‘Jehová kiixtalia akoni tatanis’

Itech xiuit 1999 tekiuaj de Francia kijtoj ke Betel de ompa, monekia kiixtauas impuesto porin itech xiuit 1993 hasta 1996 tokniuan tapaleuijkaj ika tomin. Tikinixpantilijkej jueces de Francia nejon kuejmol sayoj ke amo techpaleuijkej. Tiksentokayaj timotenpaleuiayaj sayoj ke amo akin techpaleuij, uan tekiuaj mokuilij panoua cuatro millones uan tajko de euros (seis millones trescientos mil dólares) tein Betel kipiaya itech banco. Tiknemilijkej ke akin pouiaj itech Tribunal Europeo de Derechos Humanos ueliskiaj techpaleuiskej maj techkepilikan nejon tomin. Sayoj ke achto ke tikinmatiltiskiaj kuejmol, technauatijkej maj timosentilikan iniuan iabogados tekiuaj de Francia uan iuan se siuat akin tekitia itech Tribunal Europeo para maj moitani ox ueliskia momelauas nejon kuejmol.

Tiknemiliayaj ke nejon siuat techchikaujkauiskia maj tiktaxtauikan tekiuaj maski sayoj tepitsin para maj momelauani kuejmol. Sayoj ke tikmatiaj ke maski amo miak tomin tikmakaskiaj, amo tikchiujtoskiaj tein kijtoua Biblia. Tokniuan kitemakakaj nejon tomin para kipaleuiskej iTaixyekanalis Dios, yejua ika nejon tomin amo katka iaxka tekiuaj (Mat. 22:21). Maski ijkon, ipa timosentilijkej iniuan para maj kiitanij ke tiktakamatij tein tanauatia Tribunal Europeo.

Timosentilijkej itech se kualtsin cuarto tein kipiaya Tribunal Europeo. Uan techiluijkej tein amo tiknekiaj maj techiluikan. Nejon siuat kijtoj ke itaixpantijkauan Jehová monekia kiixtauaskej seki impuestos tein tajtania tekiuaj de Francia. Niman tiktajtanijkej: “¿Tikonmatia ke tekiuaj techkuilijya itech banco panoua cuatro millones uan tajko de euros?”.

Nejon siuat semi kimojkakakik porin amo kimatia uan semi kualanik porin tekiuaj de Francia kichiujka nejon. Keman iabogados tekiuaj kijtojkej ke melauj katka, tel amo kiuelitak uan kinajuak, uan techiluij maj tiakanya. Nikitak ke Jehová techpaleuij maj titatanikan kemej amo tikchiayaj. Semi timouelitstiayaj keman tikisteujkej de ompa uan semi tikmojkaitakej tein panok.

Itech 30 de junio de 2011, akin pouij itech Tribunal Europeo kiixtalijkej maj mochiua teisa tein techpaleuiskia. Kijtojkej ke amo monekia tikixtauaskej impuesto uan ke tekiuaj monekia techkepilis tein techkuilijka, uan hasta maj techmakani okachiok. Tein moixtalij kinpaleuijtok tokniuan de Francia hasta axkan. Maski amo achto tiknemilijkej toni tiktajtaniskiaj siuatsin, tein tiktajtanijkej katka kemej tet tein kimiktij Goliat uan nejon techpaleuij maj titatanikan. ¿Keyej? Porin ‘Jehová kiixtalia akoni tatanis’ ijkon kemej David kiluij Goliat (1 Sam. 17:​45-47).

Miakpa titataninij ininixpan jueces. Taixyekananij itech taneltokalis uan políticos semi techixnamikij, maski ijkon ipa titataninij 1,225 viajes keman timotajtouitoj ininixpan jueces de 70 altepemej uan ininixpan jueces akin tapaleuiaj itech miak altepemej. Tein moixtaliani tapaleuia maj tekiuanij techkauakan maj tikueyichiuakan Jehová, maj titanojnotsakan, maj amo tikueyitalikan se altepet oso maj amo tiktajpalokan bandera nion maj ticantarokan himno nacional, uan maj amo techtalilikan esti.

Sayoj ke, ¿keyej nitapaleuito Europa iniuan okseki tokniuan para maj momelaua se kuejmol maski nietoya Betel de Nueva York, Estados Unidos?

NOTATUAN KIUELITAYAJ TANOJNOTSASKEJ UAN KATKAJ MISIONEROS

Notatuan George uan Lucille, kiselijkej tamachtilis 12 de Galaad, uan itech xiuit 1956 keman nejua niyolik tapaleuijtoyaj ompa Etiopía. Nechtokaytijkej Philip, ijkon kemej Felipe akin ‘kiteixmatiltiaya kuali tanauatilmej’ (Hech. 21:8). Se xiuit satepan, tekiuaj amo techkauakok maj titanojnotsakan. Maski nipiliok katka, kuali nikelnamiki keman nochankauan ichtaka yayaj nechikolmej uan tanojnotsayaj. Semi nikuelitaya, sayoj ke itech xiuit 1960 techkixtijkej den altepet.

Tinemitoj Wichita (Kansas, Estados Unidos). Notatuan kisentokayaj semi tanojnotsayaj kemej keman katkaj misioneros. Judy nokniuj siuapil akin tayekana uan Leslie, nokniuj okichpil akin xokoyot no yolkej Etiopía. Totatuan nochipa techmachtijkej maj tiktasojtakan Jehová uan maj tiktekitilikan. Nimoauij keman nikpiaya 13 xiujmej, uan eyi xiuit satepan tinemitoj Arequipa (Perú) kampa monekiaj tanojnotsanij.

Itech xiuit 1974, keman nikpiaya 18 xiujmej, Betel de Perú techixtalij nejua uan okseki naui tokniuan maj titapaleuikan kemej precursores especiales. Techtitankej maj titanojnotsatij kampa onkayaj miakej tepemej tein moixmatij kemej Andes, ompa amo akin tanojnotstoya. No uelik tikinnojnotskej akin tajtouayaj quechua uan aimara. Tikuikatinemiaj se carro kampa tikochiaj uan tikiluiayaj Arca porin katka ueyak. Nikelnamiki ke nejon majseualtsitsin nikinnextiliaya ika Biblia ke Dios kichiuas maj amo techpolook nion teyi, maj amo akin kokolispeuaok uan maj amo akin momikiliok (Apoc. 21:​3, 4). Uan miakej peuak kiueyichiuaj Jehová.

NECHYOLEUAJ MAJ NITAPALEUI ITECH UEYI KALI KAMPA TECHIXYEKANAJ

Itech xiuit 1977, tokniuj Albert Schroeder yajki takalpanoto Perú. Tokniuj pouia iuan Oloch Taojtokaltianij, uan nechiluij maj nitajtani nitapaleuis itech ueyi kali kampa techixyekanaj. Uan ijkon nikchiuak. Tepitsin satepan itech 17 de junio xiuit 1977, peuak nitapaleuia Betel de Brooklyn. Naui xiuit nitekitik iniuan tokniuan akin tachipauayaj uan akin kiitayaj maj amo uejueliui teisa.

Itech junio xiuit 1978 nikixmatik Elizabeth Avallone itech se ueyi nechikol kampa mosentilijkej de okseki altepemej ompa Nueva Orleans (Luisiana). Itatuan no semi kitekitiliayaj Jehová ijkon kemej notatuan. Elizabeth nikixmatik keman naui xiuitya tapaleuijtoya kemej precursora regular, uan kiixtalijtoya nochipa ijkon kitekitilis Jehová oso kichiuas okse tekit kemej nejon. Tiksentokayaj timonojnotsayaj uan peuak semi timoueuelitaj. Timonamiktijkej 20 de octubre xiuit 1979 uan peuak tisentapaleuiaj Betel.

Yekinika nechikol kampa tiajsikej monotsaya Brooklyn Spanish, itech nejon nechikol tokniuan semi techtasojtakej. No tietonij itech okseki eyi nechikolmej kampa no semi techtasojtanij uan techyolchikauanij maj tiksentokakan titapaleuikan Betel. Semi tikintasojkamatiliaj totasojikniuan uan tochankauan porin techpaleuijkej uan kinyekpiakej totatuan keman xiuejkejya katkaj.

PEUA INIUAN NITEKITI AKIN KINTAJTOUIAJ ITEKITIKAUAN JEHOVÁ

Itech metsti enero xiuit 1982 nechnauatijkej maj nitapaleui itech Departamento de Asuntos Legales de Betel, amo keman niknemilij ke nechiluiskiaj nejon. Eyi xiuit satepan, nechiluijkej maj nimomachti universidad para nimochiuas abogado. Ompa nimomachtij ke kemej itaixpantijkauan Jehová miakpa tataninij ininixpan jueces, no kinpaleuiani akin nemij Estados Unidos uan okseki altepemej maj ueli kichiuakan miak taman tein achto amo kinkauayaj. Keman timomachtiayaj uejkauak ika titajtouayaj tein kinpanoka tokniuan.

Itech xiuit 1986, keman nikpiaya 30 xiujmej, nechixtalijkej maj nikixyekana tekit itech Departamento de Asuntos Legales. Semi niyolpakia maj ompa Betel nechmakanij nejon tekit maski niokichpilok katka. Sayoj ke no nimotekipachouaya porin miak taman amo keman nikchiujtoya uan nikmatia ke ouij yeskia.

Nimochiuak abogado itech xiuit 1988, sayoj ke amo nimomakaya cuenta ke amo semi kuali nimouikayaok iuan Jehová. Keman se momachtia universidad uelis peuas se kinejnekis se kipias miak taman uan se kinemilis ke okachi se tamatkej ke akin amo momachtianij. Sayoj ke Elizabeth nechpaleuij maj oksepa nikchiua tein achto nikchiuaya para maj okachi kuali nimouika iuan Jehová. Tein nechpanok nechpaleuij maj nikita ke amo tayekantok maj se kimati miak taman, ta okachi moneki maj kuali se mouika iuan Jehová uan maj se kitasojta yejua uan itekitikauan.

TIMOTENPALEUIAJ ININIXPAN TEKIUANIJ PARA MAJ MOTEIXMATILTI KUALI TANAUATILMEJ

Keman nimotamimachtij universidad peuak okachi nitapaleuia Betel para tikmelauaskej kuejmolmej iniuan jueces, para maj inechikol Jehová kuali yeto uan maj ueli titanojnotsakan. Nikteluelitaya tein nikchiuaya, sayoj ke no ouij katka porin niman mopataya teisa itech inechikol Dios. Se taman yejua tein mochiuak itech xiuit 1990, achto titajtaniaj maj kiixtauakan amaixmej tein titemakayaj, sayoj ke tokniuan akin taixyekanayaj tajtankej itech Departamento de Asuntos Legales toni monekia kichiuaskej para amo tajtaniskiajok tomin. Desde ijkuak, itaixpantijkauan Jehová peuak amo tajtanijok tomin keman kitemakaj se amaix. Nejon tapaleuij maj amo mochiuaniok tel miak tekit itech Betel uan itech nechikolmej, uan maj amo moixtauaniok impuestos tein amo moneki. Sekin kinemilijkej ke amo tikpiaskiajok tomin para mochijchiuaskej amaixmej uan ke yejua ika miakej amo kiixmatiskiajok Jehová, sayoj ke amo ijkon panok. Axkan itaixpantijkauan Jehová okachi miakej, porin moajsij panoua de okse achiok ke itech xiuit 1990, uan nochin ueli kiseliaj amaixmej tein amo moneki kiixtauaskej. Nikitani ke tein mopatani itech inechikol Dios tel tapaleuiani porin Jehová techpaleuijtok uan porin techixyekantok takeual takuaujtamach uan tamatkej (Éx. 15:2; Mat. 24:45).

Miakpa titataninij porin tokniuan kichiuaj tein kuali uan amo semi porin tikinpiaj tel kuali abogados. Se tonal, eyi tokniuan akin pouij iuan Oloch Taojtokaltianij uan iniuan ininsiuatsin, yajkej itech seki uejueyi nechikolmej ompa Cuba itech xiuit 1998. Tokniuan kuali kinnojnotskej akin iniuan tekitiaj tekiuaj. Yejua nejon tein okachi tapaleuij maj kiitanij ke amo timokalakiaj itech política ke tein tejuan tikiniluijkaj keman tikinnojnotskaj.

Kemansa ueli tikmelauaj se kuejmol sayoj komo tikinitatij jueces, nejon tapaleuia ‘maj amo teyi kitsakuili maj moteixmatilti kuali tanauatilmej’ (Filip. 1:7). Kemej tein panok ompa Europa uan Corea del Sur, itech miak xiujmej, tekiuanij kijtouayaj ke monekia tiaskej titateuitiuij maski yetoya se tanauatil tein kijtouaya ke ueliskia tikijtoskej ke amo tiaskej. Yejua ika kemej 18 mil tokniuan de Europa uan panoua 19 mil ompa Corea del Sur kintsakkej porin kiixtalijkej amo yaskej tateuitiuij porin yejuan kiajsikamatiaj ke amo kuali yetok.

Uan itech 7 de julio xiuit 2011, Tribunal Europeo de Derechos Humanos kitajtouij tokniuj Bayatyan ika tein kichiuilijkej tekiuanij de Armenia, uan tanauatij maj itech nochi altepemej de Europa kinkauanij akin ompa nemiaj maj kichiuanij okse taman tekit komo kiixtaliayaj amo yaskej tateuitiuij. Seki xiujmej satepan, tonal 28 de junio xiuit 2018, Tribunal Constitucional de Corea del Sur no kiixtalij teisa kemej nejon. Tekiuanij kiixtalijkej nejin porin kiitakej ke nochin tokniuan okichpipil nion tepitsin mokalakiaj itech política.

Tokniuan akin yetokej itech ueyi kali kampa techixyekanaj uan itech okseki kalmej Betel akin tapaleuiaj itech Departamento de Asuntos Legales, semi tekitij para techtajtouiskej maj ueli tikueyichiuakan Jehová uan maj ueli titanojnotsakan. Semi nikuelita tein nikchiua porin ueli nikintajtouia tokniuan akin tekiuanij kinixnamikij. Maski kemansa titatanij uan kemansa amo, ipa tikinixmatiltiaj kuali tanauatilmej, tekiuanij, taixyekananij uan akin nemij itech okseki altepemej (Mat. 10:18). Jueces uan akin iniuan tekitij tekiuanij, kampa kitematiltiaj tanauatilmej uan oksekin ipa kilerouaj textos den Biblia tein tikijkuilouaj itech amamej uan tein tikijtouaj keman timotenpaleuiaj ininixpan jueces. Akin yolkualmej okachi kinixmatij itaixpantijkauan Jehová uan kiitaj ke nochi tein tikneltokaj ijkuiliujtok itech Biblia uan sekin hasta mochiuaj tokniuan.

¡TASOJKAMATIK JEHOVÁ!

Nitapaleuiani 40 xiujmejya itech tataman kalmej Betel para maj momelauakan kuejmolmej, uan no niani ininixpan jueces uan akin kipiaj ueyi tanauatil. Semi nikintasojta uan nikmojkaita tein kichiuaj tokniuan akin no tekitij itech Departamento de Asuntos Legales, akin yetokej itech ueyi kali kampa techixyekanaj uan itech nochi taltikpak. Nikseliani miak taman tein kuali uan semi niyolpaki.

Elizabeth nouan yetoni 45 xiujmejya uan nochipa nechpaleuiani hasta keman techpanouani tein amo kuali. Semi nikmojkaita tein kichiua porin nechpaleuia maski semi motelkokoua uan kokolis tein kipia kichiua maj okachi kuetaui.

Elizabeth uan nejua tikitanij ke toselti amo ueli titaxikouaj uan amo ueli titatanij, ta kemej kijtoj David, sayoj ueli tikchiuaj porin yejua ‘Jehová akin kichikaua ixolal’ (Sal. 28:8). Senkis tikmatij ke ‘Jehová yejua akin kiixtalia akoni tatanis’.