Maj tikueyitalikan akin kinamiki
“Tejuatsin ten tiontokotsyetika tech ne tayekankatrono. Uan no [...] Tejuatsin ten tiontamati keme ichkatsin. Timitsonmouiskachiuaj uan timitsonueyimouistiliaj uan timitsonueyipanchiuaj uan timitsonaxkatiliaj nochi chikaualis sen nachipa.” (APOC. 5:13)
1. 1) ¿Keyej seki taltikpakneminij kinnamiki maj tikinpoujkaitakan? 2) ¿Toni tikitaskej itech nejin tamachtilis?
¿KENIUJ tiknextiliaj aksa ke tikpoujkaitaj? Keman tiktakachiuaj. Miakpa, tikinpoujkaitaj akin motanilianij ika tein kichiujkej oso porin kipiaj tanauatil. Itech nejin tamachtilis, tikitaskej akonimej moneki tikinpoujkaitaskej uan keyej.
2, 3. 1) ¿Keyej kinamiki Jiova maj tikueyitalikan? (Xikonita taixkopin ipeujyan tamachtilis.) 2) ¿Akoni Ichkatsin akin ika motajtoua itech Apocalipsis 5:13, uan keyej moneki tikueyitaliskej?
2 Apocalipsis 5:13 kijtoua ke akin ‘tokotsyetikaj itech ne tayekankatrono’ uan Ichkatsin kinnamiki maj se kinueyitali. Akin ‘tokotsyetikaj itech ne tayekankatrono’ yejua Jiova. Apocalipsis capítulo 4 ininka tajtoua seki ángeles akin kijtouaj se taman tein kinextia keyej kinamiki maj se kiueyitali Jiova, akin “yoltinemis sen nachipa uan sen nachipa”. Yejuan kijtouaj: “Totekotsin Dios, Tejuatsin mitsonnamiki xikselijto nochi ne mouistililis uan ne ueyipanchiualis uan ne chikaukakualtsiyo. Porin sayo Tejuatsin tikonchijchiuak nochi ten ongak. Uan Tejuatsin tikonmonekiltij ma taonka nochi ten tikitaj uan ma mochiua nochi ten motachijchiu ya” (Apoc. 4:9-11).
3 Ichkatsin yejua Jesucristo. ¿Keniuj tikmatij? Porin keman nemik nikan taltikpak, moijtoj ke Jesucristo katka “tagatsin ten Dios kualtitanik ten tamati keme ichkatsin. Uan ne ichkatsin yejua ya ne kinajchiuilis nintajtakoluan de nochi taltikpakuani” (Juan 1:29). Jesús sayoj yejua tekiuaj akin kitemakak inemilis uan ika kinmakixtij taltikpakneminij akin kinixyekana. Nejin yejua se taman tein kinextia keyej moneki tikueyitaliskej. No kinamiki maj tikueyitalikan porin “Yejuatsin in Tekotsin ten tayekantinemi ipan nochi okseki tekome. Uan Cristo Yejuatsin in ueyi Tayekanke inpan nochi oksekin tayekanani” (Apoc. 17:14). Xa timomachiliaj kemej ángeles akin mokuikatiaj uan kijtouaj: “Tejuatsin ten tiontamati keme ichkatsin, ten mitsonmiktijkaj ya, [...] mitsonnamiki ximoaxkatili nochi uelilisme uan ricojyot. Uan no mitsonnamiki ximoaxkatili nochi tamachilis uan kualtsiyo. Uan no xikonseli nochi ne mouistililis uan nochi ne ueyipanchiualis. Uan no xikonseli nochi ne mouiskachiualis” (Apoc. 5:12).
4. ¿Keyej motelneki maj tikinueyitalikan Jiova uan Cristo?
4 Juan 5:22, 23 kijtoua ke Jiova kiixtalij Cristo kemej inintamelaujkauj nochin taltikpakneminij. Nejin se taman tein motelneki tein kinextia ke moneki tikueyitaliskej Jesús. Keman tikueyitaliaj Jesús, no tikueyitaliaj Jiova. Komo tikinueyitaliaj Jesús uan iTajtsin, uelis tinemiskej nochipaya (xikonixtajtolti Salmo 2:11, 12).
5. ¿Keyej tinochin technamiki maj techpoujkaitakan?
5 Dios kinchijchiuak taltikpakneminij “kemej yejuatsin tamati” (Gén. 1:27). Nejin kijtosneki ke timiakej ueli tiknextiaj kualneskayomej tein Dios kinextia. Kemej neskayot, ueli tiknextiaj netasojtalis, kualtakayot uan teiknelilis. Uan no, Dios techchijchiuak maj tikpiakan totanemilil. Nejin se taman tein totech moajsi tein techmatiltia tein kuali uan tein amo kuali, tein melauak uan tein amo melauak (Rom. 2:14, 15). Timiakej tikuelitaj tein chipauak uan tein kualtsin, uan tiknekij tinemiskej ika yolseuilis. Nejin amo tikmoujkaitaj, porin Jiova kiuelita maj onka yolseuilis uan maj nochi kuali tayekyeto. Senkis moita ke tinochin techchijchiuak kemej uelis tikchiuaskej kemej yejuatsin itech miak taman. Yejua ika, tinochin technamiki maj techpoujkaitakan (Sal. 8:5).
MAJ TIKINPOUJKAITAKAN OKSEKIN
6, 7. ¿Toni tein kichiuaj miakej taltikpakneminij amo kichiuaj itaixpantijkauan Jiova?
6 Tikmatij ke moneki tikinpoujkaitaskej oksekin. Sayoj ke tel miakej moyekanaj ika tanemilil tein miakej kipiaj itech nejin taltikpak kampa taixyekantok Satanás. Kemej neskayot, miakej kinitaj seki takamej uan siuamej kemej inintiotsitsin. Amo kinpoujkaitaj kemej Jiova kijtoua, ta kintelueyitaliaj. Sekin motakentiaj uan monejnemiltiaj kemej akin kintelixmatij, kemej taixyekananij itech tekiuajyot oso itech taneltokalis, akin nesij itech televisión oso mauiltianij.
7 Akin yekmelauj tikchiuaj kemej Cristo tikmatij ke amo kuali yetok maj tikinueyitalikan okseki taltikpakneminij. Nikan taltikpak sayoj nemini se takat akin techkauilij se tel kuali neskayot: Cristo (1 Ped. 2:21). Maj tikelnamikikan ke “tinochin timotajtakolmakakke [...] uan uejka tinentinemiaj de ne chipaukanemilis ten Dios kimonekiltia” (Rom. 3:23). Yejua ika nion se taltikpaknenkej kinamiki maj kiueyichiuakan. Komo tiktelueyitaliaj aksa, tikyolxokoliskej Jiova.
8, 9. 1) ¿Keniuj tiitaixpantijkauan Jiova tikinitaj tekiuanij? 2) ¿Kemanian amo tikintakamatij?
8 Seki taltikpakneminij kinnamiki maj tikinpoujkaitakan ika tekit tein kichiuaj. Kemej neskayot, maj titanemilikan itech tekit tein kichiuaj taixyekananij akin tekiuanij kinixtaliaj. Yejuan kichiuaj tekit tein techpaleuia maj kuali tinemikan uan maj tikpiakan tein techpoloua. Tinochin techpaleuia tein kichiuaj. Tatitanil Pablo kijtoj ke akin tikchiuaj kemej Cristo moneki tikintakamatiskej “tekiuani ten kintalia in gobierno”. Yejua kijtoj: “Ximoxtauakan nochi namejuan ten nantauikatinemij ika yeski tauikalis. Uan no ximoxtautiyakan [...] nochi tataman impuestos [...]. Uan no xikmouiskaitakan nochi nekes ten kinnamiki ma se kinmouiskaita” (Rom. 13:1, 7).
9 Tiitaixpantijkauan Jiova timochikauaj tikinpoujkaitaskej tekiuanij. Melauak ke itech sejse ueyi altepet tataman tein momattokej kichiuaskej. Yejua ika uelis yeski ke tekiuanij itech se ueyi altepet tajtaniskej teisa tein itech okse ueyi altepet amo tajtanij. Maski kampa yeski tinemiskej, tiitekitikauan Dios tikintakamatij tekiuanij. Sayoj ke komo techiluiaj maj tikchiuakan teisa tein techuikas maj amo tiktakamatikan Dios, amo tikchiuaj. Ijkuak, tiktakamatij uan tikueyitaliaj Jiova uan amo tikintakamatij taltikpakneminij (xikonixtajtolti 1 Pedro 2:13-17).
10. ¿Toni kuali neskayot techkauilijkej seki itekitikauan Jiova akin nenkej ne uejkauj?
10 Itech Biblia tikajsij kuali neskayot tein kikaujkej seki itekitikauan Jiova akin kinpoujkaitakej uan kintakamatkej tekiuanij. Maj tikitakan tein kichiujkej José uan María. Keman tekiuanij ompa Roma kinekkej kimatiskej kanachimej nemiaj itech xolalmej kampa taixyekanayaj, José uan María moijkuilotoj hasta Belén maski María yoliskiaya ikonetsin (Luc. 2:1-5). Tatitanil Pablo no kinpoujkaitak tekiuanij. Keman kipantijkej ke kichiuak se taman tein amo kuali, motajtouij ika poujkaitalis iixpan tekiuaj Herodes Agripa uan iixpan Festo, akin taixyekanaya Judea (Hech. 25:1-12; 26:1-3).
11, 12. 1) ¿Keyej amo tikinteltakachiuaj taixyekananij itech taneltokalis? 2) ¿Keniuj tapaleuij keman se itaixpantijkauj Jiova kayot Austria kipoujkaitak se akin tekitia itech tekiuajyot?
11 Sayoj ke ¿moneki tikinteltakachiuaskej taixyekananij itech taneltokalis? Amo. Moneki tikinpoujkaitaskej ijkon kemej tikinpoujkaitaj okseki taltikpakneminij. Maski yejuan kichiaskej maj tikinteltakachiuakan, amo kuali yeskia maj tikchiuakan. ¿Keyej? Porin amo tamachtiaj tein melauak kemej tamati Dios uan tein tamachtia iTajtol, Biblia. Jesús amo kuali ininka tajtoj tamachtianij itech taneltokalis porin amo kuali kinixyekanayaj taltikpakneminij uan kiniluij ke katkaj ixkepmej (Mat. 23:23, 24). Sayoj ke nejin amo kijtosneki ke amo kuali yetok maj tikinpoujkaitakan uan maj tikintakachiuakan tekiuanij. Kemansa, yejuan techpaleuianij porin kiitaj ke tikinpoujkaitaj.
12 Se taixyekankej akin techpaleuij yejua Heinrich Gleissner, akin tekitia kemej abogado uan itech tekiuajyot itech ueyi altepet Austria. Itech Ojpatika Neteuilis tein Mochiuak itech Nochi Taltikpak, nazis kikitskijkej uan kititankej itech tren hasta kampa tetsakuayaj uan tetajyouiltiayaj. Itech tren kiixmatik Leopold Engleitner, se itaixpantijkauj Jiova kayot Austria. Tokniuj Engleitner ika poujkaitalis kimelauilij tein tikneltokaj, uan nejin takat kikakik ika nejmachkayot. Keman tamik neteuilis, Heinrich Gleissner, ika tanauatil tein kipiaya, miakpa kinpaleuij itaixpantijkauan Jiova ompa Austria. Xa tikelnamikij okseki neskayomej kampa poujkaitalis tein tikinnextilijkej tekiuanij kiualkuik tein kuali.
AKONIMEJ NO MONEKI TIKINPOUJKAITASKEJ
13. ¿Akonimej okachi moneki tikinpoujkaitaskej, uan keyej?
13 Nochin tokniuan kinnamiki maj tikinpoujkaitakan. Okachiok tokniuan akin taixyekanaj itech nechikolmej, kemej tayekananij, takalpanouanij, akin taixyekanaj itech sucursales uan tokniuan Oloch Taojtokaltianij (1 Tim. 5:17). Nochin nejin tokniuan kiyekpiaj ixolal Dios. Biblia kijtoua ke yejuan kemej yeskiaj se netetayokolil tein kiseliaj nechikolmej. Yejua ika taixejekol maj tikinpoujkaitakan maski okseko kayomej, tataman tamachtilis kipiaj, kipiaj uejueyi tekimej oso kipiaj tomin. Tokniuan akin nenkej itech yekinika siglo techkauilijkej se kuali neskayot. Yejuan kinpoujkaitakej tokniuan akin kinixyekanayaj, uan tejuan no ijkon tikchiuaj. Sayoj ke, keman tiyetokej iniuan nejin tokniuan, amo tikinitaj kemej yeskiaj ángeles, ta tikinpoujkaitaj porin tel tekitij uan yolyemankej (xikonixtajtolti 2 Corintios 1:24 uan Apocalipsis 19:10).
14, 15. ¿Keniuj tayekananij itech nechikolmej amo kichiuaj kemej miakej taixyekananij itech taneltokalismej?
14 Tayekananij itech nechikol kemej yeskiaj ichkatajpianij yolyemankej. Amo kinekij maj se kinita kemej taltikpakneminij akin kintelixmatij. Amo kichiuaj kemej miakej taixyekananij itech taneltokalismej axkan nion kemej taixyekananij itech taneltokalis akin nenkej itech itonaluan Jesús. Keman ininka tajtoj nejin taixyekananij, kijtoj: “Kinekij de ke ma yetokan kampa kachi kualtsin kuak tatakuatij. Uan no semi kinekij motaliske tech in tiopan de judíos kampa ne moseuiaj in ueyi chiuanime de ne taixpampa. Uan no semi kinekij ke in tagayot ma kinmouiskatajpalokan tech in ojme” (Mat. 23:6, 7).
Keman tayekananij kinextiaj yolyemanilis uan kichiuaj tein kijtoj Jesús, tokniuan kintasojtaj uan kinpoujkaitaj
15 Tayekananij kitakamatij nejin tein kijtoj Jesús: “Nion no ximotekauilikan de ke ma namechpouakan in tagayot keme tamachtiani. Porin namejuan nochi naniknime san, uan nankipiaj sayo se Namotamachtijkau [...]. Uan amo no xikpouakan nikan taltikpak nion aken keme se Namoueyitajtsin, porin namejuan nankipiaj ya ne se Namoueyitajtsin ne ten yetika nepa eluiyaktsinko. Uan amo no ximotekauilikan ma namechpouakan keme nantayekanani, porin sayo in Cristo Temakixtijke Yejuatsin in Namotayekankau. Uan naken kintekitilia oksekin tokniuan, yejua ne kachi ueyi chiuke namouan. Uan naken mouejueyichiuas, yejua ne Dios kitsikitsintiltis; uan naken motsikitsintiltis, yejua ne Dios kiueyichiuas” (Mat. 23:8-12). Keman tayekananij itech nochi taltikpak yolyemankej uan kichiuaj tein kijtoj Jesús, tokniuan kintasojtaj uan kinpoujkaitaj.
Keman tayekananij kinextiaj yolyemanilis, tokniuan kintasojtaj uan kinpoujkaitaj (xikonita párrafos 13 hasta 15)
16. ¿Keyej moneki tiksentokaskej timochikauaskej tikinpoujkaitaskej oksekin?
16 Xa amo niman tikmatiskej keniuj tikinpoujkaitaskej oksekin kemej moneki. Tokniuan itech yekinika siglo no amo niman kimatkej (Hech. 10:22-26; 3 Juan 9, 10). Sayoj ke amo nenkaj komo timochikauaj. Komo tikinpoujkaitaj oksekin kemej Jiova kineki, tikseliskej miak taman tein kuali.
KENIUJ TECHPALEUIA KEMAN TIKINPOUJKAITAJ OKSEKIN
17. ¿Keniuj tapaleuia keman tikinpoujkaitaj akin kipiaj tanauatil?
17 Keman tikinpoujkaitaj akin kipiaj tanauatil itech toxolal, xa okachi techpaleuiskej maj ueli titanojnotsakan. Xa hasta kiitaskej ke tikchiujtokej se kuali tekit. Yejua nejin panok miak xiujmej achto ompa Alemania. Keman isiuapil se tokniuj precursora akin monotsa Birgit kisak kaltamachtiloyan, tamachtianij kiluijkej Birgit ke semi kinyolpaktij kinmachtiskej itaixpantijkauan Jiova miak xiujmej. No kiluijkej ke nejon konemej tapaleuiayaj maj itech kaltamachtiloyan nochin kuali mouikanij. Birgit kiniluij ke tetatmej akin itaixpantijkauan Jiova kinmachtiaj ininkoneuan maj monejnemiltikan kemej Dios kineki, tein no kijtosneki maj kinpoujkaitakan tamachtianij. Se siuat tamachtijkej kijtoj ke komo nochin konemej yeskiaj kemej itaixpantijkauan Jiova, tel kualtsin yeskia se kinmachtis. Nejin tamachtianij tel kuali ininka tajtouayaj konemej akin itaixpantijkauan Jiova, uan hasta semej yajki se ueyi nechikol seki semana satepan.
18, 19. ¿Toni moneki tikelnamikiskej keman tikinpoujkaitaj tayekananij?
18 Tein iTajtol Dios tayolmajxitia uelis techpaleuis maj tikajsikamatikan keniuj moneki tikinpoujkaitaskej tayekananij itech nechikol (xikonixtajtolti Hebreos 13:7, 17; xikonita kampa kijtoua “Tein okachi momelaua”). Tejuan ueli uan moneki tikiniluiskej ke kuali tein kichiujtokej porin chikauak tekitij. No moneki tikinpaleuiskej keman timokauaskej maj techixyekanakan. Ijkon, yejuan tekitiskej ika yolpakilis. Uan no, Biblia kijtoua ke moneki titakuaujtamatiskej kemej yejuan. Sayoj ke nejin amo kijtosneki ke moneki timotakentiskej, titajtoskej uan titamachtiskej kemej se tayekankej akin motelixmati. Komo tikchiuaskiaj, ueliskia moitas ke tikintojtokaj takamej uan amo Cristo. Maj amo tikelkauakan ke tayekananij no tajtakolejkej kemej tejuan.
19 Komo tikinpoujkaitaj tayekananij uan amo tikinitaj kemej taltikpakneminij akin motelixmatij, tikinpaleuiskej maj kisentokakan yolyemankej. Ijkon amo kinemiliskej ke okachi ueyichiuanimej ke oksekin oso ke amo keman mopolouaj.
20. ¿Keniuj techpaleuia keman tikinpoujkaitaj oksekin?
20 Tikinpoujkaitaskej oksekin techpaleuia maj amo sayoj totech titanemilikan uan maj tiksentokakan tiknextikan yolyemanilis komo oksekin techteltakachiuaj. No techmatampauia, porin techpaleuia maj amo tikauakan Jiova komo aksa akin tikpoujkaitaj kichiua teisa tein amo tikchiayaj. No techpaleuia maj amo tixexeliujtokan itech inechikol Jiova. Itech nejin nechikol amo keman kiteltakachiuaj nion akin, yeski itaixpantijkauj Jiova oso amo.
21. ¿Katiyejua okachi ueyi nepaleuil tikpiaj keman tikinpoujkaitaj oksekin?
21 Okachi ueyi nepaleuil tein tikpiaj keman tikinpoujkaitaj oksekin yejua ke tikyolpaktiaj Dios. Uan no, ijkon tiknextiaj ke tiktakamatij yejuatsin uan ke amo tikauaj. Ijkon, Jiova uelis kinankilis Satanás, akin kijtoj ke nochin kikauaskiaj Dios (Prov. 27:11). Tel miakej amo kimatij keniuj kinpoujkaitaskej oksekin kemej moneki. Uelis tiktasojkamatiskej maj Jiova techmachtiani maj tikinpoujkaitakan oksekin kemej yejuatsin kineki.