¿Toni mitspaleuis xikilui Jehová nochi tein tikmachilia?

1, 2. 1) Keman timotataujtiaj, ¿toni uelis kichiuas maj amo tikiluikan Jehová nochi tein tikmachiliaj? 2) ¿Keniuj tikmatij ke Jehová kikaki nochi tein tikiluiaj?

¿TIKITANI ke keman timotataujtia nochipa yejuasan tein tikijtoua uan amo tikiluia Jehová nochi tein tikmachilia? Tinochin uelis ijkon techpanos. Kemej tinochin tikpiaj miak tekit, kemansa amo tiuejkauaj keman timotataujtiaj. Oso xa tikmachiliaj ke amo technamiki maj tikiluikan Jehová keniuj timomachiliaj.

² Biblia tamachtia ke Jehová amo kiita ox tel kuali titajtouaj keman timotataujtiaj, ta maj tikiluikan tein yekmelauj tikmachiliaj uan maj tiyolyemankej. Yejua kinkaki akin yolnejmachmej (Sal. 10:17). Kuali kikaki tein tikiluiaj porin motekipachoua por tejuan (Sal. 139:​1-3).

3. ¿Toni tiknankiliskej itech nejin tamachtilis?

³ Itech nejin tamachtilis tiknankiliskej seki netajtanilmej: ¿keyej amo moneki timouiskej tikiluiskej Jehová tein tiknemiliaj uan tein tikmachiliaj?, ¿keniuj uelis timotataujtiskej para maj okachi timotokikan iuan Jehová?, ¿keniuj netataujtilmej tein moajsij itech Biblia techpaleuiaj maj okachi kuali timotataujtikan? Uan ¿toni uelis tikchiuaskej komo timotayokoltijtokej uan amo tikmatij keniuj tikiluiskej Jehová tein tikmachiliaj?

AMO XIMOUI TIKTATAUJTIS JEHOVÁ

4. ¿Toni techpaleuis maj tikiluikan Jehová keniuj timomachiliaj? (Salmo 119:145).

⁴ Komo tikitaj Jehová kemej se totasojikniuj akin kineki maj kuali tietokan, amo timouiskej tiktapouiskej tein tiknemiliaj uan tein tikmachiliaj. Maj itech titanemilikan akin kijkuiloj Salmo 119, yejua kipanok miak ouijkayomej. Sekin kitakajkayauilijkej (Sal. 119:​23, 69, 78). No motayokoltiaya porin kemansa mopolouaya (Sal. 119:5). Maski ijkon, mochikauak kuali mouikas iuan Jehová uan amo mouik kiluis keniuj momachiliaya (xiklero Salmo 119:145).

5. Xikmelaua keyej amo moneki techtsakuilis nion teyi maj tiktataujtikan Jehová.

⁵ Jehová kineki maj tinochin tiktataujtikan, hasta akin tel tajtakolchiujkej (Is. 55:​6, 7). Yejua ika maj amo teyi techtsakuili maj tiktataujtikan Jehová. Maj tiknemilikan ke aksa mopoloj koujtaj uan amo kimati keniuj kisas, yejua ika moneki tajtanis maj kipaleuikan, ¿pinauaskia porin mopoloj uan amo kimati keniuj kisas? Amo. No ijkon tejuan, maski kemansa titajtakolchiuaj oso timopolouaj, amo moneki timouiskej nion tipinauaskej tiknojnotsaskej Jehová (Sal. 119:​25, 176).

KENIUJ UELIS TIKTATAUJTIS JEHOVÁ PARA OKACHI IUAN TIMOTOKIS

6, 7. Xikmelaua toni techpaleuis maj amo timouikan tikiluiskej Jehová keniuj timomachiliaj (no xikita nota).

⁶ Keman tikiluiaj Jehová nochi tein tiknemiliaj uan tein tikmachiliaj techpaleuia maj okachi iuan timotokikan. Maj tikitakan toni uelis techpaleuis maj ijkon tiktataujtikan.

⁷ Maj tiknemilikan toni tein kualtsin kinextia Jehová.a Keman tikelnamikij nejin techpaleuia maj amo timouikan tikiluiskej Jehová tein tiknemiliaj uan tein tikmachiliaj (Sal. 145:​8, 9, 18). Ijkon kichiuak Kristine, se tokniuj siuat akin itat semi tateuiaya. Yejua kijtoua: “Amo uelia nikitaya Jehová kemej noTajtsin uan amo uelia niknojnotsaya. Nikmachiliaya ke amo nechtasojtaya porin nimopolouaya”. ¿Toni kipaleuij? Yejua kijtoua: “Kuali nimomachilij keman itech nitanemilij ke Jehová nochipa tetasojta. Axkan nikmati ke maski nimopolos, Jehová nochipa nechpaleuis uan nechtasojtas. Keman niknemilia nejin okachi amo nechouijmaka nikiluis toni nechyolpaktia uan toni nechtayokoltia”.

8, 9. Xikijto keniuj techpaleuis komo achto tiknemiliaj toni tikiluitij Jehová.

⁸ Maj achto tiknemilikan toni tikiluiskej. Achto ke timotataujtiskej uelis timotajtaniskej nejin: “¿Toni ouijkayomej nikpia? ¿Moneki niktapojpoluis aksa? ¿Nechpanotok se ouijkayot uan moneki maj Jehová nechpaleui?” (2 Rey. 19:​15-19). No uelis tikchiuaskej kemej Jesús uan tiktajtaniskej Jehová maj kichipaua itokay, maj uikia iTaixyekanalis uan maj mochiua tein kineki (Mat. 6:​9, 10).

⁹ Se tokniuj akin monotsa Aliska semi kiouijmakaya kitataujtis Jehová keman kimatik ke itakatsin kipiaya cáncer uan amo pajtiskiaok. Yejua kijtoua: “Kemej semi nimotekipachouaya amo uelia nitanemiliaya uan amo nikmatia toni nikijtos keman nimotataujtiaya”. ¿Toni kipaleuiani? Yejua kijtoua: “Achto ke niktataujtis Jehová, niknemilia toni uelis nikiluis para maj amo sayoj nitajto de nejua uan de notakatsin. Keman nikchiua nejin okachi kuali nimomachilia uan amo sayoj se taman nikiluia Jehová”.

10. ¿Keyej amo moneki ijsiujka timotataujtiskej? (No xikita taixkopimej).

¹⁰ Amo ijsiujka ximotataujti. Keman amo uejkauak tiktataujtijtokej Jehová ipa techpaleuia maj iuan timotokikan, sayoj ke keman tiktataujtiaj miak tiempo ueli tikiluiaj nochi tein tikmachiliaj.b Elijah itakatsin Aliska kijtoua: “Nimochikaua miakpa nimotataujtis, uan nikitani ke keman uejkauak iuan nitajtoua Jehová okachi iuan nimotokia. Jehová amo keman kiitstok hora yejua ika amo nimoijsiuilia”. Xikchiua nejin, xiktemo toni hora uan kani uelis uejkauak timotataujtis, kampa amo akin mitskuejmolos uan uelis chikauak titajtos, uan no ximochikaua nochipa timotataujtis.

ITECH XITANEMILI NETATAUJTILMEJ TEIN MOAJSIJ ITECH BIBLIA

11. ¿Keniuj techpaleuis komo itech titanemiliaj tein motataujtijkej seki itekitikauan Jehová? (No xikita recuadro “¿No timomachiliani kemej yejuan?”).

¹¹ Xa semi mitspaleuis itech xitanemili tein kijtojkej seki itekitikauan Jehová keman motataujtijkej oso keman cantarojkej para kiueyitaliskej Dios. Komo tikita toni kijtojkej mitspaleuis xikmati toni tikijtos. Xa tikajsis seki tajtolmej tein no uelis tikuis para tikueyitalis Jehová. Uan xa tikitas ke akin kitataujtijkej Jehová no momachiliayaj kemej tejua, uan no kitajtanijkej tein tejua tikneki tiktajtanis.

12. ¿Toni uelis timotajtaniskej keman tikleroskej se netataujtil?

¹² Keman tikleros se netataujtil tein moajsi itech Biblia, ximotajtani: “¿Akoni motataujtij? ¿Toni kipanotoya? ¿No ijkon nechpanotok? ¿Toni nechmachtia?”. Xa monekis okachi timomachtis para tiknankilis nejin netajtanilmej, sayoj ke amo nenkaj yeski. Maj tikitakan naui netataujtilmej.

13. ¿Toni techmachtia tein Ana kiluij Jehová? (1 Samuel 1:​10, 11; no xikita taixkopin).

¹³ (Xiklero 1 Samuel 1:​10, 11). Keman Ana kichiuak nejin netataujtil kipiaya ome ouijkayomej. Yejua amo uelia kinpiaya konemej, uan okse isiuatsin Elcaná kitajyouiltijtoya (1 Sam. 1:​4-7). Komo semi mitstekipachoua tein mitspanotok, ¿toni uelis mitsmachtis tein Ana kiluij Jehová? Yejua kixeloj tiempo para kitapouis tein kitekipachouaya, uan satepan kuali momachilij (1 Sam. 1:​12, 18). Xikchiua kemej Ana, “xikauili Jehová tein mitstekipachoua” uan xikilui nochi tein tikmachilia (Sal. 55:22).

14. 1) ¿Toni okse taman techmachtia tein kichiuak Ana? 2) ¿Keniuj komo tiklerouaj Biblia uan itech titanemiliaj techpaleuis maj tikmatikan keniuj timotataujtiskej? (Xikita nota).

¹⁴ Seki xiujmej satepan ke yolik ikonetsin Samuel, Ana kiuikilij tayekankatiopixkat Elí (1 Sam. 1:​24-28). Keman Ana kiluij Jehová nochi tein kimachiliaya kitasojkamatilij porin kiitak ke nochipa kinyekpia itekitikauan uan kinmaka tein kinpoloua (1 Sam. 2:​1, 8, 9).c Maski Ana kisentokak kipiak ouijkayomej amo sayoj itech tanemilijtoya nejon, ta okachi kinemiliaya keniuj Jehová kitatiochiuijtoya. ¿Toni techmachtia? Ke komo okachi tiknemiliaj keniuj Jehová techpaleuiani, uelis tikxikoskej ouijkayomej.

15. ¿Toni techmachtia tein Jeremías kijtoj keman motataujtij? (Jeremías 12:1).

¹⁵ (Xiklero Jeremías 12:1). Jeremías motayokoltij porin kiitaya ke akin kichiuayaj tein amo kuali nesia ke okachi kuali nemiaj. No motayokoltij porin israelitas kikejkelouayaj (Jer. 20:​7, 8). Tikajsikamatij keniuj momachiliaya porin no techkejkelouanij, uan moita ke okachi kuali nemij akin kichiuaj tein amo kuali. Sayoj ke maski Jeremías kiluij Jehová ke moyolkokojtoya, amo keman kijtoj ke Dios kichiua tein amo kuali. Uan keman kiitak ke Jehová kintatsakuiltij itekitikauan akin amo kitakamatkej, okachi iuan takuaujtamatik porin kiitak ke yejua nochipa kichiua tein kuali (Jer. 32:19). Tejuan no uelis tikiluiskej Jehová ke techyolkokoua maj miakej tetajyouiltikan, uan no uelis tikiluiskej ke titakuaujtamatij ke yejua kiixpolos nochi tein techtajyouiltia keman kiixtalijtok.

16. ¿Toni techmachtia tein kijtoj se levita keman motataujtij? (Salmo 42:​1-4; no xikita taixkopimej).

¹⁶ (Xiklero Salmo 42:​1-4). Nejin nekuikatil kijkuiloj se levita akin amo uelia kiueyichiuaya Jehová itech templo iniuan okseki israelitas, uan nejin salmo kinextia keniuj momachiliaya. Tejuan xa no ijkon timomachiliaj keman amo ueli tikisaj de tochan porin timokokouaj oso techtsakuaj porin tikueyichiuaj Jehová. Komo ijkon techpanoua xa kemansa kuali timomachiliskej uan kemansa timotayokoltiskej, sayoj ke nochipa moneki tikiluiskej Jehová keniuj timomachiliaj. Nejon techpaleuis maj tikmatikan keyej ijkon timomachiliaj uan maj tikitakan toni okseki taman uelis tikchiuaskej. Levita kiitak ke ueliskia kichiuas okseki taman para kiueyichiuas Dios (Sal. 42:5). No itech tanemilij keniuj Jehová kiyekpixtoya (Sal. 42:8). Komo tejuan no tikiluiaj Jehová nochi tein tikmachiliaj, techpaleuis maj tikmatikan keyej ijkon timomachiliaj, maj tiyolseujtokan uan maj titaxikokan.

17. 1) ¿Toni techmachtia tein kijtoj Jonás keman motataujtij? (Jonás 2:​1, 2). 2) ¿Keniuj uelis techpaleuis komo tikelnamikij seki textos keman tikpiaskej ouijkayomej? (Xikita nota).

¹⁷ (Xiklero Jonás 2:​1, 2). Tanauatijkej Jonás motataujtij nejin keman yetoya iijtik se ueyi pescado. Maski amo kitakamatka Jehová kimatia ke yejua kikakiskia. Xa kuali kiixmatia Salmos porin keman motataujtij kijtoj miak taman tein ompa ijkuiliujtok.d Kemej kielnamikia uan itech tanemiliaya, okachi takuaujtamatik ke Jehová kipaleuiskia. No ijkon, komo timochikauaj timomatililiskej seki textos, xa uelis tikelnamikiskej keman tikpiaskej ouijkayomej uan techyolchikauas keman timotataujtiskej.

XIKSENTOKA XIKTATAUJTI JEHOVÁ PARA OKACHI IUAN TIMOTOKIS

18, 19. Xikmelaua keniuj techpaleuia Romanos 8:​26, 27 komo amo ueli tikiluiaj Jehová tein tikmachiliaj.

¹⁸ (Xiklero Romanos 8:​26, 27). Xa kemansa semi timotekipachojtoskej uan amo tikmatiskej keniuj tikiluiskej Jehová toni tikmachiliaj. Sayoj ke keman techpanoua nejon, ichikaualis Dios techpaleuia uan “techtajtouia”. ¿Toni kijtosneki nejon? Jehová ika ichikaualis kichiuak maj itech Biblia moijkuilouani tein kijtojkej seki itekitikauan keman kitataujtijkej. Yejua ika keman amo ueli senkis tikijtouaj tein tikmachiliaj, Jehová uelis kielnamikis semej netataujtilmej tein ijkuiliujtok itech Biblia uan technankilis kemej yeskia tejuan tikchiujkej.

¹⁹ Nejin semi kipaleuij se tokniuj de Rusia akin monotsa Elena, yejua kitsakkej porin kitataujtiaya Dios uan kilerouaya Biblia. Kemej semi motekipachojtoya amo uelia motataujtiaya. Yejua kijtoua: “Nikelnamik ke komo nikpia se ouijkayot uan amo nikmati toni nikiluis Jehová keman niktataujtia, yejua uelis kinankilis netataujtilmej tein moajsij itech Biblia uan kiitas kemej yeskia nejua nikchiuaskia”. Uan no kijtoj: “Nejon semi nechyolseuij keman nikpanotoya ouijkayomej”.

20. ¿Toni techpaleuis maj ueli timotataujtikan keman timotekipachojtoskej?

²⁰ Keman semi timotekipachojtokej xa peua timotataujtiaj sayoj ke no peua itech titanemiliaj okseki taman. ¿Toni uelis techpaleuis? Uelis chikauak tikleroskej seki Salmos oso tikchiuaskej kemej tekiuaj David uan tikijkuiloskej tein tikmachiliaj (Sal. 18, 34, 142 uan encabezamientos). Sayoj ke tinochin titatamamej, yejua ika tisejsemej tikmatij toni tikchiuaskej para kuali timotataujtiskej (Sal. 141:2). Uelis tikchiuas tein okachi mitspaleuis.

21. ¿Keyej uelis tikiluiskej Jehová tein tikmachiliaj?

²¹ Semi techyolseuia maj Jehová kiajsikamati keniuj timomachiliaj hasta achto ke tikiluiskej (Sal. 139:4). Sayoj ke ipa kiuelita maj tikiluikan keniuj timomachiliaj uan ke iuan titakuaujtamatij. Yejua ika maj nochipa tiktataujtikan Jehová. Maj tikijtokan seki taman tein kijtojkej itekitikauan keman motataujtijkej. Maj tikiluikan Jehová toni techtayokoltia uan toni techyolpaktia. Yejua se kuali totasojikniuj uan nochipa techpaleuis.