Xikonyekpia mokuali uikalis iuan Jiova keman tiontapaleuijtos itech se nechikol itech okse tajtol

1-3. 1) ¿Toni kiitaj nochin itekitikauan Dios ke okachi moneki? 2) ¿Toni ouijkayomej kipiaj tokniuan akin momachtijtokej okse tajtol? 3) ¿Toni netajtanilmej tiknankiliskej itech nejin tamachtilis? (Xikonita taixkopin ipeujyan tamachtilis.)

ITECH nejin tonalmej, miakej itaixpantijkauan Jiova tapaleuijtokej maj mochiua tein kijtoua Apocalipsis 14:6. Nejin tajkuilol kijtoua ke tein kichiuas iTekiuajyo Dios kinmatiltiskiaj taltikpakneminij itech “nochi paísme uan intsalan nochi tataman tagayot uan intsalan nochi tataman pueblojuani uan intsalan nochi tataman tagayot ten tajtoaj ika tataman tajtolis”. Miakej nejin tokniuan momachtijtokej okse tajtol. Sekin tekitij kemej misioneros oso tapaleuitoj itech altepemej kampa monekij okachi tanojnotsanij. Oksekin peua youij nechikolmej kampa motajtoua okse tajtol itech altepet kampa nemij.

² Nochin itekitikauan Dios kiitaj ke okachi moneki kiyekpiaskej kuali uikalis tein yejuan uan ininchankauan kipiaj iuan (Mat. 5:3, TNM). Kemansa xa tikpiaj miak tekit uan ouij techkisa tikxeloskej tiempo keman timomachtiskej Biblia toselti. Sayoj ke tokniuan akin tapaleuiaj itech se nechikol kampa motajtoua okse tajtol no kipiaj okseki ouijkayomej.

³ Nejin tokniuan amo sayoj moneki ueliskej se yankuik tajtol, ta no moneki nochipa momachtiskej tamachtilismej tein okachi ouijkej tein kipia iTajtol Dios (1 Cor. 2:10). ¿Toni uelis kichiuaskej komo amo senkis kiajsikamatij tein moijtoua itech nechikol? ¿Keyej tetatmej akin tapaleuiaj itech se nechikol kampa motajtoua okse tajtol moneki kiyekitaskej maj tamachtilis tein kitemaka Biblia ajsi itech ininyolo ininkoneuan? Maj tikitakan.

TEIN UELIS KIJTAKOS TOKUALI UIKALIS IUAN JIOVA

4. ¿Toni uelis kijtakos tokuali uikalis iuan Jiova? Xikonijto se neskayot.

⁴ Komo amo tikajsikamatij tein Biblia tamachtia itech okse tajtol, uelis kichiuas maj moijtako tokuali uikalis iuan Jiova. Kemej neskayot, keman Nehemías mokepak Jerusalén, kiitak ke seki konemej judíos amo ueliaj tajtouayaj hebreo (xikonixtajtolti Nehemías 13:23, 24). Yejua ika, amo ueliaj kiajsikamatiaj iTajtol Dios, uan nejon kijtakoj ininkuali uikalis iuan Jiova (Neh. 8:2, 8).

5, 6. ¿Toni kiitanij seki tetatmej akin tapaleuiaj itech se nechikol kampa motajtoua okse tajtol, uan keyej panoua nejon?

⁵ Seki tetatmej akin tapaleuiaj itech se nechikol kampa motajtoua okse tajtol kiitanij ke kuali uikalis tein ininkoneuan kipiaj iuan Jiova amo chikauakok. Kemej ininkoneuan amo kiyekajsikamatij tein moijtoua itech nechikolmej, tamachtilis amo ajsi itech ininyolo uan amo kinolinia maj kichiuakan. Maj tikitakan tein kijtoua Pedro,^[1] se tepopaj akin nemia Sudamérica iniuan ichankauan uan mokaltalitoj Australia: “Keman ika se tajtoua tein tamachtia iTajtol Dios moneki ajsis itech se iyolo uan teolinis maj se kichiua” (Luc. 24:32).

⁶ Okse ouijkayot yejua ke keman titaixtajtoltiaj itech okse tajtol, xa amo tikmachiliaj tein tikmachiliaj keman titaixtajtoltiaj itech totajtol. Uan no, ouij se monojnotsas itech okse tajtol. Nejin uelis techsioujtis uan kichiuas maj amo tikpiakanok chikaualis tein techpaleuis maj kuali tiktekitilikan Jiova. Yejua ika, amo sayoj moneki tiksentokaskej tiknekiskej titapaleuiskej itech se nechikol kampa motajtoua okse tajtol, ta no moneki tikyekpiaskej tokuali uikalis iuan Jiova (Mat. 4:4).

ITEKITIKAUAN DIOS AKIN KIYEKPIAKEJ ININKUALI UIKALIS IUAN

7. ¿Keniuj akin nemiaj Babilonia kitemojkej maj Daniel kichiuani tein yejuan kichiuayaj?

⁷ Keman Daniel uan itasojikniuan kinuikakej Babilonia, akin ompa nemiaj kitemojkej kichiuaskej maj neminij kemej ompa nemiaj uan maj kinueyichiuanij inintiotsitsin. ¿Keniuj kichiujkej? Kinmachtijkej inintajtol uan kintalilijkej tokaymej tein mokuiaj ompa (Dan. 1:3-7). Kemej tiotsin tein okachi kiueyichiuayaj ompa monotsaya Bel, babilonios kipatilijkej itokay Daniel uan kitalilijkej Beltsasar. Akin tekiuajtia Babilonia xa kinekia maj Daniel kineltokani ke itiotsin okachi kipiaya chikaualis ke Jiova, Dios akin Daniel kiueyichiuaya (Dan. 4:8).

8. ¿Toni kipaleuij Daniel maj kisentokani chikauak ikuali uikalis iuan Dios?

⁸ Ompa Babilonia, Daniel kinekiaj kimakaskej kuajkuali takual tein tekiuaj kikuaya. Sayoj ke yejua kiixtalijtoya kitakamatis iTajtol Dios (Dan. 1:8). Ikuali uikalis iuan Jiova kisentokak chikauak maski nemia itech okse altepet. ¿Toni kipaleuij? Momachtiaya iTajtol Dios, tein ijkuiliujtoya itech tajtol hebreo (Dan. 9:2). Kemej 70 xiujmej satepan ke ajsik Babilonia, kisentokayaj kiixmatiaj ika itokay hebreo, Daniel (Dan. 5:13).

9. ¿Keniuj kiitaya iTajtol Dios akin kijkuiloj Salmo 119?

⁹ No tikpiaj ineskayo akin kijkuiloj Salmo 119. Yejua monekik taxikos keman sekin akin nemiaj ichan tekiuaj amo kuali ika tajtouayaj. Sayoj ke yejua kitemoj nepaleuil itech iTajtol Dios, uan nejin kimakak chikaualis tein kipaleuij maj amo monejnemiltiani kemej oksekin (Sal. 119:23, 61). Kikauak maj tamachtilis tein kitemaka Dios ajsini itech iyolo (xikonixtajtolti Salmo 119:11, 46).

MAJ TIKYEKPIAKAN TOKUALI UIKALIS IUAN JIOVA

10, 11. 1) ¿Toni moneki tiktemoskej keman timomachtiaj iTajtol Dios? 2) ¿Keniuj uelis tikchiuaskej nejon? Xikonmelaua ika se neskayot.

¹⁰ Maski xa moneki tikchiuaskej miak taman itech nechikol uan kampa titekitij, tinochin moneki tikixtaliskej tonal keman timomachtiskej toselti uan keman titaueyichiuaskej iniuan tochankauan (Efes. 5:15, 16). Keman timomachtiskej, moneki amo sayoj tikixtajtoltiskej miak páginas itech Biblia uan itech toamaixuan, oso tikitaskej toni titanankiliskej itech nechikolmej, ta moneki tiktemoskej maj iTajtol Dios ajsi itech toyolo uan maj kichikaua totakuaujtamatilis.

¹¹ Yejua ika moneki tiknextiskej taixejekolis keman timomachtiskej uan tiknemiliskej keniuj uelis techpaleuis tejuan, uan amo sayoj keniuj kinpaleuis oksekin (Filip. 1:9, 10). ¿Keyej tikijtouaj nejin? Porin keman timomachtiaj tein tikijtoskej itech tanojnotsalis, tein titanankiliskej itech nechikolmej, keniuj tiktemakaskej se tanojnots oso se tamachtilis, amo nochipa tiknemiliaj keniuj uelis techpaleuis tein tikixtajtoltiaj. Kemej neskayot, maj ika titajtokan se takualchiujkej. Maski yejua moneki kiyekos takual tein kichijchiua achto ke kitemakas, amo ueli kuali motamaka sayoj ika tein kiyekoua. Komo kineki kuali yetos, moneki nochipa mochijchiuilis takual tein kipaleuis maj kipia chikaualis. No ijkon, komo tiknekij tikchikauaskej tokuali uikalis iuan Jiova, moneki nochipa timomachtiskej Biblia uan tiktemoskej maj techpaleui itech tein techpoloua.

12, 13. ¿Keyej miakej tokniuan kijtouaj ke semi kinpaleuia keman momachtiaj Biblia itech inintajtol?

¹² Miakej tokniuan akin tapaleuiaj itech se nechikol kampa motajtoua okse tajtol kiitanij ke semi kinpaleuia keman nochipa momachtiaj Biblia itech inintajtol (Hech. 2:8). Hasta misioneros kijtouaj ke komo kinekij taxikoskej kampa tapaleuijtokej, amo sayoj ueli mokauaj ika tein tepitsin kiajsikamatij itech nechikolmej.

¹³ Se tokniuj akin monotsa Alain, chikueyi xiujmejya momachtijtok tajtol persa. Yejua kijtoua: “Keman nimomachtia tein tikitaskej itech nechikol itech tajtol persa, okachi niktayekanaltia nejin tajtol. Kemej nejin sayoj ika nikmachtia notanemilil maj kielnamiki tajtolmej, amo nochipa ajsi itech noyolo tanemililmej tein nikixtajtoltia. Yejua ika, nochipa nimomachtia Biblia uan amaixmej itech notajtol”.

XIKONPALEUI MOKONEUAN MAJ TAMACHTILIS AJSI ITECH ININYOLO

14. ¿Toni moneki kiyekitaskej tetatmej, uan keyej?

¹⁴ Tetatmej moneki kiyekitaskej maj ininkoneuan kiajsikamatikan tamachtilis tein melauak uan maj nejon ajsi itech ininyolo. ¿Keyej? Maj tikitakan tein kipanok Serge uan inamik, Muriel. Yejuan kiuikayajya panoua eyi xiuit itech se nechikol kampa motajtoua okse tajtol. Sayoj ke kiitakej ke inintelpoch akin kipiaya 17 xiujmej amo kiuelitayaok tanojnotsas nion yas nechikolmej. Muriel kijtoua: “Amo kiuelitaya tanojnotsas itech okse tajtol, sayoj ke achto kiteluelitaya tanojnotsas itech tajtol francés, tajtol tein ika moskaltij”. Serge kijtoua ke yetoskej itech se nechikol kampa motajtoua okse tajtol amo kipaleuiaya itelpoch maj kichikaua ikuali uikalis iuan Jiova. Yejua ika kiixtalijkej mokepaskej itech nechikol kampa achto yetoyaj.

15. 1) ¿Toni moneki itech tanemiliskej tetatmej komo kinemilijtokej mokepaskej itech nechikol kampa achto yetoyaj? 2) ¿Toni kinyolmajxitia tetatmej tein kijtoua Deuteronomio 6:5-7?

¹⁵ Seki tetatmej xa kinemilijtokej mokepaskej itech se nechikol kampa motajtoua tajtol tein ininkoneuan kuali kiajsikamatij. ¿Toni moneki itech tanemiliskej keman kiixpejpenaskej nejin? Yekinika, moneki kiitaskej ox kipiaj tiempo uan chikaualis tein moneki uan ijkon kinmachtiskej ininkoneuan maj kitasojtakan Jiova uan no kinmachtiskej okse tajtol. Uan ojpatika, moneki kiitaskej ox ininkoneuan kinekij tanojnotsaskej, yaskej nechikolmej oso tapaleuiskej itech se nechikol kampa motajtoua okse tajtol. Satepan ke itech tanemiliskej nejin, seki tetatmej xa kiixtaliskej mokepaskej itech nechikol kampa motajtoua tajtol tein ininkoneuan kuali kiajsikamatij. Uan keman ininkoneuan kipiaskej se kuali uikalis iuan Jiova, tetatmej xa kiixtaliskej mokepaskej itech nechikol kampa motajtoua okse tajtol (xikonixtajtolti Deuteronomio 6:5-7).

16, 17. ¿Keniuj seki tetatmej kinmachtiaj ininkoneuan maj kiixmatikan Jiova?

¹⁶ Seki tetatmej kiajsinij keniuj kinmachtiskej ininkoneuan maj kiixmatikan Jiova itech inintajtol, maski yetoskej itech se nechikol oso se tein ayamo nechikol kampa motajtoua okse tajtol. Maj tikitakan ineskayo Charles. Yejua kipia eyi siuapipil akin kipiaj 9, 12, uan 13 xiujmej. Nochin kalyetouanij tapaleuijtokej itech se tein ayamo nechikol itech tajtol lingala. Charles kijtoua: “Tikixtalijkej ke timomachtiskiaj Biblia iniuan tosiuapipiluan uan titaueyichiuaskiaj kemej kalyetouanij itech totajtol”. No kijtoua ke momamachtiaj seki taman uan kichiuaj neauiltilis itech tajtol lingala uan ijkon ininsiuapipiluan kinyolpaktis momachtiskej nejon tajtol.

¹⁷ Axkan maj tikitakan ineskayo Kevin. Yejua kipia ome isiuapipiluan, akin kipiaj makuil uan chikueyi xiujmej. Kevin mochikaua kinmachtis tein yekmelauj tamachtia Biblia, porin yejuan ayamo kuali kiajsikamatij tajtol tein mokui itech nechikol kampa tapaleuijtokej. Yejua kijtoua: “Nonamik uan nejua timomachtiaj iniuan tosiuapipiluan itech tajtol francés, tajtol tein ika moskaltijkej. No tikixtalijkej tiyaskej se nechikol itech tajtol francés mejmetstika. Uan amo titekitij seki tonalmej uan tiyouij se ueyi nechikol tein uejkaua eyi tonal itech totajtol”.

18. 1) ¿Keniuj Romanos 15:1, 2 uelis kinpaleuis tetatmej maj kiixpejpenakan tein okachi kinpaleuis ininkoneuan? 2) ¿Toni tayolmajxitilis kitemakanij seki tetatmej? (Xikonita nota itamian tamachtilis.)

¹⁸ Tetatmej moneki kiixpejpenaskej tein okachi kinpaleuis ininkoneuan maj kuali mouikakan iuan Jiova^[2] (Gál. 6:5). Itech párrafo 14 ininka titajtojkej Muriel uan Serge. Muriel kijtoua ke yejua uan inamik kinekiaj kisentokaskej tapaleuijtoskej itech nechikol kampa motajtoua okse tajtol. Maski ijkon, kiixtalijkej yaskej okse nechikol uan ijkon kipaleuiskej inintelpoch maj okachi kitasojta Jiova (xikonixtajtolti Romanos 15:1, 2). Axkan, Serge kiita ke kiixpejpenkej tein okachi kuali. Kijtoua ke keman mokepkej itech se nechikol itech tajtol francés, inintelpoch kichikauak ikuali uikalis iuan Jiova uan moauij. Axkan inintelpoch tekiti kemej precursor regular uan hasta kinemilijtok oksepa tapaleuitiuj itech se tein ayamo nechikol kampa motajtoua okse tajtol.

MAJ TIKAUAKAN MAJ ITAJTOL DIOS AJSI ITECH TOYOLO

19, 20. ¿Keniuj tiknextiaj ke tiktasojtaj iTajtol Dios?

¹⁹ Jiova kintasojta nochin taltikpakneminij. Yejuatsin kichiuani maj iTajtol moajsi itech miak tataman tajtolmej uan ika kinpaleuia “nochi in taltikpakuani” maj kiixmatikan tamachtilis tein melauak (1 Tim. 2:4). Jiova kimati ke tokuali uikalis iuan mochikaua keman tikixtajtoltiaj Biblia itech tajtol tein kuali tikajsikamatij.

²⁰ Tinochin moneki timochikauaskej kuali timouikaskej iuan Jiova. Techpaleuis komo nochipa timomachtiaj Biblia itech tajtol tein kuali tikajsikamatij. Ijkon tikinpaleuiskej tochankauan maj kiyekpiakan ininkuali uikalis iuan Jiova uan tiknextiskej ke yekmelauj tiktasojtaj iTajtol Dios (Sal. 119:11).