Tein tajtanij akin taixtajtoltiaj
Keman Jesús kipeualtij iTakualis toTekotsin, ¿kani moajsiaj 70 imomachtijkauan akin kintitanka maj tanojnotsatij? ¿Kikaujteujkaj?
Keman Jesús kipeualtij iTakualis toTekotsin, 70 imomachtijkauan amo iuan yetoyaj, amo porin kikaujkaj oso amo kitakamatiajok ta porin ijkuak Jesús sayoj kinekia yetos iniuan itatitaniluan.
Nochin 12 uan oksekin 70 katkaj imomachtijkauan Jesús. Sayoj ke kinixpejpenak sayoj 12 imomachtijkauan uan kintokaytij tatitanilmej (Luc. 6:12-16). Yetoya Galilea keman “kinsentilij 12 tatitanilmej” uan “kintitanik maj kiteixmatiltitij iTaixyekanalis Dios uan maj tapajtikan” (Luc. 9:1-6). Uan satepan, tanikopa de Judea “kinijitak okseki 70 uan kintitanik ojomen” (Luc. 9:51; 10:1). Yejua ika kampa yeski kampa motanojnotsaya moajsiaj imomachtijkauan.
Judíos akin mochiuayaj imomachtijkauan Jesús kisentokayaj kichiuayaj Pascua xijxiujtika, xa iniuan ichankauan (Éx. 12:6-11, 17-20). Tepitsin achto ke Jesús momikiliskia, yajki Jerusalén iniuan itatitaniluan. Sayoj ke yejua amo kiniluij imomachtijkauan akin moajsiaj Judea, Galilea uan Perea maj iuan kichiuakan Pascua. Nesi ke ijkuak sayoj kinekia yetos iniuan itatitaniluan. Yejua ika kiniluij: “Semi niknekia nitakuas namouan itech nejin Pascua achto ke nitajyouis...” (Luc. 22:15).
¿Uan keyej sayoj kinekia yetos iniuan? Amo uejkaua momikiliskia “iIchkatsin Dios tein techkixtilia tajtakol” (Juan 1:29). Momikiliskia ompa Jerusalén, kampa kimaktiliayaj Dios tapialtsitsin desde ne uejkaujya. Ichkatsin tein motemakaya itech Pascua kinelnamiktiaya israelitas ke Jehová kinmakixtijka de Egipto. Sayoj ke imikilis Jesús okachi tapaleuiskia porin kinmakixtiskia nochin den tajtakol uan mikilis (1 Cor. 5:7, 8). Kemej Jesús momikiliskia, 12 itatitaniluan yeskiaj tatsineualoni de inechikol Dios (Efes. 2:20-22). Jerusalén tein moajsi ne iluikak kipia “kemej tatsineualoni 12 temej” uan ompa ijkuiliujtok “inintokay 12 itatitaniluan Ichkatsin” (Apoc. 21:10-14). Nejin tatitanilmej tapaleuiskiaj para maj mochiua tein Dios kinekia. Yejua ika Jesús kitelnekia iniuan yetos keman kichiuaskia Pascua uan keman kipeualtiskia iTakualis toTekotsin.
Nochin 70 uan oksekin imomachtijkauan Jesús amo iuan yetoyaj nejon tonal. Maski ijkon, nochin imomachtijkauan akin amo keman kikauaskiaj kinpaleuiskia tein Jesús kichiuak. ¿Keyej? Porin nochin akin yeskiaj taijitalmej pouiskiaj itech se taixyekanalis tein Jesús ika tajtoj nejon youak iniuan itatitaniluan (Luc. 22:29, 30).