¿Keniuj amatajkuilol Job techpaleuia keman titajyouiaj?

1, 2. ¿Keniuj techpaleuia komo tiklerouaj amatajkuilol Job?

¿YANKUIXTOK tikonixtajtoltij amatajkuilol Job? Maski moijkuiloj kemej 3,500 xiujmejya, miakej kisentokaj kiitaj ke nejin amatajkuilol yejua semej tein okachi kualtsitsin. Miakej kiueyitaliaj akin kijkuiloj amatajkuilol Job porin tel kualtsin ijkuiliujtok uan niman se kiajsikamati keman se kileroua. Maski Moisés kijkuiloj, Jehová kiluij tein monekia kijkuilos (2 Tim. 3:16).

² Tein kijtoua amatajkuilol Job itech Biblia semi techpaleuia. ¿Keyej? Porin ueli tikajsikamatij ke ángeles uan tejuan moneki tikixtaliskej ox tiktekitiliskej Jehová porin tiktasojtaj yejua uan itokay. Nejon amatajkuilol no techpaleuia maj okachi tikixmatikan Jehová, techmachtia ke semi tetasojta, tamatkej, kichiua tein kuali yetok uan chikauak. Amatajkuilol Job miakpa kijtoua ke Jehová yejua “akin kipia nochi chikaualis”. No kimelaua keyej Dios kikaua maj titajyouikan uan kinankilia miak taman tein miakej motajtaniaj.

3. ¿Keniuj techpaleuia komo timomachtiaj amatajkuilol Job?

³ Keman tiklerouaj amatajkuilol Job kemej yeskia tipankisaskiaj itech se tepet, keman tietokejya hasta ajko ueli titachiaj uejka. No ijkon techpanoua keman timomachtiaj nejin amatajkuilol porin techpaleuia maj tikitakan tein tikijyouiaj kemej Jehová kiita. Itech nejin tamachtilis tikitaskej keniuj techpaleuia amatajkuilol Job keman titajyouijtokej. Tikitaskej keniuj tein kipanok Job xa kinpaleuij sekin israelitas uan keniuj techpaleuia tejuan. Uan no tikitaskej keniuj tein kipanok uelis ika tikinpaleuiskej oksekin.

DIOS KIKAUAK MAJ JOB TAJYOUI

4. ¿Keyej Job semi taman katka ke sekin israelitas akin nemiaj Egipto?

⁴ Keman israelitas kintajyouiltijtoyaj ompa Egipto, Job nemia ompa Uz, tein xa amo uejka moajsia de Arabia. Keman israelitas yetoyaj Egipto, sekin kinueyichiuayaj tiotsitsin, sayoj ke Job amo ijkon kichiuak ta nochipa kitekitilij Jehová (Jos. 24:14; Ezeq. 20:8). Dios kijtoj: “Amo akin kemej yejua itech taltikpak” (Job 1:8).a Job kipiaya miak tomin uan nochin akin ompaka nemiaj semi kipoujkaitayaj (Job 1:3). Satanás xa ipa semi kualania keman kiitaya ke nejin takat akin miakej kiixmatiaj uan kipoujkaitayaj kitekitiliaya Jehová.

5. ¿Keyej Jehová kikauak maj Job tajyouiani? (Job 1:​20-22; 2:​9, 10).

⁵ Satanás kijtoj ke Job kikauaskia Jehová komo tajyouiaya (Job 1:​7-11; 2:​2-5). Jehová semi kitasojtaya Job sayoj ke kikauak maj Satanás kinextiani ox melauj katka tein kijtouilijka Job (Job 1:​12-19; 2:​6-8). Yejua ika Satanás kichiuak maj Job amo kinpianiok itapialuan, kinmiktilij majtakti ikoneuan uan kichiuak maj kikemi kokomej tein semi kitajyouiltiaya. Maski ijkon, Job amo keman kikauak Jehová (xiklero Job 1:​20-22; 2:​9, 10). Satepan Jehová kipajtij Job, kichiuak maj okachi tominpia, kimakak oksekin majtakti ikoneuan uan akin kiixmatiaj oksepa peuak kipoujkaitaj. No kichiuak maj nemini miak xiujmej. Job nemik 140 xiujmejok, uan kinixmatik iixuiuan uan ikoneuan iixuiuan (Job 42:​10-13, 16). ¿Keniuj tein kipanok Job kinpaleuij itekitikauan Dios ne uejkauj uan keniuj techpaleuia tejuan?

6. ¿Keniuj tein kipanok Job ueliskia kinpaleuis israelitas? (No xikonita taixkopin).

⁶ ¿Keniuj ueliskia kinpaleuis israelitas? Israelitas kemej Josué uan Caleb semi tajyouijkaj ompa Egipto. Yejuan miak xiujmej katkaj takeualmej ompa, uan satepan monekik yajtinemiskej 40 xiujmej itech taluakyan porin seki israelitas amo tatakamatkej. Komo israelitas kimatkej tein kipanok Job xa kinyolchikauak yejuan uan no israelitas akin nenkej satepan maj kiajsikamatikan ke Satanás kichiua maj titajyouikan. Xa no kiajsikamatkej keyej Jehová kikaua maj titajyouikan, ke kintasojta akin amo kikauaj maski tajyouiaj uan ke kintatiochiuia.

7, 8. ¿Keniuj amatajkuilol Job uelis kinpaleuis akin tajyouiaj? Xikonijto tein kipanok se siuatsin.

⁷ ¿Keniuj uelis techpaleuis tejuan? Axkan miakej amo kiajsikamatij keyej Dios kikaua maj tajyouikan akin yolkualmej, uan kemej kiitaj nejon, amo kineltokajok Dios oso kinemiliaj ke amo motekipachoua por tejuan. Maj tikitakan tein kipanok Hazel se siuatsin de Ruanda.b Keman katka siuapilkonet yejua kineltokaya Dios, sayoj ke satepan amo ijkon kichiuakok porin kipanok miak taman tein amo kuali. Itatuan mokaujkej uan inan monamiktij iuan okse takat akin kitajyouiltiaya Hazel. Uan keman katka siuapil se takat kiviolaroj. Keman Hazel kitemoj maj kiyolchikauakan itech itaneltokalis amo akin kipaleuij. Satepan Hazel kiluij Dios: “Nochipa nimitstataujtiani, nimochikaua nikchiuas tein kuali, sayoj ke tejua tinechtajyouiltia. Yejua ika nikixtalij nimitskauas uan nikchiuas tein nechyolpaktia”. Ijkon kemej Hazel miakej no kinkajkayauanij uan kiniluianij ke Dios kichiua maj titajyouikan. Yejua ika semi tikinikneliaj porin amo kiixmatij Dios uan tiknekij tikinpaleuiskej.

⁸ Itech amatajkuilol Job timomachtianij ke amo yejua Dios akin kichiua maj titajyouikan ta yejua Satanás. No timomachtianij ke keman aksa tajyouia, amo moneki tiknemiliskej ke ijkon kipanotok porin kichiuak tein amo kuali. Biblia kijtoua ke ‘tinochin uelis techpanos tein amo kuali uan tein amo tikchiaj’ (Ecl. 9:11; Job 4:​1, 8). Uan timomachtianij ke komo tiksentokaj tiktekitiliaj Jehová maski tikpiaj ouijkayomej, tikpaleuiaj maj kinexti ke Satanás se xolopij (Job 2:3; Prov. 27:11). Semi tiyolpakij porin timomachtijkej tein yekmelauj kijtoua Biblia uan axkan tikmatijya keyej titajyouiaj tejuan uan akin tikintasojtaj. ¿Uan toni kipanok Hazel? Yejua peuak momachtia iniuan itaixpantijkauan Jehová uan kimatik ke Dios amo kichiua maj titajyouikan. Yejua kijtoj: “Oksepa niktataujtij Dios uan nikiluij keniuj nimomachiliaya. Nikiluij ke amo melauj katka keman nikijtojka ke amo nikueyichiuaskiaok, uan ke ijkon nikijtojka porin amo nikixmatia. Axkan nikmati ke Jehová nechtasojta uan semi niyolpaki”. Semi tiyolpakij porin tikmatij keyej Dios kikaua maj titajyouikan. Maj tikitakan keniuj tein kipanok Job techpaleuia keman titajyouiaj.

¿KENIUJ TEIN KIPANOK JOB TECHPALEUIA MAJ TITAXIKOKAN?

9. ¿Keniuj tajyouijtoya Job? (Santiago 5:11).

⁹ Maj tiknemilikan keniuj tajyouij Job, motaliaya itech koujnex, kitamikenka kokomej uan semi kikokouaya. Inakayo palantoya uan semi pitsauak katka. Job amo taxikouaya kichiuas teisa, motaliaya uan mouauanaya ika se cacho tapalkat. Tenaya uan hasta mochoktiaya porin semi kikokouaya. Sayoj ke Job amo sayoj kijyouijtoya tein kipanotoya ta ika nejon kinextijtoya ke taxikojtoya oso ke amo kikauaya Jehová (xikonlero Santiago 5:11). ¿Toni kipaleuij maj amo kikaua Jehová?

10. ¿Keniuj Job mouikaya iuan Jehová, uan keniuj tikmatij?

¹⁰ Job kiluij Jehová nochi tein kimachiliaya (Job 10:​1, 2; 16:20). Itech capítulo 3 tikitaj ke Job kiluij ke amo kiuelitaya tein kipanotoya, yejua kinemiliaya ke Jehová kichiuilijtoya. Satepan, eyi itasojikniuan miakpa kiluijkej ke Dios kitatsakuiltijtoya porin tajtakolchiujka. Sayoj ke Job kisentokaya kijtouaya ke amo kikauaya Jehová. Seki taman tein kijtoj kinextij ke kinemiliaya ke katka okachi yolkuali ke Dios (Job 10:​1-3; 32:​1, 2; 35:​1, 2). Maski ijkon, Job no kimatia ke kemansa kijtouaya seki taman tein amo taixejekol porin semi kinekia kinextis ke amo kikauaya Jehová (Job 6:​3, 26). Uan itech capítulo 31 kijtoua ke kinekia maj Dios kikakini uan maj kijtouani ke amo kinamikia maj tajyouiani (Job 31:35). Sayoj ke Job amo kinamikia maj miakpa kitajtaniani Dios keyej tajyouijtoya.

11. ¿Toni kichiuak Jehová keman kinankilij Job?

¹¹ Axkan tikmatij ke Job ijkon kinojnotsak Jehová porin tel kuali iuan mouikaya uan takuaujtamatia ke kielnamikiskia ke amo keman kikaujka. Satepan Jehová kichiuak maj semi taejeka uan kinankilij Job. Sayoj ke amo kimelauilij keyej tajyouijtoya, uan amo no kitatsakuiltij porin kijtojka tein kimachiliaya oso porin motenpaleuijka. Ta Jehová kichiuak kemej se kuali tepopaj uan kipaleuij Job maj yektanemiliani. Ijkon uelik okachi kipaleuij Job porin yejua kijtoj ke amo nochi kimatia uan moyolkokoj porin amo kuali tajtojka (Job 31:6; 40:​4, 5; 42:​1-6). ¿Keniuj tein kipanok Job xa kinpaleuij akin nenkej ne uejkauj uan keniuj techpaleuia tejuan?

12. ¿Keniuj tein kipanok Job ueliskia kinpaleuis israelitas?

¹² ¿Keniuj ueliskia kinpaleuis israelitas? Maj itech titanemilikan Moisés. Yejua monekia kinixyekanas israelitas maski ouij katka, miakpa amo kitakamatkej Jehová uan kiyolkokouayaj Moisés. Miakpa keman kipiayaj ouijkayomej kualankej iuan Jehová, sayoj ke Moisés amo ijkon kichiuaya, ta nochipa kitataujtiaya para maj kipaleui (Éx. 16:​6-8; Núm. 11:​10-14; 14:​1-4, 11; 16:​41, 49; 17:5). No monekik taxikos keman Jehová kimelauak. Tepitsin achto ke israelitas kalakiskiaj itech tal tein Dios motenkaujka kinmakas, kikualantijkej Moisés uan yejua ika “amo kiyeknemilij tein kijtoj” uan amo kiueyitalij Jehová (Sal. 106:​32, 33). Yejua ika Jehová amo kikauak maj ajsi itech tal tein motenkaujka kinmakas (Deut. 32:​50-52). Maski xa Moisés semi moyolkokoj, moyolyemanij uan mokauak maj Jehová kimelauani. Tein kipanok Job xa no kinpaleuij maj taxikokan israelitas akin nenkej satepan. Komo itech tanemiliskiaj tein kipanok Job, kinpaleuiskia maj kiluikan Jehová nochi tein kimachiliayaj, uan kielnamikiskiaj ke amo katkaj okachi yolkualmej ke Dios. No ueliskia kinmachtis ke monekia yeskij yolyemankej uan kikakiskej Jehová keman kinmelauaya.

13. ¿Keniuj tein kipanok Job uelis techpaleuis maj titaxikokan? (Hebreos 10:36).

¹³ ¿Keniuj uelis techpaleuis tejuan? Tinochin akin tiktekitiliaj Jehová no moneki titaxikoskej (xikonlero Hebreos 10:36). Xa tikpiaj se kokolis, tikpiaj depresión, semi timotekipachouaj oso tikpanotokej se ueyi ouijkayot tokalijtik. Xa semej tochankauan oso totasojikniuan momikilij oso tikpiaj okse ueyi ouijkayot. Uan xa kemansa oksekin techiluiskej oso kichiuaskej teisa tein techkualantis oso okachi techtayokoltis (Prov. 12:18). Sayoj ke amatajkuilol Job techmachtia ke uelis tikiluiskej Jehová nochi tein tikmachiliaj uan titakuaujtamatiskej ke yejua techkakis (1 Juan 5:14). Jehová amo kualanis komo tikijtouaj teisa tein amo taixejekol keman tiktapouijtoskej keniuj timomachiliaj, ijkon kemej kipanok Job. Ta techchikauas uan techpaleuis maj tikmatikan toni tikchiuaskej para titaxikoskej (2 Crón. 16:9; Sant. 1:5). Jehová no techpaleuis komo moneki maj tiyektanemilikan ijkon kemej kipaleuij Job, uan uelis kichiuas ika Biblia oso toamaixuan, oso uelis kichiuas maj se tayekankej oso se totasojikniuj techyolmajxiti. Tein kipanok Job techmachtia keniuj uelis titaxikoskej keman techyolmajxitiskej (Heb. 12:​5-7). Job semi kipaleuij kikakis uan kitakamatis Jehová uan tejuan no techpaleuis komo tiyolyemankej uan tikakij tein oksekin techyolmajxitiaj (2 Cor. 13:11). ¡Miak taman techmachtia tein kipanok Job! Axkan maj tikitakan keniuj uelis ika tikinpaleuiskej oksekin.

MAJ TIKINPALEUIKAN OKSEKIN IKA AMATAJKUILOL JOB

14. ¿Keniuj uelis tikinmelauiliskej oksekin keyej titajyouiaj?

¹⁴ Keman titanojnotsaj sekin techtajtaniaj keyej titajyouiaj. Uan tejuan semi tikuelitaj tikinnextiliskej tein kijtoua Biblia. Nochipa keman tikinnankiliaj, tikintapouiaj tein panok itech xochital Edén. Peua tikiniluiaj ke Satanás, se ángel akin tel amo yolkuali kinkajkayauak Adán uan Eva, uan yejua ika amo kitakamatkej Dios (Gén. 3:​1-6). Xa no tikiniluiaj ke kemej Adán uan Eva kiixnamikkej Dios, tinochin titajyouiaj uan timomikiliaj (Rom. 5:12). Uan satepan xa tikiniluiaj ke Dios kikaujtok maj pano tiempo para kinextis ke Satanás takajkayaujtok uan para maj nochin kimatikan ke amo tiyeskijok titajtakolejkej (Apoc. 21:​3, 4). Semi tapaleuia keman tikinmelauiliaj nejin uan uelis kinpaleuis miakej maj kiajsikamatikan keyej titajyouiaj.

15. ¿Keniuj uelis ika titajtoskej Job para tikmelauaskej keyej titajyouiaj? (No xikonita taixkopimej).

¹⁵ No uelis ika titajtoskej Job keman aksa techtajtanis keyej titajyouiaj. Achto uelis tikiluiskej ke tel kuali tein techtajtanij. Satepan xa uelis tikiluiskej ke se takat akin monotsaya Job no tajtanik keyej tajyouijtoya. Yejua hasta kinemiliaya ke Dios kitajyouiltijtoya (Job 7:​17-21). Xa kimojkaitas akin tiknojnotstokej keman kimatis ke desde ne uejkaujya miakej no motajtanianij nejon. Xa no uelis tikiluiskej ke Dios amo kitajyouiltijtoya Job, ta yejua Satanás. Yejua kijtoj ke sayoj tiktekitiliaj Dios porin techmaka tein kuali uan ke tikauaskej komo titajyouiaj. No uelis tikiluiskej ke maski Dios amo kitajyouiltij Job, kikauak maj ijkon kipano porin kimatia ke itekitikauan amo kikauaskiaj uan monextiskia ke amo melauj tein Satanás kijtoj. Uan satepan uelis tikiluiskej ke Dios kitatiochiuij Job porin amo kikauak. Nejin kinextia ke nochipa uelis tikinyolseuiskej oksekin keman tikiniluiskej ke Jehová amo kintajyouiltia.

16. Xikonijto keniuj tein kipanok se takat kinextia ke amatajkuilol Job uelis kinpaleuis akin tajyouijtokej.

¹⁶ Maj tikitakan keniuj amatajkuilol Job kipaleuij se takat akin monotsa Mario. Itech xiuit 2021, se tokniuj siuat tanojnotstoya ika teléfono, uan yekinika akin kinotsak yejua Mario. Kilerouilij se versículo uan kimelauilij ke Dios amo sayoj kikaki tonetataujtiluan, ta no motenkaua ke satepan techmakas tein kuali. Satepan kitajtanij keniuj kiitaya nejon versículo uan Mario kiluij ke achto ke kinotsaskia kijkuilojtoya se amat porin yaya momiktiti, itech nejon amat kiniluijtoya ichankauan ke semi kintasojtaya. Yejua kijtoj: “Nikneltoka Dios, sayoj ke nikmachiliaya ke amo motekipachouaya por nejua”. Keman oksepa kinotsak ika tajtojkej tein kipanok Job, uan Mario kiixtalij kileros nochi amatajkuilol Job. Yejua ika tokniuj siuat kititanilij tein ika ueliskia kitapos jw.org para kileros Biblia. ¿Keniuj kipaleuij? Mario kinekik momachtis Biblia, uan semi yolpakik porin okachi momachtiskia de Dios akin kinextilij ke kitasojta.

17. ¿Keyej tikontasojkamati maj Jehová kijkuilouani itech Biblia tein kipanok Job? (Job 34:12).

¹⁷ Biblia ueli kipata kemej tinemij uan ueli kinyolseuia akin tajyouijtokej (Heb. 4:12). Semi tiktasojkamatij maj Jehová kijkuilouani tein kipanok Job porin ueli tiklerouaj itech Biblia (Job 19:​23, 24). Amatajkuilol Job kijtoua ke “Dios amo kichiua tein amo kuali” (xikonlero Job 34:12). No techmachtia keyej kikaua maj titajyouikan uan keniuj uelis titaxikoskej. Uan no techpaleuia maj ika tikinyolseuikan akin tajyouijtokej. Itech okse tamachtilis tikitaskej keniuj uelis techpaleuis amatajkuilol Job keman titayolmajxitiskej.