Maj ininka timotataujtikan oksekin

1. ¿Keniuj tikmatij ke Jehová kineki techkakis?

JEHOVÁ kichiuak maj ueli tiktataujtikan uan nejon semi kualtsin. Maj tiknemilikan nejin: Jehová kinmakak ángeles seki tekimej uan no kinauatiani iKonetsin maj kichiua tekimej tein semi moneki (Sal. 91:11; Mat. 28:18). Sayoj ke, ¿kiixtaliani aksa maj kikaki tonetataujtiluan? Amo, Jehová kiixtalij yejua kichiuas. Jehová akin kikaki netataujtilmej, kineki techkakis (Sal. 65:2).

2. ¿Keniuj uelis tikchiuaskej kemej kichiuak tatitanil Pablo?

² Uelis tikiluiskej Jehová nochi tein techtekipachoua, sayoj ke no moneki ininka timotataujtiskej oksekin. Ijkon kichiuak tatitanil Pablo keman kiniluij tokniuan de Éfeso: “Niksentoka namechelnamiki keman nikchiua netataujtil” (Efes. 1:16). Sayoj ke no ininka motataujtiaya sejsemej. Timoteo kijkuilouilij: “Niktasojkamatilia Dios [...] uan nochipa nimitselnamiki keman chikauak nimotataujtia youalintonal” (2 Tim. 1:3). Pablo monekia motataujtis porin kipiaya ouijkayomej, sayoj ke no kixelouaya tiempo para ininka motataujtis oksekin (2 Cor. 11:23; 12:​7, 8).

3. ¿Keyej kemansa tikelkauaj timotataujtiskej por oksekin?

³ Xa kemansa tikelkauaj ininka timotataujtiskej oksekin. ¿Keyej? Se tokniuj siuat akin monotsa Sabrinaa kijtoua: “Mojmostaj tikpiaj miak tekit, yejua ika sayoj tikitaj tokuejmoluan uan sayoj timotataujtiaj por tejuan”. Komo tikitaj ke techpanotok kemej Sabrina, nejin tamachtilis semi techpaleuis. Yekinika, tikitaskej keyej semi moneki maj timotataujtikan por oksekin. Uan ojpatika, tikitaskej seki taman tein techpaleuis keniuj tikchiuaskej.

¿KEYEJ SEMI MONEKI MAJ TIMOTATAUJTIKAN POR OKSEKIN?

4, 5. ¿Keniuj “semi tapaleuia” komo timotataujtiaj por oksekin? (Santiago 5:16).

⁴ ‘Semi kinpaleuis’ oksekin komo timotataujtiaj por yejuan (xiklero Santiago 5:16). Sayoj ke, ¿yekmelauj kinpaleuis komo ijkon tikchiuaj? Kemaj. Uan Jesús akin kimatia ke tatitanil Pedro kijtoskia ke amo kiixmatia, kiluij: “Chikauak niktataujtij Dios maj mitspaleui para maj motakuaujtamatilis amo kaxani” (Luc. 22:32). Pablo no kimatia ke komo timotataujtiaj por oksekin semi tapaleuia. Yejua ika keman kitsakkej uan kiluijkej maj amo kisa de Roma, kitajkuilouilij Filemón: “Kemej nankitataujtijtokej Dios maj nechpaleui, nikchia oksepa namechitatiuj” (Filem. 22). Uan amo uejkauak kikixtijkej uan oksepa peuak tanojnotsa.

⁵ Nejin amo kijtosneki ke tikchikaujkauiaj Jehová maj kichiua tein tiktajtaniaj. Sayoj ke yejua kimati toni techtekipachoua uan kemansa kiixtalia kichiuas tein tiktajtaniaj. Nejin techyolchikaua maj okachi tiktataujtikan keman teisa techtekipachoua uan maj titakuaujtamatikan ke yejua kichiuas tein okachi tapaleuis (Sal. 37:5).

6. Keman timotataujtiaj por oksekin, ¿toni tiknekij tikchiuaskej? (1 Pedro 3:8).

⁶ Keman timotataujtiaj por oksekin ‘tikinyolikneliaj’ (xiklero 1 Pedro 3:8). Akin kiniknelia oksekin kiita keniuj tajyouiaj uan kitemoua kinpaleuis (Mar. 1:​40, 41). Se tayekankej akin monotsa Michael kijtoua: “Keman nimotataujtia por oksekin okachi nikajsikamati ouijkayomej tein kipanotokej, uan yejua ika okachi nikintasojta uan okachi nikinixmati maski yejuan amo kimatij”. Richard, akin no tayekankej, no kijtoua keniuj tapaleuia maj se motataujti por oksekin: “Keman timotataujtiaj por aksa, tiknekij okachi tikpaleuiskej”. Uan no kijtoua: “Keman tikpaleuiaj akin ika timotataujtijtokej, kemej yeskia titapaleuijtokej maj monankili tonetataujtil”.

7. ¿Keniuj techpaleuia keman timotataujtiaj por oksekin? (Filipenses 2:​3, 4; no xikita taixkopimej).

⁷ Keman timotataujtiaj por oksekin amo tiknemiliaj ke sayoj tejuan tikpanouaj ouijkayomej (xiklero Filipenses 2:​3, 4). Tinochin tikpiaj ouijkayomej porin Satanás taixyekana itech taltikpak (1 Juan 5:19; Apoc. 12:12). Komo nochipa timotataujtiaj por oksekin, nejon techelnamiktia ke ‘nochin tokniuan no kipanotokej tein tejuan tikijyouijtokej’ (1 Ped. 5:9). Se precursora akin monotsa Katherine kijtoua: “Keman nimotataujtia por oksekin nechelnamiktia ke amo sayoj nejua nikpanotok ouijkayomej. Nejon nechpaleuia maj amo sayoj notech nitanemili”.

¿AKONIMEJ MONEKI ININKA TIMOTATAUJTISKEJ?

8. ¿Akonimej uelis ininka timotataujtiskej?

⁸ ¿Akonimej uelis ininka timotataujtiskej? Nochin tokniuan. Xa akin mokokouaj, telpochmej uan ichpochmej akin kinkejkelouaj uan kipanouaj ouijkayomej itech escuela oso akin xiuejkejya. Miakej tokniuan kinixnamikij, kemansa ininchankauan oso tekiuanij (Mat. 10:​18, 36; Hech. 12:5). Miakej kisaj de ininchan porin mochiua tein amo kuali kampa nemij uan oksekin tajyouiaj porin mochiuaj tetsaujmej. Xa amo tikinixmatij nejon tokniuan, sayoj ke keman timotataujtiaj por yejuan, tikchiuaj tein Jesús tanauatij keman kijtoj maj timotasojtakan se iuan okse (Juan 13:34).

9. ¿Keyej moneki timotataujtiskej por tokniuan akin kipiaj se tekit itech inechikol Jehová uan ininsiuatsin?

⁹ No uelis ininka timotataujtiskej tokniuan akin kipiaj se tekit itech inechikol Jehová, kemej Oloch Taojtokaltianij uan akin kinpaleuiaj, tokniuan akin taixyekanaj itech sejse Betel, tokniuan akin kiixyekanaj seki tekimej tein ompa mochiuaj, akin takalpanouaj itech circuito, tayekananij uan tapaleuianij. Yejuan no motekipachouaj porin kipiaj ouijkayomej, maski ijkon semi tekitij para techpaleuiskej (2 Cor. 12:15). Mark se tokniuj takalpanojkej, kijtoua: “Amo kuali nimomachilia nietos uejka de notatuan. Yejuan xiuejkejya uan mokokouaj uan maski nokniuj siuat uan itakatsin kuali kinyekpiaj, ipa nimoyolkokoua porin amo ueli semi nikinpaleuia”. Maski amo tikmatij nochi tein kinpanoua, semi kuali maj timotataujtikan por yejuan (1 Tes. 5:​12, 13). No uelis timotataujtiskej por ininsiuatsin nejon tokniuan, yejuan semi kinpaleuiaj inintakatsin para maj kisentokakan tapaleuikan itech inechikol Jehová.

10, 11. ¿Kiuelita Jehová maj ininka timotataujtikan miakej tokniuan?

¹⁰ Kemej tikitakejya, miakpa timotataujtiaj por miakej tokniuan akin kipanouaj tataman ouijkayomej. Kemansa keman timotataujtiaj, amo tiktokaytiaj sayoj se tokniuj, ta xa tikiluiaj Jehová maj kinpaleui nochin tokniuan akin tsaktokej oso maj kinyolchikaua akin se ininchankauj momikilij. Se tayekankej akin monotsa Donald kijtoua: “Miakej tokniuan kipanotokej ouijkayomej, yejua ika tiktajtaniaj Jehová maj nochin kinpaleui”.

¹¹ ¿Kiuelita Jehová maj miakej ininka timotataujtikan? Kemaj. Porin amo tikmatij toni kinpoloua uan toni kintekipachoua sejsemej itekitikauan. Yejua ika semi kuali maj miakej ininka timotataujtikan (Juan 17:20; Efes. 6:18). Keman ijkon tikchiuaj tiknextiaj ke ‘tikintasojtaj nochin tokniuan’ (1 Ped. 2:17).

¿KENIUJ UELIS ININKA TIMOTATAUJTISKEJ SEJSEMEJ?

12. ¿Keyej komo tikitaj tein kinpanotok tokniuan tiknekiskej ininka timotataujtiskej sejsemej?

¹² Maj tikitakan toni kipanotok tokniuj. Maski moneki timotataujtiskej por miakej, no semi kuali maj timotataujtikan por se tokniuj akin kipia se ouijkayot. Xa itech nechikol aksa semi mokokoua, xa akin iniuan momachtia se telpoch kichikaujkauiaj maj kichiua tein amo kuali, xa se tepopaj oso se temomaj iselti kiiskaltijtok ikoneuj uan ‘kimachtijtok maj kipata tein moneki uan maj tanemili kemej Jehová’ (Efes. 6:4). Komo tikitaj tein kinpanoua tokniuan, okachi tikintasojtaskej uan tiknekiskej timotataujtiskej por yejuan (Rom. 12:15).b

13. ¿Uelis timotataujtiskej por tokniuan akin amo tikinixmatij?

¹³ Maj tikintokaytikan. Uelis timotataujtiskej hasta por tokniuan akin amo tikinixmatij. Itech jw.org uelis tiktemoskej inintokay tokniuan akin tsaktokej ompa Crimea, Eritrea, Rusia uan Singapur.c Brian, se tokniuj akin takalpanoua itech circuito kijtoua: “Keman nikijkuiloua itokay se tokniuj akin tsaktok uan satepan niktokaytia, nechpaleuia maj nikelnamiki uan maj niktokayti keman nimotataujtia”.

14, 15. ¿Toni techpaleuis maj ika timotataujtikan tein kinpanotok tokniuan?

¹⁴ Maj ika timotataujtikan tein kinpanotok. Michael, akin ika titajtojkej itech párrafo 6, kijtoua toni uelis tikchiuaskej: “Keman nikita itech jw.org tein kinpanotok seki tokniuan akin tsaktokej, niknemilia keniuj nimomachiliskia komo nejua nechpanotoskia nejon. Xa nimotekipachoskia por nosiuatsin uan niknekiskia nikmatis keniuj yetok. Nejon nechpaleuia maj nikmati toni nikijtos keman ininka nimotataujtia tokniuan akin tsaktokej uan kipiaj ininsiuatsin” (Heb. 13:​3, nota).

¹⁵ Komo tiknemiliaj tein mojmostaj kinpanoua tokniuan akin tsaktokej, tikmatiskej toni no uelis tikijtoskej keman timotataujtiskej. Uelis tiktajtaniskej Jehová maj tajpianij amo kintajyouiltikan nejon tokniuan uan maj kinkauakan maj kiueyichiuakan (1 Tim. 2:​1, 2). No uelis ininka timotataujtiskej tokniuan itech nechikol para maj kinyolchikaua tein kichiuaj tokniuan akin tsaktokej, uan maj kinekikan kikakiskej iTajtol Dios akin amo itaixpantijkauan Jehová (1 Ped. 2:12). Nochi tein tikitakejya uelis tikchiuaskej keman timotataujtiskej por se tokniuj uan amo sayoj para akin tsaktokej. Keman tikitaj toni kipanotokej, tikintokaytiaj uan ika timotataujtiaj tein kinpanotok tiknextiaj ke ‘semi tikintasojtaj’ (1 Tes. 3:12).

SAYOJ JEHOVÁ KIMATI KENIUJ KINANKILIS TONETATAUJTILUAN

16. ¿Toni moneki tikelnamikiskej keman timotataujtiskej? (Mateo 6:8).

¹⁶ Tikitakejya ke keman ininka timotataujtiaj oksekin uelis mopatas tein kinpanotok. Sayoj ke moneki tikajsikamatiskej ke sayoj Dios kimati keniuj kinankilis tonetataujtiluan. Moneki tikelnamikiskej ke keman tiktataujtiaj Jehová ipa kimattokya toni tikiluitij uan ke amo moneki maj tikyolmajxitikan keniuj kichiuas teisa. Dios kimati tein kinpoloua itekitikauan hasta achto ke yejuan kimatiskej oso tejuan tikmatiskej toni kinpoloua (xiklero Mateo 6:8). Komo ijkon, ¿keyej moneki maj timotataujtikan por oksekin? Itech nejin tamachtilis tikitakejya seki taman, uan amo sayoj nejon, ta no tiknextiaj ke timotekipachouaj por yejuan. Kemej tikintasojtaj ininka timotataujtiaj. Uan Jehová semi yolpaki keman kiita ke titetasojtaj kemej yejua.

17, 18. ¿Keniuj tikmatij ke Jehová kikaki keman timotataujtiaj por tokniuan?

¹⁷ Keman timotataujtiaj por oksekin tiknextiaj ke tikintasojtaj, uan maski moita ke amo kinpaleuia, Jehová kemaj techkaki. Maj itech titanemilikan se tepopaj akin kipia se okichpil uan se siuapil. Okichpiltsin semi mokokoua uan siuapiltsin miakpa kiluia ipopaj: “Xikpaleui nokniuj porin semi mokokoua”. Tepopaj ipa kipaleuijtokya ikonetsin porin semi kitasojta uan kiitstok toni kipoloua, sayoj ke semi yolpaki keman kiita ke isiuapiltsin semi kitasojta iikniuj uan kiluia maj kipaleui.

¹⁸ No ijkon, Jehová kineki maj timotekipachokan uan maj timotataujtikan por oksekin. Ijkon tiknextiskej ke amo sayoj titanemiliaj por tejuan ta no por tokniuan, uan Jehová kiita nejon (2 Tes. 1:3; Heb. 6:10). Uan no, tikitakej ke kemansa tonetataujtiluan uelis kipaleuis se tokniuj. Yejua ika, maj amo keman tikelkauakan timotataujtiskej por tokniuan.