Maj tikuikan Biblia ijkon kemej se teskat tein ika timoixitaj

Santiago, se imomachtijkauj Jesús kijtoj ke Biblia kemej yeskia se teskat tein techpaleuia maj tikmatikan toni tikpiaj toyolijtik (Sant. 1:​22-25). Sayoj ke, ¿keniuj uelis tikuiskej kemej techpaleuis?

Maj yolik tiklerokan iTajtol Dios. Komo ijsiujka timoitaj itech se teskat xa amo tikitaskej toni moneki tikyektaliskej para kuali timoitaskej. No ijkon, komo ijsiujka tiklerouaj Biblia, amo tikitaskej toni moneki tikpataskej. Yejua ika moneki yolik tikleroskej.

Xikonita tein tejuatsin moneki tikonpatas uan amo tein oksekin moneki kipataskej. Keman timoitaj itech se teskat, xa no tikinitaj akin ompaka yetokej uan xa okachi tikitaskej tein kichiua maj amo kuali moitakan. No ijkon, keman tikixtajtoltiaj Biblia, ueliskia tiknemiliskej sayoj tein oksekin moneki kipataskej. Sayoj ke nejon amo techpaleuis maj tikpatakan tein tejuan techpoloua.

Maj tikajsikamatikan ke amo nochi uelis tikchiuaskej. Xa amo kuali timomachiliskej komo sayoj tikitaj tein amo tikuelitaj keman timoitaj itech se teskat. Para maj amo ijkon techpano keman tikleroskej Biblia, maj tikajsikamatikan ke amo nochi uelis tikchiuaskej uan maj amo timochikaujkauikan tikchiuaskej okachiok ke tein Jehová techtajtania (Sant. 3:17).