¿Keyej semi tiktasojkamatij maj Jehová techtapojpolui?

1, 2. ¿Keyej timoajsij kemej telpoch akin ika tajtoua párrafo 1?

XIKONNEMILI ke itatuan se telpoch kipiaj miak tomin, sayoj ke se tonal kinauatiaj ke itatuan kinpanok tein amo kuali uan momikilijkej. No kiluiaj ke itatuan kiauilchiujkej nochi inintomin uan semi motauikaltijkej. Yejua ika amo kikauilijteujkej nion teyi uan hasta moneki taxtauas tein motauikaltijkej, uan akin kintaneuilijkej kinekij maj niman kintakepikan. Sayoj ke tel miak tomin tauikayaj uan yejua ika amo keman ueliskia tamitaxtauas.

² Tejuan no timoajsij kemej nejon telpoch. Yekinika totatuan, Adán uan Eva amo katkaj tajtakolejkej uan nemiaj itech se xochital (Gén. 1:27; 2:​7-9). Yejuan ueliskia nemiskej nochipaya uan yolpakiskej sayoj ke kichiujkej tein amo kuali. Adán uan Eva tajtakolchiujkej, yejua ika Jehová kinkixtij de xochital Edén uan amo ueliskiaok nemiskej nochipaya. ¿Toni kinkauilijteujkej ininkoneuan? Biblia techiluia: “Tajtakol kalakik nikan taltikpak itechkopa se takat [Adán] uan tajtakol kichiuak maj se miki, uan ijkon nochin momikilijtiajkej, porin nochin motajtakolmakakej” (Rom. 5:12). Adán techkauilijteuak tajtakol uan yejua ika timomikiliaj. Nejon tajtakol kemej yeskia tel miak titauikaskiaj uan amo keman uelis titaxtauaskej (Sal. 49:8).

3. ¿Keyej keman titajtakolchiuaj kemej yeskia timotauikaltiaj teisa?

³ Biblia kijtoua ke totajtakoluan tamatij kemej ijkuak ‘timotauikaltiaj’ (Mat. 6:12; Luc. 11:4). Keman titajtakolchiuaj, kemej yeskia timotauikaltiaj iuan Jehová. Yejua ika komo amo akin techpaleuiskia, sayoj ueliskia tikixtauaskej keman timikiskiaj (Rom. 6:​7, 23).

4. 1) ¿Toni techpanoskia komo amo akin techpaleuiskia? (Salmo 49:​7-9). 2) ¿Toni kijtoua Biblia ke kijtosneki tajtakol? (Xikonita recuadro “Tajtakol”).

⁴ Toselti amo uelis tikchiuaskej nion teyi para oksepa tikpiaskej tein Adán uan Eva kipolojkej (xikonlero Salmo 49:​7-9). Komo amo akin techpaleuiskia, amo ueliskia tikchiaskej tinemiskej nochipaya nion no ueliskia oksepa tinemiskej komo timomikiliaj. Tonemilis tamiskia ijkon kemej kinpanoua tapialmej (Ecl. 3:19; 2 Ped. 2:12).

5. ¿Toni kichiuani Jehová para techpaleuis maj moixtaua totajtakoluan? (Xikonita taixkopin).

⁵ Maj itech titanemilikan telpoch akin ika titajtojkej itech párrafo 1. ¿Keniuj momachiliskia komo se takat akin semi tominpia kiixtauiliskia nochi tein tauika? Xa semi motasojkamatiskia uan kikauaskia maj kitaxtauili. No ijkon, toTajtsin Jehová akin semi techtasojta techtayokolij teisa tein kiixtaua tajtakol tein techkauilij Adán. Jesús ijkon kimelauak: “Dios semi kintasojtak akin nemij nikan taltikpak, yejua ika kitemakak iKoneuj akin yojtsin uan ijkon akin itech takuaujtamatis amo ixpoliuis, ta nemis nochipaya” (Juan 3:16). Tein Jehová techtayokolij no techpaleuia maj kuali iuan timouikakan.

6. ¿Toni tikitaskej itech nejin tamachtilis, uan keyej?

⁶ ¿Keniuj uelis techpaleuis tein Jehová techtayokolij para techtapojpoluis totajtakoluan? Para tiknankiliskej, tikitaskej nejin tajtolmej tein kikui Biblia uan toni kijtosneki: oksepa ueli timouikaj iuan Dios, kiixtalij keniuj techmakixtis, taxtauak para techmakixtis, uan kemej techmakixtijya, ueli techita ke tiyolmelaujkej. Komo itech titanemiliaj tein Jehová kichiuak para techtapojpoluis okachi tiktasojkamatiliskej.

JEHOVÁ KINEKI MAJ OKSEPA KUALI IUAN TIMOUIKAKAN

7. 1) ¿Toni amo no kipiakejok Adán uan Eva? 2) ¿Keyej tiikoneuan Adán uan Eva motelnekia maj techpaleuikan? (Romanos 5:​10, 11).

⁷ Keman Adán uan Eva tajtakolchiujkej amo uelikok nenkej nochipaya. Uan no, amo kuali mouikakejok iuan ininTajtsin, Jehová. Achto ke tajtakolchiuaskiaj, Adán uan Eva pouiaj iniuan ichankauan Dios (Luc. 3:38). Sayoj ke keman amo kitakamatkejok Jehová, amo ueliaok pouiaj iniuan ichankauan. Nejon panok achto ke kinpiaskiaj ininkoneuan (Gén. 3:​23, 24; 4:1). Yejua ika, kemej nion semej tiikoneuan ueliskia tipouiskej iniuan ichankauan Jehová, monekia techpaleuiskej maj oksepa ueli timouikakan iuan (xikonlero Romanos 5:​10, 11). Kemej timouejkatilijkej de Dios monekia oksepa kuali iuan timouikaskej. Semi kualtsin porin yejua Jehová akin yekinika kitemoj maj oksepa kuali iuan timouikakan. ¿Keniuj kichiuak?

JEHOVÁ KICHIUAK TEISA PARA UELIS IUAN TIMOUIKASKEJ

8. ¿Toni kichiuak Jehová para techmakixtis?

⁸ Kemej titajtakolejkej, Jehová kiixtalij keniuj techmakixtis para maj ueli kuali iuan timouikakan. Para kiixtauas tein Adán kipoloj, Jehová kitemakak teisa tein no kitelpia ipatiuj kemej tein mopolojka. ITajtol Dios itech tajtol griego no ika tajtoua tein kichiuak Jehová para maj aksa ueli kuali iuan mouika (Rom. 3:25).

9. ¿Toni kiixtalij Jehová maj kichiuanij israelitas para kintapojpoluilis inintajtakoluan?

⁹ Ne uejkauj, Jehová kiixtalij maj mochiua teisa para ueliskia kintapojpoluilis inintajtakoluan israelitas uan para maj kuali iuan mouikanij. Itech tonal keman Dios kiixpolouaya inintajtakoluan, tayekankatiopixkat kintemaktiaya tapialmej para kinpaleuis israelitas uan nejin mochiuaya sepa itech xiuit. Maski ijkon, tapialmej amo senkis kiixpolouaya inintajtakoluan porin tonemilis ipa kipia okachi ipatiuj ke den tapialmej. Sayoj ke Jehová kintapojpoluiliaya inintajtakoluan israelitas nochipa keman moyolpatayaj uan kitemakayaj tein kiniluiaya (Heb. 10:​1-4). Uan no, tein kitemakayaj itech tonal keman Dios kiixpolouaya inintajtakoluan uan itech okseki tonalmej, kinelnamiktiaya ke katkaj tajtakolejkej uan ke monekia motemakas teisa tein okachi kuali para kintapojpoluiskiaj nochipaya.

10. ¿Toni kichiuak Jehová para ueliskia senkis kintapojpoluilis inintajtakoluan nochin?

¹⁰ ¿Toni kichiuak Jehová para senkis techtapojpoluilis totajtakoluan? Kichiuak maj iKonetsin ‘sayoj sepa motemaktiani para kinkixtilis inintajtakoluan miakej’ (Heb. 9:28). Jesús kitemakak inemilis uan ijkon taxtauak “para kinmakixtis miakej” (Mat. 20:28). ¿Keyej monekia maj taxtaua?

TEIN TAXTAUAK PARA OKSEPA KUALI IUAN TIMOUIKASKEJ

11. 1) ¿Toni monekia motemakas para motaxtauas? 2) ¿Akoni sayoj ueliskia taxtauas?

¹¹ Biblia kijtoua ke Jehová kiitak ke monekia maj aksa taxtaua para techmakixtis uan ijkon ueliskia techtapojpoluilis totajtakoluan uan iuan timouikaskej. ¿Toni monekia motemakas para ika motaxtauas uan ijkon ueliskia oksepa tikpiaskej tein Adán kipolojka? Maj tikelnamikikan ke Adán uan Eva tajtakolchiujkej uan amo ueliskiaok nemiskej nochipaya. Yejua ika tein motemakaskia monekia maj no ipatiuj kemej tein kipolojka Adán (1 Tim. 2:6). Sayoj ueliskia taxtauas se takat akin kipiaskia nejin eyi taman: maj amo tajtakolej, maj uelini nemini nochipaya nikan taltikpak uan maj kinekini toka momikilis. Sayoj nejon takat ueliskia motemakas para kiixtauas tein poliujka uan techtapojpoluiskej.

12. ¿Keyej Jesús uelik taxtauak?

¹² Maj tikitakan eyi taman tein kinextia keyej Jesús uelik taxtauak para techmakixtis: 1) amo yolik tajtakolej uan “amo kichiuak nion se tajtakol”, 2) yejua ika ueliskia nemis nochipaya nikan taltikpak uan 3) kinekik toka motemakas uan momikilis (1 Ped. 2:22; Heb. 10:​9, 10). Jesús amo no katka tajtakolej ijkon kemej katka yekinika takat Adán achto ke motajtakolmakaskia (1 Cor. 15:45). Kemej toka momikilij, Jesús uelik kiixtauak nochi tein Adán kipolojka (Rom. 5:19). Ijkon, Jesús mochiuak “okse Adán”. Amo monekiok maj uiki okse takat akin amo tajtakolej uan maj kiixtaua tein Adán kipoloj. Jesús “motemaktij sayoj sepa” (Heb. 7:27; 10:12).

13. ¿Keyej ueli kuali timouikaj iuan Jehová?

¹³ Kemej tikitakejya, ¿keyej ueli kuali timouikaj iuan Jehová? Yejua kitemakak tein tapaleuiskia maj techtapojpoluili totajtakoluan keman Jesús, akin amo tajtakolej motemakak mikis para kiixtauas totajtakoluan (Efes. 1:7; Heb. 9:14).

KEMEJ TECHMAKIXTIJYA UELI TECHITA KE TIYOLMELAUJKEJ

14. ¿Toni timomachtiskej, uan keyej?

¹⁴ ¿Keniuj techpaleuia tein Jehová toka kichiuak? Para tiknankiliskej nejin netajtanil maj tikitakan toni kijtosneki ome taman tein Biblia kijtoua, uan ijkon tikajsikamatiskej keniuj techpaleuia maj Jehová techtapojpolui.

15, 16. 1) ¿Keniuj techpaleuia maj Jesús taxtauani para techmakixtis? 2) ¿Keniuj timomachiliaj porin amo yeski titajtakolejkejok nion timomikiliskejok?

¹⁵ Biblia kijtoua ke kemej motaxtauakya ueli techtapojpoluiaj oso techmakixtiaj. Tatitanil Pedro kijtoj ijkon: “Namejuan nankimatij ke namechmakixtijkej para amo nankisentokaskej nanenkajnemiskej ijkon kemej namechnextilijkej namouejkaujtatuan. Keman namechmakixtijkej amo taxtaujkej ika plata uan oro tein uejueliui, ta ika iesyo Cristo, tein semi kipia ipatiuj, kemej iesyo se ichkatsin tein amo teyi kipoloua uan amo pitsotik” (1 Ped. 1:​18, 19).

¹⁶ Kemej Jesús taxtauakya, Dios ueli techmakixtia den tajtakol uan mikilis tein axkan kichiua maj semi titajyouikan (Rom. 5:21). Semi tikintasojkamatiliaj Jehová uan iKonetsin porin techmakixtijkej ika inemilis oso iesyo Jesús tein semi kipia ipatiuj (1 Cor. 15:22).

17, 18. 1) ¿Toni kijtosneki maj Jehová techita ke tiyolmelaujkej? 2) ¿Keniuj techpaleuia nejon?

¹⁷ Biblia kijtoua ke Jehová kinita yolmelaujkej akin kitekitiliaj. Nejin kijtosneki ke amo techixtaualtia tajtakolmej tein tikchiuaj. Maski ijkon, Jehová kisentoka kichiua tein yejua kiita ke kuali yetok. Uan keman yejua techita ke tiyolmelaujkej, amo kichiua porin timotaniliaj oso porin amo kichiua cuenta totajtakoluan. Ta Jehová techtapojpoluia porin itech titakuaujtamatij tein yejua uan Jesús kichiujkej para techmakixtiskej (Rom. 3:24; Gál. 2:16).

¹⁸ ¿Keniuj techpaleuia maj Jehová techita ke tiyolmelaujkej? Seki tokniuan kinixpejpenkej maj tekiuajtikan ne iluikak iuan Jesús uan mochiujkejya ikoneuan Dios (Tito 3:7; 1 Juan 3:1). Kintapojpoluilijkejya inintajtakoluan uan kemej yeskia amo keman tajtakolchiuaskiaj, yejua ika ueli pouij itech iTaixyekanalis Dios (Rom. 8:​1, 2, 30). Okseki tokniuan kichiaj nemiskej nochipaya nikan taltikpak, kuali mouikaj iuan Dios, uan no kintapojpoluilijkejya inintajtakoluan (Sant. 2:​21-23). Uan tel miakej akin makisaskej keman mochiuas Armagedón, kichiaj amo keman momikiliskej (Juan 11:26). Akin “yolmelaujkej” uan akin “amo yolmelaujkej” uan momikilijkejya oksepa nemiskej (Hech. 24:15; Juan 5:​28, 29). Satepan, nochin akin kitekitiliaj Jehová, akin nemiskej nikan taltikpak yeskij kemej “ikoneuan Dios akin amo yetokej temako” (Rom. 8:21). Tiktelnekijya maj ejko tonal keman uelis timochiuaskej tiikoneuan toTajtsin Jehová akin amo tajtakolejkej.

19. ¿Keniuj techpaleuia tein Jehová uan Jesús toka kichiujkej? (No xikonita recuadro “¿Toni kichiuani Jehová para techtapojpoluis?”).

¹⁹ Tejuan no timoajsiaj kemej nejon telpoch akin amo kipia nion teyi uan tein tauika amo keman uelis kiixtauas, sayoj ke Jehová techpaleuij. Tein techpanotoya mopatak porin Jehová kitemakak tein ueliskia kiixpolos totajtakoluan, uan Jesús taxtauak para techmakixtis. Kemej titakuaujtamatij iuan Jesús techpaleuia maj timomakixtikan den tajtakol uan mikilis. Uan no, keman Jehová techtapojpoluilia totajtakoluan kemej yeskia amo keman titajtakolchiuaskiaj. Sayoj ke okachi kualtsin porin axkan ueli kuali timouikaj iuan toTajtsin Jehová.

20. ¿Toni tikitaskej itech okse tamachtilis?

²⁰ Semi tikintasojkamatiliaj Jehová uan Jesús keman itech titanemiliaj nochi tein toka kichiujkej (2 Cor. 5:15). Komo amo techpaleuiskiaj, amo ueliskia tikchiaskej nion teyi tein kuali. Itech okse tamachtilis tikitaskej seki taman itech Biblia tein techpaleuis maj tikitakan ke keman Jehová techtapojpoluia amo monekiok maj timoyolkokojtokan.