Maj tikixpejpenakan tein kiyolpaktia Jehová

1. ¿Toni moneki tikchiuaskej tinochin, uan keyej kemansa ouij?

MOJMOSTAJ moneki titaixpejpenaskej. Seki taman amo ouij tikixtaliskej tikchiuaskej, kemej toni tikuaskej kualkan oso toni hora tikochitiuij. Sayoj ke seki taman okachi ouij porin tein tikixtaliskej uelis semi techpaleuis maj tipaktokan, maj tiyolpakikan tejuan uan tochankauan oso maj ueli tiktekitilikan Dios. Tiknekij tikixpejpenaskej tein techpaleuis tejuan uan tochankauan, sayoj ke okachi tiknekij tikyolpaktiskej Jehová (Rom. 12:​1, 2).

2. ¿Toni uelis tikonchiuas para kuali tiontaixpejpenas?

² Itech nejin tamachtilis tikitaskej eyi taman tein techpaleuis maj kuali titaixpejpenakan: 1) maj tikmatikan nochi tein moneki, 2) maj tiknemilikan keniuj kiita Jehová uan 3) maj itech titanemilikan nochi tein ueliskia tikixpejpenaskej. No tikitaskej toni uelis tikchiuaskej para okachi kuali titaixejekoskej (Prov. 2:11).

MAJ TIKTEMOKAN TIKMATISKEJ NOCHI TEIN MONEKI

3. Xikonmelaua keyej moneki tikmatiskej nochi tein moneki achto ke tikixpejpenaskej teisa.

³ Komo achto tikmatij nochi tein moneki, techpaleuis maj kuali titaixpejpenakan. ¿Keyej semi moneki nejin? Maj tiknemilikan ke aksa akin motelkokoua kiitati tapajtijkej. ¿Niman kiixtaliskia tapajtijkej toni pajti kimakas maski ayamo kiita oso ayamo kitajtania toni kimachilia? Amo. No ijkon, tejuatsin kuali tiontaixpejpenas komo achto tikontemoua tikonmatis nochi tein mitsonpaleuis. ¿Keniuj uelis ijkon tikonchiuas?

4. Kemej kijtoua Proverbios 18:​13, ¿toni mitsonpaleuis xikonmati nochi tein moneki? (No xikonita taixkopimej).

⁴ Uelis tikonmatis toni tikonchiuas komo tiontajtani seki taman. Xikonnemili ke mitsonyoleuaj se convivio. ¿Moneki tionyas? Komo amo semi tikonixmati akin kichiuati iluitsin uan amo tikonmati toni mochiuas, moneki tikontajtanis nejin: “¿Kani uan kemanian mochiuas? ¿Kanachimej yeskij? ¿Akoni kiitas maj amo mochiua tein amo moneki? ¿Akonimej yaskej? ¿Toni tikonixtalijtok maj mochiua? ¿Onkas tayil tein teuintij?”. Keman tikonmatis nejin, mitsonpaleuis kuali xiontaixpejpena (xikonlero Proverbios 18:13).

5. ¿Toni uelis tikonchiuas satepan ke tikonmatisya nochi tein moneki?

⁵ Keman tikonmatisya nochi tein tikonnekia, kuali xikonnemili nochi tein uelis panos. ¿Toni tikonchiuas komo tikonmati ke no ompa yetoskej akin amo kitakamatij Jehová, oso onkas tayil uan amo akin kintakaualtis maj amo tel tayikan? ¿Tikonnemilia ke uelis mochiuas tein amo kuali uan semi eliuistiskej? (1 Ped. 4:3). ¿Oso toni tikonchiuaskia komo moneki tionmopolouilis se nechikol para tionyas iluit oso amo uelis tionyas tiontanojnotsatiuj? Komo tikonnemilia toni uelis panos mitsonpaleuis kuali xiontaixpejpena. Sayoj ke no uelis tikonchiuas okseki taman. Axkan ke tikonmattokya nochi tein moneki, xionmotajtani: “¿Keniuj kiita Jehová tein niknemilia nikixpejpenas?” (Prov. 2:6).

MAJ TIKNEMILIKAN KENIUJ KIITA JEHOVÁ TEIN TIKNEKIJ TIKIXPEJPENASKEJ

6. Kemej kijtoua Santiago 1:​5, ¿keyej moneki tiktajtaniskej Jehová maj techpaleui?

⁶ Xikonilui Jehová maj mitsonpaleui xikonmati keniuj kiita tein tikonnemilia tikonchiuas. Jehová motenkaua ke kintelpaleuis maj mochiuakan tamatinij nochin akin kitajtaniskej ‘uan amo kualanis iniuan’ (xikonlero Santiago 1:5). Komo timochiuaj titamatinij techpaleuis maj tikmatikan ox kiyolpaktis oso amo tein tiknekij tikixpejpenaskej.

7. ¿Keniuj uelis tikonmatis toni kiyolpaktia Jehová? Xikonijto se neskayot.

⁷ Satepan ke tikontataujtis Jehová maj mitsonpaleui, kuali xikonita keniuj mitsonnankilia. Xikonnemili nejin, komo tionyajtok tionnemiti uan tionmopoloua, xa tikontajtanis maj mitsonpaleui aksa akin ompa nemi. Xa ompa tionmochiaskia hasta maj mitsonilui toni tikonchiuas uan kuali tikonkakiskia toni mitsoniluia. No ijkon panoua keman tikontajtania Jehová maj mitsonpaleui xiontamatkej, moneki kuali tikonkakis toni mitsoniluia uan tikontemos tamachtilis itech Biblia tein ika tajtoua tein mitsonpanotok. Maj oksepa itech titanemilikan iluit tein mitsonyoleujkej uan moneki tikonitas ox tionyas oso amo. Keman tikonitas ox tionyas, moneki tikontemos toni kijtoua Biblia den iluimej kampa eliuistij, tein uelis panos komo timouikaj iniuan akin amo yolkualmej uan ke moneki tiktayekanaltiskej iTaixyekanalis Dios uan amo tein tejuan tikuelitaj (Mat. 6:33; Rom. 13:13; 1 Cor. 15:33).

8. ¿Toni uelis tikonchiuas komo amo tikonajsi tamachtilis tein tikontemojtok? (No xikonita taixkopin).

⁸ Xa kemansa monekis maj mitsonpaleuikan xikonajsi tamachtilis tein tikontemojtok. Se tokniuj akin kuali kitekitilijtok Jehová uelis mitsonpaleuis xikonmati toni uelis tikonchiuas oso mitsonyolmajxitis. Sayoj ke no moneki tikontemos tamachtilis moselti. Uelis tikonajsis okachi tamachtilis itech amaixmej tein ika timomachtiaj kemej Nepaleuil tein ika momachtiaj itaixpantijkauan Jiova uan amaix Textos bíblicos para la vida cristiana. Uan nochipa xikonelnamiki ke tikonneki tikonixpejpenas tein kiyolpaktia Jehová.

9. ¿Keniuj uelis tikmatiskej ke tein tikixpejpenatij kiyolpaktis Jehová? (Efesios 5:17).

⁹ ¿Keniuj uelis tikmatiskej ke tein tikixpejpenaskej kiyolpaktis Jehová? Yekinika moneki kuali tikixmatiskej yejuatsin. Proverbios 9:10 kijtoua ke ‘komo tikixmatij Dios akin senkis chipauak uelis tikajsikamatiskej nochi’. Nejin kijtosneki ke para tikajsikamatiskej nochi moneki maj tikmatikan keniuj tamati Jehová, tein kiixtalijtok kichiuas, tein kiyolpaktia uan tein kitauelita. Xionmotajtani: “Kemej nikixmattokya seki taman de Jehová, ¿toni niknemilia ke uelis kiyolpaktis?” (xikonlero Efesios 5:17).

10. ¿Keyej moneki tiktakamatiskej tein tayolmajxitia Biblia uan amo tein momattokej kichiuaskej tochankauan oso kampa tinemij?

¹⁰ Para tikyolpaktiskej Jehová kemansa monekis tikchiuaskej tein tochankauan oso totasojikniuan amo kiuelitaskej. Xikonnemili ke seki tetatmej kiteliluiaj ininsiuapil maj iuan monamikti se tokniuj akin kipia miak tomin sayoj ke amo tel kuali kitekitilijtok Jehová. Tetatmej ijkon kichiuaj porin amo kinekij maj tajyoui ininsiuapil. Sayoj ke yejua uelis motajtanis: “Komo iuan nimonamiktia, ¿nechpaleuis maj okachi kuali nimouika iuan Jehová?”. ¿Toni kinemilia Jehová? Tanankilil tikajsij itech Mateo 6:​33, kampa kinyolchikaua tokniuan maj kisentokakan kitayekanaltikan “iTaixyekanalis Dios”. Maski tikintakachiuaj totatuan uan akin nemij itech toxolal, nochipa tiktemouaj tikchiuaskej tein kiyolpaktis Jehová.

MAJ ITECH TITANEMILIKAN NOCHI TEIN UELISKIA TIKIXPEJPENASKEJ

11. Kemej kijtoua Filipenses 1:​9, 10, ¿toni mitsonpaleuis kuali xiontaixpejpena?

¹¹ Satepan ke tikonitas toni kijtoua Biblia ika tein tikonneki tikonixpejpenas, moneki tikonnemilis nochi tein ueliskia tikonchiuas (xikonlero Filipenses 1:​9, 10). ¿Toni mitsonpaleuis? Kuali xiontaixejeko para tikonitas nochi tein uelis panos. Kemansa niman tikmatiskej toni tikixtaliskej, sayoj ke kemansa amo tikmatiskej toni tikchiuaskej. Komo kuali tiontaixejekoua mitsonpaleuis kuali xiontaixpejpena maski kemansa ouij yeski.

12, 13. ¿Keniuj komo kuali tiontaixejekoua mitsonpaleuis keman tikonixpejpenas se tekit?

¹² Xikonnemili nejin, tikontemojtok se tekit para tikonixpanoltis mochankauan. Uan tikonajsi ojkan kampa uelis tiontekitis. Tikonita toni tekit tikonchiuas, toni hora tionkalakis uan tionkisas, ox uejka oso amo uan okseki taman. Nochin ojkan kuali yetok porin amo tikonchiuas tein Biblia kijtoua ke amo kuali yetok. Xa tikonixpejpena semej porin okachi tikonuelita tekit uan okachi mitsontaxtauiaj. Sayoj ke onkak okseki taman tein no moneki tikonitas achto ke tiontaixpejpenas.

¹³ Xikonnemili, ¿uelisok tionyas nochi nechikolmej komo tikonixpejpena semej de nejon tekimej? ¿Tikonpiasok tiempo para tikonpaleuis mochankauan maj yolpakikan uan maj motokikan okachi iuan Jehová? Komo tionmotajtania nejin mitsonpaleuis xikonita ke tikonueyichiuas Jehová uan tikonpaleuis mochankauan, okachi tayekantok ke tikontanis okachi tomin. Ijkon uelis tikonixpejpenas tein kiyolpaktis Jehová.

14. ¿Keyej komo kuali titaixejekouaj uan titetasojtaj amo tikinuetsiltiskej oksekin?

¹⁴ Komo kuali titaixejekouaj techpaleuis maj tiknemilikan keniuj kiitaskej oksekin tein tikixpejpenaskej uan ijkon ‘amo tikinuetsiltiskej’ (Filip. 1:10). Nejin semi moneki keman tikixpejpenaskej toni timotaliliskej uan keniuj timochijchiuaskej. Xa tikuelitaj kemej moita se taman tasal oso kemej mochijchiuaj oksekin, sayoj ke komo tokniuan uan akin amo momachtiaj amo kiyekitaj, tiknextiskej ke tikpoujkaitaj tein kinemiliaj komo kuali titaixejekouaj. Uan komo titetasojtaj, tiktemoskej “tein kinpaleuis oksekin” uan amo tein tejuan tikuelitaj (1 Cor. 10:​23, 24, 32; 1 Tim. 2:​9, 10). Ijkon tikixpejpenaskej se taman tein kinextis ke titetasojtaj uan tikinpoujkaitaj oksekin.

15. ¿Toni moneki tikonchiuas achto ke tikonixpejpenas teisa?

¹⁵ Komo moneki tikonixpejpenas teisa tein achto moneki kuali tikonnemilis, kuali xikonita nochi tein moneki tikonchiuas. Jesús tamachtij ke moneki kuali ‘titaixejekoskej’ (Luc. 14:28). Yejua ika kuali xikonnemili nochi tiempo, tomin uan chikaualis tein monekis para tikonchiuas tein tikonixtalijtok. Kemansa monekis tikonnojnotsas mochankauan para nankiitaskej toni uelis kichiuaskej sejsemej uan ijkon mitsonpaleuiskej. ¿Keyej moneki tikonchiuas nochi nejin? Porin xa tikonitas ke monekis tikonpatas teisa oso ke uelis tikonchiuas okse taman. Uan no, komo tikontajtania mochankauan tein kinemiliaj uan tikonkaki, okachi kinekiskej mitsonpaleuiskej uan nochi kuali kisas (Prov. 15:22).

XIKONIXPEJPENA SE TAMAN TEIN KUALI KISAS

16. ¿Toni moneki tikonchiuas para maj kuali kisa tein tikonixpejpenak? (No xikonita recuadro “¿Keniuj uelis kuali titaixpejpenaskej?”).

¹⁶ Komo tikonchiuakya nochi tein timomachtijkej, uelisya tikonixpejpenas teisa tein mitsonpaleuis. Tikonmattokya nochi tein moneki, uan tikonitakya itech Biblia tein kiyolpaktia Jehová. Yejua ika axkan uelisya tikontajtanis maj mitsonpaleui maj kuali kisa tein tikonixtalij.

17. ¿Toni techpaleuis maj kuali titaixpejpenakan?

¹⁷ Xa kuali kisani tein tikonixtaliani. Maski ijkon, xikonelnamiki ke para kuali tiontaixpejpenas, nochipa moneki tikonchiuas tein Jehová kijtoua uan amo tein tejua tikonnemilia. Sayoj yejua uelis mitsonpaleuis xikonmati nochi tein moneki, xikonajsikamati keniuj kiita tein tikonchiuasneki uan kuali xiontaixejeko, nochi nejin semi moneki para tionmochiuas tamatkej (Prov. 2:​1-5). Ijkon tikonixpejpenas tein Jehová kiyolpaktia (Sal. 23:​2, 3).