¿Keniuj techmakixtia Jesús?
Tein Biblia kijtoua
Keman Jesús kitemakak inemilis, kinmakixtij akin nemij nikan taltikpak (Mateo 20:28). Yejua ika Biblia kijtoua ke Jesús ‘kinmakixtiko akin nemij nikan taltikpak’ (1 Juan 4:14). Uan no kijtoua: “Amo onkak okse temakixtijkej, ta sayoj yejua, porin amo onkak okse tokayit nikan taltikpak tein ika uelis timakisaskej” (Hechos 4:12).
Jesús “momikilij para kinpaleuis” nochin akin iuan takuaujtamatij (Hebreos 2:9; Juan 3:16). Sayoj ke “Dios kichiuak maj oksepa nemi” uan ijkon oksepa peuak nemi Jesús kemej se akin nemij ne iluikak (Hechos 3:15). Ompa iluikak, Jesús ueli “senkis kinmakixtis akin itechkopa motokiaj iuan Dios, porin nochipa yoltok uan kintajtouia” (Hebreos 7:25).
¿Keyej moneki maj Jesús techtajtoui?
Tinochin titajtakouanij (Romanos 3:23). Tajtakol kichiua maj amo ueli timotokikan iuan Dios uan no kichiua maj timomikilikan (Romanos 6:23). Sayoj ke Jesús ‘se akin kinpaleuia’ oso kintajtouia akin takuaujtamatij ke ”inemilis Jesús temakixtia (1 Juan 2:1). Kemej Jesús kitemakak inemilis por tejuan, ueli techtajtouia iixpan Dios para maj techkaki keman tiktataujtiaj uan maj techtapojpolui totajtakoluan (Mateo 1:21; Romanos 8:34). Dios kikaki tein Jesús tajtani porin tajtani tein Dios kineki. ToDios kiualtitanik Jesús nikan taltikpak para maj “momakixtikan itechkopa” (Juan 3:17).
¿Sayoj moneki se kineltokas Jesús para se momakixtis?
Amo. Maski kemaj moneki se kineltokas Jesús, amo sayoj nejon moneki (Hechos 16:30, 31). Biblia kijtoua: “Komo amo timijyotiaj, amo tiyoltokej, no ijkon komo tikijtouaj ke titakuaujtamatij uan amo tikchiuaj tein kuali, nenkaj titakuaujtamatij” (Santiago 2:26). Para timomakixtiskej moneki:
Moneki timomachtiskej akoni Jesús uan iTajtsin, Jehová (Juan 17:3).
Moneki iuan titakuaujtamatiskej Jehová uan Jesús (Juan 12:44; 14:1).
Tiknextiaj ke titakuaujtamatij komo tiktakamatij tein technauatiaj Jehová uan Jesús (Lucas 6:46; 1 Juan 2:17). Jesús tamachtij ke amo nochin akin kiluiaj “noTekotsin” makisas, ta sayoj akin ‘kichiuaj tein kineki iTajtsin akin yetok ne iluikak’ (Mateo 7:21).
Maj tiksentokakan titakuaujtamatikan maski tikpiaskej kuejmolmej. Jesús kijtoj: “Akin taxikos hasta keman tatamis, makisas” (Mateo 24:13).