Tein tajtanij akin taixtajtoltiaj
¿Toni kijtosnekia akin kijkuiloj Proverbios 30:18, 19 keman kijtoj ke amo kiajsikamatia “kemej mouikaj se takat uan se ichpoch”?
Miakej hasta akin kuali kiixmatij Biblia motajtaniaj toni kijtosnekij nejin versículos. Itech Traducción del Nuevo Mundo kijtoua: “Moajsi eyi taman tein amo nikyekajsikamati, naui taman tein amo nikajsikamati: águila tein patani iluikak, kouat tein moxoxolatsa itech tet, se barco tein youi itech mar uan kemej mouikaj se takat uan se ichpoch” (Prov. 30:18, 19).
Achto tikajsikamatiaj ke kampa kijtoua “kemej mouikaj se takat uan se ichpoch” kijtosnekia teisa tein amo kuali. ¿Keyej? Porin tepitsin achto ika motajtoua seki taman tein amo kuali yetok uan tein amo keman tami (Prov. 30:15, 16). Uan versículo 20 ika tajtoua “se siuat akin auilnemi”, akin kijtoua ke amo kichiuani tein amo kuali. Yejua ika tiknemiliayaj ke nejin versículo ika tajtoua tein aksa kichiua uan amo akin kimati. Tiknemiliayaj ke ijkon kemej patani se águila, kemej moolinia se kouat, uan kemej youi se barco itech mar, se takat uelis kichiuas teisa uan amo akin kimatis. Yejua ika keman itech nejin versículo kijtoua “kemej mouikaj se takat uan se ichpoch”, tiknemiliayaj ke ika tajtojtoya se takat akin kikajkayaua se siuapil para maj iuan auilnemi.
Sayoj ke, nejin versículo ika tajtojtoya seki taman tein kuali. Akin kijkuiloj, sayoj kijtojtoya seki taman tein kimojkaitaya.
Amatajkuilolmej itech tajtol hebreo no kijtouaj ke Proverbios 30:18 ika tajtoua teisa tein kuali. Se amaix tein ika tajtoua Biblia kijtoua ke itech nejin versículo, tajtolmej “tein amo nikyekajsikamati”, kijtosnekia se taman tein amo akin ueli kichiua, tein semi kualtsin uan se kimojkaita.
Crawford Howell Toy, akin tamachtia itech Universidad de Harvard (Estados Unidos), no kijtoj ke nejin versículo amo ika tajtoua teisa tein amo kuali, ta ke akin kijkuiloj kijtojtoya ke semi kimojkaitaya nochi tein ika tajtoj.
Proverbios 30:18, 19 ika tajtoua seki taman tein se kimojkaita uan tein amo ueli se kiyekajsikamati. Ijkon kemej akin kijkuiloj, no tikmojkaitaj keman tikitaj keniuj patanij águilas, keniuj moxoxolatsaj kouamej itech temej maski amo kipiaj ininmetsuan, keniuj moita itech at keman panouaj uejueyi barcos itech mar, uan keniuj se okichpil uan se siuapil peua motasojtaj uan yolpakij.