Jehová kiajsikamati keyej timochoktia

1, 2. ¿Toni ueliskia kichiuas maj tichokakan?

TINOCHIN tichokanij uan kemansa tichokaj porin tiyolpakij, xa keman yoli se konetsin. No ijkon panoua keman tikelnamikij teisa tein kualtsin tein techpanok oso keman tikitaj se totasojikniuj akin amo tikitstoyaj.

² Sayoj ke miakpa tichokaj porin timoyolkokojtokej. Xa tein aksa kichiuak semi techyolkokoj, xa semi titajyouiaj porin tikpiaj se kokolis oso porin momikilij aksa akin semi tiktasojtayaj. Keman ijkon techpanoua, xa timomachiliaj kemej Jeremías keman babilonios kiixpolojkej Jerusalén. Tanauatijkej kijtoj: “Itech noixtololouan kisa noixayo kemej yeskia miak at tein motalojtok [...]. Semi nichokas, uan amo uelis nimotsakuilis” (Lam. 3:​48, 49).

3. ¿Keniuj momachilia Jehová keman techita ke titajyouiaj? (Isaías 63:9).

³ Jehová kimati kanachpa tichokanij keman techtajyouiltia teisa. Biblia techiluia ke yejuatsin kiita keniuj titajyouiaj uan ke techkaki keman tiktataujtiaj maj techpaleui (Sal. 34:15). Uan amo sayoj techita uan techkaki, ta no kichiua okse taman. Yejua toTajtsin uan semi techtasojta, uan motayokoltia keman kiita ke tichokaj uan niman techpaleuia (xikixtajtolti Isaías 63:9).

4. ¿Akonimej ininka timomachtiskej uan toni techmachtis de Jehová?

⁴ Itech Biblia tikitaj toni kichiuaya Jehová keman itekitikauan chokayaj. Maj itech titanemilikan tein kipanok Ana, David uan tekiuaj Ezequías. ¿Keyej chokakej? ¿Keniuj kinpaleuij Jehová? Uan ¿keniuj techyolseuia keman titayokoyaj, keman techkajkayaua akin tiktasojtaj uan keman tikpiaj se ueyi kokolis?

KEMAN TICHOKAJ PORIN TITAYOKOYAJ

5. ¿Keniuj momachiliaya Ana?

⁵ Ana kipanok miak taman tein semi ouij uan chokaya porin itakauj no iuan monamiktijka Peniná akin semi kitauelitaya Ana. Yejua amo uelia kinpiaya konemej uan Peniná kinpiaya miakej (1 Sam. 1:​1, 2). Yejua ika miakpa kikejkelouaya. ¿Keniuj timomachiliskia komo ijkon mitspanoskia? Ana semi tajyouijtoya, yejua ika “semi chokaya uan amo takuaya” (1 Sam. 1:​6, 7, 10).

6. ¿Toni kichiuak Ana?

⁶ ¿Toni kichiuak Ana? Yajki itech kaltsin kampa kiueyichiuayaj Jehová. Uan keman moajsiaya kaltenoj, “peuak kitataujtia Jehová uan tel chokaya”. Kitajtanij maj amo kielkaua uan kiluij: “Tejua tikmati ke semi nitajyouijtok” (1 Sam. 1:10b, 11). Ana kitapouij Jehová nochi tein kimachiliaya. Yejuatsin no moteltayokoltij keman kiitak ke Ana semi mochoktiaya. Uan kemej semi kitasojtaya kinekia kiyolseuis.

7. ¿Keniuj momachilij Ana satepan ke kitataujtij Jehová?

⁷ ¿Keniuj momachilij Ana satepan ke kitataujtij Jehová uan keman tayekankatiopixkat Elí kiyolseuij? Biblia kijtoua: “Yajki, takuaj uan amo tayokoyakok” (1 Sam. 1:​17, 18). Ana yolseuik maski ayamo moyektaliaya tein kipanotoya. Kineltokaya ke Jehová kiajsikamatia tein kimachiliaya uan tein kipanotoya uan ke kipaleuiskia. Uan yejua nejon tein kichiuak Jehová, kiajsikamatik Ana, kikakik inetataujtil uan satepan kichiuak maj kipia se konetsin (1 Sam. 1:​19, 20; 2:21).

8, 9. Kemej kijtoua Hebreos 10:​24, 25, ¿keyej semi moneki maj timonechikokan? (No xikita taixkopin).

⁸ ¿Toni techmachtia? ¿No timochoktia oso timotayokoltia porin mitspanotok teisa tein ouij? Xa momikilij se mochankauj oso se motasojikniuj. Keman ijkon panoua xa tiknekij tietoskej toselti, sayoj ke xikelnamiki tein kichiuak Ana. Yejua yajki itech kaltsin kampa taueyichiuayaj uan Jehová ompa kiyolseuij. Yejuatsin no uelis mitsyolseuis komo tiouj nechikolmej maski tikmachilis ke tisioujtok uan titayokoxtok (xikixtajtolti Hebreos 10:​24, 25). Itech nechikolmej tikakij miak textos tein techyolchikauaj, ijkon Jehová techpaleuia maj amo tiknemilikanok tein techtayokoltia. Nejon techpaleuia maj kuali timomachilikan maski amo niman moyektalis tein techtajyouiltijtok.

⁹ Itech nechikolmej, tokniuan techyolseuiaj uan technextiliaj ke techtasojtaj, uan nejon techyolchikaua (1 Tes. 5:​11, 14). Maj tikitakan tein kijtoj se precursor especial akin momikilij isiuatsin, yejua kijtoj: “Semi niktemouaok nosiuatsin uan nichoka keman nietok noselti. Sayoj ke keman niouj nechikolmej, tokniuan nechyolchikauaj para maj amo nimosenkaua. Tein tanankiliaj tokniuan uan tein nechiluiaj nechyolseuia. Maski semi nitayokoxtiujok keman niajsi itech Kali kampa tiMosentiliaj, kuali nimomachilia keman ompa nietokya”. Keman tiouij nechikolmej, Jehová kinkui tokniuan para maj techpaleuikan.

10. ¿Keniuj uelis tikchiuaskej kemej Ana keman semi timotayokoltiskej?

¹⁰ Ana yolseuik keman kitapouij Jehová keniuj momachiliaya. Tejua no uelis tikchiuas tein kijtoua 1 Pedro 5:7 uan tikiluis Jehová tein mitstekipachoua uan titakuaujtamatis ke yejuatsin mitskakis. Se tokniuj siuat kijtoua keniuj momachilij keman seki tachtekinij kimiktijkej itakatsin: “Semi nimotayokoltiaya uan niknemiliaya ke amo oksepa niyolpakiskia”. ¿Toni kipaleuij? Yejua kijtoua: “Niktataujtiaya noTajtsin Jehová uan nochipa nikmachiliaya keniuj nechyolseuiaya. Kemansa amo nikmatia keniuj nikiluis tein nikmachiliaya sayoj ke yejuatsin nechajsikamatia. Keman semi nimotayokoltiaya niktajtaniaya maj nechyolseui. Niman kuali nimomachiliaya uan uelia nikchiuaya tein monekia nejon tonal”. Keman tichoka uan tikiluia Jehová toni mitstayokoltia, yejuatsin no motayokoltia uan kiajsikamati keniuj timomachilia. Maski amo niman moyektalis tein mitspanotok, Jehová mitsyolseuis uan mitspaleuis kuali ximomachili (Sal. 94:19; Filip. 4:​6, 7). Uan no, yejuatsin kiita nochi tein tikchiua para amo tikauas uan mitstatiochiuis (Heb. 11:6).

KEMAN TICHOKAJ PORIN TECHKAJKAYAUAK AKIN TIKTASOJTAJ

11. ¿Keniuj momachilij David keman kichiuilijkej tein amo kuali?

¹¹ David miakpa mochoktij porin kipanok miak taman tein amo kuali. Miakej kitauelitakej uan hasta seki ichankauan uan itasojikniuan kikajkayaujkej uan kinekiaj kichiuiliskej tein amo kuali (1 Sam. 19:​10, 11; 2 Sam. 15:​10-14, 30). Se tonal kijkuiloj: “Nisiouikya porin semi nichoka, nochi youal nikapaloua nocama ika noixayo, uan kemej semi nichoka hasta kemej yeskia taapexoni kampa nikochi”. ¿Keyej ijkon momachiliaya? Yejua kijtoj ke katka ‘inintajtakol nochin akin kitauelitayajʼ (Sal. 6:​6, 7). David kichiuilijkej miak taman tein amo kuali uan yejua ika chokaya.

12. Kemej kijtoua Salmo 56:​8, ¿toni kineltokaya David?

¹² Maski tein David kipanotoya semi ouij katka, kimatia ke Jehová kitasojtaya. Yejua kijkuiloj: “Jehová nechkakis keman nichokas” (Sal. 6:8). Okse tonal kijkuiloj nejin kualtsitsin tajtolmej tein moajsi itech Salmo 56:8 (xikixtajtolti). Tein kijtoua nejin tajtolmej kinextia ke Jehová semi techtasojta uan ke toka motekipachoua. Yejua kijtoj ke Jehová kemej yeskia kisentilijtiaya nochi iixayo David itech se kuetaxbolsa oso kemej yeskia kijkuiloskia itech se amaix. Senkis kineltokaya ke iTajtsin kiitaya tein kipanotoya uan kielnamikia. Uan yejua amo sayoj kimatia nejon, ta no keniuj momachiliaya.

13. ¿Toni uelis techyolseuis komo aksa techchiuilia tein amo kuali oso techkaua? (No xikita taixkopin).

¹³ ¿Toni techmachtia? ¿Timoyolkokojtok porin aksa akin tiktasojta mitschiuilij tein amo kuali? ¿Timoyolkokojtok porin mitskauak akin iuan timonamiktiskia, motakatsin oso mosiuatsin? ¿Titayokoxtok porin aksa akin tiktasojta kikauak Jehová? Maj tikitakan tein kipanok se tokniuj takat. Yejua kijtoua keniuj momachilij keman isiuatsin kikajkayauak uan kikaujteuak: “Amo nikneltokaya tein nechpanoka. Nimotayokoltiaya, nikualania uan nikmachiliaya ke nion teyi kuali nikchiuaya”. ¿Toni uelis mitsyolseuis komo aksa mitschiuilij tein amo kuali oso mitskauak? Nochipa xikelnamiki ke Jehová amo keman mitskauas. Tokniuj kijtoj: “Aksa uelis mitskauas sayoj ke Jehová amo keman ijkon kichiuas. Yejua kemej yeskia se ueyi tet. Nochipa touan yetos uan amo keman kinkauas akin amo kikauaj” (Sal. 37:28). Nochipa xikelnamiki ke amo akin mitstasojta ijkon kemej Jehová. Xa semi mitsyolkokoua keman aksa akin tiktasojta mitschiuilia tein amo kuali oso mitskaua, sayoj ke Jehová kisentoka mitstasojta uan mitspatiuita (Rom. 8:​38, 39). Maski mitschiuiliskej tein amo kuali, uelis tikneltokas ke Jehová mitstasojta.

14. ¿Toni motenkaua Jehová itech Salmo 34:18b?

¹⁴ Komo aksa mitskauak oso mitschiuilij tein amo kuali, no uelis mitspaleuis tein kijkuiloj David itech Salmo 34:18 (xikixtajtolti). Se amaix kijtoua ke tajtolmej “akin semi tayokoxtokej”, xa no kijtosneki “akin amo kichiaj tein kuali”. ¿Keniuj Jehová kinpaleuia akin ijkon momachiliaj? Texto kijtoua ke yejuatsin “iniuan yetok” akin tajyouijtokej xa porin kinchiuilijkej tein amo kuali oso kinkaujkej. Jehová kemej yeskia se tepopaj akin kinapaloua ikonetsin uan kiyolseuia porin choka. Yejuatsin kimachilia tein tikmachiliaj uan niman techpaleuia. Kineki techyolseuis keman titajyouijtokej uan kijtoua ke uelis tikchiaskej miak taman tein kuali. Keman techiluia nejin techpaleuia maj tikxikokan ouijkayomej tein tikpiaj axkan (Is. 65:17).

KEMAN TICHOKAJ PORIN TIKPIAJ SE UEYI KOKOLIS

15. ¿Keyej tekiuaj Ezequías peuak mochoktia?

¹⁵ Keman tekiuaj Ezequías de Judá kipiaya 39 xiujmej, semi kokolispeuak. Itechkopa tanauatijkej Isaías, Jehová kiluij ke momikiliskia ika nejon kokolis (2 Rey. 20:1). Moitaya ke Ezequías amo pajtiskia. Keman kimatik tein kipanoskia semi motayokoltij uan mochoktij uan peuak kitataujtia Jehová maj kipaleui (2 Rey. 20:​2, 3).

16. ¿Keniuj momachilij Jehová uan keniuj kipaleuij Ezequías keman kikakik uan kiitak ke mochoktij?

¹⁶ Jehová semi kiiknelij Ezequías keman kikakik inetataujtil uan keniuj mochoktij. Itechkopa Isaías kiluij: “Nimitskakik keman tinechtataujtij uan nikitak ke titelchokak. Yejua ika nejua Jehová nimitspajtiti”. Kinextilij ke kiikneliaya keman motenkauak ke kikauaskia maj nemiok uan ke kimakixtiskia Jerusalén den asirios (2 Rey. 20:​4-6).

17. Keniuj techpaleuia Jehová keman timotelkokouaj? (Salmo 41:3; no xikita taixkopin).

¹⁷ ¿Toni techmachtia? ¿Toni uelis tikchiuas komo tikokolispeuak uan amo tipajtiok? Xikilui Jehová keniuj timomachilia, yejuatsin mitskakis maski tichokatos keman tiktataujtis. Biblia kijtoua ke “toTajtsin akin semi teiknelia uan Dios akin nochipa teyolseuia”, techyolchikauas keman tikpiaskej ouijkayomej (2 Cor. 1:​3, 4). Yejuatsin amo kiixpolos nochi ouijkayomej tein tikpiaj, sayoj ke tikmatij ke techpaleuis maj titaxikokan (xikixtajtolti Salmo 41:3). Ika ichikaualis techpaleuis maj titaxikokan, maj timochiuakan tamatinij uan maj tiyolseujtokan (Prov. 18:14; Filip. 4:13). Uan Jehová no motenkaua ke satepan kichiuas maj amo akin kokolispeuaok (Is. 33:24).

18. ¿Katiyejua texto mitspaleuij keman tikpiaya se ouijkayot? (Xikita recuadro “Textos tein techyolchikauaj keman tichokaj”).

¹⁸ Ezequías kiyolseuij tein Jehová kiluij. Uan tejuan no uelis techyolseuis tein techiluia itech Biblia. Jehová kichiuak maj moijkuilo tein uelis techyolchikauas keman tikpiaskej ouijkayomej (Rom. 15:4). Maj tikitakan tein kipanok se tokniuj siuat de África Occidental akin tel chokaya porin kiajxilijkej cáncer. Yejua kijtoua: “Tein kijtoua Isaías 26:3 semi nechpaleuij. Maski amo uelis tikpataskej tein techpanoua, nejin texto kijtoua ke Jehová uelis techpaleuis maj tiyolseujtokan uan techpaleuis maj tikxikokan tein yeski ouijkayot”. ¿Tikelnamiki se texto tein mitsyolchikauak keman tikpiaya se ouijkayot uan tikmachiliaya ke amo titaxikoskiaok?

19. ¿Toni tatiochiualismej tikchiaj?

¹⁹ Kemej tinemij itech tonalmej keman tatamitiya, techpanos miak taman tein techchoktis. Sayoj ke tein kipanok Ana, David uan tekiuaj Ezequías, techmachtij ke Jehová techita keman tichokaj uan kimachilia tein tikmachiliaj. Jehová kielnamiki keman tichoka, yejua ika keman tikpias ouijkayomej xiktapoui keniuj timomachilia. Nochipa xiktemo tietos iniuan tokniuan akin semi mitstasojtaj. Xiksentoka xikixtajtolti Biblia uan ijkon Jehová mitsyolseuis. Uelis tikmatis ke komo titaxikoua, yejuatsin mitstatiochiuis. Amo uejkaua tikitaskej keniuj Jehová kiuatsa toixayo (Apoc. 21:4). Uan itech xochital sayoj tichokaskej porin tiyolpakiskej.