“Xitaneltoka itech toTekotsin Jesús”. ¿Sayoj nejon moneki para timakisaskej?
Tein Biblia kijtoua
Akin kichiuaj kemej Cristo, kineltokaj ke Jesús momikilij para uelis techtapojpoluiliskej totajtakoluan (1 Pedro 3:18). Sayoj ke, para timakisaskej amo sayoj moneki maj tikneltokakan ke Jesús yejua toTemakixtijkauj porin hasta amokuali ejekamej kineltokaj ke Jesús yejua iKonetsin Dios, sayoj ke yejuan amo makisaskej ta kinixpoloskej (Lucas 4:41; Judas 6).
¿Toni moneki tikchiuaskej para timakisaskej?
Tikneltokaskej ke Jesús motemakak mikis para maj techtapojpoluilianij totajtakoluan (Hechos 16:30, 31; 1 Juan 2:2). Nejin kijtosneki ke moneki se kineltokas ke Jesús yekmelauj nemik uan ke nochi tein Biblia kijtoua melauak.
Timomachtiskej tein yekmelauj kijtoua Biblia (2 Timoteo 3:15). Biblia kijtoua ke tatitanil Pablo uan Silas kiluijkej se tajpixkej nejin: “Xitaneltoka itech toTekotsin Jesús, uan tejua uan akin nemij mochan, namakisaskej”. Uan satepan kimachtijkej “itajtol Jehová” (Hechos 16:31, 32).a Nejon kinextia ke achto ke nejon tajpixkej kineltokaskia Jesús, monekia kiixmatis seki taman tein Biblia tamachtia. Monekia maj kuali kiixmati tein melauak tein kijtoua itajtol Dios (1 Timoteo 2:3, 4).
Moneki timoyolpataskej (Hechos 3:19). No moneki maj timoyolpatakan uan maj techyolkoko nochi tein amo kuali tein achto tiknemilijkej uan tikchiujkej. Nochin moneki kiitaskej ke amo tikchiuajok tein Dios amo kiuelita, ta ke timochikauaj tikchiuaskej tein kuali tein kinextis ke timoyolpatakejya (Hechos 26:20).
Moneki timoauiskej (Mateo 28:19). Jesús kijtoj ke moneki se moauis para uelis se mochiuas imomachtijkauj. Tajpixkej akin achto ika titajtojkej moauij (Hechos 16:33). Uan keman Pedro kinnojnotsak sekin ika tein Jesús tamachtij, no ijkon panok. Biblia kijtoua ke “akin kiuelkakkej tein Pedro kijtojka, moauijkej” (Hechos 2:40, 41).
Moneki tiktakamatiskej Jesús (Hebreos 5:9). Nochin akin kitojtokaj Jesús, ika tein kichiuaj kinextiaj ke kitakamatij tein tanauatij (Mateo 28:20). Amo sayoj kikakij tein momachtiaj ta yekmelauj mochikauaj kichiuaskej (Santiago 1:22).
Maj titaxikokan hasta keman tatamis (Marcos 13:13). Akin kitojtokaj Jesús ‘moneki taxikoskej’ para momakixtiskej (Hebreos 10:36). Tatitanil Pablo nochipa kitakamatik tein Jesús tamachtij uan amo keman kikauak Dios, uan kisentokak ijkon kichiuak hasta ke momikilij (1 Corintios 9:27).
¿Uelis timakisaskej komo tikchiuaj netataujtil tein moixmati kemej oración del pecador?
Itech seki taneltokalismej akin ompa pouij kichiuaj netataujtilmej tein moixmatij kemej: oración del pecador uan oración de salvación. Keman kichiuaj nejon netataujtil ika kinextiaj ke kimatij ke tajtakolchiuaj uan ke kineltokaj ke Jesús momikilij para uelis kintapojpoluiliskej inintajtakoluan. Uan ika nejin kinemiliaj ke Jesús uelis kipatas ininyolo uan kemej nemij. Sayoj ke Biblia amo ika tajtoua nejin netataujtilmej nion ke yejuasan moneki tikijtojtoskej.
Sekin kinemiliaj ke komo aksa kichiua oración del pecador kijtosneki ke momakixtis. Sayoj ke nion se netataujtil uelis kichiuas maj timakisakan, porin titajtakolejkej uan timopolouaj (1 Juan 1:8). Yejua ika Jesús kinmachtij imomachtijkauan maj nochipa kitajtanianij Jehová maj kintapojpoluiliani inintajtakoluan (Lucas 11:2, 4). Sekin akin kitojtokayaj Jesús amo uelisok kichiaskej nemiskej nochipaya porin kikaujkej Jehová (Hebreos 6:4-6; 2 Pedro 2:20, 21).
¿Kani ualeuak oración del pecador?
Motelmachtianij amo kiyekmatij kani ualeuak nejon netataujtil. Sekin kijtouaj ke nejin netataujtil peuak kichiuaj keman mochiujtoya Reforma protestante. Oksekin kinemiliaj ke oración del pecador peuak kikuij itech xiuit mil setecientos uan mil ochocientos. Yejua ika amo moajsi itech Biblia porin amo mouika ika tein tamachtia.
a Biblia tamachtia ke Dios monotsa Jehová.