Xikneltoka ke Jehová mitstapojpoluijya

1, 2. ¿Toni kichiua Jehová keman timoyolpataj uan keniuj timomachiliaj? (No xikita taixkopin).

TEKIUAJ David semi motayokoltiaya porin kichiujka tein amo kuali (Sal. 40:12; 51:​3, encabezamiento). Sayoj ke moyolpatak uan Jehová kitapojpoluij (2 Sam. 12:13). David semi yolpakik keman kiajsikamatik ke Jehová kitapojpoluijkaya (Sal. 32:1).

² Tejuan no uelis tiyolpakiskej keman tikajsikamatiskej ke Jehová techiknelia uan techtapojpoluijya totajtakoluan. Maski titeltajtakolchiuaskej, Jehová techtapojpoluis komo yekmelauj timoyolpataj, tiktataujtiaj maj techtapojpolui, iniuan titajtouaj tayekananij, uan timochikauaj amo titajtakolchiuaskejok (Prov. 28:13; Hech. 26:20; 1 Juan 1:9). Uan semi tiyolpakij keman Jehová techtapojpoluia porin amo keman kielnamikiok uan amo ika techtatsakuiltia (Ezeq. 33:16).

3, 4. ¿Keniuj momachiliaya Jennifer? ¿Toni tikitaskej itech nejin tamachtilis?

³ Xa kemansa amo semi tikneltokaj ke Jehová yekmelauj techtapojpoluijya. Ijkon momachilij Jennifer. Itatuan kimachtijkaj de Jehová sayoj ke keman moskaltij, ichtaka peuak kichiua tein amo kuali. Satepan moyolpatak, motemaktij iuan Jehová uan moauij. Yejua kijtoua: “Niauilnemia, nitauanaya, uan katka niteltauel, uan nikitaya ke semi monekia maj niktani miak tomin. Nikmatia ke Biblia kijtoua ke Jehová ueli techtapojpoluia porin Jesús momikilij por tejuan. Sayoj ke maski nimoyolpatak uan niktataujtij Jehová maj nechtapojpolui, amo nikneltokaya ke yekmelauj nechtapojpoluijkaya”.

⁴ Xa kemansa tiknemilia ke Jehová mouan kualantok porin tikchiujka tein amo kuali. Sayoj ke xikelnamiki ke yejua semi teiknelia. David kimatia ke Jehová kitapojpoluijkaya, uan Dios kineki maj tejuan no tiyolpakikan ijkon kemej momachilij David keman kitapojpoluij. Itech nejin tamachilis tikitaskej keyej semi moneki maj tikneltokakan ke Jehová techtapojpoluia uan toni techpaleuis maj tikneltokakan.

¿KEYEJ MOTELNEKI MAJ TIKNELTOKAKAN KE JEHOVÁ TECHTAPOJPOLUIJYA?

5. Xikmelaua toni kineki Satanás maj tiknemilikan.

⁵ Komo tikneltokaj ke Jehová techtapojpoluijya, amo tikneltokaskej tein Satanás takajkayaua. Maj tikelnamikikan ke Satanás kichiua miak taman para maj amo tiktekitilikanok Jehová. Uan ijkon kichiua keman kineki maj tiknemilikan ke Jehová amo keman techtapojpoluis totajtakoluan. Maj itech titanemilikan tein kipanok takat de Corinto, akin auilnemik uan kikalankixtijkaj de nechikol (1 Cor. 5:​1, 5, 13). Keman nejon takat moyolpatak, Satanás amo kinekia maj tokniuan kitapojpoluikan nion maj kiselikan itech nechikol. Uan komo tokniuan ijkon kichiuaskiaj, nejon takat xa kinemiliskia ke Jehová amo keman kitapojpoluiskia. Nejon kichiuaskia maj ‘mosenkaua porin semi tayokoxtoskia’ uan amo kitekitiliskiaok Jehová. Axkan Satanás no kineki maj tiknemilikan ke Jehová amo keman techtapojpoluis totajtakoluan porin amo kineki maj tiktekitilikanok. Sayoj ke tejuan “kuali tikmatij toni ika takajkayaua” (2 Cor. 2:​5-11).

6. ¿Toni techpaleuis maj amo timotajtakoltikanok tein tikchiujkaj?

⁶ Komo tikneltokaj ke Jehová techtapojpoluijya uelis oksepa tiyolpakiskej. Keman titajtakolchiuaj tel amo kuali timomachiliaj (Sal. 51:17). Uan nejon techpaleuia maj timopatakan uan maj tikchiuakan tein kuali (2 Cor. 7:​10, 11). Sayoj ke komo tiksentokaj tiknemiliaj ke Jehová ayamo techtapojpoluia, xa tiknekiskej timosenkauaskej uan amo tiktekitiliskejok. Yejua ika, okachi kuali maj tikneltokakan ke Jehová techtapojpoluijya porin nejon techpaleuis maj amo timotajtakoltikanok. Ijkon uelis tiktekitiliskej Jehová kemej yejua kineki, amo techtekipachojtos tein tikchiujkaj uan oksepa tiyolpakiskej (Col. 1:​10, 11; 2 Tim. 1:3). Maj tikitakan toni uelis techpaleuis maj tikneltokakan ke Jehová techtapojpoluijya.

¿TONI MITSPALEUIS XIKNELTOKA KE JEHOVÁ MITSTAPOJPOLUIJYA?

7, 8. ¿Toni kijtoj Jehová itech Éxodo 34:​6, 7 keman moteixmatiltij, uan keniuj techpaleuia nejin?

⁷ Itech xitanemili tein Jehová kijtoj keman moteixmatiltij. Keman Moisés kinekia okachi kiixmatis Jehová, xikelnamiki tein kiluij itech tepet Sinaí (xiklero Éxodo 34:​6, 7).a Maski Jehová kinextia miak taman tein kuali, keman kinojnotsak Moisés kiluij ke yejua “se Dios akin teiknelia uan yolkuali”. Komo ijkon, ¿tiknemilia ke Jehová amo kitapojpoluis aksa akin tajtakolchiujka uan moyolpatakya? Komo amo kitapojpoluiskia, kinextiskia ke amo yolkuali uan ke amo tetasojta, sayoj ke Jehová amo keman kichiuaskia nejon.

⁸ Keman Jehová kijtoua ke teiknelia, uelis tikneltokiliskej porin yejua amo keman takajkayaua (Sal. 31:5). Yejua ika, komo amo ueli tikneltoka ke Jehová mitstapojpoluijya xiknemili nejin, komo tikneltoka ke Jehová kintapojpoluia nochin akin moyolpataj porin teiknelia uan yolkuali, uelis tikneltokas ke tejua no mitstapojpoluia.

9. ¿Toni techmachtia Salmo 32:5 keman kijtoua ke Jehová techtapojpoluilia totajtakoluan?

⁹ Itech xitanemili tein techmachtia Biblia keman kijtoua keniuj Jehová techtapojpoluia. Kemej nejin tein David kiluij Jehová: “Tejua tinechtapojpoluij notajtakoluan” (xiklero Salmo 32:5). Tajtol “tinechtapojpoluij” itech hebreo no kijtosneki “tikajokuik” oso “tikuikak”. Yejua ika keman Jehová kitapojpoluij David, kemej yeskia kikuilij teisa tein etik tein kimamajtoya. David semi yolpakik keman kimatik ke Jehová kitapojpoluijka (Sal. 32:​2-4). Tejuan no uelis ijkon tiyolpakiskej. Komo yekmelauj timoyolpatakejya amo moneki techyolkokojtosok tein tikchiujkej. Ta maj tiyolpakikan porin Jehová kemej yeskia techkuilij teisa tein tikmamajtoyaj uan etik.

10, 11. ¿Toni techmachtia de Jehová tein kijtoua Salmo 86:5?

¹⁰ (Xiklero Salmo 86:5). David kijtoj ke Jehová ‘kineki tetapojpoluis’. Nejin kijtosneki ke Jehová amo niman kualani keman timopolouaj uan nochipa kinejneki kintapojpoluis akin moyolpataj. ¿Keyej? Nejin versículo kisentoka kijtoua: “Nochipa semi tikintasojta nochin akin mitsnotsaj”. Itech okse tamachtilis tikitakej ke Jehová motenkaua nochipa kintasojtas akin kitekitiliaj uan amo keman kinkauas. Yejua ika komo yejuan tajtakolchiujkej uan moyolpatakejya, Jehová kisentoka kintasojta uan senkis kintapojpoluia (Is. 55:7). Komo amo senkis tikneltoka ke Jehová mitstapojpoluijya porin tikchiujka tein amo kuali, xiknemili nejin: Komo tikneltoka ke Jehová niman kintapojpoluia nochin akin moyolpataj uan kitataujtiaj maj kinikneli, uelis tikneltokas ke tejua no mitstapojpoluij keman tiktataujtij maj mitsikneli uan maj mitstapojpolui.

¹¹ Uan no, semi techyolseuia maj Biblia kijto ke Jehová kuali kimati keniuj tichijchiujtokej uan ke titajtakolejkej (Sal. 139:​1, 2). Maj tikitakan tein David kijtoj itech okse salmo uan keniuj nejin no techpaleuia maj tikneltokakan ke Jehová kineki techtapojpoluis.

¿TONI KIELNAMIKI JEHOVÁ DE TEJUAN?

12, 13. Kemej kijtoua Salmo 103:​14, ¿toni kielnamiki Jehová uan toni kineki kichiuas?

¹² (Xiklero Salmo 103:14). David kijtoj se taman tein kinextia keyej Jehová kineki kintapojpoluis akin moyolpataj. Yejua kijtoj ke Jehová “kielnamiki ke tichijchiujtokej ika talnex”. Nejin kijtosneki ke nochipa kielnamiki ke titajtakolejkej. Maj okachi timomachtikan toni kijtosneki nejin.

¹³ David kijkuiloj ke Jehová “kuali kimati keniuj tichijchiujtokej”. Dios kichijchiuak Adán “ika tal”, yejua ika kuali kimati de toni tichijchiujtokej uan kimati toni techpoloua: moneki titakuaskej, tikochiskej uan timijyotiskej. Hasta komo amo yeskia titajtakolejkej ipa monekiskia tikchiuaskej nejin (Gén. 2:7). Sayoj ke desde ke Adán uan Eva tajtakolchiujkej, tajtolmej “tichijchiujtokej ika talnex” no kijtosneki ke tiyolij titajtakolejkejya uan moneki timochikauaskej amo tikchiuaskej tein amo kuali. Jehová kuali techixmati, sayoj ke keman David kijtoj ke Jehová “kielnamiki” ke tichijchiujtokej ika tal, kijtosnekik ke nochipa techiknelia porin kimati ke titajtakolejkej. Jehová kimati ke kemansa timopolouaj porin titajtakolejkej, uan keman kiita ke yekmelauj timoyolpatakejya, techiknelia uan techtapojpoluia (Sal. 78:​38, 39).

14. 1) ¿Toni no kijtoj David keman ika tajtoj keniuj Jehová techtapojpoluia? (Salmo 103:12). 2) ¿Toni techmachtia kemej Jehová kitapojpoluij David? (Xikita recuadro “Jehová kielkaua totajtakol keman techtapojpoluia”).

¹⁴ ¿Toni no uelis techpaleuis maj tikneltokakan ke Jehová techtapojpoluijya? (Xiklero Salmo 103:12). David kijtoj ke keman Jehová techtapojpoluia, uejka kikauati totajtakoluan “ijkon kemej ueuejka moajsij kampa ualkisa tonaltsin uan kampa pankalaki”. Nochi ojkan tel ueuejka moajsij. ¿Toni techmachtia nejin? Se amaix tein ika tajtoua nejin versículo kijtoua ke Dios tel uejka kiuika totajtakol, kemej yeskia teisa tein moijnekuia sayoj ke poliuikya uan amo tikijnekuijok. Yejua ika uelis senkis tikneltokaskej ke amo keman itech tanemilisok oso techelnamikilisok. Xa kemansa keman tikijnekuij se tapalol oso okseki taman, uelis techelnamiktis teisa tein techpanok. Sayoj ke keman Jehová techtapojpoluia, amo teyi uelis kichiuas maj oksepa kielnamiki uan maj techtatsakuilti (Ezeq. 18:​21, 22; Hech. 3:19).

15. ¿Toni uelis tikchiuaskej komo tiksentokaj timoyolkokouaj porin titajtakolchiujkej?

¹⁵ Komo tiksentoka timotajtakoltia tein tikchiujka, tein David kijkuiloj itech Salmo 103 mitspaleuis xikneltoka ke Jehová mitstapojpoluijya. Xiknemili nejin: “Komo Jehová kielnamiki ke nitajtakolej uan no nechtapojpoluijya porin nimoyolpatak, no moneki nikelnamikis nejon. Uan no, komo Jehová kiixtalij kielkauas uan amo nechelnamikilisok, no moneki maj ijkon nikchiua”. Jehová amo kielnamiktokok tajtakol tein tikchiujka, yejua ika tejua amo no xikelnamikiok (Sal. 130:3). Keman tikneltokas ke Jehová mitstapojpoluijya, amo timoyolkokojtosok uan tiksentokas kuali tiktekitilis.

16. ¿Keyej tel amo kuali komo itech titanemilijtokok tajtakol tein tikchiujka? (No xikita taixkopin).

¹⁶ Komo nochipa tikelnamiktok tajtakol tein tikchiujka, kemej yeskia tiknejnemiltiskia se carro uan sayoj tikitstiaskia espejo tein ika titachia taikampa. Kuali yetok komo kemansa tikita para tikmatis toni onkak taikampa uan ijkon amo teisa panos. Sayoj ke komo tikneki kuali tikuikas carro, moneki titachias taixpan. No ijkon, xa kemansa monekis tikelnamikis tein tikchiujka para mitsmachtis teisa uan amo oksepa tikchiuas. Sayoj ke komo nochipa itech titanemilijtok, xa amo tiyolpakisok uan amo kuali tiktekitilisok Jehová. Yejua ika, xiksentoka xiktekitili uan xiknemili keniuj tinemis itech xochital keman ‘amo tikelnamikisok’ tein mitspanok (Is. 65:17; Prov. 4:25).

XIKYEKNELTOKA KE JEHOVÁ MITSTASOJTA UAN MITSTAPOJPOLUIJYA

17. ¿Keyej moneki tikyekneltokaskej ke Jehová techtasojta uan techtapojpoluia?

¹⁷ Moneki tikyekneltokaskej ke Jehová techtasojta uan ke techtapojpoluia (1 Juan 3:​19, nota). ¿Keyej? Porin Satanás kisentokas kitemos maj tiknemilikan ke Dios amo techtasojta uan ke amo keman techtapojpoluis. Yejua amo kineki maj tiktekitilikanok Jehová. Uan okachi kitemos kichiuas nejin porin kimati ke amo uejkaua kiixpoloskej (Apoc. 12:12). Yejua ika moneki maj tikixnamikikan Satanás uan maj tiksentokakan tiktekitilikan Jehová.

18. ¿Toni mitspaleuis xikneltoka ke Jehová mitstasojta uan mitstapojpoluijya?

¹⁸ Itech okse tamachtilis tikitakej toni uelis mitspaleuis xikneltoka ke Jehová mitstasojta. Uan axkan tikitakej toni uelis mitspaleuis xikneltoka ke Jehová mitstapojpoluijya. Yejua ika itech xitanemili keniuj Jehová moteixmatiltia uan keniuj Biblia kijtoua ke tetapojpoluia. Amo xikelkaua ke yejua nochipa kielnamiktok ke titajtakolej uan mitsiknelia. Uan xikelnamiki ke Dios senkis tetapojpoluia. Komo ijkon tikchiua, uelis tikijtos kemej David: “¡Nimitstasojkamatilia Jehová porin ‘tinechtapojpoluij notajtakoluan’!” (Sal. 32:5).