TAMACHTILIS 1
NEKUIKATIL 2 Motokay Jiova
Maj tikueyitalikan Jehová
TEXTO PARA XIUIT 2025: “Xikueyitalikan itokay Jehová kemej kinamiki” (SAL. 96:8).
TEIN TIMOMACHTISKEJ
¿Keniuj uelis tikueyitaliskej Jehová kemej kinamiki?
1. ¿Toni kitemouaj miakej?
TIKITANIJ ke itech nejin tonalmej miakej sayoj inintech tanemiliaj. Sekin ijkon kichiuaj keman kikuij redes sociales para kitemoskej maj kinitakan yejuan uan tein kichiuaj. Uan amo miakej akin kiueyitaliaj Jehová Dios. Itech nejin tamachtilis tikitaskej toni kijtosneki se kiueyitalis Jehová uan keyej moneki ijkon tikchiuaskej. No timomachtiskej keniuj uelis tikueyitaliskej Dios kemej kinamiki uan keniuj amo uejkaua kiueyitalis itokay.
¿TONI KIJTOSNEKI SE KIUEYITALIS JEHOVÁ?
2. ¿Keniuj Jehová kinextij itech tepet Sinaí ke yejua semi ueyi? (No xikonita taixkopin).
2 Biblia kinextia ke Jehová se Dios akin semi ueyi. Tepitsin satepan ke kinmakixtij israelitas de Egipto kampa semi kintekitiltiayaj, kichiuak teisa para kinextis ke yejua semi ueyi. Maj itech titanemilikan nejin: millones de israelitas senyetokej itsintan tepet Sinaí para kikakiskej tein Dios kiniluiskia. Uan itech nochi tepet tel tamixtemik, semi talolinik uan tatileuik. Peua semi tatitikuini, tapepetani uan mokaki ke chikauak tapitsaj (Éx. 19:16-18; 24:17; Sal. 68:8). Keman panok nejin, israelitas xa semi kimojkaitakej keman Jehová kinextij ke yejua semi ueyi.
Itech tepet Sinaí, Jehová kinnextilij israelitas ke yejua semi ueyi. (Xikonita párrafo 2).
3. ¿Keniuj uelis tikueyitaliskej Jehová?
3 Uan tejuan, ¿no uelis tikueyitaliskej Jehová? Kemaj, tikchiuaj keman tikintapouiaj oksekin chikaualis tein kipia uan keniuj tamati. No ijkon tikchiuaj keman tikueyitaliaj porin techpaleuia maj tikchiuakan seki tekimej (Is. 26:12). Ijkon kichiuak tekiuaj David keman kitataujtij Dios ininixtenoj nochin israelitas, yejua kijtoj: “Tejua Jehová semi tiueyichiujkej, semi tichikauak, semi kualtsin nochi tein mitsyoualoua uan mitsnamiki maj mitstakachiuakan uan maj mitsueyitalikan, porin moaxka nochi tein onkak ne iluikak uan nikan taltikpak”. Keman motamitataujtij, “nochin israelitas akin mosentilijkaj kiueyitalijkej Jehová” (1 Crón. 29:11, 20).
4. ¿Keniuj Jesús kiueyitalij Jehová?
4 Keman Jesús yetoya nikan taltikpak, kiueyitalij iTajtsin porin nochipa kiniluiaya oksekin ke Dios kimakaya chikaualis para kichiuas milagros (Mar. 5:18-20). No kiueyitaliaya keman kuali ika tajtouaya Jehová uan keman katka kualtakat iniuan oksekin. Se tonal, Jesús tamachtijtoya kampa taueyichiuayaj judíos, uan ompa yetoya se siuatsin akin 18 xiujmejya semi kitajyouiltijtoya se amokuali ejekat, yejua ika semi pantomotstik katka uan amo uelia momelauaya. Jesús semi kiiknelij nejon siuatsin akin semi tajyouijtoya, yejua ika kiluij: “Siuatsin, nimitspajtijya”. Satepan itech kitalij imay uan nimantsin momelauak uan “peuak kiueyitalia Dios” (Luc. 13:10-13). Kemej nejon siuatsin pajtik, semi kinekik kiueyitalis Jehová, uan tejuan no tiknekij ijkon tikchiuaskej.
¿KEYEJ TIKUEYITALIAJ JEHOVÁ?
5. ¿Keyej tiktakachiuaj Jehová?
5 Tikueyitaliaj Jehová porin semi tiktakachiuaj. Miak taman kinextia ke kinamiki maj tiktakachiuakan Jehová. Yejua kipia chikaualis para kichiuas nochi tein kiixtalia uan amo keman sioui (Sal. 96:4-7). Itech nochi tein kichijchiuak moita ke semi tamatkej. Techmakatok tonemilis uan nochi tein moneki para tinemiskej (Apoc. 4:11). Amo keman tekaua (Apoc. 15:4). Kuali kisa nochi tein kichiua uan nochipa kichiua tein motenkaua (Jos. 23:14). Yejua ika tanauatijkej Jeremías kiluij Jehová: “De nochin tamatinij akin nemij itech altepemej uan de nochin inintekiuanij, amo akin kemej tejua” (Jer. 10:6, 7). Nochi nejin kinextia ke onkak miak taman tein kichiua maj tiknekikan tiktakachiuaskej toTajtsin. Sayoj ke amo sayoj tiktakachiuaj, ta no tiktasojtaj.
6. ¿Keyej tiktasojtaj Jehová?
6 Tikueyitaliaj Jehová porin semi tiktasojtaj. Jehová kinextia miak taman tein kualtsin uan yejua ika tiktasojtaj. Kinextia ke teiknelia uan yolkuali (Sal. 103:13; Is. 49:15). Kimati keniuj timomachiliaj keman titajyouiaj uan no kiyolkokoua (Zac. 2:8). Techpaleuia maj ueli tikixmatikan uan maj kuali timouikakan iuan (Sal. 25:14; Hech. 17:27). Uan no, yolyemanik uan “moixpiloua para kipanitas iluikak uan taltikpak uan ijkon kiajokuis den talnex akin yolyemanik” (Sal. 113:6, 7). Nochi nejin tein kinextia Jehová, kichiua maj tiknekikan tikueyitaliskej (Sal. 86:12).
7. Kemej tejuan kuali tikixmatij Jehová, ¿toni ueli tikchiuaj?
7 Tikueyitaliaj Jehová porin tiknekij maj kiixmatikan. Miakej amo kuali kiixmatij Jehová. ¿Keyej? Porin Satanás semi kitakajkayauiliani uan miakej kineltokanij nejon (2 Cor. 4:4). Kichiuani maj kineltokakan ke Jehová nochipa kualantok, ke amo toka motekipachoua uan ke yejua itajtakol maj mochiua miak taman tein amo kuali. Sayoj ke tejuan tikmatij ke nejon amo melauj. Uan uelis tikinpaleuiskej oksekin maj kuali kiixmatikan Dios para maj no kiueyitalikan (Is. 43:10). Axkan maj timomachtikan seki versículos de Salmo 96, kampa kijtoua ke moneki tikueyitaliskej Jehová. Techmachtis keniuj uelis tikueyitaliskej Dios ijkon kemej kinamiki.
¿KENIUJ UELIS TIKUEYITALISKEJ JEHOVÁ KEMEJ KINAMIKI?
8. ¿Keniuj uelis tikueyitaliskej Jehová? (Salmo 96:1-3).
8 (Xikonlero Salmo 96:1-3). Uelis tikueyitaliskej Jehová komo kuali ika titajtouaj. Nejin versículos kijtouaj ke itekitikauan Dios moneki kicantarouiliskej Jehová, kiueyitaliskej itokay, noyampa kiteixmatiltiskej keniuj temakixtia uan ke yejua semi ueyi. Nejin seki taman kemej uelis tikueyitaliskej toTajtsin Jehová. Ne uejkauj, itekitikauan Dios kitemouayaj kitetapouiskej keniuj yekmelauj tamati Jehová uan nochi tein kichiujka para kinpaleuis (Dan. 3:16-18; Hech. 4:29). ¿Keniuj uelis tikchiuaskej kemej yejuan?
9, 10. ¿Toni techmachtia tein kipanok Angelina? (No xikonita taixkopin).
9 Maj tikitakan tein kichiuak se tokniuj siuat de Estados Unidos akin monotsa Angelina.a Yejua kinextij ke katka yolchikauak uan ika tajtoj Jehová kampa tekitia. Kemej yankuixtok peujka ompa tekiti, kiyoleujkej maj youi se nechikol kampa yayaj nochin akin yankuikej katkaj, uan ompa kijtouayaj teisa de yejuan para maj kinixmatinij. Tokniuj kinemilij kinnextilis seki taixkopimej para kinmelauilis ke yejua semi yolpaki porin itaixpantijkauj Jehová. Sayoj ke se takat akin tajtoj achto ke yejua, kijtoj ke itatuan katkaj itaixpantijkauan Jehová uan peuak kinijijtoua nochin itaixpantijkauan uan tein kineltokaj. Angelina kijtoua: “Semi niyolmouik. Sayoj ke nimotajtanij: ‘¿Nikauati maj kitakajkayauili Jehová oso niktajtouiti?’”.
10 Keman nejon takat tamitajtoj, Angelina ichtaka kitataujtij Jehová maj kipaleui. Satepan kuali kinojnotsak, uan kiluij: “Nejua no nechiskaltijkej kemej itaixpantijkauj Jehová, uan niksentoka niitaixpantijkauj hasta axkan”. Maski ouij tein panok, tokniuj kisentokaya yolseujtoya. Satepan kinnextilij seki taixkopimej kampa nesi keniuj semi yolpaki kitekitilis Jehová uan kinmelauilij tein kineltoka (1 Ped. 3:15). Keman Angelina tamitajtoj, nejon takat amo kualanikok. Hasta kijtoj seki taman tein kiuelitaya kichiuas keman mosentiliaya iniuan itaixpantijkauan Jehová. Angelina kijtoj: “Jehová kinamiki maj tiktajtouikan. ¡Semi kuali maj tikteixmatiltikan keniuj yekmelauj tamati!”. Tejuan no tikitaj ke se ueyi tatiochiualis maj ueli tikueyitalikan Jehová keman oksekin kijijtoskej.
Uelis tikueyitaliskej Jehová ika tein tikijtouaj. (Xikonita párrafos 9 uan 10).b
11. ¿Keniuj itekitikauan Dios kichiuanij tein tayolmajxitia Salmo 96:8?
11 (Xikonlero Salmo 96:8). Uelis titemakaskej tein tikpiaj para tikueyitaliskej Jehová. Akin yekmelauj itekitikauan Dios kitemakanij tein kipiaj para kiueyitaliskej (Prov. 3:9). Ijkon kichiujkej israelitas keman kitemakakej tein kipiayaj para kichijchiuaskej templo uan kiitaskej maj amo uejueliui (2 Rey. 12:4, 5; 1 Crón. 29:3-9). Sekin imomachtijkauan Cristo kikuiaj “tein kipiayaj” para kipaleuiskej Jesús uan itatitaniluan (Luc. 8:1-3). Uan Biblia kijtoua ke keman seki tokniuan amo kipiayajok toni kikuaskej, okseki tokniuan kintitaniliayaj miak taman (Hech. 11:27-29). Uan axkan, tejuan no tikueyitaliaj Jehová keman tiktemakaj tomin para titapaleuiskej.
12. ¿Keniuj tikueyitaliaj Jehová ika tomin tein tiktemakaj? (No xikonita taixkopin).
12 Maj tikitakan keniuj tein kipanok se tokniuj kinextia ke tikueyitaliaj Jehová ika tomin tein tiktemakaj. Itech xiuit 2020, uejkauak amo kiouik ompa Zimbabue uan semi tauaktoya, yejua ika tel miakej ueliskia mayanmikiskej. Semej katka se tokniuj siuat akin monotsa Prisca. Maski semi ouij tein kipanotoya, kisentokaya yaya tanojnotsati tonalmej miércoles uan viernes, hasta itech tonalmej keman monekiskia tayuntajuis. Ivecinos kipinaujtiayaj. Kiluiayaj ke monekia tekitis para tatokas uan amo sayoj tanojnotstinemis. Kiluiayaj: “¡Timayanmikiti!”. Sayoj ke yejua takuaujtamatia ke Jehová kimakaskia tein kipoloskia. Yejua ika kinnankiliaya: “Jehová amo keman kinsenkaua itekitikauan”. Tepitsin satepan, kiselij takual tein inechikol Jehová kititanilij ika tomin tein tiktemakaj. Seki ivecinos kimojkaitakej uan kijtojkej: “Dios nochipa mitspaleuia. Tiknekij timomachtiskej Biblia”. Uan chikomen peuak youij nechikolmej.
Uelis tikueyitaliskej Jehová ika tein titemakaj para titapaleuiskej. (Xikonita párrafo 12).c
13. Kemej kijtoua Salmo 96:9, ¿toni moneki tikchiuaskej para tikueyitaliskej Jehová?
13 (Xikonlero Salmo 96:9). Tikueyitaliaj Jehová keman tikchiuaj tein kuali. Tiopixkamej akin kitekitiliayaj Jehová itech ikaltsin uan itech templo, monekia mopajpakaskej para yeskiaj chipaujkej (Éx. 40:30-32). Tejuan no moneki maj tichipaujkej uan amo sayoj itech tonakayo, ta no moneki tikixtopeuaskej tein Jehová kitauelita (Sal. 24:3, 4; 1 Ped. 1:15, 16). Biblia kijtoua ke amo moneki tikchiuaskejok ‘tein achto tikchiuayaj’, ta maj ‘tinemikan kemej Dios kineki’. Nejin kijtosneki ke amo moneki titanemiliskej nion tikchiuaskej tein Jehová kitauelita, uan timochikauaskej titanemiliskej uan tikchiuaskej kemej yejua technextilia (Col. 3:9, 10). Jehová kinpaleuia maj mopatakan hasta akin semi auilnemij uan tateuiaj uan maj nemikan kemej yejua kiyolpaktia.
14. ¿Toni mitsonmachtia tein kipanok Jack? (No xikonita taixkopin).
14 Maj tikitakan tein kipanok Jack. Yejua semi tateuiaya uan hasta kiluiayaj Demonio. Kemej kichiuak miak taman tein tel amo kuali, tekiuanij kiixtalijkej ke kinamikia kimiktiskej. Keman kichiaya maj ajsi tonal para kimiktiskej, kinekik maj kimachti Biblia se tokniuj akin takalpanouaya itech cárcel. Maski Jack kichiujka miak taman tein tel amo kuali, yolik mopatatiajki, satepan moauij uan mochiuak itaixpantijkauj Jehová. Senkis mopatak, yejua ika itech tonal keman yaya kimiktitij, seki tajpianij chokakej keman iuan monauatijkej. Semej tajpianij akin ompa tekitia, kijtoj: “Achto, Jack yejua akin okachi tamouilil katka. Sayoj ke axkan yejua akin okachi yolnejmach”. Se semana satepan ke kimiktijkej, tokniuan akin kiixyekankej nechikol tein mochiua itech cárcel, kiitakej ke ompa no yetoya se takat akin amo keman mosentilijtoya. ¿Keyej kiixtalij yas? Porin kimojkaitaya keniuj mopataka Jack uan kinekia kimatis keniuj ueliskia kiueyichiuas Jehová. Nejin kinextia ke tikueyitaliaj toTajtsin keman tikchiuaj tein kuali (1 Ped. 2:12).
Uelis tikueyitaliskej Jehová ika tein tikchiuaj. (Xikonita párrafo 14).d
¿KENIUJ JEHOVÁ KIUEYITALIS ITOKAY AMO UEJKAUA?
15. ¿Toni kichiuas Jehová amo uejkaua para senkis kiueyitalis itokay? (Salmo 96:10-13).
15 (Xikonlero Salmo 96:10-13). Itamian Salmo 96 kimelaua ke Jehová kemej se Tekiuaj akin kiixtalia nochi kemej moneki. ¿Keniuj Jehová kiueyitalis itokay amo uejkaua? Keman kichiuas maj nochin kiselikan tein kinnamiki. Amo uejkaua kiixpolos Ueyi Babilonia porin kichiuani maj amo kuali ika tajtokan itokay (Apoc. 17:5, 16; 19:1, 2). Sekin akin kiitaskej keniuj ixpoliuiskej taneltokalismej tein amo melaujkej, xa kiixtaliskej no touan kiueyichiuaskej Jehová. Uan itech Armagedón, Jehová kiixpolos nochi tein Satanás kiixyekana. Kinixpolos nochin akin kitauelitaj uan kitakajkayauiliaj, uan kinmakixtis nochin akin kitasojtaj, kitakamatij uan kiuelitaj kiueyitaliskej (Mar. 8:38; 2 Tes. 1:6-10). Satepan ke tamisya itaixyekanalis Cristo tein uejkauas mil xiujmej, keman Satanás kinyejyekosya nochin, Jehová kinextis ke sayoj yejua kinamiki kiueyichiuaskej (Apoc. 20:7-10). Ijkuak, “nochin kimatiskej ke Jehová semi ueyi ijkon kemej at pexontok itech mar” (Hab. 2:14).
16. ¿Toni tikonixtalia tikonchiuas? (No xikonita taixkopin).
16 ¡Semi kualtsin yeski keman nochin kiueyitaliskej Jehová kemej kinamiki! Sayoj ke axkan no uelis tikchiuaskej nochi tein tiueliskej para ika titajtoskej Jehová uan tikchiuaskej tein kiueyitalis itokay. Para tikelnamikiskej ke motelneki tikchiuaskej nejin, tokniuan Oloch Taojtokaltianij kiixpejpenkej Salmo 96:8 maj yejua texto para xiuit 2025: “Xikueyitalikan itokay Jehová kemej kinamiki”.
¡Ejkos tonal keman nochin kiueyitaliskej itokay Jehová kemej kinamiki! (Xikonita párrafo 16).
NEKUIKATIL 159 Maj tikueyitalikan Jehová
a Mopatakej seki tokaymej.
b TEIN NESI ITECH TAIXKOPIN: Moixnextia tein kipanok Angelina.
c TEIN NESI ITECH TAIXKOPIN: Moixnextia tein kipanok Prisca.
d TEIN NESI ITECH TAIXKOPIN: Moixnextia tein kipanok Jack.