¿Toni moneki tikchiuaskej keman techchiuiliskej tein amo kuali?

1, 2. ¿Toni kichiuaj miakej keman yejuan oso oksekin kinchiuiliaj tein amo kuali, uan toni xa timotajtaniskej?

AXKAN miakej kinchiuiliaj tein amo kuali, kintajyouiltiaj porin amo kipiaj tomin, okseko kayomej, porin taman kemej moitaj oso okseki taman. Miakej tajyouiaj porin akin tominpiaj oso akin taixyekanaj sayoj kinekij kipiaskej okachi tomin. Tein kichiuaj uelis techtajyouiltis tejuan oso akin tikinixmatij.

² Tinochin tiknekij tiyolseujkanemiskej uan maj oksekin yolkualmej touan. Yejua ika, miakej amo kiuelitaj keman yejuan oso oksekin kinchiuiliaj tein amo kuali. Sekin kichiuaj miak taman para kiyektaliskej kuejmolmej tein mochiua itech ininaltepeuj oso itech taltikpak. Kinixnamikij tekiuanij uan amo kichiuaj tein tanauatiaj, oso keman kikakij ke aksa kineki kiyektalis kuejmolmej tavotarouaj para maj yejua taixyekana. Sayoj ke akin tiktekitiliaj Jehová tikmatij ke ‘amo tipouij iniuan akin nemij nikan taltikpak’ uan ke iTaixyekanalis Dios kichiuas maj amo akinok kichiuilikan tein amo kuali (Juan 17:16). Maski ijkon, ipa timoyolkokouaj uan amo tikuelitaj keman tikitaj ke oksekin kintajyouiltiaj. Yejua ika xa timotajtaniskej: “¿Toni moneki nikchiuas? ¿Uelis nitapaleuis para maj amo mochiuaok tein amo kuali?”. Itech nejin tamachtilis tiknankiliskej nejin netajtanilmej. Sayoj ke achto tikitaskej keniuj momachiliaj Jehová uan Jesús keman kiitaj ke techtajyouiltiaj.

JEHOVÁ UAN JESÚS NOCHIPA KICHIUAJ TEIN KUALI

3. ¿Keyej amo tikuelitaj maj tejuan oso oksekin techchiuilikan tein amo kuali? (Isaías 5:7).

³ Biblia kijtoua keyej amo tikuelitaj maj tejuan oso oksekin techchiuilikan tein amo kuali. Ijkon timomachiliaj porin Jehová techchijchiuak kemej yejua tamati, uan yejua “kineki maj mochiua tein kuali uan keman tamelaua amo techichikouia” (Sal. 33:5; Gén. 1:26). Jehová amo akin kichiuilia tein amo kuali uan amo no kineki maj tikinchiuilikan tein amo kuali oksekin (Deut. 32:​3, 4; Miq. 6:8; Zac. 7:9). Keman tanauatijkej Isaías nemia, Jehová kikakik keniuj miakej israelitas kitsajtsiliayaj porin oksekin israelitas kinchiuiliayaj tein amo kuali (xikonlero Isaías 5:7). Yejua kintatsakuiltij akin amo kitakamatiaj iTanauatil uan kinchiuiliayaj oksekin tein amo kuali (Is. 5:​5, 13).

4. ¿Keniuj momachilia Jesús keman kiita ke oksekin kinchiuiliaj tein amo kuali? (No xikonita taixkopin).

⁴ Ijkon kemej Jehová, Jesús nochipa kichiua tein kuali yetok uan amo kiuelita keman kiita ke kinchiuiliaj tein amo kuali oksekin. Se tonal, Jesús kiiknelij uan kipajtij se takat akin amo uelia kioliniaya se imay. Sayoj ke keman akin taixyekanayaj itech taneltokalis kiitakej tein kichiuak, semi kualankej. Kijtojkej ke Jesús amo kitakamattoya tanauatil den tonal sábado, uan amo yolpakkej maj nejon takat amo tajyouianiok. ¿Keniuj momachilij Jesús? Yejua “kualanik uan semi moyolkokoj” porin nejon takamej semi yoltakuaujkej katkaj (Mar. 3:​1-6).

5. ¿Keyej amo moneki tikualaniskej keman mochiua tein amo kuali?

⁵ Jehová uan Jesús kualanij keman kiitaj ke oksekin kinchiuiliaj tein amo kuali, yejua ika amo tajtakol komo no techkualantia (Efes. 4:26 uan nota de estudio “Cuando se enojen”). Sayoj ke maj tikelnamikikan ke nenkaj komo tikualanij porin amo uelis tikchiuaskej maj amo kinchiuilikanok tein amo kuali oksekin. Uan komo tiksentokaj tikualantokej, uelis tikokolispeuaskej oso timoteltayokoltiskej (Sal. 37:​1, 8; Sant. 1:20). ¿Toni moneki tikchiuaskej keman tejuan oso oksekin techchiuiliskej tein amo kuali? Tein kichiuak Jesús uelis techpaleuis.

¿TONI KICHIUAK JESÚS KEMAN KIITAK KE KINTAJYOUILTIAYAJ OKSEKIN?

6. ¿Toni tein amo kuali kinchiuiliayaj oksekin keman Jesús yetoya nikan taltikpak? (No xikonita taixkopin).

⁶ Keman Jesús yetoya nikan taltikpak kiitak keniuj miakej kintajyouiltiayaj. Kimatia ke akin taixyekanayaj itech taneltokalis kinnauatiayaj oksekin maj kichiuakan miak taman tein semi ouij (Mat. 23:​2-4). No kimatia ke taixyekananij romanos kinteltajyouiltiayaj oksekin. Miakej judíos amo kinekiajok maj romanos kinixyekananij, uan sekin hasta mosenpaleuijkej para kinixnamikiskej. Sayoj ke Jesús amo keman tapaleuij maj kiixpatakan tekiuaj. Uan keman kimatik ke sekin kinekiaj maj mochiua inintekiuaj, Jesús niman yajki (Juan 6:15).

7, 8. ¿Keyej keman Jesús yetoya nikan taltikpak amo kinemilij kiixpolos nochi tein techtajyouiltia? (Juan 18:36).

⁷ Jesús amo keman mokalakij itech política para kiyektalis kuejmolmej tein onkayaj. ¿Keyej? Porin kimatia ke amo akin kinamiki maj taixyekana uan amo akin uelis kuali taixyekanas (Sal. 146:3; Jer. 10:23). Uan no, amo akin uelis kiixpolos tein kichiua maj titajyouikan. Ijkon panoua porin Satanás taixyekana nikan taltikpak, yejua tel amo yolkuali uan kichiua maj miakej no tetajyouiltikan (Juan 8:44; Efes. 2:2). Uan maski sekin yolkualmej, amo uelis kiyektaliskej kuejmolmej porin amo nochipa kichiuaj tein kuali (Ecl. 7:20).

⁸ Jesús kimatia ke sayoj iTaixyekanalis Dios uelis kiixpolos nochi tein techtajyouiltia. Yejua ika kikuik itiempo uan ichikaualis para ‘kiteixmatiltis kuali tanauatilmej’ (Luc. 8:1). Jesús kiniluij akin ‘semi kinejnekiaj maj mochiua tein kuali yetok’ ke Dios senkis kiixpolos nochi tein amo kuali (Mat. 5:6 uan nota de estudio; Luc. 18:​7, 8). Nion se tekiuaj uelis kiixpolos tein amo kuali, ta sayoj iTaixyekanalis Dios, uan nejin “amo poui nikan taltikpak” (xikonlero Juan 18:36).

XIKONCHIUA KEMEJ JESÚS KEMAN KINTAJYOUILTISKEJ OKSEKIN

9. ¿Keyej tikonneltoka ke sayoj iTaixyekanalis Dios kiixpolos tein techtajyouiltia?

⁹ Tinemij itech “tonalmej keman tatamitiya” yejua ika okachi titajyouiaj ke keman Jesús yetoya nikan taltikpak. Sayoj ke yejuan Satanás uan akin kinixyekana akin kisentokaj techtajyouiltiaj (2 Tim. 3:​1-5, 13; Apoc. 12:12). Ijkon kemej Jesús, tejuan no tikmatij ke sayoj iTaixyekanalis Dios kiixpolos nochi tein techtajyouiltia. Uan kemej tikpaleuiaj sayoj nejon taixyekanalis, amo titakuejmolchiuaj uan amo no tikneltokaj ke tekiuanij kinixpoloskej akin tetajyouiltiaj. Maj tikitakan tein kipanok se tokniuj siuat akin monotsa Stacy.a Achto ke momachtiskia Biblia, yaya iniuan oksekin para takuejmolchiuaskej porin amo kinekiajok maj kinchiuilikan tein amo kuali. Sayoj ke satepan peuak kinemilia ox yekmelauj tapaleuiaya tein kichiujtoya. Yejua kijtoua: “Kemansa niknemiliaya ox nitapaleuijtoya maj moyektali kuejmolmej. Sayoj ke axkan kuali nikmati ke sayoj iTaixyekanalis Dios kiyektalis nochi. Nikmati ke nejua amo ueli nikixpoloua tein techtajyouiltia, ta sayoj Jehová uelis kichiuas” (Sal. 72:​1, 4).

10. Kemej kijtoua Mateo 5:​43-48, ¿keyej amo titapaleuiaj maj kiixpatakan se tekiuaj oso maj kipatakan tanauatilmej? (No xikonita taixkopin).

¹⁰ Miakej mosentiliaj iniuan oksekin akin kinekij kiixpataskej se tekiuaj, kemansa hasta tel kualanij uan amo kitakamatijok tanauatilmej uan kintajyouiltiaj oksekin. Sayoj ke Jesús amo tamachtij maj tikchiuakan nejon (Efes. 4:31). Se tokniuj takat akin monotsa Jeffrey, kijtoua: “Nikitani ke miakej akin takuejmolchiuaj niman kualanij, peua tachtekij uan kichiuaj tein amo kuali, uan hasta kinkojkokouaj oksekin”. Sayoj ke Jesús technextilia ke moneki tikintasojtaskej nochin, hasta akin amo tanemiliaj kemej tejuan oso techixnamikij (xikonlero Mateo 5:​43-48). Uan akin tiktojtokaj Jesús timochikauaj tikchiuaskej kemej yejua.

11. ¿Keyej kemansa techouijmakas tikchiuaskej kemej Jesús?

¹¹ Maski tikmatij ke iTaixyekanalis Dios kiixpolos nochi tein techtajyouiltia, xa ipa techouijmakas tikchiuaskej kemej Jesús keman techchiuiliskej tein amo kuali. Ijkon kipanok se tokniuj siuat akin monotsa Janiya, yejua kichiuilijkej tein amo kuali porin taman kemej ixtamatia. Yejua kijtoua: “Tein nechiluiayaj semi nechyolkokouaya uan kemej nikualania, niknekia maj no tajyouikan. Yejua ika niknemilij nikinpaleuis sekin akin takuejmolchiuayaj porin amo no kiuelitayaj maj kinchikoitakan uan maj kinchiuilikan tein amo kuali. Niknemiliaya ke komo nikinpaleuiaya okachi kuali nietoskia”. Sayoj ke satepan kiitak ke monekia kipatas kemej tanemiliaya. Yejua kijtoua: “Nikitak ke amo semi nitakuaujtamatiaok iuan Jehová uan peuak niknemilia ke yejuan ueliskia kichiuaskej maj amo akin techikoitaok. Yejua ika, nikixtalij amo nimouikasok iniuan akin kichiuayaj nejon”. Keman tikitaj ke tejuan oso oksekin techchiuiliaj tein amo kuali, ipa tikualanij. Sayoj ke amo moneki titelkualaniskej uan tikelnamikiskej ke tejuan amo tikchiuaj kemej akin nemij nikan taltikpak (Juan 15:19).

12. ¿Keyej moneki kuali tikixpejpenaskej tein tikitaj, tiklerouaj uan tikakij?

¹² ¿Toni techpaleuis maj amo tikualanikan keman tejuan oso oksekin techchiuiliskej tein amo kuali? Maj kuali tikixpejpenakan tein tikitaj, tiklerouaj uan tikakij. Seki taman tein nesi itech internet sayoj ika temojmoujtiaj uan kinijijtouaj tekiuanij. Miakpa, akin kitematiltiaj tanauatilmej sayoj kijtouaj tein yejuan kinemiliaj uan amo tein yekmelauj panotok. Uan maski xa kijtoskej tein melauj, tejuan amo ueli tikpataj nion teyi maski miakpa tikleroskej. Sayoj ke komo tiksentokaj tikitaj, tiklerouaj oso tikakij tein moijtoua, xa okachi timotekipachoskej, timoyolkokoskej uan tikualaniskej (Prov. 24:10). Uan uelis tikelkauaskej ke sayoj iTaixyekanalis Dios uelis tayektalis.

13. ¿Keniuj techpaleuia komo mojmostaj tiklerouaj Biblia?

¹³ No techpaleuis komo mojmostaj tiklerouaj Biblia uan itech titanemiliaj. Se tokniuj siuat akin monotsa Alia semi moyolkokoj uan kualanik keman kiitak ke sekin tetajyouiltiayaj uan amo kintatsakuiltiayaj. Yejua kijtoua: “Monekik nikelnamikis ke sayoj Jehová uelis kiyektalis nejin kuejmolmej. No nikleroj Job 34:​22-29, kampa kijtoua ke Jehová nochi kiita. Sayoj Dios kimati toni kuali yetok uan sayoj yejua uelis kiyektalis nochi kuejmolmej”. Sayoj ke, ¿uelis tikchiuaskej teisa tein tapaleuis hasta keman iTaixyekanalis Dios kiixpolos nochi kuejmolmej?

¿TONI UELIS TIKCHIUASKEJ AXKAN?

14. ¿Toni uelis tikchiuaskej axkan? (Colosenses 3:​10, 11).

¹⁴ Tejuan amo ueli tikchiuaj maj amo kintajyouiltikan oksekin, sayoj ke uelis tikixtaliskej amo tikchiuaskej kemej yejuan. Timomachtijkejya ke moneki titetasojtaskej kemej Jesús. Uan uelis ijkon tikchiuaskej keman tikinpoujkaitaskej nochin hasta akin techchiuiliaj tein amo kuali (Mat. 7:12; Rom. 12:17). Jehová yolpaki keman kiita ke tiyolkualmej uan ke amo tikinchiuiliaj oksekin tein amo kuali (xikonlero Colosenses 3:​10, 11).

15. ¿Keniuj tapaleuia keman titamachtiaj ika Biblia?

¹⁵ Keman tikinpaleuiaj oksekin maj kiixmatikan Jehová, tikinpaleuiaj maj amo tetajyouiltikanok. ¿Keyej? Porin ‘akin kiixmatij Jehová’ uan kinekij kiyolpaktiskej, mopataj, mochiuaj yolkualmej uan tetasojtaj (Is. 11:​6, 7, 9). Achto ke momachtis Biblia, se takat akin monotsa Jemal kiixnamikia tekiuaj iniuan oksekin porin kintajyouiltiaya. Yejua kijtoua: “Amo ueli se kichiua maj mopata aksa komo se kiixnamiki, sayoj ueli mopata komo momachtia Biblia. Yejua nejon nechpaleuij maj nimopata”. Tein momachtiaya itech Biblia kipaleuij maj amo taixnamikiok. Yejua ika keman aksa peua tikmachtiaj Biblia, uelis tikpaleuiskej maj amo kinchiuiliok tein amo kuali oksekin.

16. ¿Keyej tikonneki tikonteixmatiltis iTaixyekanalis Dios?

¹⁶ Ijkon kemej Jesús, tejuan no tiknekij tikintapouiskej oksekin ke sayoj iTaixyekanalis Dios kiixpolos nochi tein amo kuali. Nejin uelis kinyolchikauas akin kintajyouiltianij (Jer. 29:11). Stacy, akin ika titajtojkej itech párrafo 9, kijtoua: “Kemej nikmati ke sayoj Dios kiixpolos tein techtajyouiltia nechpaleuiani maj niyolseujto keman nejua oso oksekin techchiuiliaj tein amo kuali. Uan Jehová techyolseuia ika Biblia”. Para uelis tikinyolseuiskej oksekin moneki kuali timomachtiskej Biblia. Komo okachi tikneltokaj ke sayoj iTaixyekanalis Dios kiixpolos nochi tein amo kuali, techpaleuis maj ika titanojnotsakan kampa yeski, xa kampa titekitij oso kampa timomachtiaj.b

17. ¿Keniuj techpaleuia Jehová maj tikxikokan tein amo kuali tein mochiua itech taltikpak?

¹⁷ Tikmatij ke kisentokas mochiuas tein amo kuali porin yejua Satanás “akin taixyekana nikan taltikpak”. Sayoj ke Jehová techpaleuis uan motenkaua ke amo uejkaua kiixpolos Satanás uan nochi tein amo kuali (Juan 12:31). Jehová no techiluia itech Biblia keyej mochiua tein amo kuali uan kijtoua ke kiyolkokoua keman kiita ke titajyouiaj (Sal. 34:​17-19). Tein kichiuak Jesús techmachtia toni moneki tikchiuaskej keman techchiuiliskej tein amo kuali, uan ke iTaixyekanalis Dios kiixpolos nochi tein techtajyouiltia (2 Ped. 3:13). Yejua ika, maj tiksentokakan tikteixmatiltikan iTaixyekanalis Dios uan maj tikchiakan tonal keman “mochiuas tein kuali” itech nochi taltikpak (Is. 9:7).