¿Tikonmati “keniuj” tionyolpakis?

1. ¿Toni kijtosneki maj tiyolpakikan ika tein tikpiaj, uan toni amo kijtosneki?

¿TIONYOLPAKI ika tein tikonpia? Akin yolpakij, yolseujtokej uan kuali momachiliaj porin kitasojkamatiliaj Jehová nochi tein kinmakani, uan amo kualantokej porin amo kipiaj tein kinejnekij. Komo tiyolpakijya amo kijtosneki ke amo monekiok timochikauaskej okachi tiktekitiliskej Jehová (Rom. 12:1; 1 Tim. 3:1). Uan no tiyolpakij maski ayamo tikseliaj se tekit tein tiknekij tikseliskej itech inechikol Dios.

2. ¿Toni uelis techpanos komo amo tiyolpakij?

² Komo amo tiyolpakij ika tein tikpiaj uelis peuas tikchiuaskej tein tel amo kuali. Xa sekin okachi peuas tekitiskej para kikouaskej tein amo moneki. Uan seki tokniuan tel amo kualtsin tein kichiuanij porin kiichtekinij tomin oso okseki taman tein kinejnekij. Xa kinemilijkej: “Nejin moneki yeski noaxka”, “Nikneki nikpiasya” oso “Uelis nikuis nejin tomin uan nikepas satepan”. Sayoj ke maski ijkon titanemiliskej ipa titachtektokej, uan Jehová amo kiyolpaktia porin amo kuali ika tajtouaj itokay (Prov. 30:9). Oksekin akin kichianij kiseliskej se tekit itech nechikol uan amo kiseliaj, semi moyolkokouaj uan hasta amo kitekitiliajok Jehová (Gál. 6:9). ¿Keyej aksa akin kitekitilia Jehová kinemilia kichiuas nejon? Xa porin yolik peua amo yolpakiok ika tein kipia.

3. ¿Toni techmachtia tein kijtoua Filipenses 4:​11, 12?

³ Tinochin uelis tikmatiskej keniuj tiyolpakiskej ika tein tikpiaj. Tatitanil Pablo kijtoj: “Nikmati keniuj niyolpakis itech tein yeski taman tein nikpanos” (xikonlero Filipenses 4:​11, 12). Pablo kisentokaya yolpakia maski tsaktoya keman kijkuiloj nejin. Komo amo ueli tiyolpakij ika tein tikpiaj, tein Pablo kijtoj uan tein kipanok techpaleuis maj tikitakan ke kemaj uelis tiyolpakiskej. ¿Keniuj uelis tiyolpakiskej maski tikpiaskej ouijkayomej? Itech nejin tamachtilis tikitaskej eyi taman tein techpaleuis.

MAJ TIMOTASOJKAMATIKAN

4. ¿Keyej komo timotasojkamatij techpaleuia maj tiyolpakikan? (1 Tesalonicenses 5:18).

⁴ Komo okachi timotasojkamatij, no okachi tiyolpakiskej (xikonlero 1 Tesalonicenses 5:18). Komo yekmelauj tiktasojkamatij porin tikpiaj tein ika timoixpanoltiaj, amo tiknejnekiskej tein amo tikpiaj. Komo tikpatiuitaj tekit tein Jehová techmakatok itech inechikol, okachi tikitaskej keniuj kuali tiktekitiliskej uan amo itech titanemilijtoskej okse tekit tein tikuelitaskiaj tikpiaskej. Jehová kimati ke semi moneki maj timotasojkamatikan, yejua ika Biblia techyolchikaua maj tiktasojkamatilikan keman tiktataujtiaj. Komo ijkon tikchiuaj, tikmachiliskej keniuj ‘Dios techyolseuia kemej amo akin ueli kiajsikamati’ (Filip. 4:​6, 7).

5. ¿Keyej israelitas monekia motasojkamatiskej? (No xikonita taixkopin).

⁵ Maj tikitakan toni kichiujkej israelitas. Miakpa kualankej iuan Jehová porin kitemouayaj takual tein kipiayaj Egipto (Núm. 11:​4-6). Xa katka semi ouij nemiskej ompa taluakyan, sayoj ke semi yolpakiskiaj komo kielnamikiskiaj nochi tein Jehová kichiujka para kinpaleuis. Monekia kielnamikiskej ke Jehová kintatsakuiltij akin nemiaj Egipto ika majtakti taman para kinmakixtis keman kinteltekitiltiayaj uan kintajyouiltiayaj. Uan keman kiskej de ompa, ‘kinkuilijteujkej egipcios nochi tein kipiayaj’ kemej plata, oro uan tasal (Éx. 12:​35, 36). Uan no, Jehová kikuik ichikaualis para kixelos mar Rojo uan ijkon israelitas uelik kincholuijkej isoldados faraón. No mojmostaj kintamakak ika maná keman moajsiaj taluakyan. Komo ijkon, ¿keyej amo kiuelitayaj tein Jehová kinmakaya maj kikuakan? Amo moyolkokojtoyaj porin kinpolouaya takual, ta porin amo motasojkamatiaj.

6. ¿Toni techpaleuis maj timotasojkamatikan?

⁶ ¿Toni techpaleuis maj timotasojkamatikan? Yekinika, maj itech titanemilikan seki taman tein techyolpaktia. Xa uelis tikijkuiloskej se oso ome taman tein ika tiknekij timotasojkamatiskej (Lam. 3:​22, 23). Ojpatika, maj tikintasojkamatilikan oksekin keman techpaleuiskej, uan okachiok maj tiktasojkamatilikan Jehová mojmostaj (Sal. 75:1). Expatika, maj amo timouikakan iniuan akin amo motasojkamatij oso amo teyi kiuelitaj, porin ueliskia no ijkon tikchiuaskej. Sayoj ke komo totasojikniuan motasojkamatij, no timotasojkamatiskej (Deut. 1:​26-28; 2 Tim. 3:​1, 2, 5). Keman nochipa timotasojkamatij amo timoyolkokouaj maski amo tikpiaj tein tiknekij.

7. ¿Toni kipaleuij Aci maj okachi yolpaki?

⁷ Maj tikitakan tein kipanok Aci, se tokniuj siuat akin nemi Indonesia. Yejua kijtoua: “Keman mochiujtoya kokolis COVID-19, peuak nimotayokoltia porin nikitaya ke oksekin okachi kuali yetoyaj ke nejua” (Gál. 6:4). ¿Toni kipaleuij? Yejua kijtoua: “Peuak itech nitanemilia tein Jehová nechmakaya mojmostaj uan nochi tein kuali tein nikseliani porin nipoui itech ixolal. Satepan niktasojkamatiliaya Jehová, uan nejon nechpaleuij maj okachi niyolpaki”. Komo amo tionyolpaki porin tikonpanotok seki taman tein amo kuali, uelis mitsonpaleuis tein kichiuak Aci.

MAJ AMO TIMOUEYIMATIKAN

8. ¿Toni kipanok Baruc?

⁸ Se tiempo, Baruc akin katka itajkuilojkauj Jeremías, motayokoltijtoya porin kipanotoya seki taman. Tekit tein kipiaya semi ouij katka, monekia kipaleuis Jeremías maj kinmatilti israelitas ke Jehová yaya kintatsakuiltiti porin amo kitakamatiaj. Sayoj ke Baruc amo kiitak ke motelnekia tein Jehová kinekia maj kichiua, uan peuak tanemilia itech tein yejua kinekia. Jehová kiluij tanauatijkej Jeremías maj kilui Baruc nejin: “Timotemolijtok miak taman tein ika timoueyichiuas. Amo xiktemook nejon” (Jer. 45:​3-5). Kemej yeskia Jehová kiluijtoskia: “Xiyolpaki ika tein tikpia”. Baruc kitajtolkakik Jehová uan kisentokak kuali iuan mouikak.

9. ¿Toni techmachtia tein kijtoua 1 Corintios 4:​6, 7? (No xikonita taixkopimej).

⁹ Kemansa xa se tokniuj kinemilis ke kinamiki maj kiseli se tekit itech nechikol. Xa ijkon tanemilia porin ueli kichiua miak taman, semi tekiti, oso miak xiujmejya kitekitiliani Jehová. Maski ijkon, xa oksekin kiseliskej tein yejua kinejneki. ¿Toni kipaleuis maj amo moyolkokojto? Uelis tanemilis itech tein tatitanil Pablo kijkuiloj itech 1 Corintios 4:​6, 7 (xikonlero). Nochi tein ueli tikchiuaj uan tekimej tein tikseliaj itech inechikol Dios, tikpiaj porin Jehová techmaka uan amo porin timotaniliaj oso porin technamiki tikseliskej. Jehová techmaka nochi nejin porin techtasojta uan semi yolkuali (Rom. 12:​3, 6; Efes. 2:​8, 9).

10. ¿Toni techpaleuis maj amo timoueyimatikan?

¹⁰ Komo itech titanemiliaj tein kichiuak Jesús techpaleuis maj amo timoueyimatikan. Maj tikelnamikikan ke yejua kinmetspajpakak imomachtijkauan maski kimatia ke katka iKoneuj Dios uan kipiaya ueyi tanauatil. Tatitanil Juan kijkuiloj: “Jesús kimatia ke toTajtsin kimaktilijka nochi uan ke ualeuak imako Dios, uan ke yaya mokepati iuan […] uan peuak kinmetspajpaka imomachtijkauan” (Juan 13:​3-5). Jesús ueliskia kinemilis ke yejua monekia maj kimetspajpakakan. Sayoj ke amo keman kinemilij ke kemej katka iKoneuj Dios monekia kipias se kuali kali, miak tomin oso kuali nemis (Luc. 9:58). Yejua amo moueyimatia uan yejua ika yolpakia ika tein kipiaya. Tel kuali technextilij tein moneki tikchiuaskej (Juan 13:15).

11. ¿Toni kipaleuiani Dennis maj okachi yolpaki?

¹¹ Dennis, se tokniuj takat akin nemi Países Bajos kijtoua ke mochikaua kichiuas kemej Jesús uan amo moueyimatis, sayoj ke kemansa kiouijmaka. Yejua kijtoua: “Keman nikita ke aksa kiselia se tekit tein nejua nikneki nikchiuas, kemansa nikualani porin niknemilia ke nejua nechnamiki maj nechmakakan. Keman nechpanoua nejon, nimomachtia seki tamachtilismej tein kijtoua maj amo se moueyimati. Itech JW Library^®, nikxelojtok miak textos tein kijtoua maj amo se moueyimati, ijkon ueli ijsiujka nikinajsi uan oksepa nikinleroua. No nikaki tanojnotsmej tein nikpia itech nocelular tein ika tajtouaj nejin.a No nikitani ke nochi tekit tein nikchiua, moneki nikchiuas para ika nikueyitalis Jehová uan amo nejua. Jehová techkaujtok maj tikchiuakan seki tekimej, sayoj ke yejua kiita maj kuali mochiua”. Komo kemansa timomachiliaj kemej nejin tokniuj, maj timochikauakan tiyeskij okachi tiyolyemankej. Nejon techpaleuis maj okachi kuali timouikakan iuan Jehová uan maj okachi tiyolpakikan (Sant. 4:​6, 8).

MAJ ITECH TITANEMILIKAN TEIN JEHOVÁ MOTENKAUA

12. ¿Toni tein tikchiaj techpaleuia maj tiyolpakikan? (Isaías 65:​21-25).

¹² Okachi tiyolpakiskej komo itech titanemiliaj tein Jehová motenkaujtok. Itech amatajkuilol Isaías, Jehová techiluia ke kiajsikamati ke semi titajyouiaj, sayoj ke no motenkaua ke kiixpolos nochi nejon (xikonlero Isaías 65:​21-25). Itech xochital tinochin tikpiaskej kualtsitsin kalmej, tekit tein techyolpaktis uan miak takual tein uelik uan tein amo techkokolispeualtis. Amo techtekipachosok maj techpano tein amo kuali tejuan oso tokoneuan (Is. 32:​17, 18; Ezeq. 34:25). Uelis senkis tikneltokaskej ke mochiuas nochi tein Jehová motenkaua.

13. ¿Toni ouijkayomej tikpiaj uan keniuj techpaleuia tein tikchiaj?

¹³ ¿Keyej semi moneki maj itech titanemilikan tein Dios kichiuas amo uejkaua? Porin tinemij itech “tonalmej keman tatamitiya” uan tinochin tikpiaj ouijkayomej (2 Tim. 3:1). Jehová kichiua maj titaxikokan keman techixyekana, techchikaua uan techpaleuia (Sal. 145:14). Uan no, tein Jehová motenkaua techpaleuia maj titaxikokan keman tikpiaj se ouijkayot. Xa semi timotekitiltiaj para maj tochankauan kipiakan toni kikuaskej, toni motaliliskej, uan kani nemiskej, sayoj ke tikmatij ke amo nochipa ijkon yeski porin Jehová motenkaua ke itech xochital techmakas okachi ke tein techpolos (Sal. 9:18; 72:​12-14). Oso xa titajyouijtokej porin timotelkokouaj, tikpiaj depresión oso tixiuejkejya. Sayoj ke, ¿nochipa ijkon tinemiskej uan amo tikchiaskej tein kuali? Amo, porin Dios motenkaua ke itech xochital amo akin kokolispeuasok nion momikilisok (Apoc. 21:​3, 4). Tein Dios motenkaua techpaleuia maj amo tikualantokan nion maj timoyolkokojtokan porin techpanotok tein amo kuali. Uelis tiyolpakiskej uan tiyolseujtoskej maski momikilis se tochankauj, techchiuiliskej tein amo kuali oso techpanotos teisa tein tel amo kuali. ¿Keyej? Porin tikmatij ke maski tikpiaskej tein yeski ouijkayot, ‘sayoj panotikisas’ uan itech xochital nochi tein techtajyouiltia ixpoliuis nochipaya (2 Cor. 4:​17, 18).

14. ¿Toni techpaleuis maj okachi titakuaujtamatikan ke mochiuas tein tikchiaj?

¹⁴ Tein tikchiaj techpaleuia maj tiyolpakikan, sayoj ke ¿keniuj uelis tikneltokaskej ke mochiuas tein Jehová motenkaua? Maj itech titanemilikan aksa akin yetok ichan uan tayouayan, yejua moneki kixotaltis luz para tachias, no ijkon, tejuan moneki tikchiuaskej tein techpaleuis maj tiknemilikan ke tietokejya itech xochital. Komo semi timotekipachouaj porin amo techajsi tomin, uelis tiknemiliskej keniuj tinemiskej keman amo monekisok tomin uan amo akinok yeski pobre. Komo timoyolkokojtokej porin amo tikselijkej se tekit tein tiknekiaj, uelis tiknemiliskej keniuj nejin tekimej amo semi tayekantoskejok keman tiktekitilijtoskej Jehová tel miak xiujmej uan amo titajtakolejkejok yeski (1 Tim. 6:19). Xa axkan tikpiaj miak ouijkayomej uan yejua ika amo ueli itech titanemiliaj keniuj tinemiskej satepan, sayoj ke komo okachi itech titanemiliaj tein Jehová motenkaujtok, techpaleuis maj amo semi techtekipacho ouijkayomej tein tikpiaj.

15. ¿Toni mitsonmachtia tein kijtoua Christa?

¹⁵ Maj tikitakan tein techmachtia Christa, isiuatsin Dennis akin ika titajtojkej itech párrafo 11. Yejua kijtoua: “Nikpia se kokolis tein kichiua maj amo ueli ninejnemi uan moneki nikuis silla de ruedas. Nochipa moneki niuetstos uan nochipa nechkokojtok teisa, tapajtijkej nechiluij ke moita ke amo nipajtis, sayoj ke nejua niman niknemilij: ‘Yejua amo kimati tein nejua nikchia maj mochiua’. Nochipa itech nitanemilia tein nikchia uan nejon nechpaleuia maj niyolseujto. Axkan sayoj moneki nitaxikos porin amo nipajtisok, sayoj ke itech xochital niyolpakis porin kualtsin ninemis!”.

“AKIN KIMOJKATOKAJ AMO TEYI KINPOLOUA”

16. ¿Keyej David kijtoj ke ‘akin kimojkatokaj Jehová amo teyi kinpoloua’?

¹⁶ Maski tiyolpakij ika tein tikpiaj, ipa tikpanouaj ouijkayomej. Maj itech titanemilikan tekiuaj David, eyi ikoneuan momikilijkej, sekin kitakajkayauilijkej ke kichiujka tein amo kuali, itasojikniuan kikaujkej uan se tekiuaj akin amo katka yolkuali kitokatinemia miak xiujmej para kimiktis. Maski kipanotoya ouijkayomej, yolpakia, uan hasta kijtoj nejin de Jehová: “Akin kimojkatokaj amo teyi kinpoloua” (Sal. 34:​9, 10). ¿Keyej ijkon kijtoj? Porin maski kimatia ke Jehová amo kiajchiuiliskia kuejmolmej tein kipiaya, nochipa kimakaskia tein kipolouaya (Sal. 145:16). Ijkon kemej David, tejuan no tikmatij ke keman tikpiaskej ouijkayomej Jehová nochipa techpaleuis maj titaxikokan, yejua ika uelis tiyolseujtoskej uan tiyolpakiskej maski tikpiaskej ouijkayomej.

17. ¿Keyej tikonneki tionyolpakis maski tikonpia ouijkayomej?

¹⁷ Jehová kineki maj tiyolpakikan maski tikpiaj ouijkayomej (Sal. 131:​1, 2). Axkan tikmatijya toni moneki tikchiuaskej para tiyolpakiskej, yejua ika maj timochikauakan timotasojkamatiskej, amo timoueyimatiskej uan itech titanemiliskej tein tikchiaj maj mochiua. Uan uelisya tikijtoskej: “Nikmati keniuj niyolpakis” (Filip. 4:11).