¿Keniuj techpaleuia maj Jehová techtapojpolui?

1. ¿Keyej kemansa amo senkis tikajsikamatij keman aksa techiluia ke techtapojpoluia?

SEMI tiyolseuij keman aksa akin tikyolkokojkej techiluia: “Nimitstapojpoluia”. Sayoj ke kemansa amo senkis tikajsikamatij toni kijtosnekij keman techiluiaj ke techtapojpoluiaj, porin tataman tein kichiuaj keman ijkon kijtouaj. Xa akin tikyolkokojkej kinextis ke uelis tiksentokaskej kuali iuan timouikaskej, oso xa kinextis ke techtapojpoluijya sayoj ke amo uelisok kuali iuan timouikaskej kemej achto.

2. ¿Keniuj kijtoua Biblia ke tetapojpoluia Jehová? (No xikonita nota).

² Tel taman tein kichiua Jehová keman tetapojpoluia. Nion akin tetapojpoluia kemej yejua. Se salmista kiluij Jehová: “Tejua yekmelauj titetapojpoluia, yejua ika mitsmojkatokaj” (Sal. 130:4).a Semi kualtsin tein kichiua Jehová porin sayoj yejua ‘yekmelauj tetapojpoluia’. Komo tiknekij tikmatiskej keniuj uelis yekmelauj titetapojpoluiskej moneki tikitaskej tein Jehová kichiua. Itech seki versículos tein moijkuiloj itech tajtol hebreo, mokuik se tajtol para moijtos keniuj tetapojpoluia Jehová, sayoj ke nejon tajtol amo keman mokuik para moijtos keniuj tetapojpoluia aksa.

3. ¿Keyej tikijtouaj ke Jehová okachi kuali tetapojpoluia ke tejuan? (Isaías 55:​6, 7).

³ Keman Jehová kitapojpoluia aksa, senkis kiixpoloua itajtakol uan kikaua maj oksepa kuali iuan mouika. Jehová senkis tetapojpoluia uan miakpa ijkon kichiua. ¡Semi tiktasojkamatij maj nochipa techtapojpolui! (Xikonlero Isaías 55:​6, 7).

4. ¿Toni kichiua Jehová para techpaleuis maj tikajsikamatikan keniuj techtapojpoluia?

⁴ Komo Jehová okachi kuali tetapojpoluia, ¿keniuj uelis tikajsikamatiskej tein kichiua? Jehová kijtoua seki taman tein techpaleuia maj tikajsikamatikan keniuj techtapojpoluia. Itech nejin tamachtilis ika titajtoskej seki, ijkon tikitaskej toni kichiua Jehová para senkis kiixpolos totajtakoluan uan maj oksepa kuali iuan timouikakan. Keman timomachtijtiaskej, tikitaskej keniuj kinextia Jehová ke techtapojpoluia. Ijkon okachi tiktasojtaskej uan tiktasojkamatiliskej toTajtsin akin semi techtasojta uan techiknelia.

JEHOVÁ KIUIKA TOTAJTAKOLUAN

5. ¿Toni panoua keman Jehová techtapojpoluilia totajtakoluan?

⁵ Biblia kijtoua ke totajtakoluan tamatij kemej teisa tein etik. Tekiuaj David kijtoj: “Nonepololuan nechkuasioujtijkejya, kemej se tamamal tel etik tein amo nikxikouaok” (Sal. 38:4). Sayoj ke Salmo 25:18 uan 32:5 kijtoua ke Jehová “kintapojpoluia” akin yekmelauj moyolpataj. Itech nejin versículos tajtol “kintapojpoluia” itech hebreo kijtosneki “kiajokui” oso “kiuika”. Yejua ika keman Jehová techtapojpoluilia totajtakoluan, amo timoyolkokojtokejok porin kemej yeskia techkuiliskia teisa tein tikechpanojtokej tein tel etik.

6. ¿Kani kiuika Jehová totajtakoluan?

⁶ ¿Uan kani kiuika Jehová totajtakoluan? Itech Salmo 103:12 ika tajtoua okse taman tein techpaleuia maj tikmatikan, kijtoua: “Uejka kitalij totajtakoluan, ijkon kemej ueuejka moajsij tonalkisayampa uan tonalkalakyampa”. Kampa ualkisa tonaltsin keman tanesi amo ompa pankalaki keman tapoyaui. Tel ueuejka moajsij kampa ualkisa uan kampa pankalaki. Yejua ika nejin versículo technextilia ke keman Jehová techtapojpoluia kemej yeskia tel uejka kinuika totajtakoluan, tein kinextia ke senkis techtapojpoluia.

7. ¿Toni kijtoua Biblia ke kichiua Jehová ika totajtakoluan? (Miqueas 7:​18, 19).

⁷ Keman moijtoua ke Jehová uejka kiuika totajtakoluan, ¿kijtosneki ke kemej yeskia moinkauilia? Amo, porin tekiuaj Ezequías kiluij: “Amo tikitaok notajtakoluan” (Is. 38:​9, 17). Yejua ika keman timoyolpataj, Jehová kemej yeskia uejka kintamota totajtakoluan kampa amo oksepa kinitas. Nejin versículo no ueliskia motajtolkepas ijkon: “Tikchiua maj moita kemej yeskia amo keman nitajtakolchiuaskia”. Biblia techpaleuia maj tikajsikamatikan nejin porin ika tajtoua okse taman itech Miqueas 7:​18, 19 (xikonlero). Ompa kijtoua ke Jehová kinpantamota totajtakoluan itech mar. Ne uejkauj keman teisa pankalakia itech mar amo keman oksepa kiajsiaj.

8. ¿Toni timomachtijkejya?

⁸ Tikitakejya seki taman itech Biblia tein kinextia ke keman Jehová techtapojpoluia senkis kiuika totajtakoluan para maj amo timoyolkokojtokanok. David kijtoj: “Yolpakij akin kintapojpoluilianij tein amo kuali tein kichiujkej uan akin kinelkauilianij inintajtakoluan; yolpaki akin Jehová amo kielnamikilia itajtakol” (Rom. 4:​6-8). Yejua nejon tein Jehová kichiua keman techtapojpoluia.

JEHOVÁ KIIXPOLOUA TOTAJTAKOLUAN

9. ¿Keniuj tein kijtoua Biblia techpaleuia maj tikitakan ke Jehová senkis techtapojpoluia?

⁹ Maj tikitakan okseki taman tein no techpaleuis maj tikajsikamatikan ke komo timoyolpataj, Jehová ueli techtapojpoluilia totajtakoluan porin Jesús taxtauak para techmakixtis. Biblia kijtoua ke Jehová kemej yeskia kinpaka itajtakoluan aksa uan ijkon kichipaua akin tajtakolchiuak (Sal. 51:7; Is. 4:4; Jer. 33:8). Jehová kijtoua toni panoua keman kichiua nejin: “Maski namotajtakoluan yeskij chichiltikej, mochiuaskej istakej kemej sekti; maski yeskij chichiltikej kemej tasal tein semi chichiltik, mochiuaskej istakej kemej ichkatojmit” (Is. 1:18). Keman se tasal kipia se mancha chichiltik semi ouij se kikixtilia. Yejua ika keman Jehová ika tajtoua nejin, techmatiltia ke yejua ueli senkis kiixpoloua totajtakoluan.

10. ¿Toni no kijtoua Biblia ke kichiua Jehová keman techtapojpoluia?

¹⁰ Kemej tikitakej itech okse tamachtilis, tajtakolmej tamatij kemej tein “titauikaj” (Mat. 6:12; Luc. 11:4). Yejua ika nochipa keman titajtakolchiuaj kemej yeskia okachi momiakilia tein tiktauikiliaj Jehová. Sayoj ke keman yejua techtapojpoluia, kemej yeskia techiluiskia ke amo teyi tiktauikiliajok. Nejin kijtosneki ke amo techtaxtaualtiaok nion teyi porin techtapojpoluijya. Ijkon kemej yolseui aksa keman amo kitaxtaualtiajok tein tauika, no ijkon semi tiyolseuij keman Jehová techtapojpoluia.

11. ¿Toni kijtosneki keman Biblia kijtoua ke Dios kiixpoloua totajtakoluan? (Hechos 3:19).

¹¹ Jehová amo sayoj techiluia ke amo teyi tiktauikiliajok, ta no ke senkis kiixpoloua totajtakoluan oso senkis techtapojpoluia (xikonlero Hechos 3:19). Maj itech titanemilikan keman itech se amat kitacharouaj tein aksa tauika. Maski kitacharouaj, kisentoka moita kanachi tauikaya. Itech nejin versículo amo kijtoua ke sayoj kitacharouaj teisa, ta ke senkis kiixpolouaj. Maj tikelnamikikan ke tein ika tajkuilouayaj ne uejkauj uelia ijsiujka kipojpolouayaj ika at. Yejua ika keman kiixpolouayaj tein aksa tauikaya, senkis ixpoliuia. Amo moitayaok nion teyi, uan amo akin kimatia tein ompa ijkuiliujtoya. Kemej yeskia amo keman tauikaskia teisa. Semi tiktasojkamatij porin keman Jehová techtapojpoluia, senkis kiixpoloua totajtakoluan (Sal. 51:9).

12. ¿Toni techmachtia keman Biblia ika tajtoua miak mixti?

¹² Jehová no ika tajtoua nejin para technextilis keniuj techtapojpoluia: “Nikinixpolos monepololuan kemej yeskia nikixtsakuas ika se mixti, uan motajtakoluan kemej yeskia nikixtsakuas ika miak mixti” (Isaías 44:22). Keman Jehová techtapojpoluia kemej yeskia ika miak mixti kiixtsakua totajtakoluan para amo kiitasok uan para maj tejuan amo no tikitakanok.

13. ¿Keniuj tionmomachilia tikonmatis ke Jehová mitsontapojpoluia?

¹³ ¿Toni techmachtia nochi tein tikitakejya? Keman Jehová techtapojpoluia, amo moneki maj tiksentokakan timoyolkokojtokanok. Kemej iesyo Jesús senkis kiixtauakya tein titauikayaj, amo monekiok titaxtauaskej. Senkis ixpoliujkejya totajtakoluan uan kemej yeskia amo keman titajtakolchiuaskiaj. Ijkon techtapojpoluia Jehová keman yekmelauj timoyolpataj.

JEHOVÁ OKSEPA TECHSELIA KEMEJ TIITASOJIKNIUAN

14. ¿Keyej titakuaujtamatij ke Jehová senkis techtapojpoluia? (No xikonita taixkopimej).

¹⁴ Keman Jehová techtapojpoluia tikyekmatij ke oksepa mochiua totasojikniuj. Uan kemej senkis techtapojpoluia amo moneki tiksentokaskej timotajtakoltijtoskej tein tikchiujkej. Uan amo moneki tiknemiliskej ke kisentoka touan kualantok uan ke kitemojtok keniuj techtatsakuiltis. ¡Amo keman ijkon kichiuaskia! ¿Keniuj tikmatij? Porin yejua kiluij tanauatijkej Jeremías: “Nikintapojpoluis ininnepololuan, uan amo nikelnamikisok inintajtakol” (Jer. 31:34). Tatitanil Pablo ika tajtoj nejin versículo keman kijtoj: “Amo kemanok nikinelnamikilis inintajtakoluan” (Heb. 8:12). ¿Toni kijtosneki nejin?

15. ¿Toni kijtosneki keman Jehová kijtoua ke amo keman kielnamikisok totajtakoluan?

¹⁵ Itech Biblia, tajtol kielnamikis amo nochipa kijtosneki keman aksa kielnamiki teisa tein panokya, ta no kijtosneki ke niman kichiua teisa keman kielnamiki. Takat akin pilkatoya inakastan Jesús, kiluij: “Xinechelnamiki keman titaixyekantosya kemej tekiuaj” (Luc. 23:​42, 43). Tikmatij ke amo sayoj kiluijtoya Jesús maj kielnamikini. Uan Jesús kiteajsikamatiltij ke ipa kipaleuiskia nejon takat porin kichiuaskia maj oksepa nemi. Yejua ika keman Jehová kijtoua ke amo kielnamikisok totajtakoluan, kijtosneki ke senkis techtapojpoluijya uan amo kichiuasok nion teyi para techtatsakuiltis.

16. ¿Keniuj kijtoua Biblia ke timomachiliaj keman Dios techtapojpoluia?

¹⁶ Keman Jehová techtapojpoluia semi kuali timomachiliaj. Biblia ika tajtoua okse taman tein techpaleuia maj tikajsikamatikan nejon. Tinochin kemej yeskia ‘tietokej imako tajtakol’ porin titajtakolejkej. Sayoj ke keman Jehová techtapojpoluia kemej yeskia kikotona tein ika tiilpitokej para ‘techmakixtis den tajtakol’ (Rom. 6:​17, 18; Apoc. 1:5). Keman tikmatij ke Jehová techtapojpoluijya semi tiyolpakij ijkon kemej se takeual keman amo yetokok temako.

17. ¿Keyej kemej yeskia tipajtij keman Jehová techtapojpoluia? (Isaías 53:5).

¹⁷ (Xikonlero Isaías 53:5). Biblia kijtoua ke tajtakol tamati kemej se kokolis tein amo kipia pajti. Sayoj ke Jehová kemej yeskia techpajtij keman kitemakak iKonetsin. Nejon techpaleuia maj oksepa kuali iuan timouikakan, porin keman titajtakolchiuaj amo ueli iuan timouikajok (1 Ped. 2:24). Semi yolpaki aksa akin motelkokouaya keman pajti. Ijkon timomachiliaj keman Jehová techtapojpoluia uan oksepa kuali iuan timouikaj.

¿KENIUJ TECHPALEUIA MAJ JEHOVÁ TECHTAPOJPOLUI?

18. Ika tein tikitakejya itech Biblia, ¿toni techmachtia tein kichiua Jehová keman techtapojpoluia? (No xikonita recuadro “¿Keniuj techtapojpoluia Jehová?”).

¹⁸ Timomachtijkejya itech Biblia seki taman tein kichiua Jehová keman techtapojpoluia, ¿toni techmachtia nejon? Keman yejua techtapojpoluia kemej yeskia amo keman titajtakolchiuaskiaj, uan amo no kitemojtos techtatsakuiltis satepan. Nejin techpaleuia maj kuali iuan timouikakan toTajtsin. Sayoj ke moneki tikelnamikiskej ke Jehová techtapojpoluia porin techtasojta uan yolkuali, uan amo porin tejuan timotaniliaj, uan amo no uelis tikchikaujkauiskej maj ijkon kichiua (Rom. 3:24).

19. 1) ¿Keyej timotasojkamatij? (Romanos 4:8). 2) ¿Toni tikitaskej itech okse tamachtilis?

¹⁹ (Xikonlero Romanos 4:8). ¡Semi tiktasojkamatiliaj Jehová maj techtapojpolui! (Salmo 130:4). Sayoj ke komo tiknekij maj Jehová ‘yekmelauj techtapojpolui’ moneki tikakiskej tein Jesús tanejmachtij: “Komo amo nankintapojpoluiaj oksekin, namoTajtsin amo no namechtapojpoluis” (Mat. 6:​14, 15). Yejua ika, semi moneki maj titetapojpoluikan kemej Jehová kichiua. Itech okse tamachtilis tikitaskej keniuj uelis ijkon tikchiuaskej.