Jehová mitsonyolseuia

1. ¿Keniuj momachiliayaj judíos akin kinuikakej Babilonia?

MAJ ininka titanemilikan judíos akin kinuikakej Babilonia. ¿Keniuj momachilijkej keman kiitakej ke kiixpolojkej Jerusalén kampa achto nemiaj? Miak xiujmej, judíos miakpa amo kitakamatkej Jehová, yejua ika kikauak maj babilonios kiixpolouanij Jerusalén uan maj kinuikanij Babilonia, ¿keniuj momachiliayaj ompa? (2 Crón. 36:​15, 16, 20, 21). Ompa Babilonia ueliaj nemiaj kemej oksekin (Jer. 29:​4-7). Sayoj ke no katka ouij porin xa amo kinekiaj ompa nemiskej. Uan semej de yejuan kijtoj nejin: “Timotalijkej tanakastan den uejueyi amej ompa Babilonia uan timochoktijkej keman tikelnamikkej Sion” (Sal. 137:1). Judíos monekia maj kinyolseuikan, sayoj ke, ¿akoni kichiuaskia?

2, 3. 1) ¿Keniuj Jehová kinpaleuij judíos akin kinuikakej okseko? 2) ¿Toni tikitaskej itech nejin tamachtilis?

² Jehová yejua “Dios akin nochipa teyolseuia” (2 Cor. 1:3). Kintasojta akin kitekitiliaj uan kineki kinyolseuis. Jehová kimatia ke keman yetoskiaj Babilonia sekin judíos moyolpataskiaj uan oksepa kiueyichiuaskiaj kemej yejua kiyolpaktia (Is. 59:20). Yejua ika kemej 100 xiujmej achto ke judíos kinuikaskiaj Babilonia, Jehová kichiuak maj tanauatijkej Isaías kijkuilouani amatajkuilol tein kipia itokay. ¿Keniuj kinpaleuiskia amatajkuilol Isaías? Nejin tanauatijkej kijkuiloj: “‘Xikyolseuikan, xikyolseuikan noxolal’, kijtoua namoDios” (Is. 40:1). Jehová kikuik amatajkuilol Isaías para kinyolseuis judíos akin kinuikakej Babilonia.

³ Kemansa tejuan no moneki maj techyolseuikan. Itech nejin tamachtilis tikitaskej eyi taman tein Jehová kichiuak para kinyolseuis judíos: 1) Jehová motenkauak ke kintapojpoluiskia akin moyolpataskiaj, 2) kiniluij itekitikauan ke ueliskia kichiaskej tein kuali uan 3) kinpaleuij maj amo momoujtikan. No tikitaskej keniuj Jehová ijkon techyolseuia axkan.

JEHOVÁ TEIKNELIA UAN TETAPOJPOLUIA

4. ¿Keniuj kinextij Jehová ne uejkauj ke teiknelia? (Isaías 55:7).

⁴ Jehová yejua “toTajtsin akin semi teiknelia” (2 Cor. 1:3). Uan kinextij keman motenkauak iniuan judíos ke kintapojpoluiskia komo moyolpatayaj (xikonlero Isaías 55:7). Yejua kijtoj: “Kemej nochipa nitetasojta, nimitsiknelis” (Is. 54:8). Maski judíos monekik nemiskej miak xiujmej ompa Babilonia porin amo tatakamatkej, Jehová kiniluij ke amo nochipa ompa nemiskiaj (Is. 40:2). Nejin xa semi kinyolseuij judíos akin moyolpatakaj uan kinekiaj kiyolpaktiskej.

5. ¿Keyej tejuan okachi tikneltokaj ke Jehová techtapojpoluia?

⁵ ¿Toni techmachtia? Ke Jehová senkis kineki kintapojpoluis itekitikauan. Judíos akin kinuikakej Babilonia ipa kimatiaj nejin, sayoj ke axkan tejuan okachi uelis tikneltokaskej ke Jehová techtapojpoluia. ¿Keyej? Porin tikmatij nochi tein kichiuani para uelis techtapojpoluis. Miak xiujmej satepan ke Isaías kijtoj ke Jehová techtapojpoluia, toTajtsin kiualtitanik iKonetsin nikan taltikpak para maj motemaktiani ininka nochin akin moyolpataj. Jehová ueli senkis techtapojpoluilia totajtakoluan porin Jesús toka motemaktij (Hech. 3:19; Is. 1:18; Efes. 1:7). ¡Jehová yekmelauj tetapojpoluia!

6. ¿Keyej moneki maj itech titanemilikan keniuj techiknelia Jehová? (No xikonita taixkopimej).

⁶ Tein Jehová kiniluij judíos itech Isaías 55:​7, no uelis semi techyolseuis komo kisentoka techyolkokoua tein amo kuali tein tikchiujkej maski timoyolpatakejya. Sekin kinyolkokouaok tein kichiujkej uan okachiok komo kisentokaj tajyouijtokej. Sayoj ke komo tikintapouijkejya tayekananij uan amo tikchiuajok, uelis senkis tikneltokaskej ke Jehová techtapojpoluijya. Keman yejua techtapojpoluia, kiixtalia amo oksepa techelnamikilis (no xikonita Jeremías 31:34). Komo Jehová amo itech tanemiliaok tein tikchiujkej, tejuan amo no moneki itech titanemiliskejok. Jehová kiita tein tikchiuaj axkan uan amo tein amo kuali tein achto tikchiujkaj (Ezeq. 33:​14-16). Uan maj tikelnamikikan ke amo uejkaua toTajtsin akin semi teiknelia kichiuas maj amo titajyouikanok ika tajtakol tein tikchiujkej.

7. ¿Toni techpaleuis maj tikiniluikan tayekananij komo titajtakolchiujkej?

⁷ ¿Uan toni uelis tikchiuaskej komo timoyolkokojtokej porin titajtakolchiujkej uan ayamo tikiniluiaj tayekananij? Biblia techiluia maj tikiniluikan para maj techpaleuikan (Sant. 5:​14, 15). Xa ouij yeski tikiniluiskej tein tikchiujkej, sayoj ke moneki tikelnamikiskej ke Jehová kinixtalij nejin tokniuan para maj techpaleuikan. Komo tikelnamikij ke yejuan techtasojtaj uan techikneliaj ijkon kemej Jehová kichiua, okachi tiknekiskej iniuan titajtoskej. Maj tikitakan keniuj Jehová kiiknelij uan kiyolseuij se tokniuj takat akin monotsa Arthur,a yejua semi moyolkokouaya porin kichiujka tein amo kuali. Yejua kijtoua: “Kemej se xiuit nikitstoya auilnemilis. Sayoj ke satepan ke nikakik se tanojnots, nikiluij nosiuatsin uan no nikiniluij tayekananij tein nikchiujka. Niyolseuik keman iniuan nitajtoj sayoj ke kisentokaya nechtayokoltiaya. Tayekananij nechelnamiktijkej ke Jehová amo nechixtopeuaya uan ke yejua techmelaua porin techtasojta. Tein nechiluijkej nechyolseuij uan nechpaleuij maj nikita ke Jehová yekmelauj nechtapojpoluijkaya”. Axkan Arthur tekiti kemej precursor regular uan tapaleuijkej itech nechikol. ¡Semi techyolchikaua tikmatiskej ke keman yekmelauj timoyolpataj, Jehová techtapojpoluia!

JEHOVÁ TECHILUIA KE UELIS TIKCHIASKEJ TEIN KUALI

8. 1) ¿Toni Jehová kiniluij judíos ke ueliskia kichiaskej? 2) Kemej kijtoua Isaías 40:​29-31, ¿keniuj judíos akin moyolpatakaj kinpaleuiskia tein Jehová motenkaujka?

⁸ Judíos xa kinemiliayaj ke amo keman mokepaskiaj ininchan porin babilonios amo kinkauayaj maj mokepanij ininchan akin kinuikayaj (Is. 14:17). Sayoj ke Jehová kiniluijka ke ueliskiaj kichiaskej tein kuali porin motenkauak ke kinmakixtiskia. ¡Uan nion teyi ueliskia kitsakuilis! (Is. 44:26; 55:12). Jehová kiitaya Babilonia sayoj kemej talnex (Is. 40:15). Keman se kipitsa talnex, niman potoni uan poliui. No ijkon, para Jehová amo ouij yeskia kinmakixtis itekitikauan de Babilonia. Tein Jehová motenkauak semi kinyolchikauaskia judíos, uan amo sayoj nejon porin Isaías kijkuiloj: “Akin takuaujtamatij iuan Jehová oksepa mochikauaskej” (xikonlero Isaías 40:​29-31). Yejuan tamatiskiaj kemej ‘águilas tein patanij uejkapan’ porin tein kichiayaj kinchikauaskia.

9. ¿Toni kinpaleuij judíos maj kineltokanij ke Jehová kinkixtiskia de Babilonia?

⁹ Jehová kinpaleuij judíos akin kinuikakej Babilonia maj kineltokanij ke kichiuaskia tein motenkaujka. ¿Keniuj? Maj itech titanemilikan nochi tein Jehová kijtojka ke mochiuaskia uan keniuj judíos kiitakaj ke yekmelauj mochiujka. Yejuan kimatiaj ke Asiria kinteuij majtakti uejueyi kalyetonij israelitas uan kinuikakej Babilonia (Is. 8:4). Kiitakaj keniuj babilonios kiixpolojkej Jerusalén uan kinuikakej Babilonia akin ompa nemiaj (Is. 39:​5-7). Kimatiaj ke akin tekiuajtia Babilonia kichiuak maj tekiuaj Sedequías amo tachiaok uan kiuikak Babilonia (Jer. 39:7; Ezeq. 12:​12, 13). Nochi tein Jehová kiniluijka, senkis ijkon mochiuak (Is. 42:9; 46:10). Xa nochi nejin kinpaleuij maj kineltokanij ke Jehová kinmakixtiskia ijkon kemej motenkaujka.

10. ¿Toni techpaleuis itech nejin tonalmej keman tatamitiya maj nochipa tikelnamiktokan tein tikchiaj?

¹⁰ ¿Toni techmachtia? Tein Jehová motenkaua kichiuas satepan semi techpaleuis uan techyolchikauas komo titayokoxtokej. Axkan okachi mochiua tein amo kuali uan miakej akin kiixnamikij Dios no techixnamikij tejuan, sayoj ke amo moneki timotelmoujtiskej. Jehová motenkaua ke tinemiskej nochipaya itech se xochital kampa amo teyi techpanos uan tiyolseujkanemiskej. Moneki nochipa tikelnamikiskej tein tikchiaj. Komo amo ijkon tikchiuaj, kemej yeskia tinaltachixtoskiaj itech se ventana tein pitsotik uan amo tikyekitaskiaj tein kualtsin tein moita kalampakopa. ¿Toni techpaleuis maj kemej yeskia tikchipauakan nejon ventana oso maj nochipa tikelnamiktokan tein tikchiaj? Maj tikxelokan tiempo para tiknemiliskej keniuj tel kualtsin tinemiskej itech xochital. Uelis tikleroskej tamachtilismej, tikitaskej videos uan tikakiskej nekuikatilmej tein ika tajtouaj tein tikchiaj. Uan keman tiktataujtiskej Jehová uelis tikiluiskej nochi tein tiknekij maj mochiuaya.

11. ¿Toni kipaleuia se tokniuj siuat akin motelkokoua para maj taxiko?

¹¹ Maj tikitakan tein kipanoua Joy, se tokniuj siuat akin motelkokoua. Yejua kijtoua keniuj tein Jehová motenkaua semi kiyolchikaua uan kiyolseuia, kijtoua: “Keman nikmachilia ke amo nitaxikouaok, niktataujtia Jehová uan nikiluia keniuj nimomachilia, uan nikmati ke yejua nechajsikamati. Jehová nechnankilia keman nechmaka ‘chikaualis tein noselti amo ueli nikpia’” (2 Cor. 4:7). Tokniuj no kinemilia ke yetokya itech xochital kampa amo akin kijtosok: “Nimokokoua” (Is. 33:24). Komo tejuan no tikiluiaj Jehová nochi tein tikmachiliaj uan tikelnamikij tein tikchiaj, uelis tikxikoskej ouijkayomej tein tikpiaj.

12. ¿Toni techpaleuia maj titakuaujtamatikan iuan Jehová uan itech tein motenkaujtok kichiuas? (No xikonita taixkopimej).

¹² Ijkon kemej Jehová kinpaleuij judíos, tejuan no techpaleuia maj tikneltokakan ke mochiuas tein motenkaua. Maj itech titanemilikan keniuj mochiujtokya seki taman tein moijtojka ke panoskia. Ueli tikitaj ke ueyi tekiuajyot Reino Unido uan Estados Unidos “tepitsin chikauak uan tepitsin amo”, ijkon kemej kijtojka Biblia (Dan. 2:​42, 43). No tikakij ke ‘miakkan talolini’, uan ke itech nochi taltikpak ‘tikteixmatiltijtokej kuali tanauatilmej’ (Mat. 24:​7, 14). Keman tikitaj ke mochiujtokya nejin uan okseki taman tein moijtojka ke mochiuaskia, techyolseuia uan techpaleuia maj okachi tikneltokakan ke Jehová yekmelauj kichiuas tein motenkaujtok.

JEHOVÁ TECHPALEUIA MAJ AMO TIMOUIKAN

13. 1) ¿Toni ouijkayomej kipiaskiaj judíos tepitsin achto ke kisaskiaj de Babilonia? 2) Kemej kijtoua Isaías 41:​10-13, ¿keniuj Jehová kinyolchikauak judíos akin yetoyaj Babilonia?

¹³ Jehová kinyolchikauak judíos akin kinuikakej Babilonia keman kiniluij ke kinmakixtiskia, sayoj ke no kimatia ke tajyouiskiaj achto ke kisaskiaj de ompa. Jehová kijtojka ke se tekiuaj akin semi chikauak kinixnamikiskia uan moinaxkatiliskia xolalmej tein kiyoualouayaj Babilonia uan satepan no kiteuiskia nejon xolal (Is. 41:​2-5). ¿Monekiskia momoujtiskej judíos? Miak tiempo achto ke mochiuaskia nejon, Jehová ipa kichiujkaya maj moijkuilo nejin tajtolmej tein kinyolchikauaskia: “Amo ximoui, porin nejua nietok mouan. Amo ximotekipacho, porin nejua nimoDios” (xikonlero Isaías 41:​10-13). ¿Keyej kiniluij: “Nejua nimoDios”? Amo kiniluij nejon para kinelnamiktis ke monekia kiueyichiuaskej, ta para maj amo kielkauanij ke yejua iniuan yetoskia para kinpaleuis (Sal. 118:6).

14. ¿Toni no kichiuak Jehová para maj judíos amo mouinij?

¹⁴ Jehová kinelnamiktij judíos akin yetoyaj Babilonia ke kimati miak taman uan ke ichikaualis amo keman tami, ijkon kinpaleuij maj amo mouinij. Kinnauatij maj kinitanij sitalimej uan kiniluij ke amo sayoj kinchijchiujka, ta no ke sejse kiixmatia ika itokay (Is. 40:​25-28). Komo Jehová kimati itokay sejse sitalin, kijtosneki ke sejse itekitikauj no kiixmati ika itokay. Uan komo kipiak nejon chikaualis para uelis kinchijchiuas sitalimej, no uelis kinpaleuis nochin itekitikauan. Yejua ika judíos akin yetoyaj Babilonia amo monekia mouiskej.

15. ¿Toni Jehová kiniluijka judíos maj kichiuanij keman kinkixtiskia de Babilonia?

¹⁵ Jehová no kiniluij itekitikauan toni monekia kichiuaskej keman kinkixtiskia de Babilonia. Itech se capítulo achto, amatajkuilol Isaías kijtoua tein Jehová kiniluij maj kichiuakan: “Xikalaki, noxolal, itech mocuartos tein moajsij taijtik uan ximotatsakui. Ximotati tepitsin hasta maj pano kualanyot” (Is. 26:20). Xa judíos kichiujkaj tein kinnauatijkaj keman tekiuaj Ciro moaxkatilij Babilonia. Se takat griego akin monotsaya Jenofonte kijtoj ke keman Ciro kalakik Babilonia, kinnauatij isoldados maj kinmiktianij “nochin akin kinajsiskiaj kalampa” (Ciropedia, traducción de Ana Vegas Sansalvador). Xa akin nemiaj Babilonia semi momoujtijkej, sayoj ke judíos xa momakixtijkej porin kichiujkej tein Jehová kinnauatij.

16. ¿Keyej amo moneki tikmouiliskej tein mochiuas itech tetsaujkatajyouilis? (No xikonita taixkopin).

¹⁶ ¿Toni techmachtia? Amo uejkaua mochiuas tetsaujkatajyouilis uan tel fiero yeski para nochin. Keman peuas, miakej amo kimatiskej toni kichiuaskej uan motelmoujtiskej. Sayoj ke tejuan amo timouiskej porin tikmatij ke Jehová yejua toDios. Tejuan tiyeskij tiyolchikaujkej porin tikmattoskej ke ‘ejkotokya tonal keman Dios techmakixtis’ (Luc. 21:28). Uan keman Gog oso akin taixyekanaj nikan taltikpak techixnamikiskej, tejuan tiksentokaskej titakuaujtamatiskej iuan Jehová (Ezeq. 38:18). Yejua techpaleuis ika iangeluan uan techiluis toni moneki tikchiuaskej para maj amo timikikan. ¿Keniuj techiluis? Ayamo tikmatij. Xa techiluiskej itech nechikol, nejin xa yeskij “cuartos” kampa timopaleuiskej. ¿Toni moneki tikchiujtoskej axkan achto ke peuas tetsaujkatajyouilis? Moneki kuali timouikaskej iniuan tokniuan, tiktakamatiskej tein technauatia inechikol Jehová uan tikneltokaskej ke yejua akin kiixyekantok (Heb. 10:​24, 25; 13:17).

17. ¿Toni uelis tikonchiuas para maj Jehová mitsonyolseui?

¹⁷ Maski judíos akin nemiaj Babilonia kipiayaj ouijkayomej, Jehová nochipa kinyolseuij keman monekia, uan no ijkon kichiuas touan. Yejua ika maski tein yeski taman mitsonpanotos xikonsentoka xikontemo maj Jehová mitsonyolseui. Xikonneltoka ke kintapojpoluia itekitikauan akin amo kikauaj uan moka motekipachoua. Nochipa itech xiontanemili tein tikonchia. Uan amo xikonelkaua ke Jehová yejua moDios uan amo moneki tionmouis.