Telpoch, xikchiua kemej Marcos uan Timoteo

1, 2. ¿Toni ueliskia kintsakuilis Marcos uan Timoteo maj okachi kitekitilikan Jehová?

KOMO titelpoch xa okachi tikneki tiktekitilis Jehová uan titapaleuis itech nechikol. Techyolpaktia tikitaskej keniuj tel miakej telpochmej kinekij kinpaleuiskej oksekin (Sal. 110:3). Sayoj ke kemansa xa ouij tikchiuas nejin. Xa amo tiknekis okachi tiktekitilis Jehová porin amo tikmati keniuj tinemis oso kani kinekis Jehová xitapaleuiti. Oso xa amo tikselij se tekit porin tiknemiliaya ke amo ueliskia tikchiuas. Amo ximotekipacho, miakej ijkon momachilianij.

² Marcos uan Timoteo no ijkon momachiliayaj, sayoj ke maski amo kimatiaj keniuj nemiskiaj oso kinemiliayaj ke amo ueliskiaj kichiuaskej nejon tekit, kiixtalijkej okachi kitekitiliskej Jehová. Xa keman tatitanil Pablo uan Bernabé kiyoleujkej Marcos maj iniuan yani, yejua nemia iuan imomaj itech se kali kuakualtsin (Hech. 12:​12, 13, 25). Sayoj ke Marcos kikauak ichan para okachi kitekitilis Jehová. Yekinika yajki Antioquía uan satepan yajki iniuan Pablo uan Bernabé kampa okachi uejka (Hech. 13:​1-5). No ijkon, Timoteo xa nemia iniuan itatuan keman Pablo kiyoleuak maj iuan tanojnotsati. Timoteo xa kinemiliaya ke semi telpoch katka uan amo ueliskia kichiuas nejon tekit (no xikita 1 Corintios 16:​10, 11 uan 1 Timoteo 4:12). Sayoj ke kiixtalij yas iuan Pablo uan semi yolpakik keman kitekitilijtoya Jehová (Hech. 16:​3-5).

3. 1) ¿Keniuj tikmatij ke Pablo semi kintasojtaya Marcos uan Timoteo? (2 Timoteo 4:​6, 9, 11; no xikita taixkopimej). 2) ¿Toni netajtanilmej tiknankiliskej itech nejin tamachtilis?

³ Keman katkaj telpochmejok, Marcos uan Timoteo momachtijkej kichiuaskej tataman tekimej itech nechikol. Pablo semi kintasojtaya, yejua ika keman kimatik ke yaya kimiktitij kiniluij maj yakan kiitatij (xiklero 2 Timoteo 4:​6, 9, 11). ¿Keyej Pablo kintasojtaya Marcos uan Timoteo? ¿Keniuj tokniuan telpochmej uelis kichiuaskej kemej yejuan? ¿Uan toni tein tayolmajxitia Pablo uelis kinpaleuis?

XIMOTEMAKA TIKINPALEUIS OKSEKIN KEMEJ KICHIUAK MARCOS

4, 5. ¿Keniuj kinextij Marcos ke kinekia kinpaleuis oksekin?

⁴ Se amaix kijtoua ke timotemakaskej tikinpaleuiskej oksekin kijtosneki ke maj ijkon tikchiuakan uan maj tiksentokakan maski kemansa ouij techkisas. Yejua nejon tein kichiuak Marcos. Keman Pablo amo kinekik kiuikas keman ojpa yajka takalpanoto okseko, Marcos xa amo kuali momachilij uan semi moyolkokoj (Hech. 15:​37, 38). Sayoj ke nejon amo kitsakuilij maj kinpaleui tokniuan.

⁵ Marcos yajki iuan iprimo Bernabé tapaleuito okseko. Uan 11 xiujmej satepan keman Pablo tsaktoya Roma, Marcos ompa yetoya para kipaleuis (Filem. 23, 24). Pablo semi kitasojkamatiliaya Marcos tein kichiujka, yejua ika hasta kijtoj: ‘Semi nechpaleuiani uan nechyolchikauani’ (Col. 4:​10, 11).

6. ¿Keniuj kipaleuij Marcos maj iniuan tekitini akin kuali kitekitiliayaj Jehová? (Xikita nota).

⁶ Se taman tein semi kipaleuij Marcos yejua ke tekitik iniuan tokniuan akin kuali kitekitiliayaj Jehová. Satepan ke yetoya Roma iuan Pablo, Marcos yajki iuan Pedro akin yetoya Babilonia. Tel kuali mouikakej uan Pedro hasta kiluiaya “nokonetsin” (1 Ped. 5:13). Xa keman sentekitiaj, Pedro kitapouij keniuj nemik uan tanojnotsak Jesús, uan satepan Marcos kijkuiloj nejon itech amatajkuilol tein kipia itokay.a

7. ¿Keniuj se tokniuj telpoch kichiuak kemej Marcos? (No xikita taixkopin).

⁷ Marcos semi kitekitiliaya Jehová uan no mouikaya iniuan tokniuan akin kuali kitekitiliayaj Dios. ¿Keniuj uelis tikchiuas kemej Marcos? Komo tikixtaliani tikselis se tekit itech nechikol sayoj ke ayamo tikseliani, amo xiyolijsiui uan xiktemo keniuj okachi tiktekitilis Jehová uan tikinpaleuis tokniuan. Xikita tein kipanok Seung-Woo akin axkan tayekankej. Keman okachi telpoch katka, kiitaya tein oksekin telpochmej ueliaj kichiuayaj. Keman kiitaya ke yejuan kiseliayaj tekimej itech nechikol uan yejua amo, kinemiliaya ke tayekananij amo kiitayaj tein kichiuaya. Yejua motelyolkokoj uan kiniluij tayekananij keniuj momachiliaya, uan semej kiyolmajxitij maj mochikaua okachi kinpaleuis oksekin maski amo nochin kiitaskiaj tein kichiuaskia. Seung-Woo kichiuak tein kiyolmajxitijkej uan peuak kinpaleuia tokniuan akin xiuejkejya uan no akin monekia maj kinpaleuikan para yaskej nechikolmej. Keman itech tanemilia tein panok, yejua kijtoua: “Nikajsikamatik toni yekmelauj kijtosneki se kinpaleuis oksekin uan nikitak ke nejon semi nechyolpaktiaya”.

ININKA XIMOTEKIPACHO OKSEKIN KEMEJ KICHIUAK TIMOTEO

8. ¿Keyej Pablo kiixpejpenak Timoteo maj iuan yajtinemi? (Filipenses 2:​19-22).

⁸ Keman Pablo oksepa mokepak kampa kiixnamikiaj, monekia maj iuan yanij tokniuan akin semi yolchikaujkej. Yekinika kiixpejpenak se tokniuj akin monotsaya Silas, akin uejkaujya kitekitiliaya Jehová (Hech. 15:​22, 40). Uan satepan no kiixpejpenak Timoteo. ¿Keyej Pablo kiixpejpenak nejin telpoch? Porin tokniuan akin kuali kiixmatiaj kuali ika tajtouayaj (Hech. 16:​1, 2). Uan no porin Pablo kimatia ke Timoteo ininka motekipachouaya oksekin (xiklero Filipenses 2:​19-22).

9. ¿Keniuj kinextij Timoteo ke ininka motekipachouaya tokniuan?

⁹ Niman keman Timoteo peuak tekiti iuan Pablo, kinextij ke semi ininka motekipachouaya oksekin uan amo sayoj itech tanemiliaya. Yejua ika keman Pablo yajki de Berea kimatia ke Timoteo kinyekpiaskia tokniuan akin ompa nemiaj akin yekin peujkaj kitojtokaj Jesús (Hech. 17:​13, 14). Itech nejon tonalmej Silas semi kimachtij Timoteo porin no mokaujka Berea. Sayoj ke satepan, Pablo kititanik iselti Timoteo ompa Tesalónica para maj kinyolchikauati tokniuan (1 Tes. 3:2). Itech nejon 15 xiujmej tein panok, Timoteo okachi kintasojtak tokniuan uan hasta chokaya iniuan akin chokayaj (Rom. 12:15; 2 Tim. 1:4). ¿Keniuj tokniuan telpochmej uelis kichiuaskej kemej Timoteo?

10. ¿Keniuj se tokniuj takat kitemoj ininka motekipachos oksekin?

¹⁰ Se tokniuj akin monotsa Woo Jae kitemoj keniuj ininka motekipachos oksekin. Keman katka telpoch kiouijmakaya tajtos iniuan tokniuan akin xiuejkejya, yejua ika keman kinitaya itech nechikolmej sayoj kintajpalouaya uan amo kinnojnotsaya. Se tokniuj tayekankej kitemoj keniuj kipaleuis para maj okachi kinnojnotsa tokniuan. Yejua ika kiyolmajxitij maj kiniluiani tokniuan toni tein kichiuayaj kiuelitaya. No kiluij maj kinemiliani toni ueliskia kinyolnotsas tokniuan. Woo Jae kichiuak tein kiyolmajxitijkej uan axkan tayekankej. Yejua kijtoua: “Axkan amo nechouijmaka nitajtos iniuan akin tataman xiujmej kipiaj, uan niyolpaki porin okachi nikajsikamati ouijkayomej tein kipanouaj oksekin. Nejon nechpaleuia maj ueli nikita toni kinpoloua tokniuan uan keniuj uelis nikinpaleuis”.

11. ¿Keniuj telpochmej uelis okachi motekipachoskej ininka tokniuan itech nechikol? (No xikita taixkopin).

¹¹ Telpoch, tejua no uelis tiktemos keniuj ininka timotekipachos oksekin. Itech nechikol xikintajpalo nochin, hasta akin xiuejkejya. Xikintajtani keniuj yetokej uan kuali xikaki tein mitsnankiliskej. Nejon mitspaleuis xikmati keniuj uelis tikinpaleuis. Xa tikmatis ke se tokniuj uan isiuatsin akin xiuejkejya moneki maj kinnextilikan keniuj kikuiskej JW Library^® oso maj aksa iniuan youi tanojnotsati. ¿Ueliskia tikinpaleuis maj kimatikan keniuj kikuiskej ininteléfono oso iniuan tias titanojnotsatiuj? Komo tikinpaleuia tokniuan, oksekin kiitaskej tein tikchiujtok uan no ijkon kinekiskej kichiuaskej.

TEIN PABLO TAYOLMAJXITIJ UELIS MITSPALEUIS

12. ¿Keniuj uelis kinpaleuis telpochmej tein Pablo kiyolmajxitij Timoteo?

¹² Pablo kitasojtaya Timoteo kemej yeskia ikonetsin, yejua ika kiyolmajxitij para maj yolpaki uan maj kuali kitekitili Dios (1 Tim. 1:18; 2 Tim. 4:5). ¿Toni uelis tikchiuas para maj mitspaleui tein Pablo tayolmajxitij? Xiklero ome amatajkuilolmej tein Pablo kijkuilouilij Timoteo uan xiknemili kemej yeskia tejua mitsijkuilouilij, uan no xikita keniuj uelis tikchiuas tein tayolmajxitia. Maj tikitakan seki taman.

13. ¿Toni mitspaleuis amo xikaua Jehová?

¹³ “Ximochikaua tikueyichiuas Dios ika nochi moyolo” (1 Tim. 4:7b). Tikueyichiuaskej Dios ika nochi toyolo, kijtosneki amo keman tikauaskej Jehová uan tiknejnekiskej tikchiuaskej tein yejua kiuelita. Sayoj ke kemansa ouij techkisa tiktasojtaskej Dios uan amo tikauaskej, ¿keyej? Porin amo timomattokej ijkon tikchiuaskej ¿Uan keniuj uelis tiktasojtaskej? Pablo kijtoj: “Ximochikaua”. Itech griego nejin tajtol kikuiaj para kiteajsikamatiltiskej ke se aksa akin motatania, monekia mochikauas momamachtis para tatanis. Yejuan monekia sayoj tanemiliskej itech tein kinekiaj kichiuaskej uan amo itech okseki taman. Tejuan no moneki ijkon tikchiuaskej para okachi kuali timouikaskej iuan Jehová.

14. ¿Keyej tikixtaliaj tikleroskej Biblia uan keniuj uelis tikchiuaskej?

¹⁴ Semi moneki maj tikixtalikan tikleroskej Biblia mojmostaj. Uan keman tikleroskej maj tikelnamikikan ke tiknekij okachi kuali timouikaskej iuan Jehová. Maj tikitakan keniuj uelis tikchiuaskej nejin. Xiknemili ke tiklerojtok tein panok keman Jesús tajtoj iuan se telpoch akin katka taixyekankej uan tominpixkej (Mar. 10:​17-22). Nejin telpoch kimatia ke Jesús katka Mesías sayoj ke amo semi takuaujtamatia, yejua ika amo kiixtalij kitojtokas. Maski ijkon, Biblia kijtoua ke Jesús kitasojtak. Xa timotajtania keyej Jesús tel kualtsin kinojnotsak nejin telpoch. Ijkon kichiuak porin kinekia kipaleuis maj yolpakini porin kitekitiliskia Jehová. ¿Toni mitsmachtia nejin de Jehová? Ke ijkon kemej Jesús kitasojtak telpoch, no ijkon Jehová kitasojtaya nejon telpoch (Juan 14:9). Uan no, keman titanemilis itech tein kipanok nejin telpoch uan itech tein tejua tikpanotok, ximotajtani: “¿Toni moneki nikchiuas para okachi kuali nimouikas iuan Jehová uan para okachi nikinpaleuis oksekin?”.

15. ¿Keyej telpochmej moneki kuali kiitaskej toni kichiuaj? (1 Timoteo 4:​12, 13).

¹⁵ “Xikinnextili akin takuaujtamatij iuan Dios maj kichiuakan kemej tejua” (xiklero 1 Timoteo 4:​12, 13). Pablo kiluij Timoteo ke monekia momachtis keniuj kuali taleros uan tamachtis. Sayoj ke no kiluij ke monekia tetasojtas, takuaujtamatis uan chipaujkanemis. ¿Keyej? Porin okachi tapaleuia tein tikchiuaj ke tein tikijtouaj. Xiknemili ke itech nechikol moneki titamachtis keniuj okachi titanojnotsaskej. Amo tipinauas ika titajtos nejin komo nochipa timochikaua titanojnotsas. Uan tokniuan okachi kichiuaskej tein tikinmachtia porin kiitaskej ke tejua no ijkon tikchiua (1 Tim. 3:13).

16. 1) ¿Toni makuil taman moneki kichiuas se telpoch para maj oksekin no kichiuakan kemej yejua? 2) ¿Keniuj se telpoch moneki tajtos uan ijkon oksekin no kichiuaskej kemej yejua?

¹⁶ Itech 1 Timoteo 4:​12, Pablo kijtoj makuil taman tein se telpoch moneki kichiuas para maj oksekin kichiuakan ijkon kemej yejua. Semi mitspaleuis komo tikxeloua tiempo uan timomachtia sejse. Xa tiknekis okachi kuali tikchiuas tein yekinika kijtoua, “keniuj titajtoua”. Xiknemili toni uelis tikijtos para tikinyolchikauas oksekin. Komo tinemi iniuan motatuan, ¿uelis okachi tikintasojkamatilis porin kichiuanij miak taman para mitspaleuiskej? Uan itech nechikolmej keman titanankilis, ¿uelis timochikauas okachi kuali tikijtos tein tikajsikamatik uan amo sayoj tikleros? Uan keman tamis nechikol, ¿uelis tikiluis se tokniuj toni tein tamachtij tikuelitak? Komo timochikaua okachi kuali titajtos, oksekin kiitaskej keniuj okachi kuali tiktekitilijtok Jehová (1 Tim. 4:15).

17. ¿Toni kipaleuis se telpoch maj kichiua tein kinemilijtok? (2 Timoteo 2:22).

¹⁷ “Amo xikchiua tein kinejnekij telpochmej uan ichpochmej uan ximochikaua tikchiuas tein kuali yetok” (xiklero 2 Timoteo 2:22). Pablo kiluij Timoteo maj kiixtopeua nochi taman tein ueliskia kichiuas maj amo kitekitiliok Jehová uan maj amo kuali iuan mouikaok. Xa tikitas ke tikchiujtok seki taman para okachi timoixpetanis uan amo tikpiaok tiempo para okachi tiktekitilis Jehová. Xikita kanachi tiempo tikuitok para timauiltis, tikuis internet oso timauiltis ika videojuegos. ¿Ueliskia tikuis nejon tiempo para okachi tiktekitilis Jehová uan tikinpaleuis tokniuan? Xa uelis titapaleuis kampa timonechikoua maj moyektali Kali kampa tiMosentiliaj oso titanojnotsas itech carritos. Nejon mitspaleuis okachi xiktekitili Jehová uan no ueli xikchiua tein tiknemilijtok.

SEMI TIYOLPAKIS KOMO TIKINPALEUIA OKSEKIN

18. ¿Keniuj Jehová kintatiochiuij Marcos uan Timoteo?

¹⁸ Marcos uan Timoteo monekik kikauaskej miak taman para kinpaleuiskej oksekin uan Jehová semi kintatiochiuij uan semi yolpakkej (Hech. 20:35). Marcos yajtinemik uejka para kinpaleuis tokniuan. Uan no kijkuiloj miak taman tein Jesús kichiuak uan kemej tanojnotsak. Timoteo kipaleuij Pablo keman mochiujkej yankuik nechikolmej uan no kinyolchikaujkej tokniuan. Jehová kiitak tein Marcos uan Timoteo kichiujkej para okachi kitekitiliskej uan nejon semi kiyolpaktij.

19. ¿Keyej telpochmej moneki maj kichiuakan tein Pablo tayolmajxitij uan keniuj nemiskej komo ijkon kichiuaj?

¹⁹ Itech cartas tein Pablo kijkuilouilij Timoteo ueli tikitaj ke semi kitasojtaya. Sayoj ke Jehová kimatiltij Pablo toni monekia kijkuilos itech nejon cartas. Yejua ika, tein ompa tiklerouaj kinextia keniuj Jehová namechtasojta namejuan nantelpochmej. Yejua kineki xiyolpaki porin tiktekitilia. Yejua ika semi moneki xikchiua tein Pablo tayolmajxitij uan xiknejneki okachi tikinpaleuis tokniuan. Komo ijkon tikchiua semi tiyolpakis axkan, uan satepan ‘yekmelauj kuali tinemis’ (1 Tim. 6:​18, 19).