Timouikaskej iuan Dios semi techpaleuia

1, 2. 1) ¿Toni uelis tikchiuaskej para kuali timouikaskej iuan aksa? 2) ¿Toni tikitaskej itech nejin tamachtilis?

MAJ ika titanemilikan aksa akin kualtsin iuan timouikaj. ¿Tikelnamikij toni kichiuak maj kuali timouikakan? Xa miak tiempo tisenyetoyaj, timotapouijkej tein tikpanouanij, tikmatkej toni kiuelita uan toni amo. Uan no, keman tikitakej keniuj katka yejua no ijkon tiknekiaj tikchiuaskej. Uan satepan peuak tiktasojtaj.

² Para maj kuali timouikakan iuan aksa moneki maj pano tiempo, uan no ijkon panoua iuan Dios, moneki panos tiempo para kuali tikixmatiskej uan okachi tiktasojtaskej. Yejua ika itech nejin tamachtilis tikitaskej keniuj uelis okachi timotokiskej iuan Jehová akin okachi kuali uelis iuan timouikaskej. Sayoj ke achto maj tikitakan keyej semi techpaleuia iuan timotokiskej.

3. ¿Keyej moneki maj tiknemilikan keniuj techpaleuis komo kuali timouikaj iuan Jehová?

³ Semi kuali maj tiknemilikan keniuj techpaleuia komo kuali timouikaj iuan Jehová (Sal. 63:​6-8). ¿Keyej? Maj titanemilikan itech nejin, miakej kimatij ke moneki kikuaskej tein kinpaleuis maj paktokan. Uan no kimatij ke moneki kichiuaskej ejercicio, kuali kochiskej uan tayiskej at mojmostaj. Maski ijkon, sekin amo ijkon kichiuaj uan kokolispeuaj. Sayoj ke akin kinemiliaj keniuj kinpaleuia komo kichiuaj nochi nejin, okachi mochikauaj ijkon kichiuaskej. No ijkon tejuan, komo tiknemiliaj keniuj semi techpaleuis kuali timouikaskej iuan Jehová, okachi tiknejnekiskej iuan timotokiskej. (Sal. 119:​27-30).

4. ¿Toni kijtoj akin kijkuiloj Salmo 73:28?

⁴ (Xikonlero Salmo 73:28). Akin kijkuiloj Salmo 73 pouia itech ichankauan Leví uan tatsotsonaya itech templo. Xa miak xiujmejya kitekitilijtoya Jehová, sayoj ke kiitak ke monekia kielnamikis ke semi kipaleuiaya kisentokas motokis iuan Dios. Uan kinekia maj oksekin no kimatikan ke semi kinpaleuiskia komo nochipa mouikayaj iuan Jehová. Maj tikitakan seki taman keniuj techpaleuia komo ijkon tikchiuaj.

SEMI TIYOLPAKIJ KEMAN TIMOUIKAJ IUAN DIOS

5. 1) ¿Keyej tiyolpakij keman timotokiaj iuan Jehová? 2) Tein Jehová techiluia kichiua maj timochiuakan titamatinij, ¿keniuj techpaleuia nejon? (Proverbios 2:​6-16).

⁵ Komo okachi timotokiaj iuan Jehová okachi tiyolpakiskej (Sal. 65:4). Onkak miak taman tein uelis techpaleuis maj tiyolpakikan. Keman tiklerouaj tein Jehová techiluia itech Biblia uan tiktakamatij timochiuaj titamatinij. Uan no, tein Jehová techmachtia techpaleuia maj amo titajyouikan uan maj amo titajtakolchiuakan (xikonlero Proverbios 2:​6-16). Yejua ika Biblia kijtoua: “Yolpaki takat akin kitemoua mochiuas tamatkej uan takat akin kitemoua kuali taixejekos” (Prov. 3:13).

6. ¿Keniuj peuak momachilia salmista?

⁶ Sayoj ke hasta akin kuali mouikaj iuan Jehová kemansa no tayokoyaj. Ijkon momachilij akin kijkuiloj Salmo 73 keman peuak tanemilia itech tein amo kuali tein mochiuaya. Peuak kinemilia ke akin amo kipoujkaitaj Dios nion kitakamatij itanauatiluan okachi kuali nemij, yejua ika peuak kualani uan hasta peuak kinnexikoluia. Kinemiliaya ke akin amo yolkualmej, akin tateuiayaj uan moueyinekiaj kipiayaj tein kinekiaj, amo kokolispeuayaj nion tajyouiayaj, sayoj ke nejon amo melauj katka (Sal. 73:​3-7, 12). Semi kualantoya uan hasta kinemilij ke nochi tein kichiuaya para kitekitilis Jehová nenkaj katka. Yejua semi motayokoltiaya uan hasta kijtoj: “Senkis moita ke nenkaj nimochikauani nikpias noyolo chipauak uan nenkaj maj nimomapajpakani uan ijkon niknextis ke amo nikchiuani tein amo kuali” (Sal. 73:13).

7. ¿Toni uelis tikchiuaskej keman titayokoxtoskej? (No xikonita taixkopin ).

⁷ Maski salmista semi motayokoltiaya, kichiuak tein kipaleuiskia maj amo ijkon tanemiliok. Yejua kalakik kampa kiueyichiuayaj Dios uan ompa Jehová kipaleuij maj yektanemili (Sal. 73:​17-19). Kemej Jehová kuali techixmati, kimati keman timotayokoltiaj. Komo ijkon timomachiliaj uelis tiktataujtiskej Jehová uan tiktajtaniskej maj techpaleui maj tikmatikan toni tikchiuaskej. Tein yejua techiluis itech itajtol uan keman tokniuan techyolchikauaskej, techpaleuis maj tiksentokakan tiktekitilikan maski titayokoxtoskej. Hasta keman semi timotekipachojtoskej, Jehová techpaleuis maj tiyolseujtokan (Sal. 94:19).a

KOMO TIMOUIKAJ IUAN DIOS KUALTSIN TINEMISKEJ UAN TIKCHIASKEJ TEIN KUALI

8. ¿Keniuj no techpaleuia komo timouikaj iuan Dios?

⁸ Komo timouikaj iuan Dios techpaleuis ika nejin ome taman. Yekinika, kualtsin tinemiskej. Uan ojpatika, tikmatij ke amo uejkaua yekmelauj mochiuas tein tikchiaj (Jer. 29:11). Maj tikitakan keniuj techpaleuis sejse de nejin taman.

9. ¿Keyej komo timouikaj iuan Jehová okachi tiyolpakij?

⁹ Timouikaskej iuan Jehová techpaleuia maj kualtsin tinemikan. Axkan miakej amo kineltokaj ke Dios yekmelauj nemi. Yejua ika amo kimatij keyej nikan tietokej uan kinemiliaj ke amo uejkaua tinochin tiixpoliuiskej. Sayoj ke kemej tejuan timomachtiaj itajtol Dios, techpaleuia ‘maj tikneltokakan ke Dios yekmelauj nemi uan ke kintaxtauia akin semi kitemouaj kiueyichiuaskej’ (Heb. 11:6). Totajtsin Jehová techchijchiuak maj tiknekikan tikueyichiuaskej. Yejua ika keman tiktekitiliaj semi tiyolpakij (Deut. 10:​12, 13).

10. Kemej kijtoua Salmo 37:​29, ¿toni tikchiaj akin titakuaujtamatij iuan Jehová?

¹⁰ Tel miakej amo kichiaj maj mochiua tein kuali. Yejuan sayoj tekitij, monamiktiaj, kinpiaj konemej uan kieuaj tomin para kikuiskej keman amo uelisok tekitiskej. Amo kimatij tein Dios motenkaujtok kichiuas amo uejkaua. Sayoj ke tejuan tikmatij ke Jehová kinyekpia itekitikauan (Sal. 25:​3-5; 1 Tim. 6:17). Iuan titakuaujtamatij Jehová uan tikmatij ke kichiuas nochi tein motenkaujtok. Tikchiaj maj mochiua miak taman tein kuali amo uejkaua uan semej yejua tikueyichiuaskej Jehová itech xochital (xikonlero Salmo 37:29).

11. ¿Keniuj techpaleuia timouikaskej iuan Dios, uan keniuj momachilia Jehová keman ijkon tikchiuaj?

¹¹ Timouikaskej iuan Dios no techpaleuia itech okseki taman. Jehová motenkaua ke techtapojpoluis totajtakoluan komo timoyolpataj (Is. 1:18). Yejua ika amo moneki timotayokoltijtoskej komo titajtakolchiujkej ne uejkauj (Sal. 32:​1-5). No, timotokiskej iuan Dios techpaleuia maj kuali timomachilikan porin tikyolpaktiaj Jehová (Prov. 23:15). Xa tejuatsin tikonelnamiki okseki taman tein kuali tein tikonseliani porin kuali tionmouika iuan Dios. Axkan maj tikitakan toni moneki tikchiuaskej para okachi timotokiskej iuan.

TEIN MONEKI TIKCHIUASKEJ PARA OKACHI TIMOUIKASKEJ IUAN DIOS

12. ¿Toni uelis tikchiuaskej para okachi timouikaskej iuan Dios?

¹² Achto ke timoauiskiaj kemej itaixpantijkauan Jehová tikchiujkej miak taman para kuali timouikaskej iuan Dios. Timomachtijkej tein melauak de Jehová uan Jesús, timoyolpatakej uan amo titajtakolchiujkejok, tiknextijkej ke titakuaujtamatiaj iuan Jehová uan timochikaujkej tiktakamatiskej. Nochi nejin kinextia ke kuali timouikajya iuan Jehová. Sayoj ke moneki tiksentokaskej tikchiuaskej nochi nejin komo tiknekij okachi timouikaskej iuan Dios (Col. 2:6).

13. ¿Toni eyi taman techpaleuis maj okachi timouikakan iuan Jehová?

¹³ ¿Toni uelis tikchiuaskej para okachi timouikaskej iuan Jehová? 1) Moneki tiksentokaskej tikleroskej uan timomachtiskej Biblia. Uan keman tikchiuaskej nejin, maj amo sayoj timomachtikan tein amo ouij. No moneki timochikauaskej tikmatiskej keniuj tanemilia Dios uan toni kineki maj tikchiuakan uan maj tinemikan ijkon kemej yejua kineki (Efes. 5:​15-17). 2) Moneki okachi titakuaujtamatiskej, uan uelis tikchiuaskej nejin komo itech titanemiliaj nochi tein Jehová kichiuani tein ika kinextiani ke techtasojta. 3) Moneki maj tiksentokakan tikixtopeuakan nochi tein Jehová amo kiuelita uan maj amo timouikakan iniuan akin kichiuaj tein amo kuali (Sal. 1:1; 101:3).

14. ¿Toni moneki tikchiuaskej mojmostaj para tikyolpaktiskej Jehová? (1 Corintios 10:31; no xikonita taixkopimej).

¹⁴ (Xikonlero 1 Corintios 10:31). Semi moneki maj tikchiuakan tein kiyolpaktia Jehová. Amo sayoj moneki tiaskej titanojnotsatiuij oso tiaskej nechikolmej. Ta no tein tikchiuaskej mojmostaj moneki maj kiyolpakti Jehová. Yejua kiyolpaktia maj amo titakajkayauakan uan maj tikinuantikan oksekin tein tikpiaj (2 Cor. 8:21; 9:7). No kineki maj tiknextikan ke tikpatiuitaj tonemilis tein techtayokolij. Uan ijkon tikchiuaj keman amo titeltakuaj nion titeltatayij uan tikchiuaj seki taman tein techpaleuis maj amo niman tikokolispeuakan. Komo Jehová kiita ke timochikauaj tikchiuaskej nochi tein kiyolpaktia yejua okachi techtasojtas (Luc. 16:10).

15. ¿Keniuj kineki Jehová maj timouikakan iniuan oksekin?

¹⁵ Jehová yolkuali iniuan akin kitekitiliaj uan akin amo (Mat. 5:45). Uan yejua kineki maj no ijkon tikchiuakan iniuan oksekin. Dios kineki maj itekitikauan “amo akin kijijtokan”, “maj amo tateuikan” “uan maj nochipa yolnejmachmej iniuan nochin” (Tito 3:2). Uan maski miakej amo kineltokaj Jehová, amo tiknemiliaj ke okachi tiueyichiuanimej ke yejuan (2 Tim. 2:​23-25). Komo nochipa tiyolkualmej iniuan oksekin, okachi timouikaskej iuan Jehová.

NO UELIS TIMOUIKASKEJ IUAN DIOS MASKI TIKNEKISKEJ TIMOSENKAUASKEJ

16. ¿Keniuj peuak momachilia akin kijkuiloj Salmo 73?

¹⁶ ¿Uan toni uelis tikchiuaskej komo tikmachiliaj ke Jehová amo touan yetokok porin timopolojkej? Maj tikelnamikikan tein kipanok akin kijkuiloj Salmo 73. Yejua kijtoj: “Nejua yaya niati itech okse ojti, kemej yeskia yaya niuetsiti” (Sal. 73:2). Yejua kiajsikamatik ke kualantoya, ke amo kuatamatia uan ke iixpan Jehová katka kemej se tapial tein amo tanemilia (Sal. 73:​21, 22). Hasta kinemilij ke amo kinamikia maj Jehová kitasojtani porin katka tajtakolej uan mopolouaya.

17. 1) ¿Toni xa kichiuak salmista keman tel amo kuali momachiliaya? 2) ¿Toni technextilia tein kipanok? (No xikonita taixkopimej).

¹⁷ Komo salmista kinemiliaya ke Jehová kisenkaujkaya, nejon tein kimachiliaya niman panok. Maski tel amo kuali momachiliaya, yejua kimatia ke monekia motokis iuan Jehová. Tikmatij nejin porin yejua kijtoj: “Sayoj ke axkan, nochipa nitakuaujtamati mouan; tikitskijtok noyekmay. Tein tinechyolmajxitia nechixyekana, uan satepan tinechueyitalis” (Sal. 73:​23, 24). Keman tikmachiliskej ke amo semi titakuaujtamatijok oso timosenkauasnekij porin timopolouaj, no moneki maj tiktajtanikan Jehová maj techpaleui (Sal. 73:26; 94:18). Uan maski titeltajtakolchiuaskej uelisok timokepaskej iuan Jehová uan tikyekmatij ke yejua techtapojpoluis (Sal. 86:5). Uan keman tel amo kuali timomachiliskej okachi moneki timotokiskej iuan Dios (Sal. 103:​13, 14).

MAJ TIMOUIKAKAN IUAN JEHOVÁ NOCHIPAYA

18. ¿Keyej uelis tiksentokaskej timouikaskej iuan Jehová nochipaya?

¹⁸ Uelis tiksentokaskej timouikaskej iuan Jehová nochipaya. Biblia kijtoua ke Jehová kimati miak taman, semi tamattok uan tein kichiua amo nochi ueli se kimati (Rom. 11:33). Yejua ika nochipaya uelis timomachtiskej miak taman de Jehová.

19. ¿Toni techmatiltiaj nejin Salmos?

¹⁹ Salmo 79:13 kijtoua: “Tejuan akin tipouij itech moxolal uan ichkamej akin tikintamaka; timitstasojkamatiliskej nochipaya, uan timitsueyitaliskej tejuan uan tokoneuan akin yoltiaskej”. Tejuatsin uelis tikonneltokas ke komo tikonsentoka tionmouika iuan Jehová, yejua mitsonmakas miak taman tein kuali uan no uelis tikonijtos nejin: “Dios nechyolchikaua uan yejua yeski noaxka nochipaya” (Sal. 73:26).