke toTajtsin akin semi teiknelia, techtapojpoluis totajtakoluan komo timoyolpataj.

3. ¿Toni tikitaskej itech nejin tamachtilis?

³ Itech nejin tamachtilis ika titajtoskej keniuj Dios techpaleuia maj timoyolpatakan. Achto tikitaskej keniuj Jehová kinmachtij israelitas ke monekia moyolpataskej. Satepan ika titajtoskej keniuj Jehová kinpaleuij miakej maj moyolpatakan. Uan no tikitaskej tein Jesús tamachtij keman ika tajtoj ijkuak se moyolpata.

¿KENIUJ JEHOVÁ KINMACHTIJ ISRAELITAS KE MONEKIA MOYOLPATASKEJ?

4. ¿Toni Jehová kiniluij israelitas ke kichiuaskia komo moyolpatayaj?

⁴ Keman israelitas kiselijkej itanauatiluan Jehová, yejuan motenkaujkej ke kintakamatiskiaj. Uan Jehová motenkauak ke kinyekpiaskia uan kintiochiuaskia komo yejuan kitakamatiaj. Yejuatsin kiniluij: “Nejin tanauatilmej tein axkan nimitsmakatok amo tel ouij para tikinajsikamatis uan amo no tel ouij tikintakamatis” (Deut. 30:​11, 16). Sayoj ke, komo yejuan amo kitakamatiaj oso kinueyichiuayaj tatadiosmej, Jehová amo kinpaleuiskiaok uan tajyouiskiaj. Komo ijkon panouaya, ¿ueliskia oksepa kiyolpaktiskej Dios? Kemaj, iTanauatil kijtouaya ke oksepa ueliskia iuan mokepaskej uan kikakiskej (Deut. 30:​1-3, 17-20). Nejin kijtosneki ke yejuan ueliskia moyolpataskej. Komo ijkon kichiuayaj, Jehová kinseliskia uan oksepa kintatiochiuiskia.

5. ¿Keniuj kinextij Jehová ke amo yolijsiuia keman israelitas amo kitakamatiaj? (2 Reyes 17:​13, 14).

⁵ Israelitas tel miakpa kiixnamikkej Jehová. Uan amo sayoj kinueyichiujkej tatadiosmej, ta no kichiujkej okseki taman tein tel amo kuali uan yejua ika tel tajyouijkej. Sayoj ke Jehová amo kinsenkauak uan kisentokak kinpaleuij para maj oksepa kitekitilianij, yejuatsin kisentokaya kintitania tanauatianij para maj kinpaleuianij maj moyolpatanij uan maj oksepa senkis kitekitilianij (xikonixtajtolti 2 Reyes 17:​13, 14).

6. ¿Keniuj Jehová kinmatiltij israelitas ke motelnekia maj moyolpatakan? (No xikonita taixkopin).

⁶ Jehová miakpa kintitania itanauatijkauan maj kinnejmachtitij israelitas uan maj kinmelauanij. Yejuatsin kinauatij Jeremías maj kiniluiani nejin: “Ximokepa Israel akin taixnamiki […]. Amo namechtauelitstos porin amo nitekaua […]. Amo nochipa nikelnamiktos tein nankichiujkej. Sayoj xikijto ke timopoloj porin tikixnamikik Jehová moDios” (Jer. 3:​12, 13). Jehová kiluij Joel maj kiniluiani israelitas: “Senkis xikixtalikan nouan namokepaskej” (Joel 2:​12, 13). Kiluij Isaías maj kitematilti: “Ximochipauakan; amo xiksentokakan xikchiujtokan tein amo kuali; amo xitajtakolchiuakanok” (Is. 1:​16-19). Uan no kinauatij Ezequiel maj kinilui: “Amo nechyolpaktia maj miki aksa akin amo yolkuali. […] Ta nikneki maj amo kichiuaok tein amo kuali, uan maj kisentoka yolto”. “Amo nechyolpaktia maj miki aksa […]. Yejua ika ximoyolpatakan uan xinemikan” (Ezeq. 18:​23, 32). Jehová semi yolpaki keman aksa moyolpata porin kineki maj nemi nochipaya. Sayoj ke Jehová peua kipaleuia desde achtook para maj moyolpata. Maj ininka titajtokan oksekin akin kinpaleuij.

7. ¿Keniuj tein kipanok Oseas iuan isiuatsin Jehová ika kinmachtij israelitas?

⁷ Maj tikitakan tein kipanok tanauatijkej Oseas uan isiuatsin Gómer, uan keniuj ika nejon Jehová kinmachtij israelitas. Yejua auilnemik, satepan kikauak Oseas uan yajki iuan okse takat. ¿Kinemilij Jehová ke amo moyolpataskiaok? Yejuatsin akin kimati tein se kipia se iyolijtik, kiluij Oseas: “Oksepa xiouj uan xiktasojta mosiuatsin akin okse takat kitasojta uan auilnentok, ijkon kemej Jehová kintasojta israelitas maski yejuan kinueyichiuaj tatadiosmej” (Os. 3:1; Prov. 16:2). Gómer kisentokaya tel tajtakolchiujtoya. Sayoj ke, Jehová kiluij Oseas maj kitapojpoluiani uan maj oksepa iuan mokepani.a Tein Oseas kipanok iuan Gómer, kinmachtij israelitas ke Jehová semi kintasojtaya. Yejuatsin kintasojtayaok maski kisentokayaj tajtakolchiuayaj, uan kisentokak kintitanilij itanauatijkauan para maj kinpaleuianij maj moyolpatakan uan maj kipatakan kemej nemiaj. Nejin techmachtia ke Jehová kuali kiixmati aksa, uan kitemoua kipaleuis maj moyolpata akin tel tajtakolchiujtok (Prov. 17:3). Maj tikitakan keniuj Jehová kichiua nejin.

¿KENIUJ JEHOVÁ KINPALEUIA AKIN TAJTAKOLCHIUJTOKEJ MAJ MOYOLPATAKAN?

8. ¿Keniuj Jehová kipaleuij Caín maj moyolpatani? (Génesis 4:​3-7; no xikonita taixkopin).

⁸ Ininkoneuj Adán uan Eva akin tayekanaya katka Caín. Uan yejua no kinejnekia tajtakolchiuas ijkon kemej itatuan. Uan no, Biblia kijtoua ke “kichiuaya tein amo kuali” (1 Juan 3:12). Xa yejua ika Jehová “amo kiyolpaktiaya keniuj katka Caín uan amo no kiyolpaktij tein kimaktilij”. Sayoj ke yejua amo kipatak tein kichiuaya, ta “tauelmikik uan moixtayokoltij”. Uan, ¿toni kichiuak Jehová? Iuan tajtoj (xikonixtajtolti Génesis 4:​3-7). Jehová kuali kinojnotsak Caín uan kiluij ke kitatiochiuiskia komo kichiuaya tein kuali. Sayoj ke no kiluij ke komo kisentokaya kualantoya ueliskia kichiuas tein amo kuali. Maski ijkon, Caín amo kikakik Jehová uan amo no mokauak maj yejuatsin kipaleuiani maj moyolpata. ¿Toni kichiuak Jehová keman kiitak ke Caín amo mokauak maj kipaleui? ¿Kinemilij ke amo oksepa kipaleuiskia aksa maj moyolpata? ¡Amo!

9. ¿Keniuj Jehová kipaleuij David para maj moyolpatani?

⁹ Jehová semi kitasojtaya tekiuaj David. Yejua ika kijtoj: “David [...] nechyolpaktia” (Hech. 13:22). Sayoj ke David semi tajtakolchiuak porin auilnemik uan temiktij uan kemej kijtouaya iTanauatil Moisés, monekia kimiktiskej (Lev. 20:10; Núm. 35:31). Sayoj ke kemej Jehová tel yolkuali, kinekik kipaleuis David para maj moyolpatani. Uan kititanilij itanauatijkauj Natán para maj iuan tajtouani maski David ayamo kijtouaya tein kichiujka nion moyolpataya.b Natán kitapouij se taman para maj kiitani ke semi tajtakolchiujka, ijkon tekiuaj kimatik ke semi kiyolkokojka Jehová uan moyolpatak (2 Sam. 12:​1-14). David kijkuiloj se salmo kampa kinextij ke tel amo kuali momachilij porin tajtakolchiujka (Sal. 51, encabezamiento). Miakej akin tajtakolchiuaj semi kinyolseuia nejin salmo uan moyolpataj. Semi tiktasojkamatij maj Jehová kitasojtani itekitikauj uan maj kipaleuiani maj moyolpata.

10. ¿Keniuj tionmomachilia keman tikonmati ke Jehová amo yolijsiui uan tetapojpoluia?

¹⁰ Jehová kitauelita nochi taman tajtakol (Sal. 5:​4, 5). Sayoj ke yejuatsin kimati ke titajtakolejkej uan kemej techtasojta kiixtalij techpaleuis komo titajtakolchiuaj. Nochipa kineki kinpaleuis akin tajtakolchiuaj para maj moyolpatakan uan maj kinekikan oksepa iuan motokiskej. ¡Semi techyolseuia keman tikmatij ke Jehová kineki techtapojpoluis! Keman tikelnamikij ke Jehová amo yolijsiui uan techtapojpoluia, techpaleuia maj amo keman tikauakan uan maj niman timoyolpatakan komo titajtakolchiuaj. Axkan tikitaskej toni Jesús kinmachtij itatojtokakauan keman kijtoj ke monekia moyolpataskej.

¿KENIUJ JESÚS KINMACHTIJ ITATOJTOKAKAUAN KE MONEKIA MOYOLPATASKEJ?

11, 12. ¿Toni kitetapouij Jesús para kinextis ke Jehová nochipa kineki techtapojpoluis? (Xikonita taixkopin).

¹¹ Itech yekinika siglo achto ke Jesús mochiuaskia Mesías, Jehová kichiuak maj Juan akin teauia kinnojnotsani itekitikauan uan maj kinyolchikauani maj moyolpatakan. Uan keman Jesús peuak tanojnotsa no tamachtij ke moneki maj moyolpatakan (Mat. 3:​1, 2; 4:17).

¹² Keman Jesús yetoya nikan taltikpak tamachtij ke iTajtsin semi kineki tetapojpoluis keman se tajtakolchiua uan kimelauak nejin keman ika tajtoj se tepopaj uan iokichpil akin poliujtoya. Nejon okichpil kinemilij kisas de ichan uan kichiuas tein tel amo kuali. Sayoj ke satepan oksepa peuak “yektanemilia” uan mokepak. ¿Toni kichiuak itat? Jesús kijtoj ke “keman ajsitiayaya, itat kiuejkaitak uan semi kiueyiyoliknelij. Tsikuinteuak kinamikito, kinauaj uan kimakak se beso porin semi kitasojtaya”. Telpoch yaya kiluiti ipopaj maj kikaua maj kitekitili. Sayoj ke ipopaj semi kinekia kitapojpoluis uan oksepa kiselij kemej ikoneuj, kijtoj: “Nookichpiltsin [...] poliujtoya uan mokepakya” (Luc. 15:​11-32). Achto ke Jesús ualaskia nikan taltikpak, xa kiitak keniuj Jehová kinikneliaya akin tajtakolchiuayaj uan moyolpatayaj. Tein Jesús kitetapouij semi teyolseuia uan kinextia ke toTajtsin Jehová semi teiknelia.

13, 14. ¿Toni momachtij tatitanil Pedro keman moyolpatak, uan toni tamachtij? (No xikonita taixkopin).

¹³ Tein Jesús kichiuak kinextilij Pedro ke Jehová kintapojpoluia akin moyolpataj. Pedro semi tajtakolchiuak, uan Jesús nochipa kinekik kitapojpoluis. Expa kijtoj ke amo kiixmatia Jesús uan satepan semi kiyolkokoj tein kichiujka (Mat. 26:​34, 35, 69-75). Sayoj ke satepan ke Jesús oksepa nemik monextij iixpan Pedro para kinojnotsas iselti (Luc. 24:​33, 34; 1 Cor. 15:​3-5). Jesús kimatia ke Pedro moyolpatakaya, uan kinekia kimatiltis ke kitapojpoluijkaya.

¹⁴ Pedro kimatia keniuj se momachilia keman se moyolpata uan keman tetapojpoluiaj. Yejua ika kinmachtij oksekin tein yejua momachtijka. Satepan, itech iluit tein monotsa Pentecostés, Pedro kiniluij miakej judíos ke yejuan kimiktijkaj Mesías, kinyolchikauak uan kiniluij: “Yejua ika, ximoyolpatakan uan ximokepakan iuan Dios para maj namechtapojpoluili namotajtakoluan, uan ijkon Jehová namechyolseuis” (Hech. 3:​14, 15, 17, 19). Pedro tamachtij ke akin tajtakolchiua uan moyolpata oksepa mokepa iuan Dios, nejin kijtosneki amo kinemiliaok tein amo kuali, amo kichiuaok tein amo kuali uan peua kichiua tein Dios kiyolpaktia. Tatitanil no kinextij ke Jehová kintajpojpoluiskia uan kemej yeskia senkis kiixpoloskia tajtakol. Miak xiujmej satepan, Pedro kijtoj: “Yejua namechchixtok porin amo kineki maj nion akin ixpoliui, ta maj nochin moyolpatakan” (2 Ped. 3:9). Semi kualtsin timomachiliaj keman tikmatij ke Jehová ueli senkis techtapojpoluia keman timoyolpataj, uan ijkon kichiua maski kemansa titeltajtakolchiuaj.

15, 16. 1) ¿Toni momachtij Pablo keman Jehová kitapojpoluij? (1 Timoteo 1:​12-15). 2) ¿Toni tikitaskej itech okse tamachtilis?

¹⁵ Saulo de Tarso kichiuak miak taman tein tel amo kuali. Yejua semi kintajyouiltij itatojtokakauan Cristo. Yejua ika miakej xa kinemiliayaj ke amo keman mopataskia. Sayoj ke Jesús kimatia ke Saulo ueliskia moyolpatas. Yejua uan iTajtsin kiitakej tein kuali tein kichiuaya Saulo. Jesús kijtoj: “Nejin takat nikijitak” (Hech. 9:15). Hasta kichiuak se milagro para kipaleuis Saulo maj moyolpata (Hech. 7:58–8:3; 9:​1-9, 17-20). Saulo oso tatitanil Pablo moyolpatak uan peuak kitojtoka Cristo, uan Jesús kiixtalij kemej tatitanil. Pablo miakpa kijtoj ke kitasojkamatiliaya Jehová uan Jesús porin kinextilijkaj ke semi kiikneliayaj uan yolkualmej katkaj iuan (xikonixtajtolti 1 Timoteo 1:​12-15). Pablo kiniluij tokniuan: “Dios yolkuali uan kitemojtok mitspaleuis ximoyolpata” (Rom. 2:4).

¹⁶ Se tonal, Pablo kikakik ke itech nechikol ompa Corinto kuali kiselijtoyaj se takat akin auilnemia. ¿Toni kiniluij maj kichiuakan? Tein kijtoj Pablo techmachtia keniuj Jehová kinextia ke kintasojta itekitikauan keman kinmelaua, uan ke kiniknelia keman moyolpataj uan no techmachtia keniuj uelis tikchiuaskej kemej yejuatsin. Itech okse tamachtilis ika titajtoskej tein panok itech nechikol ompa Corinto.