Jehová nochipa uelis mitsonpaleuis

1. ¿Keniuj kinextij Moisés ke takuaujtamatia iuan Jehová keman kinkixtij israelitas de Egipto?

AMATAJKUILOL Hebreos ininka tajtoua miakej itekitikauan Jehová akin semi takuaujtamatkej. Semej katka Moisés (Heb. 3:​2-5; 11:​23-25). Yejua kinextij ke semi takuaujtamatia iuan Jehová keman kinkixtij israelitas de Egipto, uan amo kimouilij faraón uan isoldados. Semi takuaujtamatik iuan Jehová uan kinixyekanak israelitas keman kipanauijkej mar Rojo uan no itech taluakyan (Heb. 11:​27-29). Miakej israelitas amo takuaujtamatiajok ke Jehová kinyekpiaskia, sayoj ke Moisés kisentokak iuan takuaujtamatik. Uan ijkon kichiuak porin Jehová nochipa kinmakak israelitas tein kikuaskiaj uan at para maj amo momikilianij taluakyan (Éx. 15:​22-25; Sal. 78:​23-25).a

2. ¿Keyej Jehová kitajtanij Moisés tein ijkuiliujtok itech Números 11:​21-23?

² Kemej se xiuit satepan ke kinkixtijkej israelitas de Egipto, Jehová kijtoj ke kinmakaskia nakat. Moisés semi takuaujtamatia sayoj ke amo uelia kineltokaya keniuj Jehová kinmakaskia nakat millones itech taluakyan. Yejua ika Dios kitajtanij: “¿Timoluia ke Jehová amo uelis kichiuas nejin?” (xikonlero Números 11:​21-23). Itech tajtol hebreo nejin texto kijtoua ‘imay Jehová’, nejin kijtosneki ichikaualis Dios tein kikui para kichiuas tein kineki. Kemej yeskia kijtojtoskia: “Nejua ueli nikchiua nochi tein nikneki”.

3. ¿Keyej moneki maj tikitakan tein kinpanok Moisés uan israelitas?

³ ¿Kemansa tionmotajtaniani ox Jehová nochipa namechmakas tein namechpolos tejuatsin uan mochankauan? Komo tionmotajtaniani oso amo, maj tikitakan keyej Moisés uan israelitas amo takuaujtamatkejok ke Dios kinyekpiaskia. No tikitaskej seki textos tein techpaleuis maj okachi titakuaujtamatikan ke Jehová nochipa techyekpias.

¿TONI TECHNEXTILIA TEIN KICHIUJKEJ MOISÉS UAN ISRAELITAS?

4. ¿Keyej miakej israelitas amo semi takuaujtamatkejok ke Jehová kinyekpiaskia?

⁴ ¿Keyej miakej israelitas peuak amo takuaujtamatijok ke Jehová kinyekpiaskia? Israelitas uan akin amo katkaj israelitas kiskej de Egipto, uan miak tiempo nejnentoyajya itech taluakyan para ajsiskej itech tal tein Dios motenkaujka kinmakas (Éx. 12:38; Deut. 8:15). Akin amo katkaj israelitas amo kinekiajok kikuaskej maná uan yejua ika peuak kualanij iuan Moisés, uan miakej israelitas no peuak ijkon kichiuaj (Núm. 11:​4-6). Nochipa kielnamikiaj tein kikuayaj ompa Egipto. Kemej nochin kualaniaj iuan Moisés, yejua kinemilij ke monekia kinmakas nakat (Núm. 11:​13, 14).

5, 6. ¿Keniuj israelitas peuak tanemiliaj kemej akin amo katkaj israelitas uan toni techmachtia nejon?

⁵ Akin amo katkaj israelitas amo kitasojkamatiaj tein Jehová kinmakatoya, uan israelitas no peuak ijkon kichiuaj. Tejuan no ueliskia ijkon techpanos porin miakej akin axkan nemij amo motasojkamatij, yejua ika xa no peuas amo techyolpaktisok tein Jehová techmaka. Xa tiktemoskej seki taman tein achto tikpiayaj oso tikinnexikoluiskej oksekin. Sayoj ke komo nochipa tikpatiuitaj tein tikpiaj okachi tiyolpakiskej.

⁶ Israelitas monekia kielnamikiskej tein Jehová iniuan motenkaujka. Kiniluijka ke kinmakaskia miak taman keman ajsiskiaj itech tal tein yejua motenkaujka kinmakas, amo itech taluakyan. Tejuan amo no moneki tiktelnejnekiskej tikpiaskej tein amo tikpiaj, ta maj itech titanemilikan tein Jehová motenkaujtok techmakas itech xochital. No maj itech titanemilikan textos tein techpaleuis maj okachi titakuaujtamatikan iuan Jehová.

7. ¿Keyej uelis tikneltokaskej ke Jehová nochipa techpaleuis maski kampa yeski tietoskej?

⁷ Xa tiknemiliskej keyej Dios kiluij Moisés: “¿Timoluia ke Jehová amo uelis kichiuas [tein kijtoua]?”. Xa yejua kinekia maj kiajsikamati ke ichikaualis amo keman tami, uan ke uelis kitekitiltis kampa yeski. Yejua ika maski israelitas yetoyaj taluakyan, Jehová ueliskia kinmakas miak nakat. Ika ichikaualis, Dios kinextij ke ueliskia kinpaleuis itekitikauan kampa yeski yetoyaj (Éx. 6:6). Yejua ika keman tikpiaskej se ouijkayot, uelis titakuaujtamatiskej ke Jehová nochipa techpaleuis kampa yeski tietoskej (Sal. 138:​6, 7).

8. ¿Toni techpaleuis maj amo tikchiuakan ijkon kemej kichiujkej miakej israelitas itech taluakyan? (No xikonita taixkopin).

⁸ Jehová kichiuak tein kijtoj uan kintitanilij tel miak totomej. Sayoj ke israelitas amo motasojkamatkej uan miakej peuak kinkitskiaj okachi totomej ke tein kinkuaskiaj. Uan se tonal uan tajko kinsentilijtoyaj totomej, yejua ika Jehová tel kualanik uan kintatsakuiltij akin “kampetsmikiaj” (Núm. 11:​31-34). Nejin techmachtia ke tejuan amo no moneki tiktemoskej tikpiaskej okachi ke tein techpoloua. Maski tikpiaskej tomin oso amo, okachi moneki maj tiksentilikan “tein kipia ipatiuj ne iluikak”, uan uelis ijkon tikchiuaskej komo timochikauaj okachi kuali timouikaskej iuan Jehová uan Jesús (Mat. 6:​19, 20; Luc. 16:9). Komo ijkon tikchiuaj techpaleuis maj tikneltokakan ke Jehová techmakas tein techpolos.

9. ¿Toni uelis tikneltokaskej?

⁹ Axkan Jehová no kinpaleuia itekitikauan. ¿Kijtosneki nejin ke amo keman techpolos tomin oso tein tikuaskej? Amo.b Sayoj ke uelis titakuaujtamatiskej ke Jehová nochipa techpaleuis. Yejua techpaleuis maj tikxikokan tein yeski ouijkayot. Tikitaskej ome taman kampa uelis tiknextiskej ke titakuaujtamatij ke Jehová techyekpias: 1) keman amo tikpiaskej tomin uan 2) keman tiknemiliskej keniuj tikpiaskej tein techpolos keman tiyeskij tixiuejkej.

KEMAN AMO TIKPIASKEJ TOMIN

10. ¿Toni ueliskia kichiuas maj amo tikpiakan tomin?

¹⁰ Kemej amo uejkaua tamitiya nochi tein amo kuali, xa satepan okachi tatasojtis. Xa tekiuanij kichiuaskej tein amo tapaleuis, okachi mochiuaskej neteuilismej uan tetsaujmej oso momoyauaskej okseki kokolismej. Xa monekis okachi tomin, xa amo tikpiaskejok tekit nion tochan oso okseki taman tein achto tikpiayaj, uan xa monekis tiktemoskej okse tekit oso tiknemiliskej tiaskej okseko tinemitiuij iniuan tochankauan para uelis timoixpanoltiskej. ¿Keniuj uelis tikixpejpenaskej teisa tein kinextis ke titakuaujtamatij ke Jehová nochipa techpaleuis?

11. ¿Toni uelis tikchiuaskej keman amo tikpiaskej tomin? (Lucas 12:​29-31).

¹¹ Semi moneki maj tiktapouikan Jehová tein techtekipachoua, nejon semi techpaleuis (Prov. 16:3). Maj tiktajtanikan maj techpaleui maj kuali titaixpejpenakan uan maj tiyolseujtokan para maj amo ‘timoteltekipachojtokan’ (xikonlero Lucas 12:​29-31). Maj tiktataujtikan maj techpaleui maj tiyolpakikan ika tein tikpiaj (1 Tim. 6:​7, 8). Maj tiktemokan tamachtilismej itech toamaixuan tein techpaleuis maj tikmatikan toni tikchiuaskej keman amo tikpiaskej tomin. Miakej semi kinpaleuiani videos uan tamachtilismej tein ika tajtouaj nejon, tein moajsij itech jw.org.

12. ¿Toni uelis motajtanis se tokniuj para uelis kiixpejpenas tein kinpaleuis ichankauan?

¹² Sekin kiselianij seki tekimej kampa moneki yetoskej uejka de ininchankauan, sayoj ke satepan kiitaj ke okachi kuali maj amo yanij. Yejua ika, achto ke tikonselis se tekit, amo sayoj xikonita kanachi mitsontaxtauiskej, ta no ox mitsonpaleuis xikonsentoka kuali xionmouika iuan Jehová (Luc. 14:28). Xionmotajtani nejin: “Komo uejka nietok, ¿uelis niksentokas kuali nimouikas iuan notakatsin oso nosiuatsin? ¿Uelis nias nochi nechikolmej, nitanojnotsatiuj uan nietos iniuan tokniuan?”. Komo tikonpia mokoneuan, moneki xionmotajtani nejin: “¿Uelis nikinpaleuis nokoneuan maj kuali mouikakan iuan Jehová uan maj kitakamatikan komo amo iniuan nietok?” (Efes. 6:4). Keman tikonitas toni tikonchiuas, xikonita keniuj tanemilia Dios, uan amo xikonchiua tein kijtouaj mochankauan oso motasojikniuan akin amo kichiuaj tein kijtoua Biblia.c Tony, akin nemi Asia occidental, miakkan kiluijkej maj iniuan tekiti itech okse altepet kampa kitaxtauiskiaj miak tomin. Sayoj ke satepan ke motataujtij uan iuan tajtoj isiuatsin, kiixtalij amo yas uan peuak kinemilia toni ueliskia kichiuaskej para amo kikouaskej tein amo moneki. Axkan Tony kijtoua: “Ueli nikinpaleuiani miakej maj kiixmatikan Jehová uan tokoneuan kuali kitekitilijtokej. Tikitanij ke komo tikchiuaj tein kijtoua Mateo 6:​33, Jehová nochipa techyekpia”.

KEMAN TIKNEMILISKEJ KENIUJ TIKPIASKEJ TEIN TECHPOLOS KEMAN TIYESKIJ TIXIUEJKEJYA

13. ¿Toni techpaleuis maj tikpiakan tein monekis satepan?

¹³ Keman tikixtaliskej toni tikchiuaskej para tikpiaskej tein monekis keman tiyeskij tixiuejkejya, uelis moitas ox titakuaujtamatij iuan Jehová. Biblia kijtoua ke kuali yetok maj titekitikan para tikpiaskej tein monekis satepan (Prov. 6:​6-11). Yejua ika, kuali yeskia komo tiksentiliaj tepitsin tomin para ika timopaleuiskej satepan. Tomin semi tapaleuia, sayoj ke amo moneki maj sayoj tiktemojtokan nejon (Ecl. 7:12).

14. ¿Keniuj tein kijtoua Hebreos 13:5 techpaleuia maj amo semi timotekipachokan?

¹⁴ Jesús ika tajtoj se taman para kinextis ke amo tapaleuia komo aksa kisentilia tomin sayoj ke “iixpan Dios amo teyi kipia” (Luc. 12:​16-21). Amo tikmatij toni techpanos satepan (Prov. 23:​4, 5; Sant. 4:​13-15). Uan no, Jesús kijtoj ke nochin akin kitojtokaskiaj amo monekia kinyolkokos kikauaskej nochi tein kipiaj (Luc. 14:33). Uan yejua nejon tein kinpanok tokniuan de Judea keman nemiaj tatitanilmej, yejuan kikaujkej nochi tein kipiayaj (Heb. 10:34). Axkan miakej tokniuan amo kipiajok tekit oso kinkuilianij tein kipiayaj porin amo tavotarouaj (Apoc. 13:​16, 17). Yejuan kinextianij ke takuaujtamatij itech nejin tein Jehová motenkaua: “Amo keman nimitskauas uan nochipa nimitspaleuis” (xikonlero Hebreos 13:5). Yejua ika timochikauaj tiksentiliskej tepitsin tomin para ika timopaleuiskej keman tiyeskij tixiuejkejya uan titakuaujtamatij ke Jehová techpaleuis komo techpanoua teisa tein amo tikchiayaj.

15. ¿Toni moneki kinemiliskej tetatmej keman kiniskaltiskej ininkoneuan? (No xikonita taixkopin).

¹⁵ Itech seki xolalmej miakej kinpiaj ininkoneuan para maj kintekipanokan keman yeskij xiuejkejya. Sayoj ke Biblia kijtoua ke tetatmej moneki kinmakaskej tein kinpoloua ininkoneuan (2 Cor. 12:14). Uan keman tetatmej yeskij xiuejkejya xa ipa monekis maj ininkoneuan kinmakakan tomin oso okseki taman, uan miakej tekoneuan yolpakij kinpaleuiskej inintatuan (1 Tim. 5:4). Sayoj ke tetatmej akin takuaujtamatij iuan Jehová kimatij ke okachi yolpakiskej komo kinpaleuiaj ininkoneuan maj kitekitilikan Jehová, uan amo komo kiniskaltiaj para maj satepan yejuan kintekipanokan (3 Juan 4).

16. ¿Keniuj tetatmej uelis kinpaleuiskej ininkoneuan maj ueli moixpanoltikan keman yeskijya uejueykej? (Efesios 4:28).

¹⁶ Tetatmej, keman nankinpaleuiskej namokoneuan maj momachtikan keniuj motekipanoskej xikinnextilikan ke nantakuaujtamatij iuan Jehová. Keman yeskij pilimejok xikinmachtikan ke semi moneki maj tekitikan (Prov. 29:21; xikonlero Efesios 4:28). Uan keman moskaltiskejya xikinpaleuikan maj kuali momachtikan keman yaskej escuela. No uelis nankitemoskej tamachtilismej itech toamaixuan para maj namokoneuan kuali kiixtalikan ox kisentokaskej momachtiskej. Xikinpaleuikan maj kimatikan keniuj uelis moixpanoltiskej, uan no maj ueli okachi tanojnotsakan oso hasta maj mochiuakan precursores.

17. ¿Toni tikneltokaj?

¹⁷ Itekitikauan Jehová takuaujtamatij ke yejua kineki uan ueli kinpaleuia maj kipiakan tein kinpoloua. Kemej amo uejkaua ixpoliuis nochi tein amo kuali, okachi monekis titakuaujtamatiskej iuan Jehová. Sayoj ke tein yeski ouijkayot tein tikpiaskej, maj titakuaujtamatikan ke Jehová ika ichikaualis techmakas nochi tein moneki. Tikmatij ke yejua nochipa techpaleuis kampa yeski tietoskej.