Maj timochikauakan titanemiliskej kemej Jehová uan Jesús

1, 2. 1) ¿Keniuj no tiknextiaj ke tiktasojtaj Jehová? 2) ¿Keniuj kinextij Jesús ke kitasojtaya Jehová ika nochi itanemilil?

JESÚS kijtoj katiyejua okachi tayekantoya de nochi iTanauatil Moisés, yejua kijtoj: “Xiktasojta moDios Jehová ika nochi moyolo, ika nochi monemilis, ika nochi motanemilil uan ika nochi mochikaualis” (Mar. 12:30). Yejua ika senkis tiktasojtaj Jehová. Nejon kijtosneki ika nochi tein tiknejnekij, tein tikmachiliaj uan tochikaualis. Uan no tiknextiliaj kemej titanemiliaj. Kemej semi tiktasojtaj Jehová techpaleuia maj no tiknekikan titanemiliskej kemej yejua maski amo ueli senkis tikajsikamatij keniuj tanemilia. Sayoj ke uelis techpaleuis komo timomachtiaj keniuj ‘tanemilia Cristo’, porin yejua senkis tanemiliaya kemej iTajtsin (1 Cor. 2:16).

² Jesús kinextiaya ke semi kitasojtaya Jehová ika nochi itanemilil. Yejua kimatia toni kinekia Dios maj kichiua uan kiixtalij ijkon kichiuas maski kimatia ke tajyouiskia. Kemej kinekia senkis kiyolpaktis iTajtsin, amo kikauak maj nion teyi kitsakuili maj kichiua nejon.

3. ¿Toni momachtij tatitanil Pedro de Jesús, uan keniuj kinyolchikauak tokniuan? (1 Pedro 4:1).

³ Pedro uan okseki tatitanilmej uelik kimatkej keniuj tanemiliaya Jesús porin miak tiempo iuan nentinemiaj. Keman Pedro kijkuiloj yekinika iamatajkuilol kinyolchikauak tokniuan maj tanemilikan ijkon kemej Jesús tanemiliaya (xikonlero 1 Pedro 4:1). Keman Pedro kijkuiloj nejin versículo, kijtoj se tajtol tein kinextia toni kikuiaj soldados para ika mopaleuiskej keman tateuiayaj. Ijkon kiteajsikamatiltij ke komo titanemiliaj kemej Cristo kemej yeskia tikpiaskej toni ika titateuiskej para tikixnamikiskej tein amo kuali tein tejuan tiknejnekij uan tein kiixyekana Amokuali Satanás (2 Cor. 10:​3-5; Efes. 6:12).

4. ¿Toni tikitaskej itech nejin tamachtilis?

⁴ Itech nejin tamachtilis tikitaskej keniuj tanemiliaya Jesús uan keniuj no uelis ijkon tikchiuaskej. Tikitaskej keniuj uelis 1) peuas titanemiliskej kemej Jehová, 2) tiyeskij tiyolyemankej uan 3) keniuj kuali titaixejekoskej.

MAJ TITANEMILIKAN KEMEJ JEHOVÁ

5. Xikonijto keniuj kinextij Pedro ke amo tanemiliaya kemej Jehová.

⁵ Maj tikitakan tein panok se tonal keman Pedro kinextij ke nion tepitsin tanemiliaya kemej Jehová. Jesús kiniluij itatitaniluan ke monekia yas Jerusalén, uan ompa akin taixyekanayaj itech taneltokalis kikitskiskiaj, kiteltajyouiltiskiaj uan satepan kimiktiskiaj (Mat. 16:21). Pedro kimatia ke Jesús katka Mesías akin moijtojka ke kimakixtiskia ixolal Dios, yejua ika amo kineltokaya maj Jehová kikauani maj kimiktianij Jesús (Mat. 16:16). Yejua ika Pedro kiuikak okseko uan kiluij: “¡NoTekotsin, amo ijkon xikijto! Nejon amo keman mitspanos” (Mat. 16:22). Ika nejin, kinextij ke amo tanemiliaya kemej Jehová, yejua ika Pedro uan Jesús tataman tanemiliayaj.

6. ¿Keniuj kinextij Jesús ke tanemiliaya kemej Jehová?

⁶ Jesús tanemiliaya ijkon kemej iTajtsin. Kiluij Pedro: “¡Ximijkuani Satanás! Sayoj tinechtsajtsakuilia, porin amo titanemilijtok kemej Dios tanemilia, ta kemej tanemiliaj nikan taltikpak” (Mat. 16:23). Jesús kimatia ke para kichiuas tein Jehová kinekia, ouij yeskia porin tajyouiskia uan mikiskia. Yejua ika amo kikakik Pedro maski xa yejua sayoj kinekia kipaleuis. Ijkon tatitanil kiajsikamatik ke monekia peuas tanemilis kemej Jehová. ¡Nejon techmachtia ke no moneki ijkon tikchiuaskej!

7. ¿Keniuj kinextij Pedro ke mochikaujtoyaya tanemilis kemej Jehová? (Xikonita taixkopin).

⁷ Satepan Pedro kinextij ke mochikaujtoyaya tanemilis kemej Jehová. Dios kiixtalijkaya ke kinseliskia itech ixolal akin amo katkaj judíos. Uan kiluij Pedro maj kinojnotsati Cornelio, yejua yeskia semej de yekinika tokniuan akin amo katkaj judíos. Ijkuak, judíos amo mouikayaj iniuan akin amo katkaj judíos, yejua ika Pedro xa ouij kikisak kichiuas tein Jehová kinauatijka. Sayoj ke keman kiajsikamatik toni kinekia Jehová, kipatak kemej tanemiliaya. Keman Cornelio kiluij Pedro maj kikalpanoti, yejua yajki uan amo kijtoj ‘ke amo ueliskia’ (Hech. 10:​28, 29). Kinmatiltij kuali tanauatilmej Cornelio uan nochin akin nemiaj ichan, uan yejuan moauijkej (Hech. 10:​21-23, 34, 35, 44-48).

8. ¿Keniuj tiknextiaj ke titanemiliaj kemej Jehová? (1 Pedro 3:8).

⁸ Seki xiujmej satepan, Pedro kinyolmajxitij tokniuan nejin: “Nochin xikpiakan sayoj se tanemilil” (xikonlero 1 Pedro 3:8). Itech Biblia kijtoua keniuj uelis titanemiliskej kemej Jehová. Komo tikchiuaj kemej yejua, nochin tokniuan uan tejuan sayoj se taman kemej titanemiliskej. Maj tikelnamikikan ke Jesús kinyolchikauak itatojtokakauan maj kitayekanaltikan iTaixyekanalis Dios (Mat. 6:33). Axkan maj tiknemilikan ke se tokniuj itech tonechikol kiixtalia kitekitilis Jehová miak tonalmej. ¿No tikiluiskiaj ijkon kemej Pedro kiluij Jesús? Amo. Ta tikiluiskiaj ke kuali yetok tein kichiujtok uan ke tikpaleuiskej.

MAJ TIYOLYEMANKEJ

9, 10. ¿Keniuj tamachtij Jesús ke moneki maj se yolyemanik?

⁹ Se youak achto ke kimiktiskiaj Jesús, kinmachtij Pedro uan oksekin itatitaniluan maj yolyemankej. Jesús kiniluijka Pedro uan Juan maj kichijchiuanij tein kikuaskiaj yejua uan itatitaniluan achto ke kimiktiskiaj. Xa yejuan no kiitakej maj onkani se ueyi kaxit uan tasal tein mokuiskia keman kinmetspajpakaskiaj akin ajsiskiaj para takuaskej. ¿Uan akoni kinmetspajpakaskia?

¹⁰ Nochipa kichiuaya se takeual. Sayoj ke Jesús amo mochiak uan niman kinmetspajpakak. Ijkon kinextij ke semi yolyemanik katka. Tatitanilmej xa semi kimojkaitakej keman kiitakej ke mokixtilij ipantaken, motajkoilpilij se tasal, kipantekak at itech ueyi kaxit uan peuak kinmetspajpaka (Juan 13:​4, 5). Jesús kinmetspajpakak 12 itatitaniluan uan xa semi uejkauak, no kimetspajpakak Judas akin satepan kitemaktiskia. ¡Jesús semi yolyemanik katka! Satepan kinmelauilij keyej kichiuak nejin: “¿Nankimatij keyej namechmetspajpakak? Namejuan nanechiluiaj Tamachtijkej uan toTekotsin, uan melauak tein nankijtouaj. Yejua ika, komo nejua namoTekotsin uan namoTamachtijkauj, uan namechmetspajpakak, namejuan no moneki namometspajpakaskej se iuan okse” (Juan 13:​12-14).

11. ¿Keniuj kinextij Pedro ke katkaya yolyemanik? (1 Pedro 5:5; no xikonita taixkopin).

¹¹ Pedro momachtij yeski yolyemanik keman kiitaya tein kichiuaya Jesús. Satepan ke yejua mokepak iluikak, Pedro kipajtij ika se milagro se takat akin yolik metskoxoj (Hech. 1:​8, 9; 3:​2, 6-8). Miakej kiitakej nejin milagro uan mosentilijkej kampa yetoya Pedro (Hech. 3:11). Sayoj ke yejua amo kinekia maj kiueyitalianij maski kampa moskaltijka miakej kinemiliayaj ke monekia maj kintelixmatikan. Yejua kinextij ke katka yolyemanik uan kiniluij maj kiueyitalianij Jehová uan Jesús keman kijtoj: “Itokaykopa Jesús uan porin itech titakuaujtamatij, metschijchikauayak nejin takat akin namejuan nankiitaj uan nankiixmatij” (Hech. 3:​12-16). Satepan, Pedro kintajkuilouilij tokniuan para kiniluis ke semi monekia maj yolyemankej. Tein kijtoj xa techelnamiktia keman Jesús motajkoilpilij se tasal uan kinmetspajpakak itatitaniluan (xikonlero 1 Pedro 5:5 uan ojpatika nota).

12. Ijkon kemej Pedro, ¿toni techpaleuis maj tiyolyemankej?

¹² Ijkon kemej Pedro, tejuan no uelis tiyeskij tiyolyemankej. Amo sayoj tiknextiaj ke tiyolyemankej ika tein tikijtouaj, ta no ika tein tiknemiliaj. Yejua nejon kijtosnekij tajtolmej ‘maj se yolyemanik’ itech 1 Pedro 5:5. Tikinpaleuiaj oksekin amo porin tiknekij maj techueyitalikan, ta porin tikintasojtaj uan no Jehová. Tiknextiaj ke tiyolyemankej keman tiyolpakij tiktekitiliskej Jehová uan tikinpaleuiaj tokniuan maski oksekin amo kiitaskej tein tikchiuaj (Mat. 6:​1-4).

MAJ KUALI TITAIXEJEKOKAN

13. ¿Toni kijtosneki maj kuali titaixejekokan?

¹³ ¿Toni kijtosneki maj ‘kuali se talnamikto’ oso maj kuali se taixejeko? (1 Ped. 4:7). Komo kuali titaixejekouaj, tiknemiliskej keniuj kiita Jehová tein tiknekij tikixpejpenaskej. No tikitaskej ke okachi moneki maj kuali timouikakan iuan Jehová ke tikchiuaskej okseki taman. Komo kuali titaixejekouaj, amo tiknemiliskej ke okachi tiueyichiuanimej ke oksekin, nion tiknemiliskej ke amo akin moneki techmachtis teisa. Uan no tiktemoskej maj Jehová techpaleui keman tiktataujtiskej maj techixyekana.a

14. Xikonijto tein panok keman Pedro amo kitemoj maj Jehová kipaleui.

¹⁴ Se youal achto ke momikilis, Jesús kiniluij imomachtijkauan: “Keman nankiitaskej tein nechpanos, nanochin nanechkauaskej nejin youak”. Sayoj ke Pedro tanankilij: “Maski nochin mitskauaskej keman kiitaskej tein mitspanos, ¡nejua amo keman nimitskauas!”. Nejon youak, Jesús kinyolmajxitij sekin imomachtijkauan: “Xiijsatokan uan nochipa ximotataujtijtokan” (Mat. 26:​31, 33, 41). Komo Pedro kichiuaskia nejon, xa moyolchikauaskia kijtos ke katka imomachtijkauj Jesús. Kemej amo ijkon kichiuak, kijtoj ke amo kiixmatia iTekotsin, uan satepan tel amo kuali momachilij (Mat. 26:​69-75).

15. Youak achto ke Jesús momikiliskia, ¿toni kipaleuij maj kuali taixejeko?

¹⁵ Jesús nochipa kitemoj maj Jehová kipaleui. Youak achto ke momikiliskia miakpa kitataujtij maski amo tajtakolej katka. Ijkon moyolchikauak kichiuas tein iTajtsin kinekia (Mat. 26:​39, 42, 44; Juan 18:​4, 5). Uan tikmatij ke Pedro amo keman kielkauak ke Jesús miakpa motataujtij youak achto ke momikiliskia.

16. ¿Keniuj kinextij Pedro ke kuali taixejekouayaya? (1 Pedro 4:7).

¹⁶ Satepan, Pedro nochipa kitataujtiayaya Jehová para maj kipaleuiani. Keman Jesús oksepa nemik, kiniluij Pedro uan okseki itatitaniluan ke kinmakaskia ichikaualis Dios para maj uelinij tanojnotsanij. Sayoj ke kiniluij ke monekia mochiaskej ompa Jerusalén hasta maj pano tein kijtojka (Luc. 24:49; Hech. 1:​4, 5). ¿Toni kichiuak Pedro keman ayamo mochiuaya nejon? Biblia kijtoua ke yejua uan okseki tokniuan “miakpa motataujtiayaj” (Hech. 1:​13, 14). Satepan ke kijkuiloj yekinika iamatajkuilol kinyolchikauak tokniuan maj kuali titaixejekokan uan maj motataujtianij para maj Jehová kinpaleuiani (xikonlero 1 Pedro 4:7). Pedro nochipa kitemouaya maj Jehová kipaleui uan semi kinyolchikauaya tokniuan itech nechikol (Gál. 2:9).

17. ¿Toni moneki nochipa tikchiuaskej maski seki taman tiuelijya toselti? (No xikonita taixkopin).

¹⁷ Para kuali titaixejekoskej moneki semi tiktataujtiskej Jehová. Moneki nochipa tiktajtaniskej maj techixyekana maski tiknemiliskej ke seki taman tiuelijya toselti. Moneki tikiluiskej Jehová maj techpaleui, okachiok keman moneki tikixpejpenaskej teisa tein motelneki porin tikmatij ke sayoj yejua kimati toni okachi techpaleuis.

18. ¿Toni no uelis tikchiuaskej ijkon kemej Pedro?

¹⁸ Jehová techchijchiuak kemej uelis titanemiliskej kemej yejua, kemej uelis tiyeskij tiyolyemankej uan kuali titaixejekoskej (Gén. 1:26). Tikmatij ke amo uelis tikchiuaskej senkis kemej Jehová. Sayoj ke semi timotasojkamatij porin ijkon kemej Pedro kichiuak, tejuan no uelis timochikauaskej titanemiliskej kemej Jehová (Is. 55:9).