¿Uelis techpaleuisok tein tikmatkej keman peuak timomachtiaj Biblia?

1. ¿Keniuj tionmomachilij keman tikonmatik toni tamachtia Biblia?

TEIN tikmatkej keman peuak timomachtiaj Biblia semi techpaleuij uan techyolseuij, porin keman tikmatkej ke Dios monotsa Jehová peuak kuali iuan timouikaj (Is. 42:8). Keman tikmatkej ke akin momikilijkejya amo teyi kimatijok uan ke amo tajyouijtokej, semi techyolseuij (Ecl. 9:10). Uan keman timomachtijkej ke Dios kichiuas se xochital, amo semi techtekipachojok tein uelis techpanos porin tikmatkej ke amo sayoj tinemiskej kemej 70 oso 80 xiujmej, ta nochipaya (Sal. 37:29; 90:10).

2. Maski seki tokniuan miak xiujmejya kiixmatiaj Jehová, ¿keyej Pedro kinelnamiktij tein kimatkej keman peuak momachtiaj Biblia? (2 Pedro 1:​12, 13).

² Maski miak xiujmejya tikixmatij Jehová, maj amo tikelkauakan ke tein tikmatkej keman peuak timomachtiaj Biblia kisentoka techpaleuia. Tatitanil Pedro kintajkuilouilij tokniuan akin ‘semi kineltokayaj tein melauak’ (xikonlero 2 Pedro 1:​12, 13). Kinekia kinyolchikauas para maj tokniuan amo kikauanij Jehová, porin itech nechikol moajsiaj akin amo tamachtiayaj tein melauak uan akin amo katkaj yolkualmej (2 Ped. 2:​1-3). Pedro kinelnamiktij seki taman tein kimatkej keman peuak momachtiaj para kinpaleuis maj amo kikauanij Jehová.

3. Xikonmelaua keyej nochin akin kitekitiliaj Jehová moneki kisentokaskej itech tanemiliskej tein kimatkej keman peuak momachtiaj Biblia.

³ Maski miak xiujmejya tiktekitilijtokej Jehová, tein tikmatkej keman peuak timomachtiaj uelis kisentokas techpaleuis. Maj itech titanemilikan se temomaj akin tel kuali takualchiua uan isiuapil akin momachtijtok keniuj takualchiuas. Xa nochin omen kikuij se taman para kichijchiuaskej se tapalol, sayoj ke kemej temomaj okachi kuali takualchiua, no ueli kikui nejon taman para kichijchiuas okse taman tapalol. No ijkon, akin yekin momachtijtokej Biblia peua kimatij tein kijtouaj seki textos, sayoj ke akin miak xiujmejya kitekitilijtokej Jehová nejon textos no kinmachtia okseki taman. ¿Keyej? Porin desde ke moauijkej xa mopatak kemej nemiaj uan kemej kitekitiliayaj Jehová. Keman itech titanemiliaj tein tikmatkej keman peuak timomachtiaj Biblia, tikitaj keniuj uelis techpaleuis ika tein axkan tikpanouaj. Itech nejin tamachtilis, tikitaskej eyi taman tein Biblia tamachtia uan toni uelis kinmachtisok akin uejkaujya kitekitilijtokej Jehová.

JEHOVÁ YEJUA AKIN TACHIJCHIUAK

4. ¿Keniuj techpaleuia tikmatiskej ke yejua Jehová akin tachijchiuak?

⁴ Tikmatij ke taltikpak uan nochi tein onkak kichijchiuak Dios akin semi tamatkej uan chikauak, Biblia kijtoua: “Akin kichijchiuak nochi yejua Dios” (Hebreos 3:4). Sayoj ke nejin tamachtilis uelis techmachtis okseki taman. Kemej Jehová techchijchiuak, kuali techixmati. No techtasojta uan kimati toni okachi kuali para tejuan. Kemej tikmatij ke Jehová kichijchiuak nochi, techpaleuia maj kuali tinemikan uan maj tiyolpakikan.

5. ¿Toni techmachtia keman tikmatij ke Jehová tachijchiuak? (Isaías 45:​9-12).

⁵ Kemej tikmatij ke yejua Jehová akin tachijchiuak no techmachtia ke moneki maj amo timoueyimatikan. Maj ika titajtokan Job. Se tiempo kijtoj seki taman tein amo melauj de Jehová, kielkauak toni okachi tayekantoya. Sayoj itech tanemilij uan kinekia kinextis ke yejua amo mopolojtoya, sayoj ke Jehová kielnamiktij ke yejua akin kichijchiujka nochi (Job 38:​1-4). Nejin kipaleuij Job maj kiita ke nochi tein Jehová kichiua kuali yetok. Satepan, tanauatijkej Isaías kijkuiloj ke tejuan amo keman moneki tiknemiliskej ke okachi titamatinij ke akin techchijchiuak (xikonlero Isaías 45:​9-12).

6. ¿Keyej semi moneki maj itech titanemilikan keniuj Jehová semi tamatkej uan semi chikauak? (No xikonita taixkopimej).

⁶ Keman se tokniuj uejkaujya kitekitilijtok Jehová, xa uelis peuas moixyekanas ika tein yejua kinemilia uan amo kitemos maj Jehová uan iTajtol kiixyekanakan (Job 37:​23, 24). Para maj amo techpano nejin, moneki tikxeloskej tiempo uan itech titanemiliskej keniuj Jehová semi chikauak uan semi tamatkej (Is. 40:22; 55:​8, 9). Komo tikelnamikij nejin techpaleuis maj amo timoueyimatikan uan maj tikelnamikikan ke Jehová okachi kuali tanemilia ke tejuan.

7. ¿Toni kipaleuij Rahela maj kiseli se taman tein mopatak itech inechikol Dios?

⁷ Keman Rahela se tokniuj siuat de Eslovenia itech tanemiliaya ke Jehová tachijchiuak, kipaleuij maj kiseli se taman tein mopatak itech inechikol Dios. Yejua kijtoua: “Kemansa nechouijmaka nikselis tein kiixtaliaj tokniuan akin taixyekanaj. Maski nikitakaya video Tein Oloch Taojtokaltianij kitematiltiaj (8) xiuit 2023, kampa kijtouaya ke tokniuan takamej ueliskia mokauiliskej ininbarba, amo nikuelitak keman nikitak ke se tokniuj kitemakatoya se tanojnots uan kipiaya barba. Yejua ika niktataujtij Jehová maj nechpaleui maj nikseli tein moixtalijka”. Rahela kiajsikamatik ke kemej Jehová tachijchiuak, kuali kimati keniuj kiixyekanas inechikol. Komo no techouijmaka tikseliskej se taman tein moixtalia itech inechikol Dios oso keman mopata se tamachtilis, semi techpaleuis komo tikxelouaj tiempo para tiknemiliskej keniuj Jehová semi tamatkej uan chikauak (Rom. 11:​33-36).

¿KEYEJ DIOS KIKAUA MAJ TITAJYOUIKAN?

8. ¿Keniuj techpaleuia maj timomachtianij keyej Dios ayamo kiixpoloua tein techtajyouiltia?

⁸ ¿Keyej Dios kikaua maj titajyouikan? Miakej kualanij iuan Dios oso peua kinemiliaj ke amo nemi porin amo kimatij keyej titajyouiaj (Prov. 19:3). Sayoj ke tejuatsin tionmomachtiani ke titajyouiaj uan timomikiliaj porin titajtakolejkej uan amo porin Jehová techtajyouiltia. No tionmomachtiani ke kemej Jehová amo yolijsiui uan ayamo kiixpoloua tein techtajyouiltia, tel miakejok ueli kiixmatij uan momachtiaj keniuj kichiuas maj amo titajyouikanok (2 Ped. 3:​9, 15). Semi mitsonyolseuij uan mitsonpaleuij okachi iuan xionmotoki Dios keman tikonmatik keyej ayamo kiixpoloua tein techtajyouiltia.

9. ¿Kemanian monekis maj tikelnamikikan keyej Jehová kikaua maj titajyouikan?

⁹ Kemej Jehová ayamo kiixpoloua tein techtajyouiltia, moneki amo tiyolijsiuiskej. Sayoj ke keman momikilia aksa akin tiktasojtaj, keman tejuan oso se tochankauj kipanoua se ouijkayot oso kichiuiliaj tein amo kuali, ueliskia tikualaniskej iuan Jehová uan tiknemiliskej ke semi uejkaujtok para kiixpolos tein techtajyouiltia (Hab. 1:​2, 3). Keman ijkon timomachiliskej, semi techpaleuis komo tikelnamikij keyej Jehová kikaua maj kinpano tein amo kuali akin yolkualmej (Sal. 34:19).a No uelis itech titanemiliskej ke Jehová kiixtalijya kiixpolos nochi tein techtajyouiltia.

10. ¿Toni kipaleuiani Anne maj kuali momachili maski momikilij imomaj?

¹⁰ Keman tikmatij keyej Dios kikaua maj titajyouikan techpaleuia maj tikxikokan ouijkayomej. Anne, akin nemi itech isla de Mayotte, ompa océano Índico, kijtoua: “Semi nimotayokoltij keman nomaj momikilij, sayoj ke nochipa nimoelnamiktia ke Jehová amo techtajyouiltia. Yejua semi kinejneki kiixpolos nochi tein kichiua maj titajyouikan, uan no kineki maj oksepa nemikan akin momikilijkejya akin semi tikintasojtaj. Keman itech nitanemilia nejin nechyolseuia uan kichiua maj kuali nimomachili”.

11. ¿Keyej Dios kikaua maj titajyouikan, uan keniuj nejon techpaleuia maj tiksentokakan titanojnotsakan?

¹¹ Kemej tikmatij keyej Dios kikaua maj titajyouikan, no techpaleuia maj tiksentokakan titanojnotsakan. Satepan ke Pedro kijtoj ke kemej Jehová amo yolijsiui miakej uelis moyolpataskej uan momakixtiskej, yejua kijkuiloj: “¡Xiknemilikan tein nankichiuaj uan tein moneki nankichiuaskej! Moneki nanchipaujkanemiskej uan nankichiuaskej tein kinextis ke nankiueyichiuaj Dios ika nochi namoyolo” (2 Ped. 3:11). Se taman kemej tikueyichiuaj ‘Dios ika nochi toyolo’ yejua keman titanojnotsaj. Ijkon kemej Jehová, tejuan no tikintasojtaj oksekin uan tiknekij maj nemikan itech xochital. Kemej Jehová amo yolijsiui, kinkaujtok maj ueli kiixmatikan uan maj kiueyichiuakan akin nemij kampa tiontanojnotsa. Semi kualtsin porin tejuatsin ueli tiontekiti iuan Jehová uan tikonpaleuia nochin akin tionueli maj kiixmatikan achto ke kiixpolos nochi tein amo kuali (1 Cor. 3:9).

TINEMIJ “ITECH TONALMEJ KEMAN TATAMITIYA”

12. ¿Toni techpaleuia maj tikneltokakan keman tikitaj ke mochiujtokya tein moijtojka?

¹² Biblia kijtojka keniuj yeskiaj akin nemiskiaj “itech tonalmej keman tatamitiya” (2 Tim. 3:​1-5). Keman tikitaj tein kichiuaj oksekin, tikitaj ke mochiujtok tein kijtojka Biblia. Uan keman tikitaj ke okachi kichiuaj tein amo kuali, okachi tikneltokaj ke melauj tein kijtoua iTajtol Dios (2 Tim. 3:​13-15).

13. ¿Keniuj uelis techpaleuis tein Jesús kijtoj itech Lucas 12:​15-21?

¹³ Kemej tikmatij ke tinemij itech tonalmej keman tatamitiya techpaleuia maj tiktayekanaltikan tein okachi moneki. Tein Jesús ika tajtoj itech Lucas 12:​15-21 (xikonlero), kinextij keyej moneki kuali tikuiskej totiempo. ¿Keyej moijtoua ke takat akin tominpiaya ‘amo tanemiliaya’? Porin kitayekanaltijtoya tein amo monekia. Kisentilijtoya “miak taman tein kipia ipatiuj”, “sayoj ke iixpan Dios” amo teyi kipiaya. ¿Uan keyej monekia kuali kikuis itiempo? Dios kiluij: “Nejin youak timomikiliti”. ¿Toni techmachtia nejin? Kemej amo uejkauaok ixpoliuis nochi tein amo kuali, moneki timotajtaniskej: “¿Kinextia tein nikixtalijtok nikchiuas ke kuali nikuitok notiempo? ¿Toni nikinyolchikaua maj kichiuakan nokoneuan? ¿Nikui nochikaualis, notiempo uan tein nikpia para nimotomintis oso para nikueyichiuas Dios?”.

14. Ijkon kemej kipanok Miki, ¿keyej moneki maj tikelnamikikan ke tinemij itech tonalmej keman tatamitiya?

¹⁴ Keman itech titanemiliaj tein kinextia ke tinentokej itech tonalmej keman tatamitiya techpaleuia maj tikixtalikan toni tikchiuaskej. Yejua nejon tein kipanok se tokniuj siuat akin monotsa Miki. Yejua kijtoua: “Keman nikisak de bachillerato, niknekia nias universidad para nimomachtis okachi nikinixmatis tapialmej. Sayoj ke no niknekia nimochiuas precursora regular uan nitapaleuitiuj okseko. Seki tokniuan itech nonechikol nechiluijkej maj kuali niknemiliani ox ueliskia nias universidad uan no nitapaleuitiuj okseko kemej precursora regular. Nechelnamiktijkej ke amo uejkaua ixpoliuis tein amo kuali uan ke itech xochital nikpias miak tiempo para okachi nikinixmatis nochin tapialmej. Yejua ika nikixtalij nimomachtis teisa tein amo nechkuiliskia miak tiempo. Ijkon uelik nikajsik se tekit para ika nimoixpanoltis uan no uelia nitapaleuiaya kemej precursora regular uan satepan nitapaleuito Ecuador”. Axkan, Miki uan itakatsin takalpanouaj itech nechikolmej ompa Ecuador.

15. ¿Toni techmachtia tein kipanok Santiago? (No xikonita taixkopimej).

¹⁵ Amo moneki timosenkauaskej komo tikitaj ke oksekin amo kinekij kikakiskej kuali tanauatilmej. Maj tikelnamikikan ke uelisok mopataskej. Maj itech titanemilikan Santiago, itakpaikniuj Jesús. Yejua kiitak keniuj moskaltij Jesús, keniuj mochiuak Mesías uan keniuj tel kuali tamachtiaya, maski ijkon, amo niman iuan takuaujtamatik. Ta peuak kitojtoka Jesús hasta satepan ke oksepa nemik, uan tel kuali kitekitilij (Juan 7:5; Gál. 2:9).b Yejua ika maj amo tiknemilikan ke tochankauan amo keman kinekiskej kikakiskej kuali tanauatilmej, uan maj tiksentokakan tikinkalpanokan akin amo kinekij techkakiskej. Maj tikelnamikikan ke tinentokej itech tonalmej keman tatamitiya uan yejua ika semi moneki titanojnotsaskej. Tein tikiniluiskej axkan xa kielnamikiskej uan kichiuaskej satepan, uan xa uelis kichiuaskej hasta keman mochiujtosya tetsaujkatajyouilis.c

MAJ NOCHIPA TIKTASOJKAMATIKAN TEIN JEHOVÁ TECHELNAMIKTIA

16. ¿Keniuj mitsonpaleuia tamachtilismej tein Jehová mitsonelnamiktia? (No xikonita recuadro “Xikonkui tamachtilismej para tikonpaleuis oksekin”).

¹⁶ Tamachtilis tein inechikol Jehová techmaka no chijchiujtok para akin amo semi kimatij tein kijtoua Biblia. Tanojnotsmej tein tikakij itech nechikol itamian semana, seki tamachtilismej uan videos tein moajsij itech jw.org, uan amaixmej tein tiktemakaj kipiaj tamachtilismej para akin ayamo itaixpantijkauan Jehová. Sayoj ke tinochin techpaleuia nejon tamachtilismej tein Jehová techelnamiktia, porin kichiua maj okachi tiktasojtakan, techpaleuia maj okachi tikneltokakan tein kijtoua Biblia uan maj okachi kuali tikinmachtikan oksekin (Sal. 19:7).

17. ¿Kemanian uelis mitsonpaleuis tein tikonmatik keman peuak tionmomachtia Biblia?

¹⁷ Akin miak xiujmejya tiktekitilijtokej Jehová tikuelkakij keman techiluiaj ke mopatak kemej tikajsikamatiaj se tamachtilis tein kipia Biblia. Sayoj ke no tiktasojkamatij tamachtilis tein tikmatkej keman peuak timomachtiaj uan techpaleuij maj timotokikan iuan Jehová. Kemej tikitakejya, nejin tamachtilismej uelis kisentokas techpaleuis. Keman inechikol Jehová technauatia teisa, sayoj ke tiknemiliaj ke okachi kuali kisas tein tejuan tikixtaliaj, maj amo timoueyimatikan uan maj tikelnamikikan ke Jehová akin tamatkej uan tel chikauak yejua akin kiixyekana inechikol. Keman tejuan oso se tochankauj kipias se ouijkayot, maj amo tiyolijsiuikan uan maj tikelnamikikan keyej Jehová kikaujtok maj titajyouikan. Keman tikixtaliskej keniuj tikuiskej totiempo uan tein tikpiaj, maj tikelnamikikan ke amo uejkaua ixpoliuitiya nochi tein amo kuali. Maj tiksentokakan timomachtikan tamachtilismej tein Jehová techelnamiktia para kuali titaixpejpenaskej uan amo keman tikauaskej.