KAMPA TECHTAPOUIAJ ININNEMILIS
ToUeyi Tamachtijkauj nochipa techmachtiani miak taman
NOSIUATSIN uan nejua techpanok miak taman keman tikatkaj misioneros uan precursores, miakpa soldados techtsakuilijkej, kemansa oksekin kitikuiltiayaj miak taman para maj amo akin panouani itech carretera, kampa tietoyaj chikauak kiouaejekaya, peuayaj moteuiayaj itech altepet uan kemansa monekia ticholoskej uan tiaskej okseko. Maski tikpianij miak ouijkayomej, semi tiyolpakij ika tein tikixtalianij tikchiuaskej. Jehová nochipa techpaleuiani uan techtatiochiuiani, uan no techmachtiani miak taman porin yejua toUeyi Tamachtijkauj (Job 36:22; Is. 30:20).
TEIN KICHIUJKEJ NOTATUAN NECHMACHTIJ MIAK TAMAN
Itech xiuit 1957, notatuan kiskej de Italia uan yajkej nemitoj Canadá, itech se xolaltsin tein monotsa Kindersley, de Saskatchewan. Tepitsin satepan peuak momachtiaj Biblia uan peuak tiktayekanaltiaj tiktekitiliskej Jehová. Nikelnamiki ke keman katka nipiliok, nochipa niaya nitanojnotsati iniuan nochankauan. Yejua ika kemansa nikijtoua ke keman nikpiaya chikueyi xiuit nitapaleuiayaya kemej precursor auxiliar.
Iniuan nochankauan kemej itech xiuit 1966.
Maski notatuan amo kipiayaj tomin kichiujkej seki taman para kiueyichiuaskej Jehová. Itech xiuit 1963 yaya mochiuati se ueyi nechikol kampa mosentiliskiaj akin ualeuayaj itech tataman altepemej ompa Pasadena (California, Estados Unidos). Notatuan kinekiaj yaskej, yejua ika kinamakakej miak taman tein kipiayaj. Itech xiuit 1972 notatuan kiixtalijkej maj tinemitij itech se xolaltsin tein monotsa Trail, de Columbia Británica (Canadá) para tikinnojnotsaskej akin tajtouaj italiano. Nejon xolaltsin uejka yetoya de kampa tinemiaj achto. Nopaj tachipauaya uan kiyekchijchiuaya seki taman tein uejueliuia kampa tekitia, uan amo kinekik kiselis okseki tekimej kampa kitaniskia okachi tomin porin kinekia okachi kitekitilis Jehová.
Semi nikintasojkamatilia notatuan porin tein kichiujkej semi nechpaleuij nejua uan eyi nokniuan. Tein kichiujkej nechpaleuij maj peua niktekitili Jehová, uan maj amo keman nikelkaua ke komo niktayekanaltia niktekitilis yejua nochipa nechyekpias (Mat. 6:33).
PEUAK NIKTEKITILIA JEHOVÁ MIAK TONALMEJ
Itech xiuit 1980 nimonamiktij iuan Debbie, se tokniuj tel kuakualtsin akin kinekia okachi kitekitilis Jehová. Tiomen tiknekiaj tiktekitiliskej Jehová miak tonalmej, yejua ika keman panok eyi metsti ke timonamiktijkej Debbie mochiuak precursora. Se xiuit satepan tiajkej titapaleuitoj itech se nechikol kampa monekiaj tanojnotsanij uan nejua no nimochiuak precursor.
Keman timonamiktijkej itech xiuit 1980.
Satepan peuak amo tiyolpakijok uan tiknekiaj tiaskej okseko. Sayoj ke achto tiknojnotskej tokniuj takalpanojkej uan yejua amo techajuak, ta techyekiluij nejin: “Namejuansan namotajyouiltijtokej porin sayoj nankitstokej ouijkayomej tein nankipiaj oso tein amo nankiuelitaj. Komo itech nantanemiliaj tein kuali, ipa onkas miak taman”. Monekia maj aksa techilui nejon (Sal. 141:5). Niman tikchiujkej tein techiluij uan tikitakej ke onkaya miak taman tein kualtsin. Miakej itech nechikol, konemej uan tokniuan siuamej akin inintakauj amo momachtiayaj kinekiaj okachi kitekitiliskej Jehová. Nejin techmachtij se taman tein motelneki, ke moneki sayoj tiknemiliskej tein kuali uan titakuaujtamatiskej ke sayoj Jehová techpaleuis maj tikxikokan ouijkayomej (Miq. 7:7). Satepan oksepa peuak tiyolpakij uan kuali timomachiliayaj.
Keman tikpiakej tamachtilis tein kiseliaj precursores techmachtijkej naui tokniuan, eyin tapaleuijkaj itech okseki altepemej. Keman technextilijkej taixkopimej uan techtapouijkej ouijkayomej tein kipiakej, uan keniuj Jehová kintatiochiuij keman tapaleuiayaj itech nejon altepemej, techpaleuij maj no tiknekikan timochiuaskej misioneros. Yejua ika tikixtalijkej ijkon titapaleuiskej.
Itech se Kali kampa tiMosentiliaj ompa Columbia Británica, itech xiuit 1983.
Para ueliskia tikchiuaskiaj tein tikixtalijkaj, itech xiuit 1984 tiajkej tinemitoj Quebec, tein yetoya panoua naui mil kilómetros de Columbia Británica. Ompa tajtouaj francés, yejua ika monekik timomachtiskej inintajtol uan timomatiskej kemej yejuan nemij. No titajyouijkej porin miakpa amo techajsia tomin, uan se tiempo sayoj tikuajtoyaj papas tein se takat akin kitokaya techkauaya maj tikololokan. Debbie miak taman kemej kichijchiuaya papa uan nochi uelik katka. Maski semi titajyouijkej timochikaujkej titaxikoskej uan tiyolpakiskej, uan no tikmatiaj ke Jehová techyekpiaya (Sal. 64:10).
Se tonal keman amo tikchiayaj, technotskej para techyoleuaskej maj titapaleuitij Betel ompa Canadá. Kemej tiknekiaj tikseliskej tamachtilis tein motemaka Galaad, keman techyoleujkej Betel titelyolpakkej sayoj ke no timotayokoltijkej, maski ijkon ipa tiajkej Betel. Keman tiajsikej niman tiktajtanijkej tokniuj Kenneth Little, semej akin ompa taixyekana: “¿Uan toni tikchiuaskej komo techyoleuaj Galaad?”. Yejua technankilij: “Satepan tikitaskej toni tikchiuaskej komo namechyoleuaj”.
Se semana satepan Debbie uan nejua techyoleujkej maj tikselikan tamachtilis tein motemaka Galaad, yejua ika monekia tikitaskej toni tikchiuaskej. Tokniuj Little techiluij: “Maski tein yeski nankiixpejpenaskej ipa kemansa nankinemiliskej ke okachi kuali yeskia komo nankiixpejpenaskiaj okse taman, nochin ome tekit nochi kualtsitsin uan Jehová uelis kitiochiuas tein yeski tein nankiixpejpenaskej”. Tikixtalijkej tikseliskej tamachtilis tein motemaka Galaad. Uan tikitanij ke tein techiluij tokniuj Little, yekmelauj techpanouani. Uan nejin no miakpa tikiniluianij oksekin tokniuan akin monekini kiixpejpenaskej keniuj kitekitiliskej Jehová.
TEIN TECHPANOK KEMAN TITAPALEUIJKEJ KEMEJ MISIONEROS
(Opochmakopa) Ulysses Glass.
(Yekmakopa) Jack Redford.
Semi tikuelitakej timomachtiskej iniuan oksekin 22 tokniuan akin no kiselijkej tamachtilis 83 de Galaad, tein peuak abril xiuit 1987 ompa Brooklyn (Nueva York). Tokniuan Ulysses Glass uan Jack Redford, yejuan akin okachi techmachtijkej. Tikmachilijkej ke ijsiujka panok nejon makuil metsti, uan tamachtilis tamik 6 de septiembre xiuit 1987. Techtitankej maj titapaleuitij Haití iniuan John uan Marie Goode.
Ompa Haití, itech xiuit 1988.
Desde xiuit 1962 keman kinkixtijkej de Haití nochin misioneros, amo akin ijkon tapaleuijtoyaok hasta ke tejuan tiajsikej. Eyi semana satepan ke tamik tamachtilis peuak titapaleuiaj itech se nechikol tein moajsia kampa tepeyoj uan uejka katka, uan sayoj yetoyaj 35 tanojnotsanij. Monekia timomachtiskej miak taman porin tipipilok katka uan tinemiaj toselti itech kali kampa mokauayaj misioneros. Akin nemiaj ompa Haití katkaj pobres uan sayoj sekin ueliaj talerouayaj. Miakej akin nemiaj kampa titapaleuijtoyaj takuejmolchiuayaj porin motelixnamikiaj políticos, kitemouayaj kitakuiliskej tekiuaj, tatikuiltiayaj para kitsakuaskej carreteras uan kemansa tel kiouaejekaya.
Semi techyolchikauak keman tikitakej ke tokniuan de Haití semi taxikouayaj uan yolpakiaj. Miakej kipanouayaj miak ouijkayomej, sayoj ke semi kitasojtayaj Jehová uan kiuelitayaj tanojnotsaskej. Se tokniuj siuat akin xiuejya katka kuali kimatia tein kijtoua kemej 150 textos de Biblia maski amo uelia talerouaya. Kemej tikitayaj ke mochiuaya miak taman tein amo kuali, okachi tiknekiaj tikintapouiskej oksekin ke sayoj iTaixyekanalis Dios uelis kiixpolos nochi tein amo kuali. Semi tiyolpakij porin miakej akin peuak tikinmachtiaj keman tiajsikej mochiujkej precursores regulares, precursores especiales uan tayekananij.
Ompa Haití nikixmatik Trevor, se okichpil akin miakpa niknojnotsak den Biblia, yejua katka misionero itech taneltokalis mormón. Xiujmej satepan nikselij se carta tein Trevor nechtitanilij, ompa kijtouaya: “¡Nimoauiti itech ueyi nechikol tein amo uejkaua mochiuati! Nikneki nimokepas Haití uan nitapaleuis kemej precursor especial kampa achto nietoya kemej misionero itech taneltokalis mormón”. Uan ijkon kichiuak, miak xiujmej ompa tapaleuij iuan isiuatsin.
EUROPA UAN SATEPAN ÁFRICA
Tekititok ompa Eslovenia, itech xiuit 1994.
Satepan techtitankej maj titapaleuitij Europa, ompa peuayaya techkauaj maj titanojnotsakan. Itech xiuit 1992 tiajsikej Liubliana (Eslovenia), tein amo uejka yetoya de kampa moskaltijkaj notatuan achto ke yaskiaj nemitiuij Italia. Ijkuak, seki xolalmej tein pouiaj kampa achto moixmatia kemej Yugoslavia kisentokayaj moteuijtoyaj. Tokniuan de Viena (Austria), Zagreb (Croacia) uan Belgrado (Serbia) kiitayaj maj motanojnotsa kampa achto monotsaya Yugoslavia. Sayoj ke satepan mochijchiuaskia sejse Betel itech nejon naui altepemej.
Yejua ika monekik timomachtiskej okse tajtol uan timomatiskej tinemiskej kemej nemiaj kampa tiajsikej. Akin ompa nemiaj techiluiayaj ke inintajtol tel ouij uan amo techkajkayaujkej. Semi tikuelitakej tikitaskej ke tokniuan amo kikauayaj Jehová uan kuali kiseliayaj tein inechikol kipataya, uan Jehová kintatiochiuij. Oksepa tikitakej ke yejua kiita nochi tein panoua uan kichiua tein moneki keman okachi moneki. Keman tietoyaj Eslovenia timomachtijkej miak taman, uan seki taman tein ipa tikmatiajya techpaleuij maj tikxikokan ouijkayomej tein ompa tikpiayaj.
Kisentokak techpanok miak taman. Itech xiuit 2000 techtitankej maj titapaleuitij Costa de Marfil, ompa África Occidental. Sayoj ke ompa peuak moteuiaj uan yejua ika itech metsti noviembre xiuit 2002 techuikakej Sierra Leona, kampa 11 xiujmej no moteuijtoyaj, sayoj ke keman tiajsikej ipa tankaya nejon. Semi techouijmakak ijsiujka tikisaskej de Costa de Marfil, sayoj ke tein timomachtijkajya semi techpaleuij maj tiksentokakan tiyolpakikan.
Tikitakej keniuj miakej akin ompa nemiaj kinekiaj momachtiskej Biblia uan ke tokniuan semi motasojtayaj. Yejuan miak xiujmej taxikojkaj keman moteuijtoyaj itech nejon altepet. Maski katkaj pobres kiuelitayaj temakaskej tein kipiayaj. Se tokniuj siuat kinekia kitayokolis Debbie seki tasal, uan yejua amo kinekia kikuilis, sayoj ke tokniuj kitataujtij maj kikui uan kiluij: “Keman moteuijtoyaj, tokniuan de okseki altepemej techpaleuijkej uan axkan tejuan no moneki ijkon tikchiuaskej”. Yejua ika tikixtalijkej no tikchiuaskej kemej yejuan.
Satepan oksepa timokepkej Costa de Marfil, sayoj ke oksepa peuak takuejmolchiuaj porin políticos motelixnamikiaj. Yejua ika itech noviembre de 2004 techkixtijkej ika se helicóptero, uan sayoj uelik tikuikakej 10 kilos de seki taman tein tikuiskiaj. Tikochkej talpan kampa yetoyaj soldados franceses uan mostika techuikakej Suiza ika se avión. Tiajsikej Betel kemej tajkoyouan. Tel kualtsin timomachilijkej keman tikitakej ke tokniuan akin taixyekanaj Betel uan akin kinmachtiayaj tokniuan takamej, techchixtoyaj iniuan ininsiuatsitsin ika tapalol totonik uan miak chocolate de Suiza.
Kinnojnotstok akin motepalotitoj ompa Costa de Marfil, itech xiuit 2005.
Techtitankej maj titapaleuitij se tiempo ompa Ghana, uan keman amo motakuejmolchiujtoyaok ompa Costa de Marfil, oksepa timokepkej. Kemej nochin tokniuan semi yolkualmej katka, semi techpaleuij keman miakpa techuikakej okseko uan keman techtitankej maj miakkan titapaleuitij. Maski itech inechikol Dios ipa moneki timotasojtaskej, Debbie uan nejua tikixtalijkej nochipa tiktasojkamatiskej tein yejuan kichiuaj. Nochi tein techpanok techmachtij miak taman tein ueliskia tikchiuaskej keman tiktekitilijtoskiaj Jehová.
TECHTITANKEJ OKSEKO
Ompa Oriente Medio, itech xiuit 2007.
Itech xiuit 2006, tokniuan de ueyi kali kampa techixyekanaj techiluijkej maj titapaleuitij Asia occidental (Oriente Medio). Oksepa techpanoskia miak taman tein kuali, tikpiaskiaj ouijkayomej, timomachtiskiaj okseki tajtolmej uan timomatiskiaj kemej nemij. Ompa monekia timomachtiskej miak taman porin miakej motelkalakiayaj itech política uan tel taneltokayaj. Semi tikuelitakej porin tokniuan itech nechikolmej maski tajtouayaj tataman tajtolmej, nochin kuali mouikayaj porin kichiuayaj tein inechikol Jehová tanauatia. Tikmojkaitakej porin tokniuan katkaj yolchikaujkej uan taxikouayaj keman kinixnamikiaj ininchankauan, akin iniuan momachtiayaj, akin iniuan tekitiaj uan ininvecinos.
Itech xiuit 2012 tiajkej itech se asamblea especial tein mochiuak ompa Tel Aviv (Israel). Amo keman moelkauas nejin ueyi nechikol porin ompa amo mosentilijtoyajok tel miakej itekitikauan Jehová desde Pentecostés xiuit 33.
Itech nejon xiujmej techtitankej maj titakalpanotij itech se altepet kampa amo techkauayaj maj tiktekitilikan Jehová. Tikuikakej amaixmej, tiajkaj titanojnotsatoj uan tietoyaj itech seki uejueyi nechikolmej kampa amo miakej mosentiliayaj. Miakkan yetoyaj soldados uan tatsakuiliayaj, sayoj ke amo timouiaj porin maski ompa amo miakej tokniuan katkaj, techuikatinenkej uan techpaleuijkej maj timoyekpiakan.
TIMOKEPKEJ ÁFRICA
Ompa Kinsasa (República Democrática del Congo), momachtijtok para kipanoltis se tanojnots itech xiuit 2014.
Itech xiuit 2013 tikselijkej okse tekit tein tel taman katka, techyoleujkej maj titapaleuitij Betel de Kinsasa (República Democrática del Congo). Nejon altepet semi ueyi uan takualtsinkan, sayoj ke akin ompa nemij semi pobres uan semi motakuejmolchiua. Niman tikijtojkej: “Tiixmattokejya África, yejua ika amo ouij timomatiskej porin ipa ompa tinemiajya”. Sayoj ke amo timomattoyaj tikchiuaskej seki taman, kemansa monekia tiaskej kampa amo onkayaj carreteras uan puentes. Maski ijkon tikitayaj miak taman tein kualtsin tein mochiuaya. Tokniuan taxikouayaj uan yolpakiaj maski amo kipiayaj miak taman, kiuelitayaj tanojnotsaskej uan mochikauayaj yaskej nechikolmej uan uejueyi nechikolmej. Tikitakej keniuj miakej peuaya kitekitiliayaj Jehová porin yejua kinpaleuiaya uan kintatiochiuiaya. Timomachtijkej miak taman itech nochi xiujmej keman tietoyaj ompa Congo-Kinsasa uan miakej akin iniuan timouikayaj mochiujkej kemej yeskia tochankauan.
Tanojnotstokej ompa Sudáfrica, itech xiuit 2023.
Itamian xiuit 2017 techiluijkej maj titapaleuitij Betel de Sudáfrica. Nejon Betel yejua tein okachi ueyi kampa titapaleuianij. Uan technauatijkej maj tikchiuakan seki tekimej tein amo keman tikchiujtoyaj. Oksepa monekia timomachtiskej okseki taman, sayoj ke tein tikmatiajya semi techpaleuij. Miakej tokniuan kitekitilianij Jehová miak xiujmej uan semi tikintasojtaj. Se kimojkaita keniuj tokniuan akin yetokej Betel semi kuali mouikaj maski tataman kemej moskaltijkej uan tein momattokej kichiuaskej. Tikitanij keniuj Jehová kinpaleuia nochin itekitikauan maj yolseujtokan porin kichiuaj tein yejua kineki uan tein momachtiaj itech Biblia.
Nochi nejin xiujmej, Debbie uan nejua tikselianij miak tataman tekimej. Kampa tiajsiaj timomachtiayaj inintajtol uan timomatiaj tinemiskej kemej yejuan, uan maski kemansa tikpianij ouijkayomej, tikitanij keniuj Jehová technextiliani ke techtasojta keman kichiua maj tokniuan uan inechikol techpaleuikan (Sal. 144:2). Nochi tein timomachtijkej keman tiktekitilijtoyaj Jehová miak tonalmej, techpaleuiani maj okachi kuali tiktekitilikan.
Semi niktasojkamati tein notatuan nechmachtijkej uan no nosiuatsin Debbie porin semi nechpaleuia, uan no niktasojkamati nochi tein tokniuan kichiujkej para nechnextiliskej miak taman. Nosiuatsin uan nejua tikixtalijkej timokauaskej maj toUeyi Tamachtijkauj kisentoka techmachti ika tein tikchiuaskejok.