TAMACHTILIS 35
NEKUIKATIL 121 Moneki tikmatiskej timotsakuiliskej
¿Keniuj uelis tikixtopeuaskej tein amo kuali tein tiknejnekij?
“Amo xikauakan maj tajtakol kisentoka kiixyekana kemej tekiuaj namonakayo tein ueli miki [para] nankichiuaskej tein kinejneki namonakayo” (ROM. 6:12).
TEIN TIMOMACHTISKEJ
Tikitaskej toni techpaleuis keman amo kuali timomachiliaj porin tiknejnekij tikchiuaskej tein amo kuali uan keniuj uelis tikixtopeuaskej.
1. ¿Toni techpanoua tinochin?
¿KEMANSA tikonnejnekini tikonchiuas teisa tein Jehová amo kiyolpaktia? Komo ijkon, xa tikonnemilia ke sayoj tejua ijkon mitsonpanoua uan yejua ika tel amo kuali tionmomachilia. Sayoj ke Biblia kijtoua: “Nochi tein namechyoltilana para ximotajtakolmakakan no yejua tein kinyoltilana nochin” (1 Cor. 10:13). Nejin kinextia ke amo sayoj tejua ijkon mitsonpanoua, ta oksekin tokniuan no moneki kiixtopeuaskej tein kinejnekij. Xikonelnamiki ke Jehová mitsonpaleuis ueli xikonixtopeua tein amo kuali.
2. ¿Toni xa kinejnekij kichiuaskej sekin tokniuan uan sekin akin momachtijtokej Biblia? (No xikonita taixkopin).
2 Biblia no kijtoua: “Sejse kiixnamiki se ouijkayot keman tein kinejneki kiyoltilana uan kitanejnektia” (Sant. 1:14). Nejin kijtosneki ke amo nochin kinejnekij kichiuaskej sayoj se taman. Sekin tokniuan uan sekin akin momachtijtokej Biblia xa kinejnekij auilnemiskej iuan aksa, uan xa kinekij ijkon kichiuaskej iuan se inintakaikniuj oso ininsiuaikniuj. Sekin xa amo kiitajok pornografía sayoj ke oksepa kiitasnekij, uan oksekin xa kinekij oksepa modrogaroskej oso tauanaskej. Tinochin kemansa timomachilianij kemej tatitanil Pablo, akin kijkuiloj: “Keman nikneki nikchiuas tein kuali, tein amo kuali notech yetok” (Rom. 7:21).
Xa peuas tiknejnekiskej tikchiuaskej tein amo kuali kampa yeski uan keman yeski. (Xikonita párrafo 2).c
3. ¿Toni uelis kinemilis aksa akin nochipa kinejnektok kichiuas se taman tein amo kuali?
3 Xa tikonnemilia ke se tonal amo uelisok tikonixtopeuas se taman tein amo kuali porin nochipa tikonnejnektok tikonchiuas, oso xa tikonnemilia ke amo tikonyolpaktiaok Jehová porin tikonnejneki tikonchiuas tein amo kuali. ¡Sayoj ke amo melauj tein tikonnemilia! Itech nejin tamachtilis tikitaskej keyej tikijtouaj nejon, uan tiknankiliskej ome netajtanilmej: 1) ¿keyej xa ijkon titanemiliaj? uan 2) ¿keniuj uelis tikixtopeuaskej tein amo kuali tein tiknejnekij?
¿TONI KINEKI SATANÁS MAJ TIKNEMILIKAN?
4. 1) ¿Toni kineki Satanás maj tiknemilikan? 2) ¿Keyej tikmatij ke uelis tikixtopeuaskej tein amo kuali tein tiknejnekij?
4 Satanás kineki maj tiknemilikan ke amo uelis tikixtopeuaskej tein tiknejnekij. Jesús kimatia ke Satanás kitemoskia maj timotajtakolmakakan, yejua ika techmachtij maj tiktajtanikan Jehová nejin: “Amo xikaua maj timotajtakolmakakan, ta xitechmakixti den Amokuali” (Mat. 6:13). Satanás kijtoj ke amo tiktakamatiskej Jehová keman tiknejnekiskej tikchiuaskej tein amo kuali (Job 2:4, 5). Amo kinamikia maj Satanás kijto nejin porin yejua niman kichiuak tein kinejnekia uan amo kitakamatik Jehová. Kinemilia ke tejuan amo no tiktakamatiskej Jehová keman tiknejnekiskej tikchiuaskej tein amo kuali. Uan hasta no kinemilij ke iKoneuj Dios akin amo tajtakolej katka kichiuaskia tein amo kuali keman kiyejyekoskia (Mat. 4:8, 9). Sayoj ke, ¿uelis tikixtopeuaskej tein amo kuali tein tiknejnekij? Kemaj, porin tatitanil Pablo kijtoj: “Nikpia chikaualis para nikixnamikis nochi porin Dios nechmaka chikaualis” (Filip. 4:13).
5. ¿Keyej tikneltokaj ke Jehová kimati ke uelis tikixtopeuaskej tein amo kuali tein tiknejnekij?
5 Jehová amo tanemilia kemej Satanás, ta yejua kimati ke uelis tikixtopeuaskej tein amo kuali tein tiknejnekij. ¿Keniuj tikmatij? Porin Jehová kijtoj ke tel miakej akin amo kikauaskej, makisaskej keman mochiuas tetsaujkatajyouilis. ¿Toni technextilia nejin? Ke Jehová akin amo takajkayaua kijtoua ke amo sayoj sekin, ta tel miakej kalakiskej itech xochital uan ‘takentiaskej ika ueyak tasal tein pochiktik’, nejin kijtosneki ke Jehová kinitas ke chipaujkej (Apoc. 7:9, 13, 14). Tikmatij ke Jehová kineltoka ke uelis tikixtopeuaskej tein amo kuali tein tiknejnekij.
6, 7. ¿Toni no kineki Satanás maj tiknemilikan?
6 Satanás no kineki maj tiknemilikan ke amo keman tikyolpaktiskej Jehová uan amo uelis tinemiskej nochipaya porin tiknejnekij tikchiuaskej tein amo kuali. Sayoj ke, ¿keyej kineki maj tiknemilikan nejon? Porin kineki maj titanemilikan kemej yejua, Satanás amo keman uelisok kiyolpaktis Jehová, amo keman uelis nemis nochipaya uan senkis ixpoliuis (Gén. 3:15; Apoc. 20:10). Yejua technexikoluia porin tejuan uelis tinemiskej nochipaya uan yejua amo. Yejua ika kitemoua maj tiknemilikan ke amo no uelis tinemiskej nochipaya. Sayoj ke tejuan amo titanemiliaj kemej Satanás, porin tejuan kemaj tikchiaj tein kuali. Uan Biblia kijtoua ke Jehová kineki techpaleuis maj tikyolpaktikan uan maj tinemikan nochipaya. Dios “amo kineki maj nion akin ixpoliui, ta maj nochin moyolpatakan” (2 Ped. 3:9).
7 Tikitakejya ke yejua Satanás akin kineki maj tiknemilikan ke amo uelis tikixtopeuaskej tein tiknejnekij, oso ke amo uelis tikyolpaktiskej Jehová porin tiknejnekij tikchiuaskej tein amo kuali. Komo nochipa tikonelnamiki nejin, mitsonpaleuis amo xikonnemili tein Satanás kineki (1 Ped. 5:8, 9).
¿TONI UELIS TIKNEMILISKEJ PORIN TITAJTAKOLEJKEJ?
8. ¿Toni no uelis kichiuas maj tiknemilikan ke amo uelis tikyolpaktiskej Dios oso ke amo uelis tikixtopeuaskej tein tiknejnekij? (Salmo 51:5; no xikonita “Tein okachi momelaua”).
8 Amo sayoj Satanás kichiua maj tiknemilikan ke amo uelis tikixtopeuaskej tein amo kuali tein tiknejnekij oso ke amo uelis tikyolpaktiskej Jehová. Tajtakol tein Adán uan Eva techpanoltilijkej no uelis kichiuas maj ijkon titanemilikan (Job 14:4; xikonlero Salmo 51:5).a
9, 10. 1) ¿Keniuj momachilijkej Adán uan Eva keman tajtakolchiujkej? (No xikonita taixkopin). 2) ¿Keniuj timomachiliaj tejuan porin titajtakolejkej?
9 Xikonnemili keniuj momachilijkej Adán uan Eva keman tajtakolchiujkej. Satepan ke amo kitakamatkejok Jehová, amo kinekiaj maj kinita uan motakentijkej. ¿Keyej ijkon kichiujkej? Amaix Perspicacia para comprender las Escrituras kimelaua ijkon: “Tajtakol kichiuak maj mopinaujmatikan, maj moteltekipachokan uan maj amo kuali momachilikan”. Adán uan Eva amo keman oksepa ueliskia kuali mouikaskej iuan Jehová. Maski tein yeski kichiuaskiaj ipa mopinaujmatiskiaj, moteltekipachoskiaj uan amo kuali momachiliskiaj porin katkaj tajtakolejkej.
10 Tejuan amo senkis techpanotok kemej Adán uan Eva. Yejuan amo kinpaleuia inemilis Jesús tein kitemakak, sayoj ke tejuan kemaj techpaleuia porin ueli techtapojpoluiliaj totajtakoluan uan ueli timouikaj iuan Dios (1 Cor. 6:11). Maski ijkon ipa titajtakolejkej uan yejua ika no timopinaujmatij, semi timotekipachouaj uan amo kuali timomachiliaj. Biblia kijtoua ke tajtakol nochin kinchiualtia tein amo kuali maski amo nochin tajtakolchiuaj “kemej Adán” (Rom. 5:14). Sayoj ke maj amo tiknemilikan ke amo uelis tikchiuaskej tein kuali uan ke amo keman uelis tikyolpaktiskej Jehová. ¿Toni techpaleuis maj amo ijkon titanemilikan?
Satepan ke Adán uan Eva tajtakolchiujkej, mopinaujmatkej, moteltekipachojkej uan amo kuali momachilijkej. (Xikonita párrafo 9).
11. Maski tiknemiliskej ke amo uelis tikixtopeuaskej tein amo kuali, ¿toni kijtoua Romanos 6:12 ke uelis tikchiuaskej?
11 Kemej titajtakolejkej, xa kemansa timoyoliluiskej ke amo uelis tikixtopeuaskej tein tiknejnekij uan ke ipa tikchiuaskej. ¡Maj amo ijkon titanemilikan! Maj tikelnamikikan ke Biblia tamachtia ke amo moneki tikauaskej maj tajtakol kisentoka techixyekana kemej “tekiuaj” (xikonlero Romanos 6:12). Nejin kijtosneki ke uelis tikixtaliskej amo tikchiuaskej tein tiknejnekij (Gál. 5:16). Jehová kimati ke uelis tikixtopeuaskej tein amo kuali uan yejua ika techiluia maj ijkon tikchiuakan (Deut. 30:11-14; Rom. 6:6; 1 Tes. 4:3). Nochi nejin kinextia ke kemaj uelis tikixtopeuaskej tein amo kuali maski tiknejnekiskej tikchiuaskej.
12. ¿Toni amo moneki tikchiuaskej komo timoyoliluiaj ke amo uelis tikyolpaktiskej Jehová, uan keyej?
12 Kemej titajtakolejkej, xa no uelis timoyoliluiskej ke amo uelis tikyolpaktiskej Jehová porin tiknejnekij tikchiuaskej tein amo kuali. ¡Maj amo ijkon titanemilikan! ¿Keyej? Porin Biblia tamachtia ke Jehová kimati ke tiyolij titajtakolejkej (Sal. 103:13, 14). Yejua tel kuali techixmati, uan hasta kimati keman tajtakol kichiua maj tiknejnekikan tikchiuaskej tein amo kuali (1 Juan 3:19, 20). Komo tiksentokaj tikixtopeuaj tein tiknejnekij uan amo tikchiuaj, Jehová techitas ke tichipaujkej. ¿Keyej uelis tikneltokaskej nejin?
13, 14. ¿Keniuj tikmatij ke uelis tikyolpaktiskej Jehová maski tiknejnekij tikchiuaskej tein amo kuali?
13 Biblia kijtoua ke semi taman maj sayoj se kinejneki se kichiuas tein amo kuali uan maj se kichiua. Kemansa ipa tiknejnekiskej tikchiuaskej tein amo kuali, sayoj ke uelis tikixtaliskej amo tikchiuaskej. Ne uejkauj sekin akin nemiaj Corinto auilnemiaj iniuan inintakaikniuan achto ke mochiuaskiaj tokniuan. Tatitanil Pablo kijtoj: “Nansekimej nankichiuayaj nejon”. Sayoj ke, ¿kijtosneki nejon ke amo keman oksepa kinejnekkej ijkon auilnemiskej? Xa amo, porin sekin semi kinouijmaka amo kinejnekiskejok kichiuaskej nejon. Sayoj ke tokniuan akin kimatiaj motsakuiliskej uan amo kichiuayaj tein kinejnekiaj, Jehová kinitaya ke ‘chipaujkej’ uan kiyolpaktiayaj (1 Cor. 6:9-11).
14 No ijkon uelis tikonchiuas, tein yeski taman tein tikonnejnekis ipa uelis tikonixtopeuas. Maski amo uelis tikonchiuas amo keman xikonnejnekiok tein amo kuali, uelis tionmotsakuilis uan amo tikonchiuas tein ‘kinejneki monakayo’ uan ‘tein tikonnemilia’ (Efes. 2:3). Sayoj ke, ¿keniuj uelis tikonixtopeuas tein tikonnejneki? Maj tikitakan.
¿KENIUJ UELIS TIKONIXTOPEUAS TEIN AMO KUALI?
15. Komo amo tiknekij tikchiuaskej tein amo kuali tein tiknejnekij, ¿keyej moneki tikmatiskej toni kichiuas maj titajtakokan?
15 Para amo tikonchiuas tein amo kuali tein tikonnejneki, moneki tikonmatis toni uelis kichiuas xiontajtako. Yejua ika moneki tionmoyekpias para amo ‘sayoj tionmokajkayaujtos’ (Sant. 1:22). Aksa akin kiuelilia tayil ueliskia kinemilis ke amo teyi kipanos porin oksekin okachi tayij ke yejua. Oso aksa akin kinejneki kiitas pornografía uelis kintajtakoltis oksekin uan kijtos “Nejua amo niknejnekiskia nikitas nejon komo nosiuatsin okachi nechtasojtaskia”. Sayoj ke akin ijkon tanemilia okachi niman kichiua tein kinejneki. Yejua ika amo xikontajtakolti oksekin tein amo kuali tein tikonchiuasneki porin tejua tikonixpejpena toni tikonchiua (Gál. 6:7).
16. ¿Toni mitsonpaleuis senkis xikonixtopeua tein amo kuali?
16 Amo sayoj moneki tikonmatis toni uelis kichiuas xiontajtako, ta no moneki tikonchiuas tein mitsonpaleuis senkis xikonixtopeua tein tikonnejneki (1 Cor. 9:26, 27; 1 Tes. 4:4; 1 Ped. 1:15, 16). Xikonnemili toni tein amo kuali okachi mitsonyolnotsa uan toni kichiua okachi xikonnejneki nejon. Xa itech se hora den tonal okachi tikonnejneki tikonchiuas tein amo kuali, xa keman tionsioujtok oso keman tel youakya. Desde achtook xikonnemili toni tikonchiuas para uelis tikonixtopeuas keman ijkon mitsonpanos. Komo desde achtook tikonixtalia toni tikonchiuas amo tiontajtakolchiuas (Prov. 22:3).
17. ¿Toni techmachtia tein kichiuak José? (Génesis 39:7-9; no xikonita taixkopimej).
17 Maj itech titanemilikan tein kichiuak José. Keman isiuauj Potifar kinekia maj iuan moteka yejua niman kiluij ke amo (xikonlero Génesis 39:7-9). Tein kichiuak kinextia ke desde achtook ke nejon siuat kiteliluiskia maj iuan moteka, José ipa kiixtalijkaya ke amo motekaskia iuan isiuatsin okse takat. ¿Toni mitsonmachtia nejin? Ke amo tiontajtakolchiuas komo desde achtook tikonixtalia tikonchiuas tein kuali. Komo ijkon tikonchiua, niman uelis tikonixtopeuas tein amo kuali porin ipa tikonixtalijkaya.
Niman xikonixtopeua tein amo kuali ijkon kemej kichiuak José. (Xikonita párrafo 17).
NOCHIPA XIKONITA OX TIKONCHIUJTOK TEIN KUALI
18. ¿Toni no mitsonpaleuis amo xiontajtakolchiua? (2 Corintios 13:5).
18 Para amo tiontajtakolchiuas no moneki nochipa tikonitas ox tikonixtopeujtok tein amo kuali (xikonlero 2 Corintios 13:5). Ijkon uelis tikonmatis ox moneki tikonpatas tein tikonnemilia oso tein tikonchiua. Satepan ke tikonixtopeuas tein amo kuali, xionmotajtani: “¿Niman nikixtopeuak?”. Komo amo ijkon tikonchiuak amo xionmotekipacho, uan xikonnemili toni uelis tikonchiuas para okachi ijsiujka tikonixtopeuas satepan. Uelis tionmotajtanis nejin: “Keman niknemilijtok tein amo kuali, ¿ueli niman nikpata tein niknemilia? Tein nikita, tein nikleroua uan tein nikaki, ¿kichiua maj okachi nechouijmaka nikixtopeuas tein amo kuali? ¿Niman nitachia okseko keman nesij taixkopimej kampa auilnemij? ¿Nikajsikamati ke okachi kuali komo niktakamati Jehová maski semi moneki nimotsakuilis para amo nitajtakolchiuas?” (Sal. 101:3).
19. ¿Keyej semi moneki maj amo tikchiuakan nion teyi tein tiknemiliskej ke amo techijtakos?
19 Xikonelnamiki ke ‘amo ueli se takuaujtamati itech se iyolo porin ijsiujka techiualtia teisa’ (Jer. 17:9). Uan Jesús kijtoj ke “itech iyolo aksa ualeua amo kuali tanemililmej” (Mat. 15:19). Yejua ika amo xikonnemili ke uelis tikonchiuas teisa tein tikonita ke amo mitsonijtakos. Xa aksa akin amo kiitaok pornografía ueliskia kinemilis ke uelis kiitas taixkopimej tein kichiua maj se kinejneki se auilnemis uan ke amo teyi kipanos porin amo senkis xipetstikej. Oso xa kinemilis nejin: “Komo amo nikchiua ta sayoj niknemilia ke niauilnentok amo teyi panos”. Komo ijkon tiontanemilia kinextia ke ‘tikonnenemilijtok keniuj tikonchiuas tein kinejneki monakayo’ (Rom. 13:14). ¿Toni mitsonpaleuis amo ijkon xiontanemili? Xikonelnamiki ke komo tikonixtalia tikonchiuas seki taman tein nesi ke amo mitsonijtakos, satepan uelis kichiuas xiontajtako.b Yejua ika nion tepitsin xikonnemili ke uelis tikonchiuas seki taman tein tikonitas ke amo mitsonijtakos.
20. ¿Keniuj tinemiskej itech xochital, uan akoni techpaleuijtok axkan maj tikchiuakan tein kuali?
20 Tikitakejya ke Jehová techpaleuia maj tikixtopeuakan tein amo kuali tein tiknejnekij. Uan no, kemej Jesús motemakak por tejuan, uelis tinemiskej nochipaya itech xochital. Ijkuak, okachi tiyolpakiskej tiktekitiliskej Jehová porin amo tiknejnekiskejok tikchiuaskej tein amo kuali. Kemej ayamo mochiua tein tikchiaj, maj tikelnamikikan ke komo timochikauaj amo tikchiuaskej tein tiknejnekij, Jehová techpaleuis maj tikixtopeuakan tein amo kuali.
NEKUIKATIL 122 Maj tiksentokakan tiktekitilikan Dios
a TEIN OKACHI MOMELAUA: Kemansa Biblia kimelaua ke tajtakol kijtosneki se kichiuas tein amo kuali kemej se tachtekis, se auilnemis oso se temiktis (Éx. 20:13-15; 1 Cor. 6:18). Sayoj ke, kemansa kijtosneki tajtakol tein tikpiaj keman tiyolij maski ayamo tikchiujtokej tein amo kuali.
b Xikonita keniuj okichpil akin ika tajtoua Proverbios 7:7-23, kiixtalij kichiuas seki taman tein amo kuali kinemilij uan yejua ika auilnemik.
c TEIN NESI ITECH TAIXKOPIMEJ: Opochmakopa: Keman se tokniuj takat yetok kampa kinamakaj kafen, kinita ome takamej akin monextiliaj ke motasojtaj. Yekmakopa: Se tokniuj siuat kinita omen akin tachichintokej.