¿Keniuj uelis tikinpaleuiskej totasojikniuan?

¿KEMANSA tikonpiak se ouijkayot uan tikonmachilij ke amo akin mitsonpaleuiaya? Tinemij itech tonalmej kampa tein ‘mochiujtok semi ouij uan tamouilil’, uan uelis kichiuas maj timomachilikan toselti porin xa amo akin iuan titajtouaj (2 Tim. 3:1). Sayoj ke oksekin uelis techpaleuiskej keman tikpiaskej ouijkayomej. Biblia kijtoua ke akin yekmelauj totasojikniuan uelis techpaleuiskej “keman titajyouiaj” (Prov. 17:17).

¿TONI UELIS TIKCHIUASKEJ PARA TIKINPALEUISKEJ TOTASOJIKNIUAN?

Keman Pablo uejka yaya tanojnotsati, iniuan yaya seki itasojikniuan uan yejuan semi kipaleuiayaj (Col. 4:​7-11). Keman tsaktoya Roma kichiujkej seki taman tein yejua amo uelia kichiuaya. Epafrodito kiuikilij seki taman tein kititanilijkaj tokniuan de Filipos (Filip. 4:18). Tíquico kinxejxeloj cartas tein Pablo kinijkuilouilijka miakej nechikolmej (Col. 4:7).a Itasojikniuan Pablo kipaleuijkej maj kinyolchikaua tokniuan keman kiluijkej ke amo ueliskia kisas de ichan uan no satepan keman tsaktoya. ¿Uan tejuan toni uelis tikchiuaskej ininka totasojikniuan?

Axkan miakej tokniuan kinextiaj keniuj akin kuali mouikaj uelis mosenpaleuiskej. Maj tikitakan tein kipanok Elísabet, se precursora regular de España. Keman imomaj kiajxilijkej cáncer, se tokniuj siuat kinextilij ke katka itasojikniuj porin miakpa kitajkuilouiliaya uan kititaniliaya textos. Elísabet kijtoua: “Keman niklerouaya tein nechtitaniliaya nikmachiliaya ke amo nietoya noselti uan nechpaleuiaya maj nitaxiko” (Prov. 18:24).

Okachi kuali timouikaskej iniuan tokniuan komo tikinpaleuiaj maj tanojnotsakan oso maj yakan nechikolmej. Xa uelis tikoniluis se tokniuj xiuejya ke uelis tikonuikas nechikol oso maj tanojnotsati, komo ijkon tikonchiua uelis tikonyolchikauas uan no mitsonyolchikauas (Rom. 1:12). Sayoj ke seki tokniuan amo ueli kisaj de ininchan, ¿keniuj uelis tikinpaleuiskej?

MAJ TIKINPALEUIKAN AKIN AMO UELI KISAJ DE ININCHAN

Seki tokniuan amo ueli youij itech Kali kampa tiMosentiliaj para touan monechikoskej porin mokokouaj oso kinpanoua okseki taman. Ijkon kipanok David, se tokniuj takat akin kiajxilijkaj cáncer uan panoua chikuasen metsti kichiuilijtoyaj quimioterapia. Keman kipajtijtoyaj, yejua uan isiuatsin Lidia kikakiaj nechikolmej desde ininchan.

¿Keniuj kinpaleuijkej tokniuan itech nechikol? Keman tamia nechikol seki tokniuan mokauayaj itech Kali kampa tiMosentiliaj para kinnojnotsaskej ika videollamada. Uan no, keman tokniuan kikakiaj ke David uan Lidia tanankiliayaj itech nechikolmej, kintajkuilouiliayaj para kinyolchikauaskej. ¿Keniuj kinpaleuij? David uan Lidia kimachilijkej ke inintasojikniuan semi kintasojtayaj.

Xa ueliskia titanojnotsaskej iniuan tokniuan akin amo ueli kisaj de ininchan. Uelis tikpataskej seki taman para iniuan tietoskej, ijkon tikinnextiliskej ke amo tikinelkauaj (Prov. 3:27). Xa ueliskia iniuan tikijkuiloskej cartas oso titanojnotsaskej ika teléfono. Uan tayekananij uelis kiitaskej maj ika videollamada, tokniuan akin mokokouaj no kikakikan nechikolmej tein mochiuaj achto ke titanojnotsatiuij. David uan Lidia semi kitasojkamatkej keman tokniuan kichiujkej nejon. David kijtoua: “Semi techyolchikauaya tietoskej iniuan tokniuan itech nejon nechikolmej, titanankiliskej tepitsin uan tikakiskej netataujtil”. Komo tikmachtiaj aksa, xa uelis tikyoleuaskej maj youi ichan tokniuj akin amo ueli kisa para ompa tikmachtiskej. Sayoj ke achto uelis tiktajtaniskej tokniuj ox uelis ijkon tikchiuaskej.

Keman iniuan tietokej tokniuan akin amo ueli kisaj de ininchan okachi ueli tikinixmatij, uan okachi kuali iniuan timouikaj. Okachi tikinpatiuitaj keman tikakij keniuj kimachtiaj aksa ika Biblia uan kipaleuiaj maj motoki iuan Jehová. Keman tikinpaleuiaj tokniuan maj yakan nechikolmej oso maj tanojnotsakan, okachi miakiaj totasojikniuan (2 Cor. 6:13).

Keman Pablo kipiak ouijkayomej, itasojikniuj Tito yajka kiitato uan nejon semi kiyolchikauak (2 Cor. 7:​5-7). Nejon techelnamiktia ke tejuan no uelis tikinyolchikauaskej tokniuan komo iniuan tietokej uan komo tikchiuaj teisa para tikinpaleuiskej (1 Juan 3:18).

MAJ TIKINPALEUIKAN TOKNIUAN KEMAN KINTAJYOUILTISKEJ

Tokniuan de Rusia technextiliaj keniuj uelis timosenpaleuiskej. Maj tikitakan tein kipanok Serguéi uan isiuatsin Tatiana. Policías kalakkej ichan para tatemoskej uan satepan kinuikakej para kintatsintokiskej. Achto kikajkaujkej Tatiana uan mokepak ichan. Serguéi kijtoua: “Keman Tatiana ajsik kalijtik, se tokniuj siuat akin semi yolchikauak yajki kiitato. Satepan ajsikej okseki tokniuan uan techpaleuijkej maj titayektalikan tokalijtik”.

Serguéi kijtoua: “Nochipa nikuelitani tein kijtoua Proverbios 17:17: ‘Akin yekmelauj totasojikniuj nochipa techtasojta, uan mochiua kemej se tokniuj keman titajyouiaj’. Kemej semi nechixnamikij moneki maj notasojikniuan nechpaleuikan. Yejua ika nikitani ke yekmelauj tein kijtoua nejin versículo. Jehová nechmakani notasojikniuan akin yolchikaujkej uan nechpaleuiaj”.b

Kemej axkan tikpiaj miak ouijkayomej moneki maj totasojikniuan techpaleuikan. Uan okachiok keman peuas tetsaujkatajyouilis. Yejua ika, desde axkan moneki maj tikinyolchikauakan uan maj tikinpaleuikan totasojikniuan (1 Ped. 4:​7, 8).