Maj kinexti ke titakuaujtamatij keman titaixpejpenaj

1. ¿Keyej Pablo yolpakia keman kielnamikia nochi tein kichiujka?

TATITANIL PABLO kimatia ke yaya kimiktitijya. Sayoj ke yolpakia keman kielnamikia nochi tein kichiujka. ¿Keyej? Yejua kijtoj: “Nitamitsikuinikya uan niksentoka nitakuaujtamati” (2 Tim. 4:​6-8). Pablo kiixtalij kitekitilis Jehová uan yejua ika kiyolpaktij. Ijkon kemej Pablo kichiuak tejuan no tiknekij kuali titaixpejpenaskej uan tikyolpaktiskej Jehová. ¿Keniuj uelis ijkon tikchiuaskej?

2. ¿Toni kijtosnekik Pablo itech 2 Corintios 5:7?

² Pablo kijtoj tein kichiuak yejua uan okseki tokniuan: “Tejuan tikchiuaj nochi porin titakuaujtamatij uan amo porin techyekana tein tikitaj” (2 Cor. 5:7). Nejin kijtosneki ke keman taixpejpenaj akin amo takuaujtamatij iuan Jehová moixyekanaj ika tein kiitaj, kikakij uan kimachiliaj. Sayoj ke aksa akin takuaujtamati iuan Jehová kinemilia tein yejua kineki maj kichiua keman taixpejpena. Ika tein kichiuas kinextis ke senkis takuaujtamati ke Jehová kitatiochiuis satepan uan ke komo kichiua tein kiyolmajxitia itech Biblia semi kipaleuis (Sal. 119:66; Heb. 11:6).

3. ¿Keniuj techpaleuia komo tiknextiaj ke titakuaujtamatij iuan Jehová? (2 Corintios 4:18).

³ Tinochin kemansa titaixpejpenaj ika tein tikitaj, tein tikakij uan tein tikmachiliaj. Sayoj ke komo nochipa ijkon titaixpejpenaj hasta ika teisa tein motelneki, xa amo kuali titaixpejpenaskej. ¿Keyej? Porin tein tikitaj uan tein tikakij amo nochipa tapaleuia. Uan no komo titaixpejpenaj ika tein tikitaj, tein tikakij uan tein tikmachiliaj, xa tikchiuaskej tein Jehová amo kineki maj tikchiuakan (Ecl. 11:9; Mat. 24:​37-39). Sayoj ke komo nochipa tiknextiaj ke titakuaujtamatij tikixpejpenaskej tein “kiyolpaktia toTekotsin” (Efes. 5:10). Komo tikchiuaj tein Dios techyolmajxitia, tiyolseujtoskej uan semi tiyolpakiskej (Sal. 16:​8, 9; Is. 48:​17, 18). Uan komo tiksentokaj tiknextiaj ke titakuaujtamatij iuan Jehová uelis tinemiskej nochipaya (xikonlero 2 Corintios 4:18).

4. ¿Keniuj uelis tikmatiskej ox tiknextiaj ke titakuaujtamatij iuan Jehová keman titaixpejpenaj?

⁴ ¿Keniuj uelis tikmatiskej ox tiknextiaj ke yekmelauj titakuaujtamatij iuan Jehová keman titaixpejpenaj? Tinochin uelis timotajtaniskej nejin: “¿Toni ika nimoixyekana keman nitaixpejpena? ¿Sayoj ika tein ueli nikita oso ika tein Jehová nechyolmajxitia?”. Itech nejin tamachtilis tikitaskej keniuj uelis tiknextiskej ke titakuaujtamatij iuan Jehová keman tikixpejpenaj toni tikchiuaskej itech nejin eyi taman: keman tikixpejpenaskej se tekit, akoni iuan timonamiktiskej uan keman inechikol Jehová technauatia maj tikchiuakan teisa. Tikitaskej seki taman tein moneki kuali tiknemiliskej achto ke titaixpejpenaskej.

KEMAN TIKIXPEJPENASKEJ SE TEKIT

5. ¿Sayoj moneki tikitaskej kanachi tiktaniskej keman tikixpejpenaskej se tekit uan keyej?

⁵ Tinochin tiknekij tikpiaskej se tekit tein techpaleuis maj timoixpanoltikan tejuan uan tochankauan (Ecl. 7:12; 1 Tim. 5:8). Sekin okachi kitanij tomin ke oksekin. Sekin okachi kintaxtauiaj uan ika ueli kinixpanoltiaj ininchankauan uan hasta ueli kisentiliaj para kikuiskej satepan. Sayoj ke oksekin amo miak kitanij uan sayoj kinajsi para kiixtauaskej tein okachi kinpoloua ininchankauan, kemej takual, kani nemiskej uan inintasal. Keman tikixpejpenaj se tekit ipa tikitaj kanachi tiktaniskej, sayoj ke komo sayoj itech titanemiliaj nejon timoixyekantoskiaj ika tein tikitaj.

6. ¿Keniuj tiknextiaj ke titakuaujtamatij iuan Jehová keman tikitaj ox tikseliskej se tekit? (Hebreos 13:5).

⁶ Komo tiknextiaj ke titakuaujtamatij iuan Jehová keman tikitaskej ox tikseliskej se tekit, no tikitaskej maj ueli tiksentokakan kuali iuan timouikakan. Maj timotajtanikan: “Keman nikselis nejon tekit, ¿monekis nikchiuas seki taman tein Jehová kitauelita? ¿Amo uelis nias nochi nechikolmej, amo semi nitanojnotsasok, nion nimomachtisok Biblia? Uan ¿uejkauak monekis nikinkauas nochankauan?” (Prov. 6:​16-19; Filip. 1:10). Komo ijkon, okachi kuali maj amo tikselikan maski ouij se kiajsi se tekit. Kemej titakuaujtamatij iuan Jehová, tein tikixpejpenaj kinextis ke senkis tikmatij ke yejua kichiuas teisa para techmakas tein techpolos (Mat. 6:33; xikonlero Hebreos 13:5).

7, 8. ¿Keniuj kinextij se tokniuj de Sudamérica ke takuaujtamati iuan Jehová? (No xikonita taixkopin).

⁷ Se tokniuj takat akin monotsa Javiera uan nemi Sudamérica kimatia ke semi monekia maj kinextij ke iuan takuaujtamati Jehová. Yejua kijtoua: “Kampa nitekitia ueliskia nechmakaskej okse tekit kampa niktaniskia okachi tomin uan semi niknekia nejon tekit”. Sayoj ke Javier no kinekia mochiuas precursor. Yejua kijtoua: “Nitajtanik iuan nitajtos takat akin taixyekanaya kampa nitekitia. Sayoj ke achto ke niknojnotsas nejon takat, niktataujtij Jehová porin nikneltokaya ke yejua kimatia toni okachi kuali katka. Maski niknekia okachi nitekitis uan okachi niktanis tomin, amo nikseliskia se tekit tein nechtsakuiliskia maj okachi niktekitili Jehová”.

⁸ Javier kijtoua: “Keman iuan nitajtoj nejon takat nechiluij ke kemansa monekiskia nimokauas uan okachi nitekitis. Kuali niknankilij uan nikiluij ke amo niueliskia porin monekia nikchiuas seki taman para niktekitilis Dios”. Javier amo kiselij nejon tekit uan ome semana satepan mochiuak precursor. Seki metsti satepan kiajsik se tekit kampa amo monekia tekitis nochin tonalmej. Yejua kijtoua: “Jehová nechkakik uan nechpaleuij maj nikajsi se tekit kampa ueliskia niksentokas nitapaleuis kemej precursor. Semi niyolpaki porin tekit tein nikpia amo nechtsakuilia maj okachi niktekitili Jehová uan maj nikinpaleui tokniuan”.

9. ¿Toni techmachtia tein kipanok Trésor?

⁹ ¿Toni uelis tikchiuaskej komo tikitaj ke tekit tein tikpiaj kichiujtok maj amo kuali timouikakanok iuan Jehová? Maj tikitakan tein kipanok Trésor, se tokniuj takat akin nemi Congo. Yejua kijtoua: “Nikajsik tekit tein ipa niknekia nikchiuas. Ompa niktania okachi, eyi tantojok ke kampa achto nitekitia uan oksekin semi nechpoujkaitayaj”. Sayoj ke Trésor miakpa mopolouiliaya nechikolmej porin monekia mokauas para okachi tekitis. Uan no, akin iniuan tekitia kichikaujkauiayaj maj takajkayauani para maj oksekin amo kimatinij ke kichiuayaj tein amo monekia kampa tekitia. Trésor amo kinekiaok ompa tekitis, sayoj ke no kinemiliaya ke amo kiajsiskia okse tekit. ¿Toni kipaleuij? Yejua kijtoua: “Tein kijtoua Habacuc 3:​17-19 nechpaleuij maj nikajsikamati ke Jehová nechyekpiaskia maski amo nikpiaskia miak tomin. Yejua ika, nikisak”. Yejua no kijtoua: “Miakej akin temakaj tekit kinemiliaj ke tikchiuaskej tein yeski taman, hasta amo semi tietoskejok iniuan tochankauan uan amo semi tiktekitiliskejok Dios para tiktaniskej miak tomin. Semi niyolpaki porin ueli niksentoka kuali nimouika iuan Jehová. Se xiuit satepan, Jehová nechpaleuij maj nikajsi se tekit kampa kuali nechtaxtauiayaj uan nechajsia para ika nimoixpanoltis uan uelia okachi niktekitiliaya Jehová. Komo tiktayekanaltiaj tiktekitiliskej Jehová xa kemansa tel amo tikpiaskej miak tomin, sayoj ke yejua nochipa techyekpias”. Komo titakuaujtamatij ke techpaleuia tein Jehová techyolmajxitia uan itech tein motenkaujtok kichiuas, tiksentokaskej tiknextiskej ke iuan titakuaujtamatij uan techtatiochiuis.

KEMAN TIKITASKEJ AKONI IUAN TIMONAMIKTISKEJ

10. ¿Keniuj aksa uelis kinextis ke sayoj moixyekana ika tein kiita keman kineki monamiktis iuan aksa?

¹⁰ Jehová kiixtalij maj se takat uan se siuat monamiktikan, yejua ika xa ipa tiknekiskej timonamiktiskej. Keman se tokniuj kinemilia monamiktis, xa kiita keniuj moita tokniuj akin kiuelita, keniuj mouika iniuan oksekin, keniuj kiixmatij, keniuj kikui tomin, ox kichiua maj kuali momachili uan ox moneki kinyekpias ichankauan. Nochi nejin semi moneki, sayoj ke komo sayoj nejon kiitaskia, yejua moixyekantoskia ika tein kiita.

11. ¿Keniuj tikchiuaj tein Jehová kiyolpaktia keman tikitaj akoni iuan timonamiktiskej? (1 Corintios 7:39).

¹¹ Jehová semi yolpaki keman kiita ke tokniuan kitakamatij tein kinyolmajxitia keman kiitaj akoni iuan monamiktiskej. Ijkon kichiuaj keman mochiaj uan amo kinemiliaj monamiktiskej keman ‘tel pilimejok’ (1 Cor. 7:36). No kiitaj ox akin kinekij iuan monamiktiskej kinextia tein Jehová kijtoua ke moneki kichiuas se kuali tetakauj oso se kuali tesiuatsin (Prov. 31:​10-13, 26-28; Efes. 5:33; 1 Tim. 5:8). Uan komo aksa akin amo itaixpantijkauj Jehová kinnojnotsa para maj mochiuakan novios, yejuan kiixtopeuaj porin kimatij ke sayoj uelis monamiktiskej iuan akin “no kitojtoka toTekotsin”, kemej kijtoua 1 Corintios 7:39 (xikonlero). Uan ijkon kichiuaj porin kimatij ke Jehová nochipa kinpaleuis maj ueli yolpakikan (Sal. 55:22).

12. ¿Toni mitsonmachtia tein kipanok Rosa?

¹² Maj tikitakan tein kipanok Rosa, se precursora de Colombia. Kampa tekitia kiixmatik se takat akin amo katka itaixpantijkauj Jehová. Nejon takat peuak kiuelita Rosa uan yejua no. Rosa kijtoua: “Moitaya ke katka yolkuali. Kinpaleuiaya akin nemiaj kampa yejua nemia, amo tachichinaya, amo kikuia droga uan amo semi tayia tein teuintij. Kuali nechnojnotsaya uan kichiuaya miak taman tein nejua nikuelitaya, sayoj ke amo katka itaixpantijkauj Jehová”. Yejua no kijtoua: “Semi ouij nechkisak nikixtopeuas porin nikuelitaya. Ijkuak, nimomachiliaya noselti uan niknekia nimonamiktis, sayoj ke amo nikajsia se tokniuj akin niknekiskia iuan nimoixmatis”. Sayoj ke Rosa amo sayoj itech tanemilij tein yejua kinekia, ta kimatia ke komo iuan moixmatia nejon takat amo kuali mouikaskiaok iuan Jehová. Yejua ika senkis kiixtalij amo iuan tajtosok, uan peuak okachi kitekitilia Jehová. Tepitsin satepan kiyoleujkej maj kiseli tamachtilis para akin kiteixmatiltiaj iTaixyekanalis Dios, uan axkan tapaleuia kemej precursora especial. Rosa kijtoua: “Jehová kichiuani maj semi niyolpaki porin semi nechtatiochiuiani”. Kemansa ouij techkisa tikchiuaskej tein Jehová kiyolpaktia, okachiok komo techpanoua kemej tokniuj Rosa, sayoj ke nochipa kuali tietoskej komo tiknextiaj ke titakuaujtamatij iuan Jehová.

KEMAN INECHIKOL JEHOVÁ TECHNAUATIA MAJ TIKCHIUAKAN SEKI TAMAN

13. ¿Keniuj ueliskia tiknextiskej ke sayoj timoixyekanaj ika tein tikitaj keman inechikol Dios technauatia teisa?

¹³ Tayekananij, takalpanouanij itech circuito, sucursal oso Oloch Taojtokaltianij miakpa technauatiaj maj tikchiuakan seki taman para techpaleuiskej maj tiktekitilikan Jehová. Sayoj ke kemansa amo senkis tikajsikamatij keyej tokniuan technauatiaj maj tikchiuakan teisa. Xa tiknemiliskej ke amo semi tapaleuia tein technauatiaj, uan hasta sayoj tikitaskej tein amo kuali tein kichiuaj tokniuan akin technauatiaj. Komo ijkon tikchiuaskiaj timoixyekantoskiaj sayoj ika tein tikitaj.

14. ¿Toni techpaleuis maj tiktakamatikan tein inechikol Jehová technauatia? (Hebreos 13:17).

¹⁴ Titakuaujtamatij ke Jehová kiixyekantok inechikol uan kimati tein techpanoua. Yejua ika niman titatakamatij uan kuali tikchiuaj tein technauatiaj (xikonlero Hebreos 13:17). Uan tikmatij ke komo titatakamatij titapaleuiskej maj tokniuan okachi kuali mouikakan (Efes. 4:​2, 3). No titakuaujtamatij iuan Jehová uan tikmatij ke maski tokniuan tajtakolejkej, Jehová techtatiochiuis komo titatakamatij (1 Sam. 15:22). Uan komo yejua kiita ke moneki mopatas teisa, kichiuas keman kiitas ke okachi kuali (Miq. 7:7).

15, 16. ¿Toni kipaleuij Kevin maj kichiua tein Jehová kinekia? (No xikonita taixkopin).

¹⁵ Maj tikitakan se taman tein panok tein kinextia keniuj semi tapaleuia maj se takuaujtamati iuan Jehová uan maj se kichiua tein tanauatia inechikol. Ompa Perú tajtouaj español, sayoj ke miakej no tajtouaj okseki tajtolmej, kemej tajtol quechua. Miak xiujmej tokniuan akin tajtouaj quechua kintemouayaj akin no tajtouayaj nejon tajtol kampa ixyetoya tanojnotsaskej. Sayoj ke tekiuaj kiixtalij okseki tanauatilmej uan yejua ika mopatak kemej tanojnotsayaj (Rom. 13:1). Sekin tokniuan peuak motajtaniaj keniuj kinajsiskiaj akin tajtouayaj nejon tajtol. Sayoj ke keman yejuan kichiujkej tein kinnauatijkej, Jehová kinpaleuij maj kinajsikan miakej akin tajtouaj quechua.

¹⁶ Kevin, se tayekankej akin tapaleuia itech se nechikol kampa motajtoua quechua, semi motekipachojtoya keman kimatik ke mopataskia kemej tanojnotsayaj. Yejua kijtoua: “Nimotajtaniaya keniuj tikinajsiskiaj akin tajtouayaj quechua”. ¿Toni kichiuak Kevin? Yejua kijtoua: “Itech nitanemilij Proverbios 3:5. Uan no itech nitanemilij Moisés. Jehová kinauatij maj kinkixtiani israelitas de Egipto uan maj kinuikani itech mar Rojo kampa moitaya ke egipcios niman kinajsiskiaj. Sayoj ke Moisés tatakamatik uan Jehová kipaleuij maj kichiua se milagro” (Éx. 14:​1, 2, 9-11, 21, 22). Kevin kichiuak tein moixtalij uan kijtoua keniuj tapaleuij: “Jehová semi techtatiochiuij. Achto uejka tinejnemiaj para titanojnotsaskej uan kemansa sayoj tikinajsiaj se oso omen akin tajtouayaj quechua, sayoj ke okachi miakej tikinajsij kampa axkan tiouij. Okachi ueli titanojnotsaj, tikinkalpanouaj akin kuali techkakij uan okachi miakej tikinmachtiaj. Uan axkan tel miakej touan mosentiliaj”. Nejin kinextia ke keman tikchiuaj tein Jehová kineki, yejua techtatiochiuia.

17. ¿Toni mitsonmachtij nejin tamachtilis?

¹⁷ Tikitakej eyi taman kampa semi moneki maj kuali tiknemilikan toni tikchiuaskej para tikyolpaktiskej Jehová. Sayoj ke moneki ijkon tikchiuaskej itech tein yeski taman tein tikixpejpenaskej, xa keman tikitaskej toni ika timoixpetaniskej, ox tiksentokaskej timomachtiskej escuela uan keniuj tikiniskaltiskej tokoneuan. Keman tikixpejpenaskej teisa moneki tikitaskej maj ueli tiksentokakan kuali timouikakan iuan Jehová, maj tikchiuakan tein techyolmajxitia uan maj tikelnamikikan ke yejua motenkaua techyekpias uan maj amo timoixyekanakan sayoj ika tein tikitaj. Ijkon, “tinentinemiskej itech itokay Jehová toDios nochipaya” (Miq. 4:5).